ANG HUNAHUNA SA BIBLIYA
Kaminyoon
Ang kaminyoon ba maoy ordinaryong kasabotan tali sa duha ka tawo?
“Kon unsay gihiusa pagyugo sa Diyos ayaw ipabulag ni bisan kinsang tawo.”—Mateo 19:6.
ANG GIINGON SA BIBLIYA
Sa mata sa Diyos, ang kaminyoon dili usa ka ordinaryong kahikayan. Kini maoy kahikayan nga gimugna sa Diyos tali sa lalaki ug babaye. Ang Bibliya nag-ingon: “Sukad sa sinugdan sa paglalang ‘[ang Diyos] nagbuhat kanila nga lalaki ug babaye. Tungod niini ang usa ka lalaki mobiya sa iyang amahan ug inahan, ug ang duha mahimong usa ka unod’ . . . Busa kon unsay gihiusa pagyugo sa Diyos ayaw ipabulag ni bisan kinsang tawo.” *—Marcos 10:6-9; Genesis 2:24.
Ang mga pulong, “kon unsay gihiusa pagyugo sa Diyos,” wala magpasabot nga siyay magbuot kon kinsay minyoan sa usa ka tawo. Hinunoa, sa paghisgot nga ang Diyos mao ang Tagmugna sa kahikayan sa kaminyoon, ang Bibliya nagpasiugda nga usa ka seryosong butang ang kaminyoon. Kon ingon nianag panglantaw ang magtiayon, isipon nila ang ilang kaminyoon ingong sagrado ug permanente, busa mahimo silang mas determinado sa pagpalampos niini. Mas mapadako pa nila ang posibilidad nga sila molampos kon sila magpagiya sa Bibliya sa pagtuman sa ilang papel ingong bana ug asawa.
Unsay papel sa bana?
“Ang bana maoy ulo sa iyang asawa.”—Efeso 5:23.
ANG GIINGON SA BIBLIYA
Aron maayog dagan ang pamilya, kinahanglang dunay mohimog desisyon. Ang Bibliya naghatag niana nga responsibilidad ngadto sa bana. Pero wala kana magpasabot nga siya maghari-hari o mahimong daogdaogan. Ang Bibliya wala usab magtugot kaniya sa paglikay sa iyang responsibilidad, nga tungod niana ang iyang asawa mabug-atan ug mawad-ag pagtahod kaniya. Hinunoa, buot sa Diyos nga magkugi siya sa pagtagana sa panginahanglan sa iyang asawa ug sa pagpasidungog kaniya ingong iyang kinasuoran ug labing kasaligang kauban. (1 Timoteo 5:8; 1 Pedro 3:7) Ang Efeso 5:28 nag-ingon: “Ang mga bana angay nga maghigugma sa ilang mga asawa sama sa ilang kaugalingong mga lawas.”
Kon ang bana nahigugma gayod sa iyang asawa, iyang pabilhan ang mga katakos sa iyang asawa, ingon man ang iyang mga panglantaw ilabina sa mga butang maylabot sa pamilya. Bisag siya ang padre de pamilya, dili niya ipamugos ang iyang pamaagi. Sa dihang wala pamatii sa diyosnong tawo nga si Abraham ang maayong sugyot sa iyang asawa maylabot sa pamilya, si Jehova nga Diyos miingon kaniya: “Pamati sa iyang tingog.” (Genesis 21:9-12) Si Abraham mapainubsanong misunod, busa ang iyang pamilya nagmalinawon, nagkahiusa, ug gipanalanginan sa Diyos.
Unsay papel sa asawa?
“Kamong mga asawa, magpasakop kamo sa inyong mga bana.”—1 Pedro 3:1.
ANG GIINGON SA BIBLIYA
Una pa lalanga sa Diyos ang asawa sa unang tawo, ang Diyos miingon: “Dili maayo alang sa tawo nga magpadayon nga mag-inusara. Buhatan ko siyag katabang, ingon nga iyang katimbang.” (Genesis 2:18) Ang katimbang maoy mopuno o mokompleto sa kon unsay nakulang. Busa gilalang sa Diyos ang babaye, dili aron mahimong sama sa lalaki o makigkompetensiya kaniya, kondili aron mahimong iyang katimbang. Ingong magtiayon, mahimo nilang matuman ang sugo sa Diyos sa pagpatunghag mga anak ug sa pagpuno sa yuta ug mga tawo.—Genesis 1:28.
Aron matuman sa asawa ang iyang papel, gihatagan siya sa Diyos ug nahiangayng pisikal, mental, ug emosyonal nga kinaiyahan. Kon kini iyang gamiton sa maalamon ug mahigugmaong paagi, dako siyag ikatabang sa pagpalampos sa iyang kaminyoon ug sa pagtabang sa iyang bana sa pagbati nga kontento ug masaligon. Sa mata sa Diyos, kining matanga sa asawa takos gayong dayegon. *—Proverbio 31:28, 31.
^ par. 5 Gitugotan sa Bibliya ang diborsiyo kon ang hinungdan maoy pagpanapaw.—Mateo 19:9.
^ par. 14 Dunay daghang sugyot bahin sa kaminyoon ug pamilyahanong kinabuhi diha sa seksiyon nga “Tabang Alang sa Pamilya,” nga regular nga mogula diha sa Pagmata!
Basin Ganahan Pod Ka
MAHIMONG MAGMALIPAYON ANG IMONG PAMILYA
Magpagiya sa Diyos Aron Magmalipayon ang Kaminyoon
Dunay duha ka simpleng pangutana nga makatabang nga magmalipayon ang inyong kaminyoon.
TUBAG SA MGA PANGUTANA BAHIN SA BIBLIYA
Unsay Giingon sa Bibliya Bahin sa Pag-ipon nga Walay Kasal?
Ang mga instruksiyon sa Diyos magpakita kon sa unsang paagi mapalampos nato ang kaminyoon, ug ang iyang mga sukdanan kanunayng makahatag ug kaayohan niadtong mosunod niana.
TUBAG SA MGA PANGUTANA BAHIN SA BIBLIYA
Unsay Giingon sa Bibliya Bahin sa Pagminyog Laing Rasa?
Tagda ang pipila ka prinsipyo sa Bibliya bahin sa pagkamanagsama sa lainlaing rasa ug kaminyoon.
TUBAG SA MGA PANGUTANA BAHIN SA BIBLIYA
Duna bay Giingon ang Bibliya Bahin sa Pagpakasal sa Parehong Lalaki o Babaye?
Ang tagmugna sa kaminyoon nahibalo gayod kon sa unsang paagi molungtad ug magmalipayon ang kaminyoon.
TUBAG SA MGA PANGUTANA BAHIN SA BIBLIYA
Puwede Bang Mangasawag Daghan?
Ang Diyos bay nagsugod sa poligamiya? Tagda kon unsay giingon sa Bibliya bahin sa poligamiya.
