Giawhag sa United Nations ang tanang tawo nga magtinabangay, tahoron ang katungod sa tawo, ug protektahan ang atong planeta. Ang rason? Si Maher Nasser sa UN Chronicle miingon nga ang tanang nasod apektado sa “pagbag-o sa klima, mga sindikato, dili patas nga kahimtang sa kinabuhi, panag-away, pagbakwet sa daghang tawo, tibuok kalibotang terorismo, makatakod nga mga sakit, ug uban pang problema.”

Ang uban mas labaw pag gitinguha. Gusto nila nga usa ra ka gobyerno ang magmando sa tibuok kalibotan. Apil kanila ang Italian nga pilosopo, magbabalak, ug politiko nga si Dante (1265-1321) ug ang physicist nga si Albert Einstein (1879-1955). Nagtuo si Dante nga dili mabatonan ang kalinaw kon ang kalibotan nagkabahinbahin tungod sa politika. Iyang gikutlo ang giingon ni Jesu-Kristo nga ‘ang gingharian nga nagkabahinbahin mapukan.’​—Lucas 11:17.

Wala madugay human sa Gubat Kalibotan II, diin gigamit ang duha ka atomic bomb, si Albert Einstein misulat sa General Assembly sa United Nations. Miingon siya, “Kinahanglang molihok dayon ang United Nations ug himoon ang tanang gikinahanglan sa pagpatunghag seguridad sa tanang nasod pinaagi sa paghimog usa ka tinuod nga gobyerno nga magmando sa kalibotan.”

Apan makaseguro ba ta nga ang mga politiko nga apil niining gamhanang gobyerno dili gyod mahimong korap, palpak, ug madaogdaogon? O basig maparehas ra sila ka daotan sa ubang magmamando? Kini nga mga pangutana magpahinumdom nato sa giingon sa British nga historyano nga si Lord Acton: “Ang gahom may tendensiya nga makadaot ug ang bug-os nga gahom bug-os nga makadaot.”

Bisan pa niana, aron ang katawhan dunay kalinaw ug pagsinabtanay, kinahanglan tang magkahiusa. Pero sa unsang paagi? Posible kaha na? Giingon sa Bibliya nga posible kini, ug mahitabo gyod kini. Sa unsang paagi? Dili pinaagig gobyerno nga gilangkoban ug korap nga mga politiko, kondili sa gobyerno nga gihimo sa Diyos. Dugang pa, ipakita niini nga gobyerno nga Diyos lang ang may katungod sa pagmando sa iyang kalalangan. Unsa kana nga gobyerno? Gitawag kini sa Bibliya nga “Gingharian sa Diyos.”​—Lucas 4:43.

Sa pag-ampo nga gitudlo ni Jesu-Kristo, ang Gingharian sa Diyos ang iyang gipasabot dihang siya miingon: “Paanhia ang imong Gingharian. Matuman unta ang imong kabubut-on . . . sa yuta.” (Mateo 6:9, 10) Oo, paneguroon gyod sa Gingharian sa Diyos nga matuman ang kabubut-on sa Diyos dinhi sa yuta, dili ang kabubut-on sa mga tawong hakog sa gahom o kaugalingon ray gihunahuna.

Ang Gingharian sa Diyos gitawag sab ug “ang Gingharian sa langit.” (Mateo 5:3) Ngano? Kay mandoan niini ang tibuok yuta gikan sa langit. Hunahunaa kon unsay ipasabot niana. Kining tibuok kalibotang gobyerno wala magkinahanglag materyal o pinansiyal nga suporta. Makapahupay gyod kana sa mga tawo nga sakop niini!

Ang pulong “gingharian” nagpasabot nga ang Gingharian sa Diyos maoy gobyerno nga mandoag hari. Ang Hari niini mao si Jesu-Kristo, ug ang iyang awtoridad gikan sa Diyos. Bahin kang Jesus, ang Bibliya nag-ingon:

•   “Siya ang magmando sa tanan . . . Walay kataposan ang pag-uswag sa iyang pagmando, ug molungtad ang kalinaw.”​—Isaias 9:6, 7, Ang Bag-ong Maayong Balita Biblia.

• “Siya gihatagag awtoridad sa pagmando, dungog, ug gingharian, aron ang tanang katawhan nga lainlaig nasod ug pinulongan mag-alagad kaniya. Ang iyang pagmando . . . dili matapos.”​—Daniel 7:14.

• “Ang gingharian sa kalibotan nahimo nang Gingharian sa atong Ginoo [Diyos] ug sa iyang Kristo.”​—Pinadayag 11:15.

Matuman ang modelong pag-ampo ni Jesus kay bug-os nga tumanon sa Gingharian ang kabubut-on sa Diyos para sa yuta. Ubos sa pagmando niini, ang tanan makakat-on sa pag-atiman sa atong planeta aron kini mahimong paraiso.

Labaw sa tanan, tudloan sa Gingharian sa Diyos ang tanang sakop niini. Usa ra ka sukdanan ang itudlo kanila. Wala nay away o pagkabahinbahin. “Dili sila magpahinabog bisan unsang kadaot o bisan unsang kagun-oban . . . kay ang yuta mapuno gayod sa kahibalo bahin kang Jehova sama sa katubigan nga nagtabon sa dagat,” nag-ingon ang Isaias 11:9.

Nianang panahona, ang mga tawo magkahiusa na ug may kalinaw​—butang nga gipangandoy sa United Nations. “Mabatonan nila ang tumang kalipay tungod sa dagayang pakigdait,” nag-ingon ang Salmo 37:11. Mawala na sa atong bokabularyo ang mga pulong nga “krimen,” “polusyon,” “kakabos,” ug “gubat.” Pero kanus-a kini mahitabo? Kanus-a magmando ang Gingharian sa Diyos? Sa unsang paagi kini magmando? Ug sa unsang paagi ka makabenepisyo niini? Atong tan-awon.