ANG GIINGON SA MGA TAWO

Nagtuo ang uban nga ang mananap mahimong gamiton sumala sa gusto sa tawo. Ang uban pod nagtuo nga ang mananap trataron sama sa paagi sa pagtratar ug tawo.

• Usa ka iladong aktibista nga naglaban sa katungod sa mananap nangatarongan nga ang mananap may “katungod nga dili isipon nga para lang sa panginabuhi o mga gamit sa paghimog produkto.” Siya midugang: “Hunongon na nato ang pagtratar sa mga mananap ingong atong kabtangan.”

• Para sa uban, sobra ra pod ang gihimo sa bilyonaryang si Leona Helmsley dihang nagbilin siyag $12,000,000 para sa iyang iro ug nagtugon diha sa iyang testamento nga kon kini mamatay, ilubong kini tapad kaniya.

Angayng palandongon: Para nimo, unsa ang hustong pagtratar ug mga mananap?

ANG GIINGON SA BIBLIYA

Ang Maglalalang sa kinabuhi, si Jehova nga Diyos, nagsugo sa mga tawo nga ilang ‘pagabut-an ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.’ (Genesis 1:28) Busa ikaingon nga para sa Diyos, ang tawo labaw kay sa mananap.

Kini nga mga pulong gisuportahan sa teksto nga nag-una niini. Ang Bibliya nag-ingon nga “gilalang sa Diyos ang tawo sumala sa iyang larawan, sa larawan sa Diyos iyang gilalang siya; lalaki ug babaye iyang gilalang sila.”—Genesis 1:27.

Kay gilalang ang tawo ‘sumala sa larawan sa Diyos,’ kita lang ang makapakita sa mga hiyas sa Diyos, sama sa kaalam, hustisya, ug gugma. Ang tawo usab dunay kinaiyanhong katakos sa pagpakitag maayong pamatasan ug sa pagtagbaw sa ilang espirituwalidad. Wala niana nga katakos ang mananap kay sila wala lalanga ‘sumala sa larawan sa Diyos.’ Sila ubos ug dili angayng trataron nga sama ug tawo.

Sa ato pa, puwede rang maltratohon sa tawo ang mananap? Dili.

• Diha sa iyang Balaod sa mga Israelitas, ang Diyos nagsugo nga ang mga mananap kinahanglang papahulayon, pakan-on, dili pabug-atan, ug ipalayo sa kadaot.—Exodo 23:4, 5; Deuteronomio 22:10; 25:4.

“Unom ka adlaw imong buhaton ang imong buluhaton; apan sa ikapitong adlaw ikaw mohunong, aron nga ang imong torong baka ug ang imong asno makapahulay.”—Exodo 23:12.

ANG GIINGON SA MGA TAWO

Ang uban mangayam ug mangisda agig lingawlingaw lang, ug sila malipay nga makagukod ug makadakop ug mananap. Uyon usab ang uban sa Ruso nga nobelistang si Leo Tolstoy, kinsa misulat nga ang pagpatay ug pagkaog mananap “daotan gayod.”

ANG GIINGON SA BIBLIYA

Gitugot sa Diyos ang pagpatayg mananap sa pagpanalipod sa kinabuhi sa tawo o para himoong sapot. (Exodo 21:28; Marcos 1:6) Ang Bibliya nag-ingon usab nga ang tawo puwedeng mopatay ug mananap para sa pagkaon. Ang Genesis 9:3 nag-ingon: “Ang matag nagalihok nga mananap nga buhi mahimong kalan-on alang kaninyo.” Si Jesus mitabang gani sa iyang mga tinun-an aron makakuhag mga isda nga ilang gikaon sa ulahi.—Juan 21:4-13.

Pero, ang Bibliya nag-ingon nga ang Diyos ‘nagdumot gayod sa kapintasan.’ (Salmo 11:5) Busa tin-aw nga dili gusto sa Diyos nga atong sakiton o patyon ang mananap ingong lingawlingaw lang.

Ang Bibliya nag-ingon nga bililhon sa Diyos ang kinabuhi sa mananap.

• Matod pa sa Bibliya nga sa panahon sa paglalang, “gibuhat sa Diyos ang ihalas nga mananap sa yuta sumala sa iyang matang ug ang anad nga hayop sumala sa iyang matang ug ang tanang nagalihok nga mananap sa yuta sumala sa iyang matang. Ug nakita sa Diyos nga kadto maayo.”—Genesis 1:25.

• Ang Bibliya nag-ingon bahin kang Jehova: “Sa mga mananap siya nagahatag sa ilang pagkaon.” (Salmo 147:9) Ang Diyos naglalang ug usa ka palibot nga makatagana ug sobra pa sa gikinahanglang pagkaon ug puy-anan para sa mga mananap.

• Si Haring David sa Israel kaniadto miampo: “Ginaluwas mo ang tawo ug ang mananap.” (Salmo 36:6) Pananglitan, sa panahon sa Lunop, giluwas ni Jehova ang walo ka tawo ug ang tanang matang sa mananap sa wala pa laglaga ang mga daotan.—Genesis 6:19.

Klaro nga gipabilhan ni Jehova ang iyang gilalang nga mga mananap, ug siya nagdahom nga trataron usab sa tawo ang mananap sa samang paagi.

“Ang matarong nagaatiman sa . . . iyang binuhing hayop.”—Proverbio 12:10.