Ang tumong mas labaw pa sa pagpangandoy nga mahitabo ang usa ka butang. Ang tinuod nga tumong nagkinahanglag pagplano, pagpasibo, ug pagpaningkamot.

Dunay mga tumong nga daling kab-oton (makab-ot sulod sa pipila ka adlaw o semana), dunay medyo dugayng kab-oton (sulod sa pipila ka bulan), ug duna poy dugayng kab-oton (sulod sa pipila ka tuig). Ang mga tumong nga dugayng kab-oton makab-ot pinaagi sa paghimog ginagmayng mga tumong.

Ang pagkab-ot sa mga tumong makadugang ug kompiyansa sa kaugalingon, makapasuod sa panaghigalaay, ug makadugang sa kalipay.

Kompiyansa sa kaugalingon: Dihang makab-ot nimo ang ginagmayng tumong, mobati kag kompiyansa sa pagkab-ot ug mas dagkong tumong. Mobati sab kag kompiyansa sa pag-atubang ug mga problema kada adlaw—sama sa pagsukol sa dili maayong impluwensiya sa uban.

Panaghigalaay: Ganahan tang makig-uban sa mga tawong dunay makataronganong mga tumong sa kinabuhi ug naningkamot sa pagkab-ot niana. Usa sab sa pinakamaayong paagi aron molig-on ang panaghigalaay mao ang pagkab-ot ug samang tumong uban sa imong higala.

Kalipay: Kon maghimo kag tumong ug makab-ot kana, bation nimo ang kalipay.

“Gusto kong naa koy mga tumong. Makatabang ni nga di ko laayon kay naay katuyoan ang akong ginahimo. Dihang makab-ot nako ang akong tumong, makaingon gyod ko, ‘Wow, nakab-ot gyod nako!’”​—Christopher.

PRINSIPYO SA BIBLIYA: “Ang usa nga magbantay sa hangin dili makapugas ug binhi, ug ang usa nga magtan-aw sa mga panganod dili makaani.”​—Ecclesiastes 11:4.

Himoa ang mosunod nga mga paagi sa pagtakda ug pagkab-ot sa imong mga tumong.

Sayra kon unsay imong unahon. Ilista ang imong mga tumong base sa imong prayoridad.

Pagplano. Sa matag tumong, himoa ang mosunod:

• Paghimog realistikong deadline.

• Planoha kon unsaon nimo kana pagkab-ot.

• Dahoma ang mga problema, ug paghunahunag mga paagi sa pagsulbad niana.

Sugdi dayon. Ayawg hulata nga mahuman nimo ang detalyadong mga plano ayha nimo sugdan. Pangutan-a ang imong kaugalingon, ‘Unsa ang una nakong himoon aron makab-ot ang akong tumong?’ Buhata dayon kana. Irekord ang imong mga nahimo hangtod makab-ot nimo ang tumong.

PRINSIPYO SA BIBLIYA: “Ang mga plano sa kugihan moresulta gyod ug kalamposan.”—Proverbio 21:5.