ANG kaka (Parasteatoda tepidariorum) mohimog balay nga ang mga angkla-angkla niini may igong kalig-on sa pagpilit sa bungbong o may igong kahuyang nga maukang gikan sa yuta ug nagsilbing lit-ag nga molabtik dihang makabitik ug nagkamang nga insekto. Giunsa sa kaka paghimog lig-on ug huyang nga angkla-angkla sa iyang balay pinaagig usa lang ka papilit?

Hunahunaa: Ipatapot sa kaka ang iyang balay diha sa bungbong, kisame, o sa ubang luna pinaagi sa paghabol ug pilit kaayong mga hilo sa paghimog scaffolding disc, nga may igong kalig-on nga dili maputol kon mabanggaan sa naglupad nga insekto. Sa laing bahin, nadiskobrehan sa mga siyentista sa University of Akron sa Ohio, U.S.A., nga ang mga hilo nga ipatapot sa kaka diha sa yuta nga gitawag ug gumfoot disc lahig disenyo o pagkagama. Sanglit dili kaayo daghan ang hilo sa gumfoot disc nga nag-angkla diha sa yuta kon itandi sa scaffolding disc, kini daling maukang kon matamakan sa insekto.

Sumala sa report sa University of Akron, ang mga siyentista nga nakadiskobre niining katingalahang obra sa kinaiyahan “nagkamulo na sa pag-imbentog artipisyal nga papilit nga sinundog sa maalamong disenyo nga gigamit sa kaka.” Ang mga siyentista naningkamot sa pag-imbentog papilit nga magamit para sa bendahe ug sa nalisa nga mga bukog.

Unsay imong hunahuna? Ang abilidad ba sa kaka sa paggamag huyang ug lig-on nga mga angkla-angkla gamit ang usa lang ka papilit mitungha pinaagig ebolusyon? O kini ba gidisenyo?