ANG thorny devil lizard sa Australia mosuhop ug yamog, umog, ug tubig sa basa nga balas. Unya iyang ipadaligdig kini paingon sa baba dihang moinom. Sa unsang paagi? Ang sekreto posibleng anaa sa panit niini.

Hunahunaa: Ang panit sa thorny devil nalukop sa himbis. Ang ubang siyentista nagtuo nga ang umog o yamog nga napondo diha sa mga himbis modaligdig sa gansangon nga panit niini paingon sa nagkang-a nga mga kanalkanal taliwala sa mga himbis. Kini nga mga kanalkanal nagsangasanga paingon sa ngilit sa baba sa thorny devil.

Giunsa pagsuhop niini nga tuko ang tubig—gikan sa iyang tiil, pasaka sa lawas, ug dayon sa baba—nga kontra sa balaod sa grabidad? Ug unsang kalakiha nga makasuhop man ug tubig ang tuko pinaagi lang sa pagbag-id-bag-id sa iyang tiyan sa basa nga yuta?

Nadiskobrehan sa mga siyentista ang sekreto sa tuko. Ang mga gulot-gulot sa panit sa tuko konektado sa nagsangasangang kanalkanal ilalom sa panit niini. Ang pagkaporma niini nga kanalkanal talagsaon kay kontrahon niini ang puwersa sa grabidad pinaagi sa pagsuyop sa tubig paingon niining gigming nga mga agosanan. Busa ang panit sa tuko morag espongha.

Si Janine Benyus, presidente sa Biomimicry Institute, nag-ingon nga ang mga teknolohiya nga nagsundog sa paagi sa pagsuhop ug yamog basig makatabang sa mga inhenyero sa pagdisenyo ug makina nga mosuhop ug yamog sa hangin sa pagpabugnaw sa mga bilding ug mokuha usab ug mainom nga tubig.

Unsay imong hunahuna? Ang mosuhop ba ug tubig nga panit sa thorny devil mitungha pinaagig ebolusyon? O kini ba gidisenyo?