1, 2. Nganong kinahanglan natong bansayon ang uban sa pagdawat ug teokratikanhong mga asaynment?

ANG pagwali sa maayong balita sa Gingharian mao ang pangunang asaynment ni Jesus. Bisan pa niana, migahin siyag panahon sa pagbansay sa uban aron mahimong mga magbalantay ug magtutudlo. (Mat. 10:5-7) Bisag puliki si Felipe ingong ebanghelisador, walay duhaduha nga gitabangan niya ang iyang upat ka anak nga babaye nga mahimong epektibo sa pagpaambit sa kamatuoran sa Kasulatan. (Buh. 21:8, 9) Unsa ka importante ang maong pagbansay karon?

² Sa tibuok kalibotan, nagkadaghan ang midawat sa maayong balita. Ang mga bag-ohan nga dili pa bawtismado kinahanglang makakat-on sa kaimportante sa personal nga pagtuon sa Bibliya. Angay usab silang bansayon sa pagsangyaw ug sa pagpanudlo bahin sa kamatuoran. Sa atong mga kongregasyon, kinahanglang dasigon ang mga brader nga maningkamot aron mokuwalipikar ingong ministeryal nga alagad ug ansiyano. Pinaagi sa “maayong pagtudlo,” matabangan sa hamtong nga mga Kristohanon ang mga bag-ohan nga mouswag sa espirituwal.​—Prov. 4:2.

3, 4. (a) Sumala ni Pablo, unsay koneksiyon sa pagtuon sa Kasulatan ug sa mabungahong ministeryo? (b) Sa dili pa nato dasigon ang atong mga ginatun-an sa paghimog personal nga pagtuon sa Bibliya, unsay angay natong buhaton?

³ Unsa ka importante ang personal nga pagtuon sa Bibliya? Makita nato ang tubag diha sa gisulti ni apostol Pablo sa iyang mga isigka-Kristohanon sa Colosas. Siya misulat: “Kami . . . wala mohunong sa pag-ampo alang kaninyo ug sa paghangyo nga kamo unta mapuno sa tukmang kahibalo sa iyang [Jehova] kabubut-on diha sa tanang kaalam ug espirituwal nga pagsabot, aron kamo magalakaw nga takos kang Jehova aron bug-os nga makapahimuot kaniya samtang padayon kamong magapamunga sa tanang maayong buhat ug molambo sa tukmang kahibalo sa Diyos.” (Col. 1:9, 10) Tungod nianang tukmang kahibalo, ang mga Kristohanon sa Colosas mahimong ‘makalakaw nga takos kang Jehova aron bug-os nga makapahimuot kaniya.’ Kini makatabang nila nga padayong “magapamunga sa tanang maayong buhat,” ilabina sa pagsangyaw sa maayong balita. Aron epektibong makaalagad, ang usa ka magsisimba ni Jehova kinahanglang dunay rutina sa pagtuon sa Bibliya. Maayong tabangan nato ang atong ginatun-an sa Bibliya nga masabtan kana.

⁴ Dili nato matabangan ang uban nga makabenepisyo sa personal nga pagtuon sa Bibliya kon dili kita kombinsido sa kaimportante niini. Oo, kita kinahanglang dunay maayong rutina sa pagtuon sa Bibliya. Busa mahimong pangutan-on nimo ang kaugalingon: ‘Dihang ang tagbalay mohatag ug opinyon nga supak sa pagtulon-an sa Kasulatan o mosuknag lisod nga pangutana, makahatag ba kog binase sa Bibliyang tubag? Dihang magbasa ko kon sa unsang paagi si Jesus, Pablo, ug ang uban nakalahutay sa ministeryo, mamalandong ba ko kon sa unsang paagi masundog nako ang ilang paglahutay diha sa akong pag-alagad kang Jehova?’ Gikinahanglan natong tanan ang kahibalo ug tambag sa Pulong sa Diyos. Ug kon sultihan nato ang uban kon sa unsang paagi nakabenepisyo kita sa atong personal nga pagtuon, lagmit madasig nato sila nga magtuon pag-ayo sa Bibliya aron makabenepisyo usab niana.

5. Paghatag ug sugyot kon sa unsang paagi matabangan ang mga bag-ohan sa pagbatog rutina sa personal nga pagtuon sa Bibliya.

⁵ Tingali makapangutana ka, ‘Unsaon man nako pagbansay ang akong ginatun-an aron regular siyang magtuon sa Bibliya?’ Maayong sugdan kana pinaagi sa pagpakita kaniya kon unsaon pagpangandam sa inyong pagtuon. Puwede nimo siyang dasigon nga basahon ang dugang impormasyon diha sa apendise sa librong Unsay Tinuod nga Gitudlo sa Bibliya? ug tan-awon ang gisitar nga mga teksto. Tabangi siya sa pagpangandam sa tigom ug himoong tumong ang pagkomento. Dasiga siya nga basahon ang matag gula sa Ang Bantayanang Torre ug Pagmata! Kon mabatonan sa inyong  pinulongan ang Watchtower Library o Watchtower ONLINE NGA LIBRARYA, puwede nimo siyang tudloan kon sa unsang paagi kini gamiton sa pagtubag sa mga pangutana sa Bibliya. Ingong resulta sa maong tabang, seguradong ang imong ginatun-an sa Bibliya malipay sa iyang personal nga pagtuon sa Pulong sa Diyos.

6. (a) Unsaon nimo pagtabang ang imong ginatun-an aron maapresyar ang Bibliya? (b) Unsay lagmit buhaton sa ginatun-an sa Bibliya kon maapresyar na niya ang Kasulatan?

⁶ Siyempre, dili nato pugson si bisan kinsa nga basahon ug tun-an ang Bibliya. Hinunoa, gamiton nato ang mga himan nga gitagana sa organisasyon ni Jehova aron tabangan ang atong mga ginatun-an nga mas maapresyar ang Bibliya. Ngadtongadto, ang sinserong tinun-an lagmit mobati sama sa gibati sa salmista kinsa miawit: “Ang pagduol sa Diyos maayo alang kanako. Ang Soberanong Ginoong Jehova gihimo ko nga akong dalangpanan.” (Sal. 73:28) Ang espiritu ni Jehova seguradong motabang niadtong kugihan ug mapasalamatong ginatun-an sa Bibliya.

7. Sa unsang paagi gibansay ni Jesus ang mga magmamantala sa maayong balita? (Tan-awa ang hulagway sa sinugdan sa artikulo.)

⁷ Sa Mateo kapitulo 10, makita nato ang mga instruksiyon nga gihatag ni Jesus sa iyang 12 ka apostoles. Naghatag siyag espesipikong mga instruksiyon kon sa unsang paagi sila mosangyaw. ^[1] Naminaw ang mga apostoles samtang gitudloan sila ni Jesus kon unsaon pagsangyaw sa epektibong paagi. Dayon miadto ang grupo sa kanataran. Tungod kay ilang naobserbahan ang mga paagi ni Jesus, wala madugay sila nahimong hanas nga magtutudlo sa kamatuoran. (Mat. 11:1) Mabansay sab nato ang atong ginatun-an sa Bibliya nga mahimong epektibong magmamantala sa maayong balita. Karon, atong hisgotan ang duha ka paagi nga matabangan sila.

8, 9. (a) Sa unsang paagi nakig-estorya si Jesus sa mga tawo diha sa iyang ministeryo? (b) Unsaon nato pagtabang ang bag-ong mga magmamantala sa pagpakig-estorya sa mga tawo sama sa paagi ni Jesus?

⁸ Pakig-estorya sa mga tawo. Si Jesus sagad makig-estorya sa uban bahin sa Gingharian. Pananglitan, nindot ug epektibo ang pagpakig-estorya ni Jesus sa usa ka babaye sa atabay ni Jacob duol sa siyudad sa Sikar. (Juan 4:5-30) Nakig-estorya usab siya kang Mateo Levi, usa ka maniningil ug buhis. Gamay ra ang gihisgotan bahin niini nga panag-estoryahay diha sa Ebanghelyo, pero gidawat ni Mateo ang imbitasyon ni Jesus nga mahimong sumusunod. Panahon sa kombira sa balay ni Mateo, nadungog niini ug sa uban pa ang taastaas nga pagpakig-estorya ni Jesus sa mga tawo.​—Mat. 9:9; Luc. 5:27-39.

⁹ Sa laing higayon, si Jesus mahigalaong nakig-estorya kang Natanael, kinsa negatibog panglantaw sa mga taga-Nasaret. Hinunoa, nausab ang panglantaw ni Natanael. Midesisyon siya nga mokat-og dugang bahin sa gitudlo ni Jesus nga taga-Nasaret. (Juan 1:46-51) Busa duna tay maayong rason nga bansayon ang bag-ohang mga magmamantala sa pagpakig-estorya sa mga tawo sa mahigalaon ug kalmadong paagi. ^[2] Kadtong atong gitabangan niining paagiha seguradong malipay dihang ilang makita ang sinserong mga tawo nga mosanong sa personal nga interes ug mabinationg mga pulong.

10-12. (a) Sa unsang paagi giugmad ni Jesus ang interes nga gipakita sa uban maylabot sa maayong balita? (b) Sa unsang paagi nato matabangan ang bag-ong mga magmamantala sa pagpauswag sa ilang katakos ingong magsasangyaw sa kamatuoran?

¹⁰ Ugmara ang interes. Mubo lang ang panahon sa ministeryo ni Jesus. Bisan pa niana, migahin siyag panahon sa pag-ugmad sa interes sa mga tawo labot sa maayong balita. Pananglitan, nagtudlo si Jesus sa panon gamit ang usa ka sakayan ingong plataporma. Nianang higayona, milagroso niyang gitabangan si Pedro nga makakuhag dakong duot sa isda ug giingnan siya: “Sukad karon mangisda ka na ug mga  tawo nga buhi.” Unsay resulta sa gisulti ug gibuhat ni Jesus? Gibalik ni Pedro ug sa iyang mga kauban “ang mga sakayan sa mamala, ug gibiyaan ang tanan ug misunod [kang Jesus].”​—Luc. 5:1-11.

¹¹ Si Nicodemo, nga membro sa Sanhedrin, nainteres sa gitudlo ni Jesus. Gusto niyang makakat-og dugang pero nahadlok siya kon unsay isulti sa mga tawo kon makig-estorya siya kang Jesus sa publiko. Nagpasibo si Jesus ug migahig panahon; nakig-estorya siya kang Nicodemo panahon sa kagabhion diin walay tawong makakita. (Juan 3:1, 2) Unsay atong makat-onan niini nga mga asoy? Migahig panahon ang Anak sa Diyos aron palig-onon ang pagtuo sa uban. Sa susama, kinahanglang maningkamot usab kita sa pagbalikduaw ug pagdumalag pagtuon sa Bibliya sa mga interesado sa ilang kombenyenteng oras.

¹² Mas mapauswag sa bag-ong mga magmamantala ang ilang katakos ingong magtutudlo sa kamatuoran kon ato silang ubanan sa ministeryo. Puwede nato silang tudloan nga balikan bisan kadtong nagpakitag diyutayng interes. Mahimo nato silang iuban sa atong mga balikduaw ug Bible study. Pinaagi niana nga pagbansay ug pagdasig, maningkamot ang dili kaayo eksperyensiyadong mga magmamantala nga maugmad ang interes sa uban ug magdumalag ilang kaugalingong Bible study. Makat-onan usab nila nga dili dayon mosurender kondili magmapailobon ug magmalahutayon sa ministeryo.​—Gal. 5:22; tan-awa ang kahon nga “ Hinungdanon ang Paglahutay.”

13, 14. (a) Unsay imong ikasulti sa mga ehemplo diha sa Bibliya niadtong nagpakitag dakong pagsakripisyo para sa uban? (b) Unsang praktikal nga mga paagi nga mabansay nimo ang mga bag-ohan ug batan-on sa pagpakitag gugma sa mga igsoon?

¹³ Ang mga asoy sa Bibliya nagpasiugda sa atong pribilehiyo sa pagpakitag “inigsoong pagbati” ug sa pag-alagad sa usag usa. (Basaha ang 1 Pedro 1:22; Lucas 22:24-27.) Gihatag sa Anak sa Diyos ang tanan, lakip ang iyang kinabuhi, sa pagtabang sa uban. (Mat. 20:28) Si Dorcas “daghag maayong mga buhat ug mga gasa sa kaluoy.” (Buh. 9:36, 39) Si Maria, usa ka sister sa Roma, ‘naghago’ para sa mga igsoon sa kongregasyon. (Roma 16:6) Sa unsang paagi nato matabangan ang mga bag-ohan nga masabtan ang kahinungdanon sa pagtabang sa mga igsoon?

¹⁴ Mahimong paubanon sa hamtong nga mga Saksi ang mga bag-ohan sa pagbisita sa mga masakiton ug edaran. Kon haom, puwedeng iuban usab sa mga ginikanan ang ilang mga anak. Mahimong patabangon sa mga ansiyano ang mga batan-on o bag-ohan sa pagtaganag pagkaon sa mga edaran ug pagmentinar sa ilang balay. Niining paagiha, makat-onan sa mga batan-on ug bag-ohan ang pagpakitag maayong binuhatan sa uban. Pananglitan, dihang magsangyaw sa baryo, bisitahon sa usa ka ansiyano ang mga Saksi nga nagpuyo nianang dapita aron komostahon sila. Usa ka batan-ong brader nga tig-ubanan niya nakakat-on nga ang tanan sa kongregasyon angayng mobati nga gihigugma.​—Roma 12:10.

15. Nganong importante nga magmahunahunaon ang mga ansiyano sa pag-uswag sa mga brader?

¹⁵ Tungod kay gamiton ni Jehova ang mga brader ingong magtutudlo sa kongregasyon, importante kaayo nga pauswagon nila ang ilang katakos sa pagsulti. Ingong ansiyano, puwede ba nimong paminawon ang usa ka ministeryal nga alagad samtang magpraktis sa iyang pakigpulong? Pinaagi sa imong tabang, lagmit mapauswag niya ang iyang kahanas ingong magtutudlo sa Pulong sa Diyos.​—Neh. 8:8. ^[3]

16, 17. (a) Sa unsang paagi gipakita ni Pablo nga naghunahuna siya sa pag-uswag ni Timoteo? (b) Sa unsang paagi epektibong mabansay sa mga ansiyano ang umaabot nga mga magbalantay sa kongregasyon?

¹⁶ Gikinahanglan ang daghang magbalantay sa Kristohanong kongregasyon, ug kadtong moabaga nianang buluhatona sa umaabot nagkinahanglag padayong pagbansay. Gihisgotan ni Pablo ang mga paagi kon unsaon sila pagbansay dihang giingnan niya si Timoteo: “Anak ko, magpadayon ka sa pagbaton ug kusog diha sa  dili-takos nga kalulot maylabot kang Kristo Jesus, ug ang mga butang nga imong nadungog gikan kanako nga gipaluyohan sa daghang saksi, kining mga butanga ipiyal sa matinumanong mga tawo, nga, sa baylo, makabaton ug igong katakos sa pagpanudlo sa uban.” (2 Tim. 2:1, 2) Nakakat-on si Timoteo pinaagi sa pag-alagad uban sa edarang apostol. Dayon gipadapat ni Timoteo ang mga paagi ni Pablo diha sa iyang kaugalingong ministeryo ug sa ubang bahin sa iyang sagradong pag-alagad.​—2 Tim. 3:10-12.

¹⁷ Gustong maseguro ni Pablo nga mabansay pag-ayo si Timoteo, busa giuban niya kini. (Buh. 16:1-5) Masundog sa mga ansiyano si Pablo pinaagi sa pagpauban sa kuwalipikadong ministeryal nga mga alagad sa pag-shepherding kon nahiangay. Sa ingon, mahatagag kahigayonan sa mga ansiyano ang ministeryal nga maobserbahan ang pagpanudlo, pagtuo, pailob, ug gugma nga gikinahanglan ingong Kristohanong mga tigdumala. Kini nga paagi makadugang sa pagbansay sa umaabot nga mga magbalantay sa “panon sa Diyos.”​—1 Ped. 5:2.

18. Nganong angay natong pabilhan ang pagbansay sa uban sa pag-alagad kang Jehova?

¹⁸ Importante kaayo ang pagbansay sa uban tungod sa nagkadakong panginahanglan ug kahigayonan sa pag-alagad kang Jehova. Maaplikar gihapon nato karon ang mga ehemplo sa pagbansay nga gihimo ni Jesus ug Pablo. Gusto ni Jehova nga ang iyang mga alagad karon mabansay pag-ayo sa ilang teokratikanhong mga asaynment. Gihatag sa Diyos kanato ang pribilehiyo nga tabangan ang mga dili kaayo eksperyensiyado sa pagpauswag sa ilang katakos sa paghimo sa mga buluhaton diha sa kongregasyon. Samtang nagkagrabe ang kahimtang sa kalibotan ug dunay bag-ong mga kahigayonan sa pagsangyaw, ang maong pagbansay importante ug dinalian.

19. Nganong kombinsido ka nga molampos ang imong mga paningkamot sa pagbansay sa uban sa pag-alagad kang Jehova?

¹⁹ Siyempre, ang pagbansay sa uban nagkinahanglag panahon ug paningkamot. Apan si Jehova ug ang iyang hinigugmang Anak motabang ug mohatag kanatog kaalam nga gikinahanglan sa pagbansay sa uban. Malipay ta dihang makita nato ang atong gibansay nga “naghago ug nanlimbasog” sa pag-alagad diha sa kongregasyon. (1 Tim. 4:10) Ug hinaot nga padayon tang mouswag sa espirituwal diha sa atong sagradong pag-alagad kang Jehova.