Pinansiyal nga Kahimtang
Namenosan sa daghan ang ilang problema sa kuwarta kay ilang gisunod ang mga prinsipyo sa Bibliya.
PAGBATON UG MAAYONG PLANO
PRINSIPYO SA BIBLIYA: “Ang mga plano sa kugihan moresulta gyod ug kalamposan, apan ang tanang madalidalion seguradong mopaingon sa kakabos.”—Proverbio 21:5.
ANG GIPASABOT NIINI: Kinahanglang sundon nimo pag-ayo ang imong mga plano aron molampos ka. Busa pagplano daan sa dili pa mogasto. Hinumdomi nga dili nimo mapalit ang tanan nimong gusto. Busa magmaalamon sa paggasto sa imong kuwarta.
ANG IMONG MAHIMO:
-
Pagbadyet. Isulat ang tanan nimong galastohan, ug ilista kini sumala sa kategoriya. Dayon paggahin ug kuwarta para sa matag kategoriya. Kon nakagasto ka ug labaw sa imong badyet para sa usa ka kategoriya, kuhai ang imong badyet para sa ubang kategoriya. Pananglitan, kon makagasto kag labaw kay sa imong badyet para sa gasolina, kuhai ang badyet para sa dili kaayo importanteng kategoriya, sama sa pagpangaon sa gawas.
-
Likayi ang pagpangutang. Kutob sa mahimo, ayawg pangutang. Hinuon, pagtigom aron mapalit ang imong mga gikinahanglan. Kon mogamit kag credit card, paningkamoting mabayran ang imong tibuok utang kada bulan aron dili ka magbayad ug interes. Kon naa kay utang nga dili nimo matingob ug bayad, paghimog repayment plan o plano sa anam-anam nga pagbayad, ug sunda gyod kana.
Sumala sa usa ka pagtuon, ang mga tawo nga naay credit card sagad mas dakog magasto. Busa kon naa kay credit card, gamita kana sa maalamong paagi.
LIKAYI ANG MAKADAOT NGA MGA KINAIYA
PRINSIPYO SA BIBLIYA: “Ang tapolan dili magdaro sa tingtugnaw, busa magpakilimos siya sa ting-ani kay wala man siyay iya.”—Proverbio 20:4.
ANG GIPASABOT NIINI: Ang pagkatapolan mahimong moresulta sa kakabos. Busa pagkugig trabaho, ug kutob sa mahimo, pagtigom para sa imong mga panginahanglan sa umaabot.
ANG IMONG MAHIMO:
-
Pagkugi. Aron di ka mawad-ag trabaho, ayaw pagtinapolan. Kon kugihan ka ug responsable, ganahan ang imong amo nimo ug magdugay ka sa trabaho.
-
Magmatinud-anon. Ayawg pangawat sa imong amo. Kon dili ka matinud-anon, madaot ang imong reputasyon ug lisod na kang madawat sa trabaho.
-
Likayi ang kahakog. Ang dili balanseng panglantaw bahin sa kuwarta anam-anam nga magdaot sa imong panglawas ug sa imong relasyon sa uban. Hinumdomi nga dili kuwarta ang pinakaimportante sa kinabuhi.
UBAN PANG PRINSIPYO SA BIBLIYA
Basaha ang Bibliya online. Mabatonan ni sa gatosan ka pinulongan diha sa jw.org
AYAWG SAYANGI ANG IMONG PANAHON UG KUWARTA SA DAOTANG BISYO.
“Ang palahubog ug ang hangol ug pagkaon mapobre, ug ang magsigeg katulog magsinina na lag trapo.”—PROVERBIO 23:21.
LIKAYI NGA SOBRANG MA-STRESS.
“Ayaw na mog kabalaka bahin sa inyong kinabuhi kon unsay inyong kan-on o imnon o sul-obon.”—MATEO 6:25.
AYAWG KASINA.
“Ang tawong masinahon naghinamhinam nga makabatog bahandi, apan wala siya mahibalo nga mapobre siya.”—PROVERBIO 28:22.
Basin Ganahan Pod Ka
ANG BANTAYANANG TORRE
Unsay Buhaton kon Dunay Utang?
Unsay mahimo sa mga pamilya kon daw imposibleng makalingkawas sa utang?
ANG BANTAYANANG TORRE
Pagkinabuhi Sumala sa Imong Kinitaan—Sa Unsang Paagi?
Sayra kon sa unsang paagi ang mga prinsipyo sa Bibliya makatabang nimo sa pagbadyet sa imong kuwarta ug sa paglikay sa wala kinahanglanang mga utang.
PAGMATA!
Balanseng Panglantaw sa Kuwarta
Pito ka pangutana nga makatabang kanimo sa pagsusi kon balanse pa ba ang imong panglantaw sa kuwarta.
UBANG TOPIKO
Kon Unsay Himoon Dihang Mogamay ang Kita
Tingali ma-stress ta kon kalit nga mogamay ang atong kita. Pero naay praktikal nga mga tambag ang Bibliya nga makatabang nimo.
TUBAG SA MGA PANGUTANA BAHIN SA BIBLIYA
Problema sa Kuwarta ug Utang—Makatabang ba ang Bibliya?
Ang kalipay dili kabayrag sapi, apan may upat ka prinsipyo sa Bibliya nga makatabang nimo sa pinansiyal.
PAGMATA!
Kon Unsaon Pagkontrol sa Paggasto
Ayaw paghulat hangtod mahutdan kag kuwarta ayha pa mamalandong bahin sa imong batasan sa paggasto. Sayra kon unsaon pagkontrol sa paggasto sa dili pa kini mahimong dakong problema.
