KITANG TANAN NAGKINAHANGLAG GUGMA. Ang kaminyoon, pamilya, o panaghigalaay dili molampos kon walay gugma. Busa, ang gugma importante sa mental nga kahimsog ug kalipay. Pero, unsa ba ang “gugma”?

Ang gugma nga gihisgotan dinhi dili ang romantikong gugma bisag importante sab kana. Ang gugma nga gitumong dinhi mao ang kinalabwang klase sa gugma nga mopalihok sa tawo nga kinasingkasing nga unahon ang kaayohan sa uban, imbes ang kaugalingon. Kini giniyahan sa mga prinsipyo sa Diyos, pero wala ni magpasabot nga wala kiniy pagbati.

Ang nindot kaayong deskripsiyon sa gugma nag-ingon: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot. Kini dili magmaya sa pagkadili-matarong, apan magmaya uban sa kamatuoran. Kini moantos sa tanang butang, . . . molaom sa tanang butang, molahutay sa tanang butang. Ang gugma dili gayod mapakyas.”​—1 Corinto 13:4-8.

Kini nga gugma “dili gayod mapakyas” kay kini dili gyod mawala. Oo, kini magkaanam ka lig-on paglabay sa panahon. Ug kay kini mapailobon, maluloton, ug mapinasayloon, kini maoy usa ka “hingpit nga bugkos sa panaghiusa.” (Colosas 3:14) Busa, ang mga relasyon nga nabugkos sa maong gugma lig-on ug malipayon bisag dili ta perpekto. Pananglitan, tagda ang bahin sa kaminyoon.

Si Jesu-Kristo nagtudlog importanteng mga prinsipyo bahin sa kaminyoon. Pananglitan, siya miingon: “‘Ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’ . . . Busa, kon unsay gihiusa pagyugo sa Diyos ayaw ipabulag ni bisan kinsang tawo.” (Mateo 19:5, 6) Dinhi, dunay duha ka importanteng prinsipyo.

“ANG DUHA MAHIMONG USA KA UNOD.” Ang kaminyoon mao ang kinasuorang panag-ubanay, ug ang gugma makapanalipod niini batok sa pagluib​—sa ato pa, ang pagpakigrelasyon sa bana o asawa ngadto sa lain. (1 Corinto 6:16; Hebreohanon 13:4) Ang pagluib makawala sa pagsalig ug makabungkag sa kaminyoon. Kon dunay mga anak, sila tingali ang mas maapektohan ug mobating wala higugmaa, walay kasegurohan, o magdumot pa gani.

“KON UNSAY GIHIUSA PAGYUGO SA DIYOS.” Ang kaminyoon maoy sagradong panaghiusa. Kon ingon ana ang panglantaw sa magtiayon, maningkamot sila nga palig-onon ang ilang kaminyoon. Dili sila mangitag paagi aron magbulag kon dunay mga problema. Ang ilang gugma lig-on ug malahutayon. Kana nga gugma “moantos sa tanang butang,” nga makatabang sa pagsulbad sa mga problema aron molampos ang kaminyoon.

Kon ang mga ginikanan magpakitag masakripisyohong gugma sa usag usa, maayo gyod kinig epekto sa ilang mga anak. Ang batan-ong si Jessica miingon: “Gihigugma gyod ug gitahod ni Papa ug Mama ang usag usa. Dihang makita nako nga gitahod ni Mama si Papa, ilabina sa iyang paagi sa pagtratar kanamong mga anak, gusto kaayo nako siyang sundogon.”

Gugma ang pangunang hiyas sa Diyos. Gani, ang Bibliya nag-ingon: “Ang Diyos gugma.” (1 Juan 4:8) Busa dili ikatingala nga si Jehova gitawag sab ug “malipayong Diyos.” (1 Timoteo 1:11) Magmalipayon sab ta kon atong sundogon ang mga hiyas sa atong Maglalalang​—ilabina ang iyang gugma. Ang Efeso 5:1, 2 nag-ingon: “Mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma.”