1. Unsay gitagna ni Isaias bahin kang Jesus, ug nganong makapadasig ni?

PINAAGI sa iyang tagna bahin sa atong Ginoong Jesu-Kristo, si Isaias nagdasig ug nagpasalig nato. Siya nagtagna nga si Jesus “dili mohukom sumala sa makita lamang sa iyang mga mata, ni mobadlong sumala sa butang nga nadungog” ug “uban sa pagkamatarong siya magahukom sa mga timawa.” (Isa. 11:3, 4) Nganong makapadasig ni? Tungod kay nagkinabuhi ta sa kalibotan nga punog diskriminasyon. Nangandoy gyod ta sa hingpit nga Maghuhukom, kinsa dili mohukom base sa panggawas nga panagway!

2. Unsay gisugo ni Jesus kanato, ug unsay atong hisgotan niining artikuloha?

² Kada adlaw, mohimo tag opinyon bahin sa mga tawo. Pero kay dili ta hingpit, dili nato masundog ang hingpit nga paghukom ni Jesus. Dali tang maimpluwensiyahan sa atong makita. Bisan pa niana, dihang dinhi pa si Jesus sa yuta, siya nagsugo: “Hunong na sa pagpanghukom pinasukad sa panggawas nga panagway, apan panghukom uban ang matarong nga paghukom.” (Juan 7:24) Klaro, gusto ni Jesus nga sundogon nato siya ug dili hukman ang uban base sa ilang panagway. Niining artikuloha, atong hisgotan ang tulo ka butang nga sagad makaimpluwensiya  sa opinyon sa mga tawo: Rasa o kultura, bahandi, ug edad. Sa matag usa niana, atong hisgotan ang praktikal nga mga paagi nga masundog si Jesus.

3, 4. (a) Unsang mga panghitabo ang nakatabang kang Pedro sa pag-usab sa iyang panglantaw sa mga Hentil? (Tan-awa ang hulagway sa sinugdan sa artikulo.) (b) Unsang bag-ong kamatuoran ang gipasabot ni Jehova kang Pedro?

³ Imadyina ang gihunahuna ni apostol Pedro dihang gipaadto siya sa Cesarea sa balay sa Hentil nga si Cornelio. (Buh. 10:17-29) Parehas sa ubang Hudiyo niadtong panahona, nagdako si Pedro nga nagtuong hugaw ang mga Hentil. Pero, may nahitabo nga nakapausab sa iyang panghunahuna. Pananglitan, nakakita siyag milagrosong panan-awon. (Buh. 10:9-16) Dihay usa ka habol nga punog hugaw nga mga hayop ang gitunton sa iyang atubangan, ug may tingog gikan sa langit nga nagsugo: “Tindog, Pedro, pag-ihaw ug kaon!” Mibalibad pag-ayo si Pedro. Dayon, ang tingog miingon: “Hunong na sa pagtawag nga mahugaw sa mga butang nga gihinloan na sa Diyos.” Human sa panan-awon, naglibog si Pedro kon unsay gipasabot sa iyang nadunggan. Dayon, nangabot ang mga mensahero ni Cornelio. Human hatagig instruksiyon sa balaang espiritu, si Pedro miuban sa mga mensahero padulong sa balay ni Cornelio.

⁴ Kon mihukom si Pedro base lang sa panagway, dili gyod unta siya mosulod sa balay ni Cornelio. Ang mga Hudiyo dili mosulod sa balay sa mga Hentil. Nganong miadto si Pedro bisan sa nakagamot nang diskriminasyon? Napalihok siya pag-ayo sa panan-awon nga iyang nakita ug sa pasalig nga gihatag sa balaang espiritu. Kay natandog si Pedro sa gisulti ni Cornelio, siya nakaingon: “Tinong naila ko nga ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buh. 10:34, 35) Nalipay gyod si Pedro nianang bag-ong pagsabot​—nga may dumalayong resulta! Sa unsang paagi ang maong kamatuoran bahin sa pagkadili-mapihigon makaapektar sa tanang Kristohanon?

5. (a) Unsay gusto ni Jehova nga masabtan sa tanang Kristohanon? (b) Bisag nahibalo na ta sa kamatuoran, unsang pagbati ang lagmit nagpabilin sa sulod nato?

⁵ Pinaagi kang Pedro, gitabangan ni Jehova ang tanang Kristohanon sa pagsabot nga dili Siya mapihigon. Para kang Jehova, walay labaw nga rasa, kultura, nasod, tribo, o pinulongan. Dawaton niya si bisan kinsang lalaki o babaye nga nahadlok sa Diyos ug nagbuhat ug matarong. (Gal. 3:26-28; Pin. 7:9, 10) Seguradong nahibalo na ka niini. Pero komosta kon nagdako ka sa lugar o pamilya nga punog diskriminasyon? Bisag para nimo wala kay pagpihig, basig naa kay diskriminasyon sa sulod nimo. Bisan si Pedro, kinsa nakapribilehiyo sa pagpahayag sa pagkadili-mapihigon ni Jehova, nagpakitag diskriminasyon sa ulahi. (Gal. 2:11-14) Unsay atong buhaton aron masunod si Jesus ug mohunong sa paghukom base sa panagway?

6. (a) Unsay makatabang nato sa pagwala sa diskriminasyon sa atong kasingkasing? (b) Unsay gipakita sa report sa usa ka responsableng brader?

⁶ Gamit ang Pulong sa Diyos, kinahanglan natong susihon pag-ayo ang kaugalingon kon naa bay nagpabiling diskriminasyon sa atong hunahuna o pagbati. (Sal. 119:105) Nagkinahanglan sab tingali tag mahigugmaong tabang sa uban kinsa nakamatikod nga nagpakita tag diskriminasyon, bisag wala nato ni mamatikdi sa atong kaugalingon. (Gal. 2:11, 14) Posibleng nakagamot na ni pag-ayo kanato nga dili na nato ni mamatikdan. Pananglitan, konsideraha ang usa ka responsableng brader nga nagpasag report bahin sa  maayong magtiayon nga bug-os panahong nag-alagad. Ang bana gikan sa tribo nga giisip sa uban nga ubos. Wala tingali mamatikdi sa brader nga may diskriminasyon pa siya niana nga tribo. Sa iyang report, daghan siyag gisulting maayong butang bahin sa bana; pero, siya miingon sa konklusyon: “Bisag gikan siya [niining triboha], ang iyang pamatasan ug pagkinabuhi nakatabang sa uban nga masabtan nga bisag [gikan sa maong tribo] wala magpasabot nga ang usa hugawan, ubos ug kalidad ang pagkinabuhi, nga komon sa daghan [niana nga] kagikan.” Nakita ba nimo ang punto? Bisag unsay atong responsibilidad, kinahanglan natong susihon pag-ayo ang kaugalingon ug andam tang modawat ug tabang aron makita ang bisan unsang diskriminasyon nga nagpabilin sa atong kasingkasing. Unsa pay atong mahimo?

7. Unsaon nato pagpakita nga gibuksan nato ang atong kasingkasing?

⁷ Kon buksan nato pag-ayo ang atong kasingkasing, gitugotan nato nga pulihan sa gugma ang diskriminasyon. (2 Cor. 6:11-13) Nabatasan ba nimong makig-uban lang niadtong pareho nimog rasa, kultura, nasod, tribo, o pinulongan? Kon mao, pakig-uban sab sa uban. Puwede ba nimong hangyoon kadtong lahig kagikan nga makigpartner nimo sa pagsangyaw? Puwede ba nimo silang imbitahon sa imong balay para sa pagpangaon o tapoktapok? (Buh. 16:14, 15) Kon buhaton nâ nimo, mapuno ug gugma ang imong kasingkasing nga wala nay luna ang diskriminasyon. Pero may lain pang paagi nga tingali hukman nato ang uban base sa atong makita. Ang sunod natong konsiderahon mao ang materyal nga bahandi.

8. Sumala sa Levitico 19:15, sa unsang paagi ang kadato o kapobre makaapektar sa atong paghukom?

⁸ Ang materyal nga bahandi maoy laing butang nga makaapektar sa atong panglantaw sa uban. Ang Levitico 19:15 nag-ingon: “Dili ka magpihigpihig sa timawa, ug dili mo palabihon ang dakong tawo [o, dato]. Kinahanglan nga imong hukman ang imong isigkatawo uban ang hustisya.” Pero sa unsang paagi ang kadato o kapobre sa usa makaapektar sa atong panglantaw kaniya?

9. Unsang makapaguol nga kamatuoran ang gisulat ni Solomon, ug unsay gitudlo niini kanato?

⁹ Ang balaang espiritu nagpalihok kang Solomon sa pagsulat sa makapaguol nga kamatuoran bahin sa dili hingpit nga tawo. Sa Proverbio 14:20, siya nag-ingon: “Bisan sa iyang isigkatawo ang tawong kabos maoy dulumtanan, apan daghan ug higala ang tawong dato.” Unsay gitudlo niini kanato? Kon dili ta magbantay, basin tinguhaon nato nga makighigala sa mga igsoon nga dato samtang likayan ang mga pobre. Nganong peligroso nga lantawon ang uban base lang sa ilang bahandi?

10. Unsang problema ang gihisgotan ni Santiago?

¹⁰ Kon lantawon nato ang mga igsoon base sa ilang bahandi, basin makapahinabo tag pagkabahinbahin sa kongregasyon. Ang tinun-ang si Santiago nagpasidaan nga kining problemaha nakapabahin sa pipila ka kongregasyon sa unang siglo. (Basaha ang Santiago 2:1-4.) Dili gyod nato tugotan nga maapektohan ang atong kongregasyon sa maong panghunahuna. Unsay atong buhaton aron dili nato mahukman ang uban base sa makita?

11. Makaapektar ba ang kabtangan sa relasyon sa usa ngadto kang Jehova? Ipatin-aw.

¹¹ Kinahanglan natong sundogon ang paglantaw ni Jehova sa atong mga igsoon. Sa mata ni Jehova, ang bili sa usa ka tawo wala magdepende sa iyang kadato o kapobre. Ang atong relasyon kang Jehova dili mag-agad sa kadaghan o kagamay sa atong kabtangan. Bisag miingon si Jesus nga “malisod  gayod sa usa ka datong tawo nga makasulod sa gingharian sa mga langit,” wala siya moingon nga imposible kini. (Mat. 19:23) Sa laing bahin, si Jesus miingon pod: “Malipayon kamong mga kabos, tungod kay inyoha ang gingharian sa Diyos.” (Luc. 6:20) Pero wala ni magpasabot nga naminaw kang Jesus ang tanang pobre ug nahatagan silag espesyal nga panalangin. Daghang pobre ang wala modawat kang Jesus. Mao ni ang punto: Dili nato mahukman ang relasyon sa usa ngadto kang Jehova base sa iyang kabtangan.

12. Unsay gisugo sa Bibliya sa mga dato ug pobre?

¹² Panalangin gyod nga daghan tag mga igsoon, dato ug pobre, nga nahigugma ug nag-alagad kang Jehova sa tibuok kasingkasing. Ang Kasulatan nagsugo sa mga dato nga “magbutang sa ilang paglaom, dili sa walay-kasegurohang bahandi, kondili sa Diyos.” (Basaha ang 1 Timoteo 6:17-19.) Sa samang higayon, ang Bibliya nagtambag sa tanang alagad sa Diyos, dato ug pobre, nga mag-amping nga dili mahigugma sa kuwarta. (1 Tim. 6:9, 10) Oo, kon buksan nato ang atong mata ug sundogon ang pagtan-aw ni Jehova sa atong mga igsoon, dili ta matental nga hukman sila base lang sa kadaghan o kagamay sa ilang kabtangan. Pero komosta ang bahin sa edad sa tawo? Basehanan ba nâ sa paghukom sa uban? Atong tan-awon.

13. Unsay gitudlo sa Bibliya bahin sa pagtahod sa mga tigulang?

¹³ Ang Bibliya kanunayng nagsugo nato sa pagpakitag pagtahod sa mga tigulang. Ang Levitico 19:32 nag-ingon: “Atubangan sa buhok nga ubanon motindog ka, ug magpakita ka ug pagtamod sa tawong tigulang, ug kahadlokan mo ang imong Diyos.” Ang Proverbio 16:31 nag-ingon pod: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” Dugang pa, si Pablo nagtambag kang Timoteo nga dili kasab-an ang tigulang nga lalaki kondili lantawon siya ingong amahan. (1 Tim. 5:1, 2) Bisag gihatagan si Timoteo ug awtoridad ibabaw sa maong tigulang nga mga igsoon, kinahanglan niyang trataron sila uban ang pagkamabination ug pagtahod.

14. Sa unsang mga situwasyon nga tingali haom ang pagbadlong o pagtambag sa usa nga mas tigulang nato?

¹⁴ Pero, hangtod asa nato ipadapat ang maong prinsipyo? Pananglitan, obligado ba tang uyon-uyonan ang usa ka tigulang bisag tinuyo siyang naghimog sala o nagpasiugdag butang nga makapasuko kang Jehova? Si Jehova dili mohukom base sa makita ug dili niya balewalaon ang tinuyong pagpakasala tungod lang kay tigulang ang nagbuhat ana. Matikdi ang prinsipyong makita sa Isaias 65:20: “Kon bahin sa makasasala, bisan tuod usa ka gatos ka tuig ang panuigon siya panghimaraoton.” Makita sab nâ nga prinsipyo sa panan-awon ni Ezequiel. (Ezeq. 9:5-7) Busa, kanunay gyod natong unahon ang pagpakitag pagtahod sa Karaan sa mga Adlaw, si Jehova nga Diyos. (Dan. 7:9, 10, 13, 14) Kon buhaton nato nâ, dili ta mahadlok sa pagbadlong ug pagtambag sa usa ka tawo, bisag unsa pay iyang edad.​—Gal. 6:1.

15. Unsay atong makat-onan kang Pablo bahin sa pagpakitag pagtahod sa batabatang mga brader?

¹⁵ Komosta ang bahin sa batabatang mga brader sa kongregasyon? Unsay imong panglantaw nila? Si Pablo misulat sa batabata pang si Timoteo: “Ayaw gayod tugoting may tawo nga magtamay sa imong pagkabatan-on. Sa kasukwahi, himoa ang imong kaugalingon nga panig-ingnan sa mga matinumanon sa sinultihan, sa panggawi, sa  gugma, sa pagtuo, sa kaputli.” (1 Tim. 4:12) Dihang gisulat kini ni Pablo, si Timoteo lagmit kapig 30 anyos. Pero giasayn na siya ni Pablo sa pag-atiman sa bug-at nga mga responsibilidad. Bisag unsa may rason niini nga tambag, klaro ang punto. Dili nato hukman ang batabatang mga brader base lang sa ilang edad. Maayong hinumdoman nga nahuman ni Ginoong Jesus ang iyang ministeryo dinhi sa yuta sa edad nga 33.

16, 17. (a) Unsaon pagdesisyon sa mga ansiyano kon ang usa ka brader kuwalipikadong irekomendar ingong ministeryal o ansiyano? (b) Sa unsang paagi lahi tingali ang personal nga opinyon o kultura sa giingon sa Bibliya?

¹⁶ Bahin tingali ta sa kultura nga ubos ang pagtan-aw sa batabatang mga lalaki. Kon mao, basin magduhaduha ang mga ansiyano sa pagrekomendar sa kuwalipikado nga batabatang mga brader nga mahimong ministeryal o ansiyano. Kinahanglang hinumdoman sa tanang ansiyano nga wala maghatag ang Bibliya ug espesipikong edad una marekomendar ang usa ingong ministeryal o ansiyano. (1 Tim. 3:1-10, 12, 13; Tito 1:5-9) Kon ang ansiyano maghimog balaod base sa kultura, wala siya magsunod sa Bibliya. Tan-awon ang kuwalipikasyon sa batabatang mga brader, dili base sa personal nga opinyon o kultura, kondili base sa sukdanan sa Pulong sa Diyos.​—2 Tim. 3:16, 17.

¹⁷ Konsideraha ang epekto kon ibase sa kultura, dili sa Bibliya, ang pagtudlog kuwalipikadong brader. Sa usa ka nasod, may kuwalipikadong ministeryal nga gipaatiman ug bug-at nga mga responsibilidad. Bisag mouyon ang mga ansiyano nga nakab-ot sa batabatang brader ang kuwalipikasyon sa Bibliya, wala gihapon siya marekomendar ingong ansiyano. Ang pipila ka edarang ansiyano miingon nga bata ra kaayo siyag hitsura para isipong ansiyano. Makapaguol, ang brader wala matudlo tungod lang sa iyang hitsura. Bisag usa ra ni ka hitabo, gipakita sa mga report nga komon kana nga panghunahuna sa daghang nasod. Busa, importante gyong mosalig ta sa Bibliya imbes sa atong kultura o personal nga opinyon! Kana ray paagi nga masunod si Jesus ug dili mohukom base sa makita.

18, 19. Unsay atong buhaton aron masundog ang pagtan-aw ni Jehova sa uban?

¹⁸ Bisag dili ta hingpit, makakat-on ta sa pagtan-aw sa uban nga walay pagpihig, sama kang Jehova. (Buh. 10:34, 35) Pero nagkinahanglan nig padayong paningkamot ug kanunayng pahinumdom gikan sa Pulong sa Diyos. Pinaagi sa pagsunod sa maong mga pahinumdom, padayon natong matuman ang sugo ni Jesus nga mohunong sa paghukom base sa makita.​—Juan 7:24.

¹⁹ Sa dili madugay, ang atong Hari nga si Jesu-Kristo maghukom sa tanang tawo, dili base sa makita o madungog, kondili base sa matarong nga mga sukdanan. (Isa. 11:3, 4) Pagkanindot ana!