DUGAY nang gituohan nga ang mga arctic tern (usa ka klase sa kanaway) molupad ug 35,200 kilometros gikan sa rehiyon sa Arctic paingon sa Antarctica, ug pabalik sa Arctic. Pero ang dili pa dugayng mga pagtuon nagpakita nga kining mga langgama makalupad ug mas layo pa.

Ang gigming nga instrumento nga gitawag ug geolocator gitaod diha sa ubay-ubayng langgam. Kini nga instrumento halos parehas ka gaan sa paper clip, ug nasayran pinaagi niini nga ang ubang tern nakalupad ug mga 90,000 kilometros padulong ug pabalik​—ang kinalay-ang distansiya nga narekord sa pag-migrate sa mga hayop. Usa ka langgam nakalupad ug mga 96,000 kilometros! Nganong nausab ang gibanabanang distansiya?

Bisag asa pa sila magsugod pag-migrate, ang arctic tern dili moagi sa deretso nga ruta. Base sa makita diha sa mapa, ang ilang naandang ruta diha sa Atlantic Ocean pormag S. Ngano? Kay ang mga langgam manglupad pabor sa direksiyon sa hangin.

Sulod sa gitas-on sa ilang kinabuhi nga mga 30 ka tuig, ang tern tingali nakabiyahe nag kapin sa 2.4 milyong kilometros. Katumbas kana sa tulo o upat ka round-trip paingon sa bulan! “Katingalahan kaayo kini alang sa usa ka langgam nga motimbang lag kapin sa 100 ka gramo,” matod sa usa ka researcher. Ug kay ang mga arctic tern makaabot man sa ting-init sa Antarctica, ug makabalik sa Arctic panahon sab sa ting-init, sila makaeksperyensiyag “mas taas nga oras sa kahayag matag tuig kay sa bisan unsang linalang,” nag-ingon ang librong Life on Earth: A Natural History.