ANG batan-on ug tigulang nga mga wizard, guwapang mga ungo, ug guwapong mga bampira maoy pipila sa dili ingon nato nga gihimong bida nga karakter diha sa mga libro, salida, ug video game. Nganong daghan ang ganahan niini?

“Nagkadaghan na karon ang nagtuog multo, kaniadto usa sa matag 10 ka Amerikano pero karon usa na sa matag tulo ka Amerikano,” matod pa sa propesor sa sociology nga si Claude Fischer. “Lagmit doble sa gidaghanon sa tigulang nga mga Amerikano ang batan-ong mga Amerikano nga nag-ingon nga sila nagpakonsultag espiritista, nagtuog multo, ug nagtuo nga dunay mga balayng taw-an.”

Busa dili ikahibulong nga nauso na sab ang mga estorya bahin sa daotang mga espiritu nga mosulod sa lawas sa tawo. “Tungod sa kalit nga pag-uso sa mga salida bahin sa zombie, tawong lobo ug bampira sa milabayng mga tuig, namalik karon ang mga salida bahin sa mga demonyo nga mosulod sa lawas sa tawo nga nagustohan sa kadaghanan,” miingon si Michael Calia sa The Wall Street Journal.

Usa ka report nag-ingon nga “mga 25 porsiyento ngadto sa 50 porsiyento sa mga tawo sa tibuok kalibotan nagtuog multo, ug ang mga multo maoy pangunang mga karakter diha sa mga basahon sa kadaghanang kultura.” Ug sa surbi nga gihimo sa mga propesor sa sociology sa United States nga si Christopher Bader ug Carson Mencken, “nakita nga 70 ngadto sa 80 porsiyento sa mga Amerikano ang nagtuo ug usa ka matang sa panghitabo nga katingad-anan.”

Ang pagpakiglangkit ba sa espiritismo ug pagtan-awg mga salida bahin sa dili ingon nato ordinaryo lang nga lingawlingaw?