SA MIAGING tuig, linibong brader sa tibuok kalibotan ang natudlo ingong ansiyano ug ministeryal nga alagad taliwala sa mga Saksi ni Jehova. Kon usa ka nianang minahal nga mga brader, seguradong nalipay ka sa imong bag-ong pribilehiyo.

Pero, dili kalikayan nga medyo mabalaka tingali ka. Si Jason, usa ka batabatang ansiyano, miingon, “Dihang bag-o kong natudlo, morag nabug-atan ko sa akong mga responsibilidad.” Si Moises ug Jeremias mibating dili kuwalipikado dihang gihatagan sila ni Jehova ug bag-ong mga asaynment. (Ex. 4:10; Jer. 1:6) Kon mibati sab ka niana, sa unsang paagi mawala kana ug padayong mouswag? Konsideraha ang Kristohanong tinun-an nga si Timoteo.​—Buh. 16:1-3.

Si Timoteo lagmit mga 20 anyos o kapin pa dihang gipauban siya ni apostol Pablo sa iyang pagbiyahe. Sa sinugdan, kay batan-on pa, tingali si Timoteo kulag pagsalig sa kaugalingon ug basin nagduhaduha sa pagpas-an sa iyang bag-ong responsibilidad. (1 Tim. 4:11, 12; 2 Tim. 1:1, 2, 7) Pero, 10 ka tuig sa ulahi, nakaingon na si Pablo sa kongregasyon sa Filipos: “Ako naglaom sa Ginoong Jesus sa pagpadala kang Timoteo nganha kaninyo sa dili-madugay . . . Kay wala akoy lain nga may sama kaniyag tinamdan.”​—Filip. 2:19, 20.

Sa unsang paagi nahimong maayong ansiyano si Timoteo? Atong konsiderahon ang unom ka leksiyon gikan sa iyang ehemplo.

1. Mahunahunaon gyod siya sa mga tawo. Si Pablo miingon sa mga igsoon sa Filipos: “[Si Timoteo] tiunay nga moatiman sa mga butang labot kaninyo.” (Filip. 2:20) Oo, mahunahunaon si Timoteo sa mga tawo. Interesado gyod siya sa ilang espirituwalidad, ug andam niyang ihatag ang iyang kaugalingon para kanila.

Ayaw sundoga ang drayber sa bus diha sa usa ka estorya nga mas naghunahuna nga makaabot sa matag hunonganan nga untop sa panahon imbes magpasakayg mga pasahero. Si William, usa ka tinahod nga ansiyano sulod na sa kapig 20 ka tuig, nagtambag sa bag-ong natudlong mga brader: “Mahala ang mga igsoon. Pagpokus sa ilang panginahanglan imbes sa inyong pagdumala.”

2. Giuna niya ang buluhaton sa Gingharian. Sa pagpakita nga lahi si Timoteo sa uban, si Pablo miingon: “Ang tanang uban pa nagtinguha sa ilang kaugalingong kaayohan, dili nianang kang Kristo Jesus.” (Filip. 2:21) Gisulat kini ni Pablo sa Roma. Namatikdan niya nga ang mga igsoon didto puliki kaayo sa personal nga mga kalihokan. Wala kaayo sila magpokus sa buluhaton sa Gingharian. Pero lahi si Timoteo! Dihang may mga kahigayonan sa pagsangyaw sa maayong balita, gisundog niya ang panghunahuna ni Isaias, kinsa miingon: “Ania ako! Ipadala ako.”​—Isa. 6:8.

Unsaon nimo pagbalanse ang imong personal ug espirituwal nga mga obligasyon? Una, paghimog prayoridad. Si Pablo nag-awhag: “[Tinoa] ang mas hinungdanong mga butang.” (Filip. 1:10) Himoang prayoridad ang prayoridad sa Diyos. Ikaduha, pagpasimple. Wad-a ang bisan unsa nga makahurot sa imong panahon ug kusog. Si Pablo nagtambag kang Timoteo: “Kalagiw gikan sa mga tinguha nga iya sa pagkabatan-on, apan tinguhaa ang pagkamatarong, pagtuo, gugma, pakigdait.”​—2 Tim. 2:22.

 3. Nagkugi siya sa sagradong pag-alagad. Gipahinumdoman ni Pablo ang mga taga-Filipos: “Kamo nahibalo sa pamatuod nga . . . gihatag [ni Timoteo] labot sa iyang kaugalingon, nga sama sa usa ka anak uban sa amahan siya nagpaulipon uban kanako sa pagpauswag sa maayong balita.” (Filip. 2:22) Dili tapolan si Timoteo. Nagkugi siya kauban ni Pablo, ug kini nakapasuod nila.

Daghag trabaho diha sa organisasyon sa Diyos karon. Makapatagbaw gyod ni nga mga trabaho ug mas makapasuod ni nimo sa imong mga igsoon sa pagtuo. Busa himoang tumong nga kanunayng “puliki diha sa buluhaton sa Ginoo.”​—1 Cor. 15:58.

4. Gipadapat niya ang iyang nakat-onan. Si Pablo misulat kang Timoteo: “Imong gisunod pag-ayo ang akong gitudlo, ang akong paagi sa pagkinabuhi, ang akong katuyoan, ang akong pagtuo, ang akong hataas-nga-pailob, ang akong gugma, ang akong pagkamainantoson.” (2 Tim. 3:10) Kay gipadapat ni Timoteo ang iyang nakat-onan, siya kuwalipikado para sa mas dakong responsibilidad.​—1 Cor. 4:17.

Duna bay igsoon nga nagtabang nimo nga mouswag sa espirituwal? Kon wala, puwede kang mangita. Si Tom, nga dugay nang ansiyano, nahinumdom: “May eksperyensiyadong ansiyano nga nagpakitag personal nga interes nako ug gibansay ko niya pag-ayo. Pirme kong mangayog tambag niya ug sundon nako ni. Tungod niana, nakabaton dayon kog kompiyansa sa kaugalingon.”

5. Pirme niyang gibansay ang iyang kaugalingon. Si Pablo nagtambag kang Timoteo: “Bansaya ang imong kaugalingon nga maoy tumong ang diyosnong pagkamahinalaron.” (1 Tim. 4:7) Ang usa ka atleta tingali may coach, pero kinahanglan sab niyang bansayon ang iyang kaugalingon. Si Pablo nag-awhag kang Timoteo: “Magmakugihon diha sa publikong pagbasa, sa pagpanambag, sa pagpanudlo. . . . Palandonga kining mga butanga; hatagi kinig bug-os nga pagtagad, aron ang imong pag-uswag madayag sa tanan nga mga tawo.”​—1 Tim. 4:13-15.

Kinahanglan sab nga padayon nimong pauswagon ang imong mga katakos. Pagkugi sa pagtuon ug sunda ang bag-ong direksiyon sa organisasyon. Likayi sab ang sobrang pagsalig sa kaugalingon​—nga tingali maghunahunang eksperyensiyado na kaayo ka nga maatubang na nimo ang bisan unsang situwasyon nga dili mag-research. Sa pagsundog kang Timoteo, “tagda kanunay ang imong kaugalingon ug ang imong pagpanudlo.”​—1 Tim. 4:16.

6. Misalig siya sa espiritu ni Jehova. Kon bahin sa ministeryo ni Timoteo, gipahinumdoman siya ni Pablo: “Kining bililhong butang [nga] gipiyal bantayi pinaagi sa balaang espiritu nga nagpuyo kanato.” (2 Tim. 1:14) Aron mabantayan ang iyang ministeryo, kinahanglang mosalig si Timoteo sa espiritu sa Diyos.

Si Donald, nga dugay nang ansiyano, nakaingon: “Kinahanglang pabilhan sa tinudlong mga brader ang ilang relasyon sa Diyos. Kadtong mohimo niana mouswag ‘gikan sa pagkakusganon ngadto sa pagkakusganon.’ Kon sila moampo alang sa espiritu sa Diyos ug ugmaron ang bunga niini, panalangin gyod sila sa mga igsoon.”​—Sal. 84:7; 1 Ped. 4:11.

Makapadasig kaayong makita ang daghang bag-ong tinudlo nga brader, sama nimo, nga miuswag sa espirituwal. Si Jason, nga gihisgotan sa sinugdan, miingon: “Sukad nga nahimo kong ansiyano, daghan kog nakat-onan ug miuswag ang akong kompiyansa sa kaugalingon. Karon, ganahan kaayo ko sa akong asaynment ug gilantaw kini ingong nindot nga pribilehiyo!”

Gusto ba nimo nga padayong mouswag sa espirituwal? Himoang tumong ang pagsundog kang Timoteo. Pinaagi niana, mahimo sab kang panalangin sa katawhan sa Diyos.