Unsa nay Nahitabo sa Pagtahod sa Kinabuhi?

I-PLAY

KON NGANONG IMPORTANTE ANG PAGTAHOD SA KINABUHI

Ang mga binuhatan nga nagpakitag kawalay-pagtahod sa kinabuhi makadaot sa imong panglawas ug makapameligro sa uban.

Ang pagpanigarilyo moresultag cancer ug makapalisod sa lawas sa pagsukol niini. Mga 90 porsiyento niadtong namatay tungod sa cancer sa baga maoy resulta sa pagpanigarilyo ug paghanggab sa aso sa sigarilyo sa uban.
Kada tuig, daghan ang na-trauma tungod sa pagpamusil. Ang usa ka report sa Stanford University nag-ingon: “Ang research nagpakita nga bisan kadtong nakalingkawas sa [pagpamusil sa eskuwelahan] nga wala ra maunsa nag-antos sa trauma, nga mahimong makaapektar pag-ayo sa ilang kinabuhi bisag molabay na ang daghang tuig.”
Ang mga tawo nga nagdrayb nga nakainom o nagdroga makapameligro sa karsada ug bisan sa agianan sa mga tawo. Dihang ang mga tawo dili magpakabana sa kinabuhi, sagad maangin ang uban diha sa komunidad.

ANG IMONG MAHIMO

Ampingi ang imong panglawas. Dili pa ulahi ang tanan aron undangon ang makadaot nga mga bisyo sama sa pagpanigarilyo, pag-vape, pagpalabig inom, o pagdroga. Kini nga mga bisyo makadaot sa imong kinabuhi ug nagpakitag kawalay-pagtahod sa kinabuhi sa uban, apil na sa mga membro sa imong pamilya.

“Hinloan nato ang atong kaugalingon sa tanang kahugawan sa unod.”—2 Corinto 7:1.

Magmahunahunaon sa safety. Aron malikayan ang aksidente, seguroa nga maayong pagkamentinar ang inyong balay. Pag-amping sa pagdrayb, ug seguroa nga maayog kondisyon ang imong sakyanan. Ayawg padala sa presyur sa uban nga mohimo sa mga kalihokan nga posibleng moresultag grabeng injury o kamatayon.

“Kon magtukod kag balay, buhatig barandilya ang imong atop, aron walay tawong mahulog ug dili mahimong sad-an sa dugo ang imong pamilya.”—Deuteronomio 22:8. a

Magpakitag kaayo sa uban. Ang pagtahod sa kinabuhi naglakip sa kon unsay atong panglantaw sa mga tawo nga lahi natog rasa, nasyonalidad, ug kahimtang sa kinabuhi. Kay sa tinuod lang, ang diskriminasyon ug pagdumot mao ang pangunang hinungdan sa kapintasan ug mga gubat.

“Wad-a ang tanang klase sa pagdumot, kasuko, kapungot, siningkahay, ug sakit nga sinultihan, apil na ang bisan unsa nga makapahinabog kadaot. Apan magpakita mog kaayo sa usag usa.”—Efeso 4:31, 32.

ANG AMONG GINAHIMO

Ang mga Saksi ni Jehova nagtudlo sa mga tawo nga ampingan ang ilang panglawas. Ang among programa sa pagtudlo bahin sa Bibliya nakatabang sa daghan nga maundang ang ilang mga bisyo ug mga binuhatan nga makadaot sa ilang panglawas.

Nagsunod mi sa taas nga mga sukdanan sa safety sa among mga proyekto sa pagpanukod. Aron malikayan ang aksidente, gibansay pag-ayo ang among mga boluntaryo nga nagtabang sa pagpanukod sa among mga pasilidad nga gigamit namo sa pagsimba ug pagtudlo bahin sa Bibliya. Regular nga ginainspeksiyon ang among mga bilding aron maseguro nga nagsunod mi sa lokal nga mga balaod bahin sa safety.

Naghatag mig praktikal nga tabang. Sa di pa dugayng tuig, gitabangan namo ang mga naapektohan sa mga 200 ka kalamidad sa tibuok kalibotan ug migasto mig halos 12 million dollars gikan sa mga donasyon sa pagtaganag hinabang sa mga biktima.

Dihang mikaylap ang Ebola sa West Africa (2014) ug sa Democratic Republic of Congo (2018), gitudloan namo ang mga tawo kon unsay himoon aron malikayan kining makamatay nga sakit. Nagpadala mig mga representante aron maghisgot sa tema nga “Ang Pagkamasinugtanon Makaluwas ug Kinabuhi.” Nagbutang mig mga hunawanan sa entrada sa among mga dapit sa pagsimba, ug gipakita namo kon unsa ka importante ang pagpanghunaw ug ang uban pang praktikal nga mga paagi aron malikayan ang sakit.

Sa Sierra Leone, ang mga Saksi ni Jehova gipasalamatan diha sa radyo tungod sa ilang pagtabang sa kauban nilang mga Saksi ug bisan sa mga dili Saksi sa ilang komunidad aron malikayan ang Ebola virus.

Hunawanan sa Kingdom Hall panahon sa pagkaylap sa Ebola sa Liberia niadtong 2014

a Sa karaang Middle East, kini nga maalamong sugo nagpakita sa kaimportante sa safety sa pamilya ug sa uban.

PAGMATA!