1. Sa unsa segurado si Marta bahin sa iyang igsoon? (Tan-awa ang hulagway sa sinugdan sa artikulo.)

ANG suod nga higala ug tinun-an ni Jesus nga si Marta naguol. Namatay ang igsoon niini nga si Lazaro. May makahupay kaha niya? Oo. Gipasaligan siya ni Jesus: “Mobangon ang imong igsoon.” Wala tingali kana bug-os makawala sa iyang kaguol, apan gidawat ni Marta ang pasalig ni Jesus. Si Marta miingon: “Ako nahibalo nga mobangon siya diha sa pagkabanhaw sa kataposan nga adlaw.” (Juan 11:20-24) Segurado siya nga mahitabo kana sa umaabot. Dayon, mihimo si Jesus ug milagro. Gibanhaw niya si Lazaro, nianang adlawa mismo.

2. Nganong gusto nimong sundogon ang pagkakombinsido ni Marta?

² Dili ta makadahom nga si Jesus o ang iyang Amahan mohimog sama niana nga milagro para nato karon. Apan sama kang Marta, kombinsido ka ba sa umaabot nga pagkabanhaw sa usa ka minahal? Tingali namatyan kag kapikas, inahan, amahan, o minahal nga apohan. O lagmit naguol ka sa kamatayon sa imong anak. Nangandoy kang magakos, makaestorya ang imong minahal ug makigkataw-anay uban niya. Makapalipay nga sama kang Marta, may  katarongan kang moingon, ‘Nahibalo ko nga mabanhaw ang akong minahal.’ Bisan pa niana, maayong pamalandongon sa matag Kristohanon ang mga rason kon nganong kombinsido ta niana.

3, 4. Sa unsa kahang paagi napalig-on ang pagsalig ni Marta tungod sa di pa dugayng gibuhat ni Jesus?

³ Kay nagpuyo duol sa Jerusalem, tingali wala masaksihi ni Marta ang pagbanhaw ni Jesus sa anak sa babayeng balo duol sa Nain sa Galilea. Pero, lagmit nakadungog siya bahin niini. Ug mao man usab sa pagbanhaw ni Jesus sa anak nga babaye ni Jairo. Kadtong tua sa balay ni Jairo “nahibalo . . . nga [ang bata] namatay.” Bisan pa niana, gikuptan ni Jesus ang kamot niini ug siya miingon: “Inday, bangon!” Ug mibangon dayon kini. (Luc. 7:11-17; 8:41, 42, 49-55) Si Marta ug ang iyang igsoong si Maria nahibalo nga makaayo si Jesus sa mga masakiton. Tungod niana, nakaingon sila nga kon didto pa si Jesus, dili unta mamatay si Lazaro. Pero karon nga patay na ang suod nga higala ni Jesus, unsa may madahom ni Marta? Matikdi nga siya miingon nga si Lazaro mabanhaw sa umaabot, “sa kataposan nga adlaw.” Nganong segurado siya niana? Ug nganong makaseguro ka nga mahitabo gyod ang pagkabanhaw diin mahimong maapil ang imong minahal?

⁴ May maayong mga rason nga makombinsir ka. Samtang atong repasohon ang pipila niini, tingali may mabasa ka diha sa Bibliya nga dili nimo sagad ikonektar sa imong kasaligang paglaom nga makita pag-usab ang imong minahal.

5. Unsay nakapakombinsir kang Marta nga mabanhaw si Lazaro?

⁵ Matikdi nga si Marta wala moingon: ‘Unta mabanhaw ang akong igsoon.’ Siya miingon: “Ako nahibalo nga mobangon siya.” Kombinsido si Marta tungod sa mga milagro nga lagmit nasayran niya bisan sa wala pa magsugod ang ministeryo ni Jesus. Nakat-onan niya kini sa bata pa siya diha sa ilang balay ug sa sinagoga. Tulo ka asoy sa Bibliya bahin sa pagkabanhaw ang lagmit mosantop sa hunahuna.

6. Unsang talagsaong milagro ang gihimo ni Elias, nga seguradong nasayran ni Marta?

⁶ Ang unang rekord sa pagkabanhaw nahitabo dihang gihatagag gahom sa Diyos ang iyang propetang si Elias sa paghimog mga milagro. Sa Zarepta, lungsod sa Fenicia nga daplin sa baybayon, usa ka pobreng babayeng balo ang nag-abiabi sa propeta. Dayon gitagan-an siya sa Diyos ug harina ug lana sa milagrosong paagi, busa siya ug ang iyang anak nga lalaki nakapabiling buhi. (1 Hari 17:8-16) Sa ulahi, ang iyang anak nasakit ug namatay. Gitabangan siya ni Elias. Samtang naghikap sa patayng lawas, si Elias miampo: “Diyos, palihog, pabalika ang kalag [o, kinabuhi] niining bataa sulod kaniya.” Ug nahitabo kini! Gidungog sa Diyos si Elias, ug ang bata nabuhi. Mao nâ ang unang pagkabanhaw nga narekord sa Bibliya. (Basaha ang 1 Hari 17:17-24.) Seguradong nasayran ni Marta kanang talagsaong panghitabo.

7, 8. (a) Hisgoti ang gihimo ni Eliseo sa paghupay sa naguol nga babaye. (b) Unsay gipamatud-an sa milagro ni Eliseo bahin kang Jehova?

⁷ Ang ikaduhang pagkabanhaw nga narekord sa Bibliya gihimo sa sumusunod ni Elias, ang propetang si Eliseo. Usa ka prominenteng babaye nga Israelinhon sa Sunem nga walay anak ang maabiabihon kaayo kang Eliseo. Pinaagi sa propeta, gigantihan sa Diyos ug anak ang maong babaye ug ang tigulang nang bana niini. Pipila ka tuig sa ulahi, ang bata namatay. Hunahunaa ang grabeng kaguol sa inahan. Sa pagtugot sa iyang bana, ang babaye mibiyaheg 30 kilometros ngadto kang Eliseo sa Bukid sa Carmelo. Gisugo sa propeta ang iyang tig-alagad nga si Gehazi nga  mag-una sa Sunem. Wala mabanhaw ni Gehazi ang bata. Dayon miabot ang naguol nga inahan ug si Eliseo.​—2 Hari 4:8-31.

⁸ Si Eliseo misulod sa balay diin didto ang patayng lawas, ug siya miampo. Pinaagig milagro, ang patayng bata nabuhi ug nakauban ang iyang nalipayng inahan! (Basaha ang 2 Hari 4:32-37.) Lagmit nahinumdoman sa inahan ang pag-ampo sa kanhing baog nga si Ana dihang gidala niini si Samuel aron moalagad sa tabernakulo: “Si Jehova . . . nagabanlod ngadto sa Sheol, ug siya nagapabangon.” (1 Sam. 2:6) Klaro, pinaagi sa literal nga pagbanhaw sa bata sa Sunem, gipamatud-an sa Diyos ang Iyang katakos sa pagbanhaw.

9. Ipatin-aw kon unsay kalabotan ni Eliseo sa ikatulong rekord sa pagkabanhaw diha sa Bibliya.

⁹ Apan dili kana ang kataposan sa talagsaong hitabo may kalabotan kang Eliseo. Siya nag-alagad ingong propeta sa kapig 50 ka tuig, ug dayon ‘siya nasakit ug namatay.’ Sa ulahi, dihang mga bukog na lang ang nahibilin sa lawas ni Eliseo, usa ka pundok sa bandido ang misulong sa nasod. May pipila ka Israelinhon nga naglubong ug patayng tawo. Kay nagdali sa pag-ikyas, ilang giitsa ang patay sa lubnganan diin nahimutang ang mga bukog ni Eliseo. Atong mabasa: “Dihang ang tawo nadapat sa mga bukog ni Eliseo, siya dihadiha nabuhi ug mitindog.” (2 Hari 13:14, 20, 21) Hunahunaa kon unsa kahay epekto kang Marta niana nga mga asoy sa pagkabanhaw! Klaro nga may gahom ang Diyos sa pagpildi sa kamatayon. Ug hunahunaa sab kon unsay epekto niini kanimo. Seguradong nakapakombinsir kini kanimo nga ang gahom sa Diyos dako ug walay kinutoban.

10. Giunsa pagtabang ni Pedro ang namatayng sister?

¹⁰ Sa Kristohanon Gregong Kasulatan, mabasa sab nato ang mga asoy bahin sa pagkabanhaw nga gihimo sa mga representante sa Diyos. Makita nâ nato sa mga pagbanhaw nga gihimo ni Jesus duol sa Nain ug sa balay ni Jairo. Gihimo sab nâ ni apostol Pedro sa Kristohanong si Dorcas (Tabitha). Giadto ni Pedro ang dapit diin kini gihaya. Duol sa patayng lawas, si Pedro miampo, dayon miingon: “Tabitha, bangon!” Nabanhaw dayon siya, ug “gipresentar siya nga buhi” ngadto sa mga igsoon sa pagtuo. Kay kadto makapakombinsir kaayo, “daghan ang nahimong mga magtutuo sa Ginoo.” Sila makapamatuod bahin sa Ginoo ug ilabina sa katakos ni Jehova sa pagbanhaw sa mga patay.​—Buh. 9:36-42.

11. Unsay gipahibalo ni Lucas bahin kang Eutiko, ug unsay epekto niana sa uban?

¹¹ Ang uban nakasaksi sa laing pagkabanhaw. Usa ka higayon niana, si apostol Pablo didto sa tigom sa usa ka itaas nga lawak sa Troas, nga karon mao ang amihanan kasadpang Turkey. Si Pablo nagpakigpulong hangtod sa tungang gabii. Usa ka batan-on nga ginganlag Eutiko ang naminaw, nga naglingkod diha sa bentana. Pero siya nakatulog ug nahulog gikan sa ikatulong andana. Tingali ang doktor nga si Lucas ang unang nakaabot kang Eutiko, ug si Lucas nakahimog medikal nga konklusyon: Si Eutiko wala lang maangol o makuyapi​—siya patay na! Si Pablo nanaog ug migakos sa patayng lawas, ug dayon mihimog makapatingalang pahibalo: “Ang iyang kalag anaa kaniya.” Seguradong dako kaayo nag epekto sa mga nakakita! Kay nahibalo sila nga si Eutiko namatay ug dayon gibanhaw, “dili masukod ang ilang kalipay.”​—Buh. 20:7-12.

12, 13. Base sa mga pagkabanhaw nga atong nahisgotan, unsang mga pangutana ang angay natong konsiderahon?

¹² Ang nahisgotang mga asoy angayng makapakombinsir nimo, sama kang Marta,  nga ang atong Diyos ug Maghahatag ug Kinabuhi makahimo sa pagbuhi pag-usab sa patayng tawo. Apan, makapainteres nga may matinumanong alagad sa Diyos, sama kang Elias, Jesus, o Pedro, nga presente sa matag usa niana nga pagkabanhaw, nga nahitabo sa panahon nga si Jehova naghimog mga milagro. Pero, unsay atong ikasulti niadtong nangamatay sa laing panahon sa kasaysayan? Kon walay gihimong pagpamanhaw ang Diyos nianang panahona, makadahom ba ang iyang matinumanong mga alagad nga iyang banhawon ang mga patay sa umaabot? Makaingon kaha sila sama kang Marta: “Ako nahibalo nga [ang akong igsoon] mobangon . . . diha sa pagkabanhaw sa kataposan nga adlaw”? Nganong masaligon man siya niana, ug nganong makasalig pod ka?

¹³ Dunay daghang asoy sa inspiradong Pulong sa Diyos nga nagpakita nga ang maunongong mga alagad ni Jehova nahibalo nga may pagkabanhaw sa umaabot. Konsideraha ang pipila.

14. Unsay atong makat-onan bahin sa pagkabanhaw gikan sa asoy ni Abraham?

¹⁴ Hunahunaa ang gisugo sa Diyos kang Abraham bahin kang Isaac, ang dugay nang gihulat nga manununod. Si Jehova miingon: “Kuhaa, palihog, ang imong anak nga lalaki, ang imong bugtong anak nga imong gihigugma pag-ayo, si Isaac, ug . . . itanyag siya ingong usa ka halad-nga-sinunog.” (Gen. 22:2) Hunahunaa kon unsay gibati ni Abraham sa pagkadungog niana nga sugo. Si Jehova nagsaad nga pinaagi sa kaliwat ni Abraham, ang tanang nasod mapanalanginan. (Gen. 13:14-16; 18:18; Roma 4:17, 18) Dugang pa, si Jehova miingon nga ang panalangin moabot “pinaagi kang Isaac.” (Gen. 21:12) Pero unsaon man pagkatuman niana kon patyon ni Abraham si Isaac ingong halad? Si Pablo giinspirar sa pagpatin-aw nga si Abraham nagtuo nga ang Diyos makabanhaw kang Isaac. (Basaha ang Hebreohanon 11:17-19.) Wala mag-ingon ang Bibliya nga si Abraham naghunahuna nga kon motuman siya, mabuhig balik si Isaac human lang sa pipila ka oras, adlaw, o semana. Wala mahibalo si Abraham kon kanus-a mabanhaw ang iyang anak. Pero siya misalig nga banhawon ni Jehova si Isaac.

15. Unsang paglaom ang gipahayag sa patriarkang si Job?

¹⁵ Ang patriarkang si Job naglaom usab sa umaabot nga pagkabanhaw. Nahibalo siya nga kon putlon ang usa ka kahoy, kini motubo pag-usab ug mahimong bag-ong tanom. Dili ingon niana ang tawo. (Job 14:7-12; 19:25-27) Kon mamatay ang usa ka tawo, dili  siya makabuhi pag-usab sa iyang kaugalingon. (2 Sam. 12:23; Sal. 89:48) Siyempre, wala kana magpasabot nga dili makabanhaw ang Diyos sa usa ka tawo. Gani, si Job nagtuo nga si Jehova nagtakdag panahon nga hinumdoman siya. (Basaha ang Job 14:13-15.) Wala mahibalo si Job kon kanus-a kana. Bisan pa niana, siya may pagsalig nga ang Usa nga naglalang sa tawo makahinumdom ug maghinumdom kaniya ug magbanhaw niya.

16. Unsang pagdasig ang gihatag sa anghel kang propetang Daniel?

¹⁶ Si Daniel maoy laing matinumanong tawo nga atong nailhan sa Hebreohanong Kasulatan. Maunongon siyang nag-alagad sa Diyos sa taas nga panahon, ug gitabangan siya ni Jehova. Sa usa ka higayon, gitawag sa anghel si Daniel ingong “tawong tilinguhaon kaayo,” ug giawhag siya nga ‘magmalinawon’ ug “magmakusganon.”​—Dan. 9:22, 23; 10:11, 18, 19.

17, 18. Unsay gisaad kang Daniel?

¹⁷ Si Daniel mag-100 na ang edad ug hapit nang mamatay. Lagmit naghunahuna siya kon unsay mahitabo kaniya. Mabuhi kaha pag-usab si Daniel? Siyempre! Sa kataposan sa basahon sa Daniel, atong mabasa ang pasalig sa Diyos: “Kon bahin kanimo, magpadayon ka hangtod sa kataposan; ug ikaw mopahulay.” (Dan. 12:13) Ang tigulang nang si Daniel nahibalo nga ang patay nagpahulay, nga wala nay “lalang [o, plano] ni kahibalo ni kaalam sa Sheol.” Hapit na kanang adtoan ni Daniel. (Eccl. 9:10) Pero dili kana ang iyang kataposan. May gisaad kaniya alang sa umaabot.

¹⁸ Ang mensahe kang Daniel nagpadayon: “Ikaw mobarog alang sa imong bahin sa kataposan sa mga adlaw.” Walay gisulting petsa o gidugayon. Si Daniel mamatay ug mopahulay. Bisan pa niana, dihang siya giingnan nga siya ‘mobarog para sa iyang bahin’ sa umaabot, susama rag gisaaran siyag pagkabanhaw​—nga dugay pang mahitabo human sa iyang kamatayon. Kana mahitabo “sa kataposan sa mga adlaw.” Ang Maayong Balita Biblia naghubad sa saad kang Daniel: “Ikaw [mobarog] sa dapit nga gitagana kanimo inig-abot na sa kataposan.”

19, 20. (a) Unsay koneksiyon sa atong gihisgotan ug sa tubag ni Marta kang Jesus? (b) Unsay atong hisgotan sa sunod nga artikulo?

¹⁹ Klarong may rason si Marta nga magmasaligon nga ang iyang matinumanong igsoon nga si Lazaro “mobangon . . . diha sa pagkabanhaw sa kataposan nga adlaw.” Ang gisaad kang Daniel, ug ang masaligong tubag ni Marta kang Jesus, angayng maghatag ug pasalig sa mga Kristohanon karon. Duna gyoy pagkabanhaw!

²⁰ Atong nasayran nga may mga panghitabo kaniadto nga nagpamatuod nga posible ang pagkabanhaw​—ang patay mahimong mabuhi pag-usab. Ug ang mga alagad sa Diyos naglaom nga mahitabo ang pagkabanhaw sa umaabot. Pero, duna bay timailhan nga may pagkabanhawng mahitabo dugay pa human kini gisaad? Kon mao, maghatag nâ natog dugang rason nga molaom, sama kang Marta, sa umaabot nga pagkabanhaw. Apan, kanus-a man nâ mahitabo? Hisgotan kana sa sunod nga artikulo.