Ang asoy ni Mateo sa mga panghitabo maylabot sa pagkatawo ni Jesus ug sa bata pa kini lahi nianang kang Lucas. Sila nag-asoy sa mga panghitabo gikan sa lainlaing anggulo.

Ang asoy ni Mateo nagpokus sa mga panghitabo nga naglangkit kang Jose. Kini naghisgot sa unang reaksiyon ni Jose sa pagmabdos ni Maria, sa iyang damgo diin gipatin-aw sa anghel ang situwasyon, ug sa iyang pagsunod sa mga instruksiyon. (Mat. 1:19-25) Gihisgotan sab ni Mateo ang damgo ni Jose diin usa ka anghel ang nagsugo niini nga mokalagiw sa Ehipto, ang pagpanaw niini uban sa iyang pamilya, ang damgo diin usa ka anghel ang nagsugo kaniya nga mobalik sa Israel, ang iyang pagbalik, ug ang desisyon nga papuy-on ang iyang pamilya sa Nasaret. (Mat. 2:13, 14, 19-23) Sa unang mga kapitulo sa Ebanghelyo ni Mateo, pito ka beses nga gihisgotan ang ngalan ni Jose, pero kang Maria, upat lang.

Sa laing bahin, ang asoy ni Lucas nagpokus kang Maria. Kini naghisgot sa pagduaw ni anghel Gabriel kang Maria, sa pagbisita ni Maria sa iyang paryenteng si Elisabet, ug sa iyang pagdayeg kang Jehova. (Luc. 1:26-56) Gihisgotan sab ni Lucas ang gisulti ni Simeon kang Maria maylabot sa mga paglutos nga maagoman ni Jesus sa umaabot. Bisan sa asoy diin ang iyang pamilya mibisita sa templo sa 12 anyos si Jesus, gikutlo ni Lucas ang gisulti ni Maria, dili ang kang Jose. Si Lucas midugang nga natandog gyod si Maria niining tanang panghitabo. (Luc. 2:19, 34, 35, 48, 51) Sa unang duha ka kapitulo sa Ebanghelyo ni Lucas, 12 ka beses nga gihisgotan ang ngalan ni Maria, pero kang Jose, 3 lang. Busa mas daghan ang gihisgotan ni Mateo bahin sa gihunahuna ug gibuhat ni Jose, samtang si Lucas naghisgot ug daghang detalye sa papel ug mga eksperyensiya ni Maria.

Managlahi usab ang talaan sa kagikan nga giasoy sa duha ka magsusulat sa Ebanghelyo. Gisubay ni Mateo ang kagikan ni Jose ug gipakita nga si Jesus, ingong sinagop nga anak ni Jose, maoy legal nga manununod sa trono ni David. Ngano? Tungod kay si Jose kaliwat ni Haring David pinaagi sa anak ni David nga si Solomon. (Mat. 1:6, 16) Sa laing bahin, giasoy ni Lucas ang kagikan ni Maria ug gipakita nga si Jesus mao ang kinaiyanhong manununod, “sumala sa unod,” sa trono ni David. (Roma 1:3) Ngano? Tungod kay si Maria kaliwat ni Haring David pinaagi sa anak ni David nga si Natan. (Luc. 3:31) Pero nganong wala hisgoti ni Lucas si Maria ingong anak ni Heli? Tungod kay mga lalaki lang ang ilista sa opisyal nga talaan sa kagikan. Busa, dihang gisulat ni Lucas si Jose ingong anak nga lalaki ni Heli, nagpasabot kini nga si Jose umagad ni Heli.​—Luc. 3:23.

Ang talaan sa kagikan nga gisulat ni Mateo ug Lucas klarong nagpamatuod nga si Jesus ang gisaad nga Mesiyas. Gani, ang pagkakasaligan sa talaan sa kagikan ni Jesus ilado kaayo nga bisan ang mga Pariseo ug Saduseo dili makakuwestiyon niana. Karon, ang rekord sa kagikan nga gisulat ni Mateo ug Lucas nagpabiling bahin sa pundasyon sa atong pagtuo ug usa ka pamatuod nga matuman gyod ang mga saad sa Diyos.