KON dunay mopahiyom nimo, unsay imong reaksiyon? Tingali mopahiyom pod ka, ug malipay pa. Ang tinuod, ang sinserong pahiyom—sa mga higala o dili kaila—makatakod, ug makapagaan sa pagbati. Usa ka babaye nga ginganlag Magdalena miingon: “Ang namatay na nakong bana nga si Georg, mapahiyomon. Kon mag-abot ang among panan-aw, marelaks ko.”

Ang sinserong pahiyom maoy timaan sa maayong mga pagbati, sama sa kahimuot, kalipay, ug katagbawan. Usa ka artikulo sa Observer, nga online nga basahon sa Association for Psychological Science miingon nga “kinaiyahan na nato ang . . . pagpahiyom.” Ang artikulo miingon nga bisan ang masuso “makasabot sa ekspresyon sa nawong.” Ang artikulo usab miingon: “Ang mga tawo dili lang makakuhag mapuslanong impormasyon gikan sa pahiyom, kondili ila usab gamiton kining impormasyona sa pagdesisyon kon unsay ilang himoon.”

Gisusi sa mga tigpanukiduki sa Harvard University sa United States ang usa ka grupo sa tigulang nga mga pasyente ug ang ilang reaksiyon sa ekspresyon sa nawong sa mga tig-atiman kanila. Ang mga tigpanukiduki miingon nga kon ang ekspresyon sa nawong sa tig-atiman kanila “mabination, mapinanggaon, mahunahunaon, ug maluluy-on,” ang mga pasyente malipayon ug ang ilang pisikal ug mental nga kahimsog miarang-arang. Pero sukwahi niana ang epekto dihang ang tig-atiman sa pasyente magmug-ot lang.

 Dihang mopahiyom ka, ikaw naghatag usab sa imong kaugalingon ug kaayohan. Sumala sa mga pagtuon, ang mga kaayohang makuha mao ang pagkamasaligon, pagkamalipayon, ug menos nga tensiyon. Ang pagmug-ot, kon itandi, sukwahi ug epekto.

Si Magdalena, nga gihisgotan sa sinugdan, Saksi ni Jehova panahon sa Gubat sa Kalibotan II. Siya ug ang ubang membro sa iyang pamilya gipadala ngadto sa kampo konsentrasyon sa Ravensbrück sa Germany tungod sa pagdumili sa ideolohiya sa Nazi. “Usahay pahunongon mi sa mga guwardiya sa among pagpakig-estorya sa ubang piniriso,” siya miingon. “Pero dili nila mapugngan ang among ekspresyon sa nawong. Ang pagtan-aw lang sa pahiyom sa akong inahan ug igsoong babaye nakapadasig nako ug nakapalig-on sa akong determinasyon sa paglahutay.”

Tingali dili ka ganahang mopahiyom tungod sa mga problema sa kinabuhi. Apan hinumdomi, ang imong pagbati maoy epekto sa imong ginapamalandong. (Proverbio 15:15; Filipos 4:8, 9) Busa bisag dili ka ganahang mopahiyom, hunahunaa ang positibo ug maayong mga butang kon mahimo. * Ang pagbasag Bibliya ug pag-ampo nakatabang sa daghang tawo sa pagkahimong positibo. (Mateo 5:3; Filipos 4:6, 7) Gani, ang pulong “kalipay” ug “kangaya” ug ang mga pulong nga susama niana gatosan ka beses nga makita sa Bibliya! Sulay pagbasag usa o duha ka panid niana adlaw-adlaw. Basin sa sunod mapahiyomon ka na.

Dugang pa, ayaw paghulat nga mauna ang uban sa pagpahiyom. Ikay una; lipaya ang adlaw sa uban. Sa pagkatinuod ang pahiyom maoy usa ka gasa nga gikan sa Diyos nga makahatag ug kaayohan kanimo ug sa mga tawo nga makakita niini.