Usa lamang kana sa daghang butang diin ang mga kaaway ni Jesus nagsaway kaniya ug sa iyang mga tinun-an. Ang Moisesnong Balaod naglakip ug daghang sugo bahin sa seremonyal nga kahinlo maylabot sa mga inagas sa lawas, sanla, ug paghikap sa patayng lawas sa tawo ug mananap. Naghatag usab kinig instruksiyon kon sa unsang paagi ang usa mahimong hinlo na usab. Pinaagi kini sa paghalad, pagkaligo ug paglaba, o pagwisik.​—Lev., kap. 11-15; Num., kap. 19.

Ang Hudiyong mga rabbi may gidugang sa matag detalye niini nga mga balaod. Ang usa ka reperensiya nag-ingon nga ang matag hinungdan sa kahugawan kinahanglang susihon kon asa kini nakuha ug kon sa unsang paagi ug gilapdon nga kini mapasa sa uban. May mga balaod usab kon unsang galamiton ug mga butang ang maapektohan ug dili maapektohan sa kahugawan, ug kon unsang mga paagi ug rituwal ang gikinahanglan aron mahimong hinlo na usab.

Ang mga kaaway ni Jesus nangutana kaniya: “Nganong ang imong mga tinun-an dili magagawi sa ilang kaugalingon sumala sa tradisyon sa mga tawo sa kanhing mga panahon, apan sila mokaon uban sa ilang mahugaw nga mga kamot?” (Mar. 7:5) Ang maong mga lider sa relihiyon wala magtumong sa pisikal nga kahinlo, sa ato pa, ang pagpanghunaw sa dili pa mokaon. Ingong rituwal, gisugo sa mga rabbi nga buboan ug tubig ang ilang kamot sa dili pa mokaon. Ang reperensiyang gikutlo midugang: “Gidebatehan usab kon unsa nga sudlanan ang gamiton sa pagbubo, unsang matanga sa tubig ang haom, kinsay mobubo, ug hangtod unsang bahina sa kamot ang bas-on.”

Simple ra ang reaksiyon ni Jesus niining tanang hinimog tawo nga mga balaod. Giingnan niya ang maong mga lider sa relihiyon: “Si Isaias haom nga nagtagna bahin kaninyo nga mga salingkapaw, ingon sa nahisulat, ‘Kining mga tawhana nagpasidungog kanako pinaagi sa ilang mga ngabil, apan ang ilang mga kasingkasing halayo kaayo kanako [Jehova]. Kawang lamang nga sila nagpadayon sa pagsimba kanako, tungod kay sila nagtudlo sa mga sugo sa mga tawo ingon nga mga doktrina.’ Kay gibiyaan ang sugo sa Diyos, kamo nangupot pag-ayo sa tradisyon sa mga tawo.”​—Mar. 7:6-8.