“Maghago siya, nga magtrabaho sa matarong nga paagi aron duna siyay ikahatag sa nanginahanglan.”—EFESO 4:28.

Gusto sa atong Maglalalang nga isipon nato ang trabaho sa positibong paagi. Ngano? Malipayon ang tawo nga nagkugi sa pagtrabaho kay matagan-an niya ang iyang kaugalingon ug ang iyang pamilya. Gani, posible pa siyang makatabang sa mga nanginahanglan. Pabilhan sab siya sa iyang amo. Busa ang kugihan mas dakog purohan nga mas magdugay sa iyang trabaho. Ang Balaang Kasulatan haom nga naghubit sa maayong resulta sa atong paghago ingong “gasa sa Diyos.”—Ecclesiastes 3:13.

“Segurado mi nga hinlo ang among konsensiya, kay gusto namong magmatinud-anon sa tanang butang.”—HEBREOHANON 13:18.

Kon matinud-anon ta, duna tay pagtahod sa kaugalingon, kalinaw sa hunahuna, ug mas maayo ang atong tulog. Dugang pa, ang uban mosalig ug motahod nato. Ang mga dili matinud-anon dili makasinati niana nga mga benepisyo. Hasolon sab sila sa ilang konsensiya, ug wala silay kalinaw kay pirme silang maghunahuna nga basig masakpan sila sa ilang ginahimo.

“Ayaw ninyog higugmaa ang kuwarta, hinuon magmakontento mo kon unsay naa ninyo.”—HEBREOHANON 13:5.

Nagkinahanglan tag kuwarta aron makapalit ug pagkaon ug ubang panginahanglan. Pero ang ‘gugma sa kuwarta’ peligroso kaayo. Kini makaaghat sa usa nga gamiton ang kadaghanan sa iyang panahon ug kusog sa pagpangagpas ug dugang kuwarta. Busa, lagmit magkaproblema siya sa iyang kaminyoon, mawad-ag panahon sa iyang mga anak, ug madaot ang iyang panglawas. (1 Timoteo 6:9, 10) Kadtong nahigugma sa kuwarta mahimong matental sab nga dili magmatinud-anon. Ang usa ka maalamong tawo miingon: “Ang tawong matinumanon makadawat ug daghang panalangin, apan kadtong nagdali nga madato dili magpabiling inosente.”—Proverbio 28:20.

“Ampingi ang praktikal nga kaalam ug ang katakos sa panghunahuna.”—PROVERBIO 3:21.

Ang maayong edukasyon makatabang nato nga mahimong responsableng adulto ug ginikanan. Pero ang maayong sekular nga edukasyon dili garantiya nga kanunay natong mabatonan ang tanan natong gikinahanglan o magmalipayon. Aron tinuod tang magmalamposon sa tanang bahin sa atong kinabuhi, kinahanglan nato ang edukasyon nga gikan sa Diyos. Ang Balaang Kasulatan nag-ingon bahin sa tawo nga maminaw sa Diyos: “Ang tanan niyang ginahimo magmalamposon.”—Salmo 1:1-3.