1. Ingon sa gipatin-aw sa Efeso 6:10-13, unsa ang usa ka makapatandog kaayong paagi nga gipakita ni Jehova ang iyang pagkamahunahunaon kanato? Ipatin-aw.

ANG usa ka makapatandog kaayong paagi nga gipakita ni Jehova ang iyang pagkamahunahunaon kanato mao ang iyang pagtabang nato nga masuklan ang atong mga kaaway. Ang panguna natong mga kaaway mao si Satanas ug ang mga demonyo. Gipasidan-an ta ni Jehova bahin nila, ug gihatag niya ang atong gikinahanglan aron masuklan sila. (Basaha ang Efeso 6:10-13.) Kon dawaton nato ang tabang ni Jehova ug bug-os tang mosalig niya, masuklan nato ang Yawa. Magmasaligon ta sama kang apostol Pablo, kinsa misulat: “Kon ang Diyos dapig kanato, kinsa ang batok kanato?”—Roma 8:31.

2. Unsay atong konsiderahon niining artikuloha?

² Ingong tinuod nga mga Kristohanon, wala nato hatagig dakong atensiyon si Satanas ug ang mga demonyo. Nagpokus ta sa pagkat-on bahin kang Jehova ug sa pag-alagad kaniya. (Sal. 25:5) Pero kinahanglan pod tang mahibalo sa ginahimo ni Satanas. Ngano? Aron dili ta niya mailad. (2 Cor. 2:11) Niining artikuloha, atong konsiderahon ang pangunang paagi nga si Satanas ug ang mga demonyo naglimbong sa mga tawo. Hisgotan pod nato kon sa unsang paagi masuklan sila.

3-4. (a) Unsa ang espiritismo? (b) Unsa ka daghan ang nagtuo sa espiritismo?

³ Ang pangunang paagi nga si Satanas ug ang mga demonyo naglimbong sa mga tawo maoy pinaagi sa espiritismo. Ang nagahimo  niana nangangkon nga sila makahibalo o makakontrol sa mga butang nga dili mahimo sa ordinaryong tawo. Pananglitan, ang pipila nangangkon nga mahibalo sila sa umaabot pinaagi sa pagpanagna o astrolohiya. Ipakita tingali sa uban nga morag nakig-estorya sila sa patay. Ang pipila nagahimog madyik, ug ang uban mamarang. *

⁴ Unsa ka daghan ang nagtuo sa espiritismo? Ang usa ka surbi nga gihimo diha sa 18 ka nasod sa Latin America ug Caribbean nagpakita nga mga 1 sa matag 3 ka tawo nga gisurbi ang nagtuo sa madyik ug pagpamarang. Halos ingon pod ana ka daghan ang nagtuo nga posible ang pagpakig-estorya sa mga espiritu. May surbi pod nga gihimo diha sa 18 ka nasod sa Africa. Didto, kapin sa katunga sa gisurbi ang nagtuo sa pagpamarang. Siyempre, bisan asa ta nagpuyo, kinahanglang likayan nato ang espiritismo. Kon buot hunahunaon, naningkamot si Satanas sa paglimbong “sa tibuok gipuy-ang yuta.”—Pin. 12:9.

5. Unsay pagbati ni Jehova sa espiritismo?

⁵ Si Jehova ang “Diyos sa kamatuoran.” (Sal. 31:5) Busa unsay iyang pagbati sa espiritismo? Gidumtan niya kini! Iyang giingnan ang mga Israelinhon: “Walay makaplagan diha kanimo nga bisan kinsang magpaagi sa iyang anak nga lalaki o sa iyang anak nga babaye sa kalayo, bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova.” (Deut. 18:10-12) Ang mga Kristohanon dili na ilalom sa Balaod nga gihatag ni Jehova sa mga Israelinhon. Pero kabalo ta nga wala mausab ang iyang pagbati sa espiritismo.—Mal. 3:6.

6. (a) Giunsa paggamit ni Satanas ang espiritismo aron daoton ang mga tawo? (b) Sumala sa Ecclesiastes 9:5, unsa ang kamatuoran bahin sa kahimtang sa mga patay?

⁶ Si Jehova nagpasidaan kanato bahin sa espiritismo kay nahibalo siya nga gigamit nâ ni Satanas aron daoton ang mga tawo. Gigamit niya ang espiritismo aron ipasiugda ang kabakakan—apil niana ang bakak nga pagtulon-an nga ang mga patay buhi gihapon sa laing kalibotan. (Basaha ang Ecclesiastes 9:5.) Gigamit sab nâ ni Satanas aron mahadlok ang mga tawo ug mopalayo sila kang Jehova. Gusto niyang mosalig ang mga tawo sa daotang mga espiritu imbes kang Jehova.

7. Unsay gitudlo ni Jehova kanato?

⁷ Sa nahisgotan na, gitudloan ta ni Jehova aron dili ta malimbongan ni Satanas ug sa mga demonyo. Konsideraha ang pipila ka paagi nga makasukol ta kang Satanas ug sa mga demonyo.

8. (a) Unsa ang pangunang paagi nga makasukol ta sa daotang mga espiritu? (b) Giunsa pagpadayag sa Salmo 146:4 nga bakak ang giingon ni Satanas bahin sa mga patay?

⁸ Basaha ug pamalandonga ang Pulong sa Diyos. Kini ang pangunang paagi aron dili ta motuo sa mga bakak sa daotang mga espiritu. Ang Pulong sa Diyos samag hait nga  espada nga makapanghimakak sa giingon ni Satanas. (Efe. 6:17) Pananglitan, gipakita sa Bibliya nga dili tinuod nga ang mga patay puwedeng makig-estorya sa mga buhi. (Basaha ang Salmo 146:4.) Nagpahinumdom sab ni nato nga si Jehova ra ang tinuod nga makatagna sa umaabot. (Isa. 45:21; 46:10) Kon pirme natong basahon ug pamalandongon ang Pulong sa Diyos, matabangan ta sa pagsalikway sa mga bakak nga gipatuo sa daotang mga espiritu ug dumtan kini.

9. Unsang mga buhat sa espiritismo ang atong likayan?

⁹ Likayi ang pagbuhat ug bisan unsa nga konektado sa espiritismo. Ingong tinuod nga mga Kristohanon, dili ta mohimog bisan unsang buhat sa espiritismo. Pananglitan, dili ta moduol ug espiritista o mangitag paagi aron maestorya ang mga patay. Sa nahisgotan na sa miaging artikulo, dili ta moapil sa mga kostumbre sa paglubong nga gibase sa patuotuo nga buhi pa ang mga patay sa laing kalibotan. Ug dili ta mogamit ug astrolohiya o pagpanag-an aron mahibaloan ang umaabot. (Isa. 8:19) Nahibalo ta nga peligroso kaayo ang espiritismo ug pinaagi niana, direkta tang nakiglabot kang Satanas ug sa mga demonyo.

10-11. (a) Unsay gihimo sa pipila niadtong unang siglo dihang nahibaloan nila ang kamatuoran? (b) Sumala sa 1 Corinto 10:21, nganong kinahanglan natong sundogon ang unang mga Kristohanon, ug unsaon nato nâ pagbuhat?

¹⁰ Idespatsar ang bisan unsang butang nga konektado sa espiritismo. Ang pipila ka taga-Efeso sa unang siglo nagahimog espiritismo. Dihang nahibaloan nila ang kamatuoran, milihok dayon sila. “Ubay-ubay niadtong nanaggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan.” (Buh. 19:19) Gisuklan gyod nila ang daotang mga espiritu. Ang ilang mga libro sa madyik mahal kaayo. Pero ila nang gisunog imbes ihatag o ibaligya. Mas naghunahuna sila nga mapalipay si Jehova imbes maghunahuna sa kantidad sa maong mga libro.

 ¹¹ Unsaon nato pagsundog ang unang siglong mga Kristohanon? Maayong idespatsar nato ang bisan unsang butang nga konektado sa espiritismo. Apil niini ang mga anting-anting, panagang, o ubang butang nga gisul-ob o gitipigan sa mga tawo aron maprotektahan sila batok sa daotang mga espiritu.—Basaha ang 1 Corinto 10:21.

12. Unsay angay natong ipangutana sa kaugalingon dihang mamilig kalingawan?

¹² Susiha pag-ayo ang imong piliong kalingawan. Pangutan-a ang kaugalingon: ‘Nagabasa ba kog libro, magasin, o artikulo diha sa Internet bahin sa espiritismo? Komosta ang akong ginapaminawng musika, ginatan-awng pelikula ug salida sa TV, o ginadulang video game? Duna ba koy kalingawan nga konektado sa espiritismo? Naa ba ni mga bampira, zombie, o gahomgahom? Gipakita ba niini nga OK ra ang madyik, pamarang, ug panunglo?’ Siyempre, dili tanang estorya nga gibase sa imahinasyon ang konektado sa espiritismo. Dihang susihon nimo ang imong kalingawan, pilia gyod tong makatabang nimo nga makalikay sa bisan unsa nga gidumtan ni Jehova. Gusto natong buhaton ang atong pinakamaayo aron magpabiling hinlo ang atong konsensiya atubangan sa Diyos.—Buh. 24:16. *

13. Unsay atong likayan?

¹³ Likayi ang pag-estorya bahin sa mga demonyo. Niining bahina, gusto natong sundogon si Jesus. (1 Ped. 2:21) Sa wala pa moanhi sa yuta, si Jesus nabuhi na sa langit, ug daghan siyag nahibaloan bahin kang Satanas ug sa mga demonyo. Pero wala siya mag-estorya bahin sa ginahimo nianang daotang  mga espiritu. Gusto ni Jesus nga mahimong tigpamatuod bahin kang Jehova, dili kang Satanas. Masundog nato si Jesus kon dili ta mag-estorya bahin sa mga demonyo. Ato hinuong ipakita sa atong isulti nga “napukaw ang [atong] kasingkasing sa usa ka maayong butang,” nga mao ang kamatuoran.—Sal. 45:1.

14-15. (a) Nganong dili ta angayng mahadlok sa daotang mga espiritu? (b) Unsay pamatuod nga giprotektahan ni Jehova ang iyang katawhan karon?

¹⁴ Ayawg kahadlok sa daotang mga espiritu. Niining kalibotana, mahimong mahitabo kanato ang daotang mga butang, sama sa aksidente, sakit, o kamatayon pa gani. Pero dili ta angayng maghunahuna nga ang daotang mga espiritu maoy responsable niana. Ang Bibliya nag-ingon nga “ang panahon ug ang wala damhang panghitabo” modangat kang bisan kinsa. (Eccl. 9:11) Kon bahin sa mga demonyo, gipakita ni Jehova nga mas gamhanan siya kay kanila. Pananglitan, wala niya tugti si Satanas nga patyon si Job. (Job 2:6) Sa mga adlaw ni Moises, gipakita ni Jehova nga mas gamhanan siya kay sa salamangkerong mga saserdote sa Ehipto. (Ex. 8:18; 9:11) Pinaagi sa gahom nga gihatag ni Jehova, gipakita sa hinimayang si Jesus nga mas gamhanan siya kang Satanas ug sa mga demonyo dihang gitambog sila sa yuta. Ug sa dili madugay, itambog sila sa kahiladman, diin dili na sila makahimog kadaot kang bisan kinsa.—Pin. 12:9; 20:2, 3.

¹⁵ Daghan tag pamatuod nga giprotektahan ni Jehova ang iyang katawhan karon. Konsideraha kini: Kita nagsangyaw ug nagtudlo sa kamatuoran sa tanang bahin sa yuta. (Mat. 28:19, 20) Ingong resulta, atong gipahibalo sa mga tawo ang daotang binuhatan sa Yawa. Segurado nga kon makahimo siya, pugngan niya ang atong buluhaton, pero wala nâ niya mahimo. Busa, dili ta angayng mahadlok sa daotang mga espiritu. Nahibalo ta nga ang mga mata ni Jehova “nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cron. 16:9) Kon matinumanon ta kang Jehova, ang mga demonyo dili makahimog dumalayong kadaot kanato.

16-17. Paghatag ug ehemplo sa kaisog nga gikinahanglan aron masuklan ang daotang mga espiritu.

¹⁶ Nagkinahanglag kaisog ang pagsukol sa daotang mga espiritu, ilabina kon mosupak nato ang maayog intensiyon nga mga higala o paryente. Pero panalanginan ni Jehova ang nagpakitag kaisog. Konsideraha ang ehemplo sa sister nga si Erica, nga taga-Ghana. Siya 21 anyos dihang nagpa-Bible study. Kay anak sa usa ka espiritista, gidahom nga mosunod siya sa kostumbre, diin pakaonon siya sa karne nga gihalad ngadto sa mga diyos sa iyang papa. Dihang mibalibad si Erica, giisip kadto sa pamilya ingong pag-insulto sa mga diyos. Nahadlok ang pamilya nga basig mabuang o masakit sila tungod sa silot sa mga diyos.

¹⁷ Gipugos si Erica sa iyang pamilya nga mosunod sa kostumbre pero wala siya magpadala, bisan pag kinahanglan siyang mohawa sa ila. Gipapuyo siya sa ubang Saksi sa ilang balay. Nianang paagiha, gipanalanginan ni Jehova si Erica ug bag-ong pamilya—nga samag tinuod gyod niyang mga igsoon. (Mar. 10:29, 30) Bisag wala na siya dawata sa iyang pamilya ug gisunog pa gani ang iyang mga gamit, si Erica nagmaunongon kang Jehova, nabawtismohan, ug karon regular payunir na. Wala siya mahadlok sa mga demonyo. Ug kon bahin sa iyang pamilya, si Erica miingon, “Kada adlaw kong mag-ampo nga unta maeksperyensiyahan sa akong pamilya ang panalangin sa pagkaila kang Jehova ug maangkon ang kagawasan nga resulta sa pag-alagad sa atong mahigugmaong Diyos.”

18. Unsang mga panalangin ang madawat kon mosalig ta kang Jehova?

¹⁸ Dili kitang tanan ang makaeksperyensiyag ingon ana nga pagsulay sa pagtuo. Pero kinahanglang suklan natong tanan ang daotang mga espiritu ug mosalig ta kang Jehova. Kon buhaton nato kana, makadawat tag daghang panalangin ug dili ta malimbongan sa mga bakak ni Satanas. Dugang pa, dili ta mapugngan sa pag-alagad tungod sa kahadlok sa mga demonyo. Labaw sa tanan, mas masuod ta kang Jehova. “Magpasakop kamo sa Diyos,” misulat ang tinun-ang si Santiago, “apan sukli ang Yawa, ug siya mokalagiw gikan kaninyo. Duol sa Diyos, ug siya moduol kaninyo.”—Sant. 4:7, 8.