Sa surbi sa 2014, 61 porsiyento sa mga batan-on nga nag-edad ug 18-25 nagtuo nga “dili dakong isyu sa India” ang pagpakigsekso sa dili pa magminyo. Usa ka doktor sa Mumbai miingon sa Hindustan Times nga para niya, “ang pagsulod sa usa ka relasyon wala magpasabot nga ang mga batan-on gusto nang magminyo. Pagpakigsekso man kini sa usa lang ka higayon, kaswal nga pagpakigsekso o pagpuyopuyo, ang pagpakasal wala gayod sa plano.”

PALANDONGA: Ang mga sakit ba nga mapasa pinaagig pagpakigsekso ug trauma sagad nalambigit sa pagpakigsekso sa dili pa magminyo o pagpakigsekso human magminyo?—1 Corinto 6:18.

Kadtong makiglalis kanunay sa mga membro sa pamilya dakog purohan nga mamatay sa edad 35 ngadto sa 50. Ang mga tigdukiduki sa University of Copenhagen nagmonitor ug 10,000 ka tawo niana nga pangedaron sulod sa kapig 11 ka tuig ug ilang nakita nga kadtong pirmeng makiglalis sa ilang pamilya lagmit sayo nga mamatay kay niadtong panagsa rang makiglalis. Ang nanguna sa maong pagtuon miingon nga ang pag-atubang sa mga kabalaka ug problema ug pagsulbad sa mga panaglalis “maisip nga hinungdanong paagi aron malikayan ang sayo nga kamatayon.”

ANG GIINGON SA BIBLIYA: “Si bisan kinsa nga nagapugong sa iyang mga pulong may kahibalo, ug ang tawo nga may katakos sa pag-ila may mabugnaw nga espiritu.”—Proverbio 17:27.

Ang mga managtrato nga magbulag ug dayon mag-uli na usab lagmit mosulay pagbulag sulod sa lima ka tuig sa ilang kaminyoon, matod sa dili pa dugayng pagtuon sa 564 ka bag-ong kinasal sa Louisiana. Sila usab may tendensiya nga magsigeg away ug dili kaayo malipayon sa ilang kaminyoon.

ANG GIINGON SA BIBLIYA: “Kon unsay gihiusa pagyugo [diha sa kaminyoon] sa Diyos ayaw ipabulag ni bisan kinsang tawo.”—Mateo 19:6.