Ang Hebreohanong mga pulong puwedeng hubaron sa duha ka paagi. Busa, ang rebisyon niana gibase sa mosunod:

1. Ang mga pulong sa maong rebisyon gisuportahan sa diksiyonaryo ug grammar. Ang koneksiyon sa Salmo 144:12-15 ug sa nag-unang mga bersikulo nagdepende sa kahulogan sa unang pulong sa bersikulo 12, nga mao ang Hebreohanong pulong nga asher. Ang asher puwedeng hubaron sa pipila ka paagi. Pananglitan, puwede ning sabton ingong relative pronoun, sama sa “who” o “whom.” Sa daang hubad, “who” ang gigamit. Tungod niini, ang mga daotan nga gihisgotan sa nag-unang mga bersikulo mao ang nakatagamtam sa maayong mga butang nga gihisgotan sa bersikulo 12 ngadto sa 14. Pero ang asher puwede pong magtumong sa resulta, ug puwedeng hubaron ug “that,” “so that,” o “then.” “Then” ang gigamit sa 2013 nga rebisyon ug sa ubang hubad sa Bibliya.

2. Ang rebisyon haom kaayo sa ubang bahin sa salmo. Ang paggamit ug “then” sa bersikulo 12 nagpasabot nga ang mga panalangin nga gihisgotan sa bersikulo 12 ngadto sa 14 matagamtam sa mga matarong​—kadtong mihangyo nga ‘pagawson ug luwason’ gikan sa mga daotan (bersikulo 11). Kini nga kausaban makita sab sa bersikulo 15, dihang ang pulong nga “malipayon,” nga kaduha mabasa, pareho nang positibog kahulogan. Ingong resulta, ang gihisgotang duha ka kalipay matagamtam sa mao rang katawhan​—ang katawhan “kansang Diyos mao si Jehova!” Hinumdomi sab nga ang orihinal nga Hebreohanong teksto walay punctuation, sama sa quotation mark. Busa, kinahanglang susihon sa mga maghuhubad ang hustong kahulogan niini, nga konsiderahon ang Hebreohanong estilo sa pagsulat ug balak, ang konteksto, ug ang ubang konektadong teksto sa Bibliya.

3. Ang rebisyon nahiuyon sa ubang teksto sa Bibliya nga nagsaad ug mga panalangin para sa matinumanong katawhan sa Diyos. Tungod sa giusab nga hubad sa asher, gipakita na sa maong salmo ang may basehanang paglaom ni David nga human luwasa sa Diyos ang nasod sa Israel gikan sa ilang mga kaaway, Iyang panalanginan ang katawhan ug kalipay ug kauswagan. (Lev. 26:9, 10; Deut. 7:13; Sal. 128:1-6) Pananglitan, ang Deuteronomio 28:4 nag-ingon: “Mapanalanginan ang bunga sa imong tiyan ug ang bunga sa imong yuta ug ang bunga sa imong binuhing mananap, ang nati sa imong mga baka ug ang liwat sa imong mga karnero.” Tinuod kana, kay panahon sa pagmando sa anak ni David nga si Solomon, ang nasod nakatagamtam ug talagsaong kalinaw ug kauswagan. Dugang pa, ang pipila ka bahin sa pagmando ni Solomon may dakong katumanan sa pagmando sa Mesiyas.​—1 Hari 4:20, 21; Sal. 72:1-20.

Ingong konklusyon, ang rebisyon sa Salmo 144 wala mag-usab sa atong pagsabot sa pagtulon-an sa Bibliya. Hinunoa, mas klarong gipakita niini ang dugay nang gilaoman sa mga alagad ni Jehova​—ang paglaglag sa mga daotan nga sundan ug malungtarong kalinaw ug kauswagan para sa mga matarong.​—Sal. 37:10, 11.