ANG Azerbaijan mao ang kinadak-an sa tulo ka nasod sa Southern Caucasus. Mga usa ka libo ka tuig kanhi, ang mga tribong Turkic nagsugod sa pagpanghugop ug puyo niining lugara. Ilang nasagop ang batasan sa mga lumad, ug nasagop usab sa mga lumad ang kultura sa mga bag-ong abot. Tungod niini ang pinulongang Azerbaijani halos parehas sa pinulongang Turkish ug Turkmen.

Ang mga Azeri ilado nga malipayon ug maabiabihon. Ang mga membro sa pamilya suod ug ang mga paryente magtinabangay panahon sa kalisod.

Ang mga Azeri gustog musika ug balak. Ang usa ka matang sa ilang musika gitawag ug mugam, diin awiton sa mag-aawit ang balak nga duyogan ug lumad nga mga instrumento sa musika. Ang mag-aawit sa mugam kinahanglang daghag nahibaloang tradisyonal nga mugam ug maayong mopaayom-ayom ug awit.

 Dili mabuhi ang mga Azeri kon walay tsa. Ila kining idalit diha sa baso nga may sugar cube, nga parisan usahay ug mga pistachio, almond, ug pasas. Bisan ang gagmayng mga lungsod dunay mga tea house.

Sa Caspian Sea, sa sidlakan sa nasod, daghag beluga sturgeon. Kini nga isda mabuhi ug kapin sa 100 ka tuig. Ang usa sa kinadak-ang nadakpan maoy 8.5 metros ang gitas-on ug mitimbang ug 1,297 kilos! Ang bihod niining isdaa mahal kaayo kay ginahimo kining caviar.

Ang mga Azeri relihiyoso, nga gustong makig-estorya bahin sa Diyos. Ang kadaghanan sa molupyo mga Muslim. Dunay ubang relihiyon usab didto, nga naglakip sa mga Saksi ni Jehova nga dunay kapin sa usa ka libong membro—kadaghanan lumad nga mga Azeri.