“ADTONG BATA PA KO, SIGE KOG KADUNGOG UG MGA ININSULTOHAY UG SININGKAHAY,” miingon si Patricia. “Dili ko kamaong mopasaylo. Bisan dihang dako na ko, sige kog hunahuna sa akong mga kahiubos, nga dili na nuon ko makatulog.” Oo, ang kinabuhi nga punog kasuko ug kahiubos dili malipayon ug dili maayo. Ang mga pagtuon nagpakita nga ang tawong dili mapinasayloon tingali . . .

• Magpadala sa kasuko o kahiubos nga makadaot sa iyang relasyon sa uban, nga tungod niana siya magmagul-anon kay magpalayo niya ang uban

• Daling masilo, mabalaka, o maguol pag-ayo

• Magsigeg tan-aw sa sayop nga makawala sa kalipay

• Magul-anon kay kahibalo siya nga wala niya mabuhat kon unsay husto

• Ma-stress pag-ayo ug dakog posibilidad nga makabatog sakit, sama sa high blood pressure, sakit sa kasingkasing, ug sakitsakit sa lawas, sama sa artraytis ug labad sa ulo *

UNSA ANG PAGPASAYLO? Ang pagpasaylo maoy pagpalabay sa sala, kasuko, kahiubos, ug sa paghunahuna nga manimalos. Pero wala kana magpasabot ug pagkonsentir o pagpakamenos sa sala, o sa pagpakaaron-ingnon nga walay sala nga nahimo. Hinunoa, ang pagpasaylo maoy gipamalandongan pag-ayong desisyon aron mahuptan ang kalinaw ug maayong relasyon uban sa tawong nakasala.

Ang pagpasaylo nagpadayag usab ug pagkamasinabtanon. Ang tawong mapinasayloon nakasabot nga kitang tanan masayop, o makasala, sa pulong ug buhat. (Roma 3:23) Busa, ang Bibliya nag-ingon: ‘Padayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.’​—Colosas 3:13.

Sa ato pa, ang pagpasaylo maoy importanteng bahin sa gugma, nga “usa ka hingpit nga bugkos sa panaghiusa.” (Colosas 3:14) Ug matod sa Mayo Clinic nga website, ang pagpasaylo moresulta ug . . .

•   Mas maayong relasyon sa uban, pagkamabination, pagkamasinabtanon, ug pagpakitag kaluoy sa nakasala

• Maayong panghunahuna ug espirituwalidad

• Menos nga kabalaka, stress, ug kasuko

• Menos nga mga simtoma sa depresyon

PASAYLOA ANG IMONG KAUGALINGON. Ang pagpasaylo sa kaugalingon tingali mao ang “kinalisdang himoon,” apan kini “hinungdanon kaayo sa panglawas”​—sa mental ug pisikal—​matod pa sa basahong Disability & Rehabilitation. Unsay makatabang aron makapasaylo ka sa imong kaugalingon?

• Ayawg hunahunaa nga hingpit ka. Dawata ang kamatuoran nga ikaw​—sama kanatong tanan—​masayop.​—Ecclesiastes 7:20

• Pagkat-on sa imong mga sayop aron dili na nimo kini mahimo pag-usab

• Pailobi ang imong kaugalingon; ang ubang kahuyangan ug dili maayong batasan dili daling mawala.​—Efeso 4:23, 24

• Pakig-uban sa mga higala nga makapadasig, positibo, ug buotan pero mosulti nimo sa tinuod kon unsa ka.​—Proverbio 13:20

• Kon makapasakit kag tawo, dawata ang imong sayop ug pangayo dayog pasaylo. Dihang makig-uli ka, ang imong hunahuna magmalinawon.​—Mateo 5:23, 24

Sa nagtuon ug Bibliya, si Patricia, nga gihisgotan sa sinugdan, nakakat-on sa pagpasaylo. “Mora kog naibtan ug tunok dihang nawala ang kasuko nga nakadaot sa akong kinabuhi,” siya miingon. “Wala na ko mag-antos, ug wala na sab ko nagpaantos sa uban. Ang mga prinsipyo sa Bibliya nagpakita nga kita gihigugma sa Diyos ug gusto niya ang kinamaayohan alang kanato.”

Usa ka tawong ginganlag Ron miingon: “Dili nako makontrolar ang hunahuna ug buhat sa uban. Apan makontrolar nako ang akong kaugalingon. Kon gusto kog kalinaw, kinahanglang wad-on nako ang akong kasuko. Dili mahimong magmalinawon ug magmasuk-anon ko sa samang higayon. Hinlo na ang akong konsensiya karon.”