Ang uniberso ba ug ang kinabuhi dinhi sa yuta gibuhat sa Diyos o mitungha rag iya? Ang giingon sa duha ka physicist niini nga artikulo ug ang unang mga pulong sa Bibliya naghatag ug magkalahi nga tubag niana nga pangutana. Ang mga tawo nga misuportar nianang magkalahi nga ideya kombinsido sa ilang gituohan. Pero daghan ang dili segurado kon unsay ilang tuohan. Kini nga topiko gidebatehan diha sa media ug sa iladong mga libro.

Tingali ang imong mga titser miingon nga kombinsido sila nga ang uniberso ug ang kinabuhi dinhi sa yuta kalit rang mitungha ug walay Diyos nga naglalang niini. Pero naa ba silay gipakitang ebidensiya nga walay Maglalalang? O lagmit nakadungog ka sa gitudlo sa mga lider sa relihiyon nga naay Maglalalang. Pero naa ba silay gipakitang ebidensiya nga magpamatuod sa ilang gitudlo? O giingnan ba ka nila nga tuohan ang ilang giingon kay pagpakita kinig “pagtuo” o kay doktrina ni sa simbahan?

Seguradong naghunahuna ka niini nga pangutana ug lagmit gibati nimo nga walay makahatag ug seguradong tubag kon naa ba gyoy Maglalalang. Ug basin nakapangutana sab ka: Importante ba gyod nga mahibalo ko sa tubag?

Ipakita niini nga isyu sa Pagmata! ang mga ebidensiya nga nakakombinsir sa daghang tawo sa pagtuo nga naay Maglalalang. Dayon, hisgotan niini kon nganong importanteng mahibaloan nimo ang tubag niini nga pangutana bahin sa sinugdanan sa kinabuhi dinhi sa yuta.