1, 2. (a) Nganong ang mga tawo sa adlaw ni Pablo nabalaka bahin sa pagpangulipon ug kagawasan? (b) Ngadto kang kinsa gigiyahan ni Pablo ang mga tawo aron matagamtam ang tinuod nga kagawasan?

ANG unang siglong mga Kristohanon nagpuyo sa Imperyo sa Roma diin ang mga tawo nagpasigarbo sa ilang kaugalingon ingong tigdepensa sa balaod, hustisya, ug kagawasan. Pero, naangkon niini ang gahom ug himaya tungod sa paghago sa mga ulipon. Dihay panahon nga mga 30 porsiyento sa populasyon mga ulipon. Walay duhaduha, gikabalak-an sa komon nga mga tawo, apil sa mga Kristohanon, ang pagpangulipon ug kagawasan.

² Ang mga sulat ni apostol Pablo daghag gihisgotan bahin sa kagawasan. Pero, dili tuyo sa iyang ministeryo ang pag-usab sa kahimtang sa komunidad ug politika​—nga maoy gipaningkamotan sa mga tawo niadtong panahona. Imbes modangop sa tawhanong mga magmamando o ahensiya aron makabatog kagawasan, si Pablo ug ang ubang Kristohanon nagkugi pag-ayo sa pagtabang sa mga tawo nga mahibaloan ang maayong balita sa Gingharian sa Diyos ug ang dili hitupngang bili sa halad lukat ni Kristo Jesus. Gigiyahan ni Pablo ang iyang mga igsoon ngadto sa Tuboran sa tinuod nga kagawasan. Pananglitan, sa iyang ikaduhang sulat sa  mga Kristohanon sa Corinto, siya klarong miingon: “Si Jehova mao ang Espiritu; ug kon asa gani ang espiritu ni Jehova, adunay kagawasan.”​—2 Cor. 3:17.

3, 4. (a) Nganong nasulti ni Pablo ang nasulat sa 2 Corinto 3:17? (b) Unsay angay natong buhaton aron matagamtam ang kagawasan nga gikan kang Jehova?

³ Sa unang bahin niini nga sulat ngadto sa mga taga-Corinto, si Pablo naghisgot bahin sa himaya ni Moises dihang milugsong kini sa Bukid sa Sinai human moatubang sa anghel ni Jehova. Pagkakita nila kang Moises, ang mga tawo nangahadlok, ug gitaptapan ni Moises ang iyang nawong. (Ex. 34:29, 30, 33; 2 Cor. 3:7, 13) “Apan,” si Pablo nag-ingon, “dihang [ang usa] modangop kang Jehova, ang taptap pagakuhaon.” (2 Cor. 3:16) Unsay gipasabot ni Pablo?

⁴ Sumala sa atong nakat-onan sa nag-unang artikulo, si Jehova nga Maglalalang sa tanang butang mao lang ang Persona nga may bug-os ug walay limitasyong kagawasan. Busa, makataronganon ang pag-ingon nga sa atubangan ni Jehova ug “kon asa gani ang espiritu ni Jehova,” dunay kagawasan. Pero, aron matagamtam ug makabenepisyo niana nga kagawasan, angay tang “modangop kang Jehova,” o makigsuod kaniya. Dihang nakiglabot si Jehova sa mga Israelinhon sa kamingawan, wala nila kana lantawa sa espirituwal nga paagi. Ang ilang kasingkasing ug hunahuna sama rag gitaptapan ug migahi, nga nagpokus lang sa paggamit sa ilang kagawasan sa Ehipto sa pisikal, o unodnon, nga paagi.​—Heb. 3:8-10.

5. (a) Unsa nga kagawasan ang ihatag sa espiritu ni Jehova? (b) Giunsa nato pagkahibalo nga ang literal nga pagkaulipon o pagkapriso wala makapamenos sa kagawasan nga gihatag ni Jehova? (c) Unsang mga pangutana ang angay natong tubagon?

⁵ Pero ang kagawasan nga ihatag sa espiritu ni Jehova dili lang kagawasan gikan sa literal nga pagkaulipon. Labaw pa sa gipaningkamotang makab-ot sa tawo, ang espiritu ni Jehova maghatag ug kagawasan gikan sa pagkaulipon sa sala ug kamatayon, ingon man gikan sa pagkaulipon sa bakak nga pagsimba ug sa mga tulumanon niini. (Roma 6:23; 8:2) Maayo gyod nâ nga kagawasan! Makabenepisyo niana nga kagawasan bisan kadtong napriso o literal nga naulipon. (Gen. 39:20-23) Tinuod gyod kini kang Sister Nancy Yuen ug Brader Harold King, nga parehong napriso sa daghang katuigan tungod sa ilang pagtuo. Imo silang makita nga mag-asoy sa ilang eksperyensiya diha sa JW Broadcasting. (Tan-awa ang INTERVIEWS AND EXPERIENCES > ENDURING TRIALS.) Pero, kinahanglan natong konsiderahon kining mga pangutanaha: Unsaon nato pagpakita nga atong giapresyar ang atong kagawasan? Ug unsay atong mahimo aron maalamon natong magamit kini nga kagawasan?

6. Giunsa pagpakita sa mga Israelinhon nga wala silay apresasyon sa kagawasan nga gihatag ni Jehova kanila?

⁶ Dihang mahibaloan nato ang tinuod nga bili sa mahalong regalo, mapalihok ta sa pagpakita sa atong pasalamat sa naghatag. Wala apresyaha sa mga Israelinhon ang kagawasan nga gihatag ni Jehova kanila dihang giluwas niya sila sa Ehipto. Pipila lang ka bulan human sila luwasa, sila misugod sa pagpangandoy sa pagkaon ug ilimnon nga ilang natagamtam sa Ehipto ug mireklamo sa tagana ni Jehova. Gusto pa gani nilang mobalik didto. Hunahunaa ra, mas gipili nila ang isda, pepino, pakwan, sibuyas dahon, bombay, ug ahos kay sa kagawasan sa pagsimba sa tinuod nga Diyos, si Jehova. Maong dili ikatingala nga nasuko pag-ayo si Jehova sa iyang katawhan! (Num. 11:5, 6, 10; 14:3, 4) Leksiyon gyod nâ alang kanato!

7. Giunsa pagpadapat ni Pablo ang iyang tambag sa 2 Corinto 6:1, ug unsaon nato siya pagsundog?

 ⁷ Si Pablo nag-awhag sa tanang Kristohanon nga dili balewalaon ang kagawasan nga mahigugmaong gihatag ni Jehova kanato pinaagi sa iyang Anak, si Jesu-Kristo. (Basaha ang 2 Corinto 6:1.) Hunahunaa ang kaguol ug kahasol sa konsensiya nga gibati ni Pablo tungod sa pagkaulipon sa sala ug kamatayon. Bisan pa niana, siya nakaingon: “Salamat sa Diyos pinaagi kang Jesu-Kristo nga atong Ginoo!” Ngano? Giingnan niya ang ubang Kristohanon: “Kay ang balaod nianang espiritu nga naghatag ug kinabuhi nga nahiusa kang Kristo Jesus nagpagawas na kaninyo gikan sa balaod sa sala ug sa kamatayon.” (Roma 7:24, 25; 8:2) Ingong pagsundog kang Pablo, dili pod nato balewalaon nga gipahigawas ta ni Jehova gikan sa pagkaulipon sa sala ug kamatayon. Pinaagi sa lukat, makaalagad ta sa Diyos nga hinlo ang konsensiya ug magmalipayon sa pagbuhat niana.​—Sal. 40:8.

8, 9. (a) Unsay gipasidaan ni Pedro maylabot sa paggamit sa atong kagawasan? (b) Unsang mga kapeligrohan ang atong maatubang karon?

⁸ Pero gawas sa pagpasalamat, kinahanglan tang mag-amping nga dili gyod gamiton sa sayop nga paagi ang atong kagawasan. Si apostol Pedro nagpasidaan maylabot sa paggamit sa atong kagawasan ingong rason sa pagtagbaw sa atong unodnong mga tinguha. (Basaha ang 1 Pedro 2:16.) Dili ba kana nga pasidaan magpahinumdom nimo sa nahitabo sa mga Israelinhon didto sa kamingawan? Ug naa gihapon karon ang maong kapeligrohan, tingali mas grabe pa gani. Si Satanas ug ang iyang kalibotan nagtanyag ug mas makapadaning kapilian sa sinina ug pamostura, pagkaon ug ilimnon, kalingawan ug lingawlingaw, ug uban pang butang. Ang hanas nga mga tig-advertise sagad mogamit ug hitsuraang mga modelo aron malimbongong ipasiugda ang mga butang nga kinahanglanon kuno nato bisag dili. Dali ra gyong mabiktima niana nga mga panglimbong ug magamit sa sayop nga paagi ang atong kagawasan!

⁹ Mapadapat pod ang tambag ni Pedro sa mas seryosong bahin sa kinabuhi, sama sa pagpilig edukasyon, trabaho, o karera. Pananglitan, ang mga batan-on karon gipresyur nga maningkamot pag-ayo aron dawaton sa kinamaayohang mga unibersidad. Gipatuo sila nga ang taas nga edukasyon maghatag nilag kahigayonan para sa dagkog suweldo ug nindot nga trabaho, ug sagad pakitaan silag estatistika nga mas dakog suweldo ang migraduwar niana nga mga eskuylahan kay niadtong nakahuman lag hayskul. Kay ang ilang desisyon makaapektar sa tibuok nilang kinabuhi, makapadani kaayo sa mga batan-on ang maong tanyag. Unsay angayng hinumdoman nila ug sa ilang mga ginikanan?

10. Unsay kinahanglang hinumdoman dihang gamiton nato ang atong kagawasan sa pagpili?

¹⁰ Gibati sa pipila nga kay personal nga butang ang pagpili, kinahanglang may kagawasan silang mopili sa ilang gusto basta itugot sa ilang konsensiya. Tingali, naa sa ilang hunahuna ang giingon ni Pablo sa mga Kristohanon sa Corinto: “Nganong ang akong kagawasan hukman man pinaagi sa tanlag sa laing tawo?” (1 Cor. 10:29) Oo, may kagawasan ta sa paghimog personal nga pagpili maylabot sa edukasyon ug karera, pero kinahanglan pod natong hinumdoman nga dili bug-os ang atong kagawasan ug ang tanan natong desisyon may mga resulta. Tungod niana, gisugdan ni Pablo ang iyang gisulti sa pag-ingon: “Ang tanang butang subay sa balaod [o, gitugot]; apan dili ang tanang butang may kaayohan. Ang tanang butang subay sa balaod; apan dili ang tanang butang makapalig-on.” (1 Cor. 10:23) Makatabang nâ nato sa pagsabot nga dihang gamiton nato ang atong kagawasan sa tanang bahin  sa atong kinabuhi, dunay mas importanteng mga butang nga angayng konsiderahon kay sa atong gusto.

11. Nganong gipahigawas man ta?

¹¹ Sa iyang pasidaan bahin sa sayop nga paggamit sa kagawasan, si Pedro naghisgot usab ug katuyoan. Siya nag-awhag nato nga gamiton ang atong kagawasan “ingong mga ulipon sa Diyos.” Busa, ang tinuod nga rason kon nganong gigamit ni Jehova si Jesus sa pagpahigawas nato gikan sa balaod sa sala ug kamatayon mao: Aron magkinabuhi ta ingong dedikadong “mga ulipon sa Diyos.”

12. Unsang ehemplo ang gipakita ni Noe ug sa iyang pamilya?

¹² Ang kinamaayohang paagi nga malikayan nato ang sayop nga paggamit sa kagawasan ug maulipon pag-usab sa ambisyon ug tinguha sa kalibotan mao ang pagpokus sa espirituwal nga mga tumong. (Gal. 5:16) Pananglitan, konsideraha ang patriarkang si Noe ug ang iyang pamilya. Nagpuyo sila sa bayolente ug imoral nga kalibotan. Pero, wala sila maimpluwensiyahi sa mga tinguha ug kalihokan sa mga tawo sa ilang palibot. Giunsa nila kana paghimo? Gituman nila ang tanang gipabuhat ni Jehova kanila​—paghimo sa arka, pagtigom ug pagkaon para nila ug sa mga hayop, ug pagpasidaan sa uban. “Gibuhat ni Noe ang sumala sa tanan nga gisugo sa Diyos kaniya. Gibuhat niya ang ingon gayod.” (Gen. 6:22) Unsay resulta? Si Noe ug ang iyang pamilya naluwas dihang nalaglag ang maong kalibotan.​—Heb. 11:7.

13. Unsang sugo ang nadawat ni Jesus nga gisugo pod niya sa iyang mga sumusunod?

¹³ Unsay gisugo ni Jehova kanato karon? Ingong mga tinun-an ni Jesus, nahibalo ta sa gisugo sa Diyos kanato. (Basaha ang Lucas 4:18, 19.) Kadaghanan karon nabutaan gihapon sa diyos niini nga sistema sa mga butang ug naulipon sa sistema sa relihiyon, ekonomiya, ug komunidad. (2 Cor. 4:4) Pribilehiyo nato ang pagsundog kang Jesus sa pagtabang sa mga tawo aron ilang mailhan ug simbahon si Jehova, ang Diyos sa kagawasan. (Mat. 28:19, 20) Dili nâ sayon, ug makaatubang tag daghang problema. Sa pipila ka lugar, nagkadaghan ang dili maminaw, ang  uban masuko pa gani. Busa, angayng pangutan-on sa matag usa ang kaugalingon, ‘Magamit ba nako ang akong kagawasan aron mas makasuportar sa buluhaton sa Gingharian?’

14, 15. Unsay pagbati sa katawhan sa Diyos bahin sa buluhatong pagsangyaw? (Tan-awa ang hulagway sa sinugdan sa artikulo.)

¹⁴ Makapadasig kaayong makita nga daghan ang mibati sa pagkadinalian sa atong panahon ug nagpasimple sa ilang kinabuhi aron makasangyaw nga bug-os panahon. (1 Cor. 9:19, 23) Ang pipila nag-alagad diha sa ilang mga teritoryo; ang uban namalhin sa lugar nga nagkinahanglag dugang magsasangyaw. Gipakita sa rekord nga sa milabayng lima ka tuig, ang aberids nga gidaghanon sa mga regular payunir miuswag ngadto sa kapig 1,100,000 ug kapig 250,000 ang nadugang nga bug-os panahong magsasangyaw. Maayo kaayo ni nga resulta sa maalamong paggamit sa kagawasan sa pag-alagad kang Jehova!​—Sal. 110:3.

¹⁵ Unsay nakatabang sa maong mga igsoon nga maalamong magamit ang ilang kagawasan? Konsideraha si John ug Judith, nga nakaalagad na sa daghang nasod sulod sa 30 ka tuig. Sila nahinumdom nga dihang nagsugod ang Pioneer Service School niadtong 1977, gipasiugda gyod ang pagkaandam mobalhin ug moalagad sa mga lugar nga nagkinahanglag dugang magsasangyaw. Aron makapokus sa ilang tumong, si John miingon nga kadaghan siyang magbalhinbalhin ug trabaho aron magpabiling simple ang kinabuhi. Dihang nakabalhin na sila sa laing nasod, ilang nakat-onan nga ang pag-ampo ug pagsalig kang Jehova nakatabang nila sa pag-atubang sa mga kalisdanan sama sa pagtuon ug bag-ong pinulongan, pag-adyas sa bag-ong kultura, ug pag-agwanta sa lisod nga klima. Unsay ilang pagbati niadto nga mga tuig sa pag-alagad? “Para nako, gihimo nako ang pinakamaayong buluhaton nga akong nahibaloan o naeksperyensiyahan,” matod ni John. “Nahimong mas tinuod si Jehova kanako, nga samag mahigugmaong amahan. Karon, mas nasabtan nako ang Santiago 4:8: ‘Duol sa Diyos, ug siya moduol kaninyo.’ Nakita na nako ang akong gipangita, ang makapalipayng katuyoan sa kinabuhi.”

16. Sa unsang paagi maalamong gigamit sa libolibo ang ilang kagawasan bisag limitado ang ilang kahimtang?

¹⁶ Dili sama ni John ug Judith, ang sirkumstansiya sa uban dili motugot nila nga magdugay sa bug-os panahong pag-alagad. Pero, gipahimuslan sa daghan ang kahigayonan nga makaboluntaryo sa mga konstruksiyon sa atong organisasyon sa tibuok kalibotan. Pananglitan, dihang gitukod ang hedkuwarter sa Warwick, New York, mga 27,000 ka igsoon ang miboluntaryo​—gikan sa duha ka semana ngadto sa usa ka tuig o kapin pa. Para makaboluntaryo, gihunong usâ sa daghan kanila ang ilang normal nga kalihokan sa kinabuhi. Maayo gyod kaayong paagi kana sa paggamit sa ilang kagawasan aron dayegon ug pasidunggan si Jehova, ang Diyos sa kagawasan!

17. Unsa ang nindot nga kaugmaon niadtong maalamong naggamit sa ilang kagawasan?

¹⁷ Mapasalamaton ta nga nailhan nato si Jehova ug natagamtam nato ang kagawasan nga resulta sa tinuod nga pagsimba. Hinaot ipakita nato sa atong mga pagpili nga atong gipabilhan ang maong kagawasan. Imbes balewalaon kana o gamiton sa sayop nga paagi, gamiton nato ang atong kagawasan ug ang mga kahigayonan nga ihatag niini sa pag-alagad kang Jehova kutob sa atong mahimo. Kon buhaton nato kana, makalaom ta nga matagamtam ang mga panalangin nga gisaad ni Jehova dihang matuman na kini nga tagna: “Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”​—Roma 8:21.