ANG GIINGON SA UBAN

Gipatay sa mga Romano si Jesus pinaagi sa paglansang kaniya diha sa krus nga kahoy.

ANG GIINGON SA BIBLIYA

Si Jesus gipatay pinaagi sa “pagbitay [kaniya] sa kahoyng haligi.” (Buhat 5:30, Biblia sa Kristohanong Katilingban) Ang mga pulong nga gigamit sa mga magsusulat sa Bibliya nagpakita nga ang instrumentong gigamit sa pagpatay kang Jesus maoy usa ka pirasong kahoy, dili duha. Ang Gregong pulong nga stau·rosʹ, sumala sa Crucifixion in Antiquity, nagkahulogang “usa ka poste. Dili kini katumbas sa ‘krus.’” Ang pulong xyʹlon, nga gigamit sa Buhat 5:30, maoy “simpleng tul-id nga haligi o estaka nga gamiton sa mga Romano sa paglansang niadtong gihukmang patyon.” *

Gipakita sab sa Bibliya nga ang paagi sa pagpatay kang Jesus nahisama sa giingon sa karaang balaod sa Israel. Ang balaod nag-ingon: “Kon ang usa ka tawo may sala nga takos sa silot sa kamatayon, ug siya gipatay, ug siya imong gibitay sa usa ka estaka, . . . siya nga gibitay tinunglo sa Diyos.” (Deuteronomio 21:22, 23) Sa paghisgot niana nga balaod, si apostol Pablo nagsulat nga si Jesus nahimong “tinunglo inay nga kita, tungod kay kini nahisulat: ‘Tinunglo ang matag tawo nga gibitay sa estaka [xyʹlon].’” (Galacia 3:13) Busa gipakita ni Pablo nga si Jesus namatay sa estaka—sa usa ka pirasong kahoy.

“Gipatay nila siya pinaagi sa pagbitay kaniya ibabaw sa kahoy.”—Buhat 10:39, NCV.

ANG GIINGON SA BIBLIYA

Walay mabasa diha sa Bibliya nga ang unang mga Kristohanon naggamit ug krus ingong simbolo sa relihiyon. Ang mga Romano hinuon nianang panahona mao ang naggamit ug krus ingong simbolo sa ilang mga diyos. Dayon, mga 300 ka tuig human mamatay si Jesus, ang emperador sa Roma nga si Constantino migamit ug krus ingong simbolo sa iyang kasundalohan, ug kini nahimong bahin sa nag-angkong Kristiyanong relihiyon.

Kay naggamit man ang mga pagano ug krus sa pagsimba sa ilang mga diyos, migamit kaha niini ang mga tinun-an ni Jesus sa ilang pagsimba sa matuod nga Diyos? Wala, kay sila nahibalo nga gidumtan sa Diyos ang pagsimba nga naggamit ug “bisan unsang simbolo” ug ang mga Kristohanon gisugo sa ‘pagkalagiw gikan sa idolatriya.’ (Deuteronomio 4:15-19; 1 Corinto 10:14) “Ang Diyos maoy Espiritu,” nga dili makita sa mga tawo. Busa ang unang mga Kristohanon wala mogamit ug makitang mga butang ug mga simbolo aron sila masuod sa Diyos. Hinunoa, sila nagsimba kaniya pinaagi sa “espiritu,” nga nagpasabot nga gigiyahan sila sa dili makitang balaang espiritu, ug pinaagi sa “kamatuoran,” nga nahiuyon sa kabubut-on sa Diyos nga gipadayag sa Kasulatan.—Juan 4:24.

“Ang matuod nga mga magsisimba magasimba sa Amahan uban sa espiritu ug sa kamatuoran.”—Juan 4:23.

ANG GIINGON SA UBAN

“Natural lang nga ang instrumento nga gigamit alang sa kaluwasan kinahanglang hatagag espesyal nga pagtahod ug pasidungog. . . . Ang nagsimba sa mga imahen, nagsimba sa persona nga girepresentahan niana.”—New Catholic Encyclopedia.

ANG GIINGON SA BIBLIYA

Ang mga Kristohanon utangan kang Jesus, kay ang iyang kamatayon nagpaposible kanila nga mapasaylo sa ilang mga sala, makaduol sa Diyos, ug makadawat ug kinabuhing walay kataposan. (Juan 3:16; Hebreohanon 10:19-22) Sila wala sugoa sa pagpakita sa ilang pagtahod niana nga regalo pinaagi sa pagdispley sa simbolo ni Jesus o sa pag-angkon lang nga sila nagtuo kaniya. Gawas pa, ang “pagtuo patay, kon kini walay binuhatan.” (Santiago 2:17) Kinahanglang ipakita sa mga Kristohanon ang ilang pagtuo kang Jesus. Sa unsang paagi?

“Ang gugma nga iya ni Kristo nagatukmod kanamo,” nag-ingon ang Bibliya, “kay mao kini ang among gikahukom, nga ang usa ka tawo namatay alang sa tanan . . . aron sila nga nagakinabuhi magkinabuhi dili na alang sa ilang kaugalingon, kondili alang kaniya nga namatay alang kanila ug gibangon.” (2 Corinto 5:14, 15) Tungod sa pagpakita ni Kristo ug talagsaong buhat sa gugma, ang mga Kristohanon nadasig sa pagbag-o sa ilang kinabuhi aron makasunod sa iyang panig-ingnan. Pinaagi niini, ilang gipasidunggan si Jesus sa mas makahuloganong paagi kay sa paggamit ug usa ka relihiyosong simbolo.

“Kini ang kabubut-on sa akong Amahan, nga ang matag usa nga makakita sa Anak ug magpasundayag ug pagtuo kaniya makabaton ug kinabuhing walay kataposan.”—Juan 6:40.