1. Sa unsang paagi magbuhat ta uban kang Jehova?

ANG Maglalalang naghunahuna nga ang hingpit nga mga tawo motabang niya sa pagpalampos sa iyang katuyoan. Bisag dili na hingpit ang tawo karon, ang matinumanong katawhan puwede gihapong magbuhat uban kang Jehova kada adlaw. Pananglitan, mahimo tang “mga isigkamagbubuhat sa Diyos” pinaagi sa pagsangyaw sa maayong balita sa Gingharian ug paghimog mga tinun-an. (1 Cor. 3:5-9) Pribilehiyo gyod nga gipili ta sa labing gamhanang Maglalalang nga motabang sa buluhatong giisip niyang importante! Pero, dili lang ang pagsangyaw ug paghimog tinun-an ang mga paagi nga magbuhat ta uban kang Jehova. Hisgotan niining artikuloha ang ubang mga paagi sa pagbuhat niana​—pagtabang sa atong pamilya ug mga igsoon sa pagtuo, pag-abiabi, pagboluntaryo sa mga proyekto sa organisasyon, ug pagpauswag sa atong sagradong pag-alagad.​—Col. 3:23.

2. Nganong dili maalamong ikomparar ang imong mabuhat sa pagpauswag sa katuyoan ni Jehova nianang sa uban?

² Samtang ato ning tun-an, ayawg ikomparar ang imong mabuhat para kang Jehova nianang sa uban. Hinumdomi nga managlahi ang atong edad, kahimsog, sirkumstansiya, ug abilidad. Si  apostol Pablo miingon: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.”​—Gal. 6:4.

3. Nganong makaingon ta nga ang nag-atiman sa iyang pamilya nakigkooperar sa Diyos?

³ Gidahom ni Jehova nga atimanon sa iyang mga alagad ang ilang pamilya. Pananglitan, kinahanglan tingali kang magtrabaho aron matagan-an sa pinansiyal ang imong mga minahal. Daghang inahan ang magpabilin sa balay aron atimanon ang gagmayng anak. Ug atimanon tingali sa pipila ka dagko nang anak ang ilang luya nang ginikanan. Importante ni nga mga buluhaton. Ang Pulong sa Diyos nag-ingon: “Kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.” (1 Tim. 5:8) Kon may responsibilidad ka sa pamilya, lagmit dili ka makagahig dakong panahon sa pag-alagad. Pero ayawg kaluya! Malipay si Jehova dihang tagan-an nimo ang imong pamilya.​—1 Cor. 10:31.

4. Unsaon pag-una sa mga ginikanan ang Gingharian, ug unsay resulta?

⁴ Ang mga ginikanan nakigkooperar kang Jehova dihang tabangan nila ang ilang mga anak sa paghimog tumong sa pag-alagad. Daghang ginikanan ang nagbuhat ana. Tungod niini, ang ilang mga anak bug-os panahong nag-alagad, bisan sa mga lugar nga layo sa ilaha. Ang pipila mga misyonaryo; ang uban nagpayunir sa mga lugar nga nagkinahanglag dugang magsasangyaw; ug ang uban nag-alagad sa Bethel. Tungod sa gilay-on, dili na tingali pirmeng magkauban ang pamilya. Pero, ang nagsakripisyo sa kaugalingong mga ginikanan modasig sa ilang mga anak sa paglahutay diha sa ilang asaynment. Ngano? Tungod kay malipay ug matagbaw gyod sila sa pagkahibalo nga giuna sa ilang mga anak ang Gingharian. (3 Juan 4) Gibati tingali sa daghan nila ang gibati ni Ana, kinsa “nagpahulam” sa iyang anak nga si Samuel kang Jehova. Isipon ni sa maong mga ginikanan ingong bililhong pribilehiyo. Ug mao gyod nay gusto nila.​—1 Sam. 1:28.

5. Sa unsang paagi makatabang ka sa mga igsoon sa inyong kongregasyon? (Tan-awa ang hulagway sa sinugdan sa artikulo.)

⁵ Kon wala kay bug-at nga responsibilidad sa pamilya, makatabang ka ba sa mga igsoon nga nag-atimag masakiton ug niadtong luya na, tigulang, o may ubang panginahanglan? Tan-awa kon kinsay nanginahanglag tabang sa inyong kongregasyon. Basin puwede nimong bantayan ang tigulang nga ginikanan sa usa ka sister dihang naa siyay laing buhaton. O tingali makatabang ka sa mga igsoon pinaagi sa pagdala nila sa tigom, pagpamalit para nila, o pagbisita niadtong naospital. Kon imo nang himoon, nakigkooperar ka kang Jehova sa pagtubag sa usa ka pag-ampo.​—Basaha ang 1 Corinto 10:24.

6. Unsay apil sa pag-abiabi?

⁶ Ang mga isigkamagbubuhat sa Diyos nailhang maabiabihon. Sa Kristohanon Gregong Kasulatan, ang pulong nga gihubad ug “pagkamaabiabihon” nagkahulogan ug “pagpakitag kaayo sa mga estranyo.” (Heb. 13:2) Diha sa Bibliya, may mga estoryang nagtudlo nato sa pagpakita sa maong gugma. (Gen. 18:1-5) Kinahanglang kanunay tang motabang sa uban ug mangitag mga kahigayonan sa pagbuhat niana, sila man “atong kabanay sa pagtuo” o dili.​—Gal. 6:10.

7. Nganong maayo nga abiabihon ang mobisita nga bug-os panahong mga alagad?

 ⁷ Makabuhat ba ka uban sa Diyos pinaagi sa pag-abiabi sa bug-os panahong mga alagad nga mobisita? (Basaha ang 3 Juan 5, 8.) Sagad oportunidad kana sa “pagdinasigay.” (Roma 1:11, 12) Konsideraha ang eksperyensiya ni Olaf. Nahinumdom siya nga kaniadto, walay usa sa ilang kongregasyon ang makapapuyo sa tigdumala sa sirkito, kinsa tagsaanon. Gihangyo sa batan-ong si Olaf ang iyang dili Saksing ginikanan kon puwede bang moestar sa ilang balay ang tigdumala sa sirkito. Misugot sila pero kinahanglang sa sofa matulog si Olaf. Wala gyod siya magmahay. “Makapadasig kaayo tong semanaha!” matod ni Olaf. “Ako ug ang tigdumala sa sirkito momatag sayo kada buntag ug maghisgot ug daghang makapainteres nga mga butang samtang mamahaw. Tungod sa maong pagdasig, nakadesisyon kong moalagad nga bug-os panahon.” Si Olaf nag-alagad ingong misyonaryo sa lainlaing nasod sulod na sa 40 ka tuig.

8. Nganong angay tang magpakitag kaayo bisag dili tingali ni maapresyar sa sinugdan? Paghatag ug pananglitan.

⁸ Makapakita kag gugma sa mga estranyo sa daghang paagi bisan pag sa sinugdan dili ni nila maapresyar. Pananglitan, samtang nag-Bible study, namatikdan sa usa ka magmamantala sa Spain nga dili moundag hilak ang iyang giestadihang si Yesica, nga taga-Ecuador. Nangutana siya kon ngano. Miingon si Yesica nga sa wala pa siya mobalhig puyo, pobre kaayo siya. Usa ka adlaw niana, wala silay makaon, ug tubig lang ang mahatag niya sa iyang anak nga babaye. Si Yesica nag-ampo alang sa tabang samtang gipakatulog ang iyang anak. Pagkataudtaod, may duha ka Saksi nga mibisita, pero gikasab-an sila ni Yesica ug gigisi ang magasin nga ilang gihatag. “Mao ba ni ipakaon nako sa akong anak?” nangutana siya. Gihupay siya sa mga sister, pero wala siya maminaw. Sa ulahi, nagbilin silag usa ka basket nga pagkaon sa iyang pultahan. Si Yesica natandog sa ilang kaayo ug naguol kay wala niya pabilhi ang tubag sa Diyos sa iyang pag-ampo. Pero karon, determinado na siyang moalagad kang Jehova. Duna gyoy maayong epekto ang pagkamahinatagon!​—Eccl. 11:1, 6.

9, 10. (a) Sa karaang Israel, unsa ang pipila ka kahigayonan sa pagboluntaryo? (b) Unsang pipila ka buluhaton ang giatiman karon sa mga brader sa kongregasyon?

⁹ Sa karaang Israel, may pipila ka kahigayonan sa pagboluntaryo. (Ex. 36:2; 1 Cron. 29:5; Neh. 11:2) Karon, daghan pod kag oportunidad sa pagboluntaryo gamit ang imong panahon, kuwarta, ug abilidad sa pagtabang sa mga igsoon. Ug magmalipayon ug mapanalanginan gyod ka tungod sa imong pagboluntaryo.

¹⁰ Ang Pulong sa Diyos nagdasig sa mga brader sa kongregasyon sa pagbuhat uban kang Jehova pinaagi sa pagkab-ot ug mga pribilehiyo sa pag-alagad ug pagpanguna. (1 Tim. 3:1, 8, 9; 1 Ped. 5:2, 3) Kadtong mohimo niana makatabang sa uban sa praktikal ug espirituwal nga paagi. (Buh. 6:1-4) Gihangyo ka ba sa mga ansiyano nga mag-attendant, mag-atiman sa literatura ug teritoryo, motabang sa pagmentinar sa tigomanan, o uban pa? Kadtong naghimo niana makaingon gyod nga makapalipay kaayo ang pagtabang sa uban.

11. Sa unsang paagi nakabenepisyo ang usa ka sister tungod sa iyang mga naamiga diha sa mga proyekto sa organisasyon?

¹¹ Kadtong nagboluntaryo sa mga proyekto sa organisasyon sagad makailailag bag-ong mga higala. Pananglitan, ang sister  nga si Margie nakaboluntaryo sa pagpanukod ug Kingdom Hall sulod sa 18 ka tuig. Nianang mga panahona, ubay-ubay nga batabatang sister ang iyang nabansay. Para niya, kini maoy maayong paagi sa pagdinasigay. (Roma 1:12) Dihang mag-atubag problema, dasigon siya sa iyang mga naamiga sa maong mga proyekto. Nakaboluntaryo na ba ka sa pagpanukod? Makaboluntaryo ka bisag wala kay makamaohan, o skill, sa pagpanukod.

12. Unsaon nimo pagtabang niadtong naigo sa katalagman?

¹² Panahon sa katalagman, ang katawhan sa Diyos may kahigayonan sa pagbuhat uban niya pinaagi sa pagtabang sa mga igsoon sa praktikal nga paagi. Pananglitan, makahatag silag donasyon para niadtong naapektohan. (Juan 13:34, 35; Buh. 11:27-30) Makatabang pod sila sa pagpanglimpiyo o pagpanukod. Tagda si Gabriela, usa ka sister nga taga-Poland. Naguba ang iyang balay tungod sa baha. Pero nadasig siya dihang gitabangan siya sa mga igsoon gikan sa mga kongregasyong duol sa ila. “Dili ko ganahang maghisgot bahin sa nawala nako​—materyal ra to nga mga butang,” miingon siya. “Hinuon, gusto nakong hisgotan ang akong nadawat. Kini nga eksperyensiya nagpasalig nako nga ang pagkahimong bahin sa kongregasyon maoy talagsaong pribilehiyo ug makapalipay kaayo.” Daghan niadtong natabangan human sa katalagman ang nakaingon nga mas nadasig sila. Ug kadtong nagbuhat uban kang Jehova pinaagi sa pagtabang sa uban malipayon sab kaayo.​—Basaha ang Buhat 20:35; 2 Corinto 9:6, 7.

13. Sa unsang paagi ang pagboluntaryo makapalig-on sa atong relasyon kang Jehova? Paghatag ug pananglitan.

¹³ Si Stephanie ug ang ubang igsoon nagbuhat uban kang Jehova pinaagi sa pagtabang sa mga Saksing mibakwet sa United States. Mitabang sila sa pagpangitag kapuy-an ug muwebles (furniture) para sa mga bakwet. Si Stephanie miingon: “Natandog mi sa ilang kalipay ug apresasyon samtang  ilang naeksperyensiyahan ang gugma sa mga igsoon sa tibuok kalibotan. Abi nilag kami ray nakatabang nila, pero sa tinuod lang, mas natabangan mi nila. Ang nakita namong gugma, panaghiusa, pagtuo, ug pagsalig sa Diyos nakapalig-on gyod sa among gugma kang Jehova, ug mas naapresyar namo ang tanan namong nadawat pinaagi sa iyang organisasyon.”

14, 15. (a) Unsa nga panghunahuna ang gipakita ni Isaias? (b) Unsaon pagsundog sa mga magsasangyaw ang panghunahuna ni Isaias?

¹⁴ Gusto ba nimong mapauswag ang imong pagbuhat uban kang Jehova? Andam ba kang mobalhin sa lugar nga nanginahanglag dugang magsasangyaw? Siyempre, dili kinahanglang mobiyaheg layo ang mga alagad sa Diyos aron magmahinatagon. Pero dunay pipila ka igsoon nga makahimo ana. Sama silag panghunahuna ni propetang Isaias. Sa pagtubag sa pangutana ni Jehova, “Kinsa ang akong ipadala, ug kinsa ang moadto alang kanamo?” siya mitubag: “Ania ako! Ipadala ako.” (Isa. 6:8) Makahimo ka ba niana? Sa unsang mga paagi makatabang ka?

¹⁵ Bahin sa pagsangyaw ug paghimog mga tinun-an, si Jesus miingon: “Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:37, 38) Makaalagad ba ka sa lugar nga nanginahanglag dugang magsasangyaw, tingali ingong payunir? O makatabang ba ka sa uban sa pagbuhat ana? Gibati sa daghang igsoon nga ang pinakamaayong paagi sa paghigugma sa Diyos ug sa silingan mao ang pagpayunir sa mga lugar nga nanginahanglag dugang mangangani. Makahunahuna ba kag laing mga paagi sa pagpauswag sa imong pag-alagad? Kon imo nang buhaton, magmalipayon gyod ka.

16, 17. Unsa pay laing mga kahigayonan sa pagpauswag sa imong pagbuhat uban kang Jehova?

¹⁶ Andam ka bang moalagad sa Bethel o motabang sa mga proyekto sa organisasyon, ingong temporary worker o commuter? Ang organisasyon kanunayng nanginahanglag boluntaryo nga andam moalagad bisan asa iasayn ug bisag unsay ipatrabaho. Iasayn tingali sila diin may espesipikong panginahanglan, bisan pag ang ipatrabaho kanila lahi sa ilang nahibaloan. Pero, gipabilhan ni Jehova ang sakripisyo niadtong nagtanyag sa ilang kaugalingon sa pag-alagad diin may panginahanglan.​—Sal. 110:3.

¹⁷ Gusto ba kang modawat ug dugang pagbansay aron makaalagad kang Jehova nga mas bug-os pa? Kon oo, puwede kang moaplay sa School for Kingdom Evangelizers. Kini magbansay sa hamtong sa espirituwal nga mga brader ug sister nga bug-os panahong nag-alagad aron mas magamit sila sa organisasyon. Kadtong gustong moeskuyla kinahanglang andam modawat sa bisan unsang asaynment nga ihatag iniggraduwar nila. Gusto ba nimong pahimuslan ang maong kahigayonan sa pagkab-ot ug dugang pribilehiyo sa pag-alagad?​—1 Cor. 9:23.

18. Unsay kaayohan sa pagbuhat uban kang Jehova kada adlaw?

¹⁸ Kay katawhan ta ni Jehova, kita mahinatagon, maayo, buotan, ug mahigugmaon. Mahunahunaon pod ta sa uban kada adlaw. Kon buhaton nato nâ, moresulta nag kalinaw ug kalipay. (Gal. 5:22, 23) Bisag unsay imong kahimtang, magmalipayon ka pinaagi sa pagsundog sa pagkamahinatagon ni Jehova ug sa pagkahimong iyang pinanggang isigkamagbubuhat!​—Prov. 3:9, 10.