KAYUTAAN UG KATAWHAN
Pagbisita Ngadto sa Italy
SA Italy, ang kabaybayonan nanganawkanaw ug ang kabukiran tuktok kaayo; sa habagatan puwerteng inita, pero sa amihanan puwerteng tugnawa. Daghan usab kinig bolkan, apan pipila lang ang aktibo—sama sa Stromboli ug Mount Etna.
Ang Italy maoy usa sa mga nasod sa Europe nga kinadaghanag populasyon. Daghang tawo ang nakatadlas niini, sama sa mga Arabo, taga-Byzantine, Grego, taga-Normandy, ug taga-Phoenicia.
Ang mga turista manakay ug gondola sa mga kanal sa Venice
Daghag karaan ug nindot nga mga obra maestra kining dapita. Ang kagun-oban sa karaang mga bilding sa Grego ug Romano o Baroque ug Renaissance nga arkitektura makita gihapon diha sa daghang lungsod ug siyudad sa Italy. Dunay mga dibuho, marmol nga mga estatuwa, ug mga fountain nga obra maestra sa mga pintor ug eskultor sama nila ni Bernini, Michelangelo, ug Raphael.
Ang pagkaon dako kaayog bahin sa adlaw-adlaw nilang kinabuhi, ug daghan silag kostumbre kon bahin sa lokal nga mga pagkaon. Sagad unang idalit ang pasta dayon karne o isda ug utanon. Halos tanang pagkaon gamitag olive oil kay abunda man kini. Ang
pizza ug risotto maoy inilang mga potahe sa mga Italyano.Pasta ang pangunang pagkaon sa mga Italyano
Ang mga Italyano mahigalaon, maabiabihon, ug hingestorya. Sagad kang makakitag mga tawo nga mag-estoryahanay diha sa plasa o bibo nga mag-estoryahanay samtang maglakaw sa dalan.
Kadaghanan sa mga Italyano mga Romano Katoliko, apan diyutay na lang ang manimba. Sa dili pa dugayng katuigan, ang impluwensiya sa simbahan ginaingon nga nagkawala na kay ang mga tawo dili na magbale-bale sa mga balaod bahin sa aborsiyon ug diborsiyo.
Ang mga Saksi ni Jehova sa Italy nagkadaghan. Sila ilado sa ilang pagpanudlo sa Bibliya ingong bahin sa ilang pag-alagad maingon man sa ilang pagkinabuhi sumala sa mga prinsipyo niini. Adunay kapin sa 3,000 ka kongregasyon sa mga Saksi ni Jehova sa tibuok nasod, ug daghan niining mga kongregasyona nagsangyaw ngadto sa mga tawo nga nagsultig ubang pinulongan. Dako gayod ang panginahanglan sa pagtudlog Bibliya sa langyaw nga pinulongan tungod kay sa dili pa dugayng 10 ka tuig nga yugto, ang mga langyaw sa Italy midaghan ug tulo ka pilo.
NAHIBALO KA BA?
Ang Vatican City nahimutang sa Rome, apan nahimo kining independenteng nasod niadtong 1929, busa giisip kini sa mga Italyano ingong langyawng nasod.
Ang kabukirang Dolomites nahimutang sa amihanan-sidlakang Italy