Unsay Epekto sa Teknolohiya sa Imong Pagkat-on?
Ang mga tawo padayong nagkat-on—para sa pag-eskuwela, trabaho, o sa ubang rason. Ang teknolohiya makatabang sa mga tawo sa pagkat-on. Dali na lang kaayo karon ang pagkuhag daghang impormasyon. Gani, dili na ka kinahanglang mogawas sa balay o motindog sa imong lingkoranan.
Pero daghan niadtong sobrang naggamit ug teknolohiya nakamatikod nga sila . . .
-
maglisod ug pokus dihang magbasa.
-
maglisod ug pokus sa ilang ginahimo.
-
daling laayon dihang mag-inusara.
ANG ANGAY NIMONG MAHIBALOAN
DIHANG MAGBASA
Ang uban dalidalion rag basa ang usa ka artikulo aron makuha dayon ang pangunang ideya imbes tarongon kinig basa.
Okey ra ang paspas nga pagbasa kon kinahanglan nimong makita dayon ang tubag sa pangutana. Pero dili kana epektibo kon kinahanglan nimong masabtan pag-ayo ang usa ka topiko.
HUNAHUNAA KINI: Ginabasa ba nimog maayo ang tag-as nga mga sentence o parapo? Sa unsang paagi makatabang na sa imong pagkat-on?—PROVERBIO 18:15.
POKUS
Ang uban nagtuo nga ang teknolohiya makatabang nila sa pagdungan sa duha ka buluhaton—pananglitan, mag-text samtang magtuon. Pero dihang mabahin ang ilang atensiyon, posibleng dili nila mabuhat ug maayo ang duha ka buluhaton, ilabina kon parehas kining nagkinahanglan ug konsentrasyon.
Ang pagpokus nagkinahanglag disiplina sa kaugalingon, pero makatabang ni nimo sa pagkat-on. “Wala kaayo kay mahimong sayop ug dili kaayo ka ma-stress,” miingon ang tin-edyer nga si Grace. “Nakita nako nga mas maayong magpokus sa usa ka buluhaton kay sa mag-multitask.”
HUNAHUNAA KINI: Tungod sa pag-multitask, nalisdan ba ka sa pagpokus o sa paghinumdom sa imong gitun-an?—PROVERBIO 17:24.
DIHANG MAG-INUSARA
Dili ganahan ang uban nga mag-inusara kon naa sa hilom nga lugar, maong gamiton nila ang ilang mga gadyet aron malingaw. “Laayon kaayo ko bisag 15 minutos lang nga dili mag-check sa akong cellphone o tablet o motan-awg TV,” miingon si Olivia.
Pero importante kaayo ang mga panahon nga mag-inusara kay higayon kini sa pagpamalandong—usa ka importanteng bahin sa pagkat-on, dili lang para sa mga batan-on, kondili sa mga adulto sab.
HUNAHUNAA KINI: Dihang mag-inusara ka, gigamit ba nimo ni nga panahon aron makapamalandong?—1 TIMOTEO 4:15.
ANG IMONG MAHIMO
SUSIHA ANG IMONG PAGGAMIT UG TEKNOLOHIYA
Sa unsang mga paagi magamit nimo ang teknolohiya aron mouswag ang imong paagi sa pagkat-on? Sa unsang paagi kini makabalda sa imong konsentrasyon ug pagkat-on?
PRINSIPYO SA BIBLIYA: “Ampingi ang praktikal nga kaalam ug ang katakos sa panghunahuna.”—PROVERBIO 3:21.
Basin Ganahan Pod Ka
MGA BATAN-ON NANGUTANA
Unsay Akong Himoon Aron Makapokus Ko?
Sayra ang tulo ka kahimtang diin ang teknolohiya lagmit makabalda nimo sa pagpokus ug kon unsay imong mahimo aron mas makapokus ka.
PAGMATA!
Sobra ra ba Kaayo Kang Makatrabaho?
Daghan ang naglisod sa pagbalanse sa ilang panahon para sa trabaho ug sa pamilya. Ngano man? Unsay solusyon?
MGA BATAN-ON NANGUTANA
Unsay Angay Nakong Mahibaloan Bahin sa Multitasking?
Makapokus ba gyod ka kon imong dunganon ang lainlaing buluhaton?
