1. Nganong importanteng desisyon ang pagpabawtismo? (Tan-awa ang hulagway sa sinugdan sa artikulo.)

MATAG tuig, linibong Bible study ang magpabawtismo. Daghan nila batan-on pa​—mga tin-edyer o mas bata pa. Tingali nagdako sila sa Saksi nga pamilya. Usa ka ba nila? Kon mao, angay kang komendahan sa imong gibuhat. Gikinahanglan ang bawtismo para sa mga Kristohanon, ug importante kini aron maluwas.​—Mat. 28:19, 20; 1 Ped. 3:21.

2. Nganong ang pagpahinungod dili angayng kahadlokan o likayan?

² Bisag moresultag daghang panalangin ang pagpabawtismo, kini naghatag sab ug responsabilidad. Sa unsang paagi? Sa adlaw sa imong bawtismo, ikaw mitubag ug oo sa pangutana, “Pinasukad sa halad ni Jesu-Kristo, ikaw ba naghinulsol sa imong mga sala ug nagpahinungod sa imong kaugalingon kang Jehova aron buhaton ang iyang kabubut-on?” Ang imong pagpabawtismo maoy simbolo sa imong pagpahinungod. Usa kana ka seryosong panaad kang Jehova nga higugmaon siya ug unahon ang iyang kabubut-on. Angay ka bang magmahay? Dili gayod! Ang paghatag sa imong kinabuhi  kang Jehova dili gyod sayop nga desisyon. Hunahunaa kon dili nâ nimo buhaton! Ang tawong wala magpasakop kang Jehova nailalom sa pagmando ni Satanas. Dili gusto sa Yawa nga maluwas ka. Sa pagkatinuod, malipay siya kon mawad-an ka sa imong paglaom nga mabuhi sa walay kataposan kay midapig ka niya ug mirebelde sa pagmando ni Jehova.

3. Unsa ang mga panalangin sa imong pagpahinungod kang Jehova?

³ Sukwahi sa pagdapig kang Satanas, tagda ang mga panalangin nga imong nadawat ingong dedikado ug bawtismadong Kristohanon. Karon nga gihatag na nimo ang imong kinabuhi kang Jehova, mas kombinsido kang moingon: “Si Jehova dapig kanako; dili ako mahadlok. Unsay arang mabuhat sa yutan-ong tawo kanako?” (Sal. 118:6) Walay makalabaw sa pribilehiyo sa pagkahimong dapig ug inuyonan sa Diyos.

4, 5. (a) Nganong personal nga responsabilidad ang pagpahinungod? (b) Unsang mga pagsulay ang maatubang sa tanang Kristohanon bisag unsay edad?

⁴ Ingong bawtismadong Kristohanon, ang imong relasyon kang Jehova dili ‘family plan,’ sama nianang ginabayrang serbisyo sa cellphone sa pipila ka ginikanan. Hinunoa, ikaw na ang responsable sa imong kaluwasan, bisag naa pa ka sa poder sa imong ginikanan. Nganong importanteng hinumdoman kana? Kay dili nimo pirmeng mahibal-an kon unsang mga pagsulay ang imong maatubang. Pananglitan, kon bata pa kaayo kang nabawtismohan, tingali makaeksperyensiya kag kausaban sa emosyon o presyur dihang tin-edyer na. Usa ka dalaga ang miingon: “Dili maguol ang usa ka bata nga Saksi ni Jehova siya tungod lang kay wala siya makakaon ug birthday cake sa eskuylahan. Pero paglabay sa pipila ka tuig diin mag-anam ka kusog ang tinguha sa pagpakigsekso, kinahanglang kombinsido kaayo siya nga ang pagsunod sa mga balaod ni Jehova mao gyod ang kinamaayohang desisyon.”

⁵ Siyempre, dili lang ang mga batan-on ang makaatubang ug bag-ong mga pagsulay. Bisag kadtong hamtong na nga nabawtismohan nakasinatig daghang wala damhang pagsulay. Kana nga mga pagsulay maylabot tingali sa kaminyoon, panglawas, o trabaho. Sa tinuod lang, bisag unsa pay atong edad, makaatubang tag mga situwasyon diin kinahanglan tang magmatinumanon kang Jehova.​—Sant. 1:12-14.

6. (a) Sa unsang paagi dili kondisyonal ang imong pagpahinungod kang Jehova? (b) Unsay imong makat-onan sa Filipos 4:11-13?

⁶ Aron matabangan ka nga magmatinumanon sa tanang situwasyon, hinumdomi nga dili kondisyonal ang imong panaad kang Jehova. Nagpasabot kana nga giingnan nimo ang Soberano sa uniberso nga mopadayon ka sa pag-alagad niya bisan pag ang imong mga higala o ginikanan moundang sa pagbuhat niana. (Sal. 27:10) Sa tanang situwasyon, pangayog tabang kang Jehova aron matuman nimo ang imong pahinungod.​—Basaha ang Filipos 4:11-13.

7. Unsay ipasabot sa pagpanlimbasog sa imong kaluwasan “uban ang kahadlok ug pagpangurog”?

⁷ Gusto ni Jehova nga mahimo kang iyang higala. Pero aron magpabiling iyang higala ug makapanlimbasog sa imong kaluwasan, kinahanglan kang maningkamot. Gani, ang Filipos 2:12 nag-ingon: “Magpadayon kamo sa pagpanlimbasog sa inyong kaugalingong kaluwasan uban ang kahadlok ug pagpangurog.” Nagpakita kana nga angay nimong konsiderahon kon sa unsang paagi magpabilin kang suod kang Jehova ug magmatinumanon kaniya bisan pa sa mga pagsulay. Dili ka angayng sobrang mokompiyansa. Bisan ang pipila nga dugay nang nag-alagad sa Diyos wala makapabiling matinumanon. Busa, unsay imong himoon aron makapanlimbasog ka sa imong kaluwasan?

8. Unsay apil sa personal nga pagtuon, ug nganong importante kini?

⁸ Aron mahimong higala ni Jehova, kinahanglan tang mamati kaniya ug makig-estorya niya. Ang pangunang paagi nga makapamati ta kang Jehova mao ang personal nga pagtuon sa Bibliya. Apil niana ang pagbasa ug pagpamalandong sa Pulong sa Diyos ug binase sa Bibliyang mga publikasyon. Samtang buhaton nimo kana, hinumdomi nga ang pagtuon sa Bibliya dili lang basta pagmemoryag impormasyon nga sama sa imong buhaton kon dunay eksam sa eskuylahan. Ang mapuslanong pagtuon maoy samag pagbiyahe diin makakat-on ug makadiskobre kag bag-ong mga butang bahin kang Jehova. Kini makatabang nimo nga masuod sa Diyos, ug makigsuod sab siya nimo.​—Sant. 4:8.

9. Unsang mga galamiton ang nakatabang nimo sa imong personal nga pagtuon?

⁹ Ang organisasyon ni Jehova nagtaganag daghang galamiton sa pagtabang nimo nga magmaepektibo sa imong pagtuon. Pananglitan, ang “Pagtuon sa Bibliya” nga makita diha sa “Mga Tin-edyer” nga seksiyon sa jw.org makatabang nimo sa pagkat-on ug praktikal nga leksiyon gikan sa mga asoy sa Bibliya. Diha usab sa jw.org, ang mga giya sa pagtuon nga “Unsay Tinuod nga Gitudlo sa Bibliya?” makatabang nimo nga mahimong kombinsido sa imong gituohan. Kana nga mga giya motabang nimo sa pagpatin-aw sa imong pagtuo ngadto sa uban. Ang ubang ideya para sa pagtuon makita sa artikulong “Mga Batan-on Nangutana . . . Unsaon Nako Paghimong Makalingaw ang Pagbasa sa Bibliya?” sa Abril 2009 nga Pagmata! Importante ang pagtuon ug pagpamalandong aron makapanlimbasog ka sa imong kaluwasan.​—Basaha ang Salmo 119:105.

10. Nganong hinungdanon sa bawtismadong Kristohanon ang pag-ampo?

¹⁰ Ang personal nga pagtuon mao ang usa ka paagi nga mamati ta kang Jehova, ug ang pag-ampo mao ang paagi nga makig-estorya ta niya. Dili angayng isipon sa usa ka Kristohanon ang pag-ampo ingong walay pulos nga rituwal o ‘pasuwerte’ aron mas modako ang tsansa nga molampos sa usa ka buluhaton. Hinunoa, ang pag-ampo maoy tinuod nga pagpakigkomunikar sa atong Maglalalang. Gusto ni Jehova nga mamati sa imong isulti. (Basaha ang Filipos 4:6.) Busa, bisag unsay imong gikabalak-an, ang maalamong  tambag sa Bibliya mao ang ‘pagtugyan sa imong palas-anon kang Jehova.’ (Sal. 55:22) Nagtuo ba gyod ka niana? Minilyong igsoon ang makapamatuod nga nakatabang nâ kanila. Makatabang sab nâ nimo!

11. Nganong angay kang magpasalamat pirme kang Jehova?

¹¹ Dili lang ang pagpangayog tabang kang Jehova ang rason kon nganong moampo ta. Ang Bibliya nag-ingon: “Magmapasalamaton kamo.” (Col. 3:15) Usahay sobra tang mabalaka sa atong mga problema nga makalimtan na nato ang daghang panalangin nga atong nadawat. Busa sulayi kini: Kada adlaw, paghunahunag labing menos tulo ka butang nga angay nimong pasalamatan. Dayon, pasalamati si Jehova sa maong mga panalangin. Ang tin-edyer nga si Abigail, kinsa nabawtismohan sa edad nga 12, miingon: “Para nako, si Jehova ang angayng modawat sa atong pasalamat labaw kang bisan kinsa sa uniberso. Angay nato siyang pasalamatan sa matag higayon nga makadawat tag regalo gikan niya. Kas-a nadunggan nako ning nindot nga pahinumdom: Unsa kaha kon pagmata nato pagkaugma, ang ihatag lang ni Jehova mao ang mga butang nga atong gipasalamatan karong adlawa?” *

12, 13. Nganong hinungdanon nga hunahunaon kon sa unsang paagi nimo natilawan ang kaayo ni Jehova?

¹² Si Haring David, nga naluwas gikan sa daghang kalisdanan, mipahayag pinaagig awit: “Tilawi ug tan-awa ninyo nga si Jehova maayo; malipayon ang tawo nga lig-on ug lawas nga modangop kaniya.” (Sal. 34:8) Gipasiugda nianang tekstoha nga kinahanglang masinati nato mismo ang kaayo ni Jehova. Dihang ikaw mobasa sa Bibliya ug sa atong mga publikasyon ug motambong sa mga tigom, makadungog kag makapadasig nga mga eksperyensiya kon giunsa pagtabang sa Diyos ang uban sa pagpabiling matinumanon. Pero samtang mouswag ka sa espirituwal, kinahanglan nimong masulayan mismo ang kaayo ni Jehova. Sa unsang paagi nimo natilawan ang kaayo ni Jehova?

¹³ May usa ka paagi diin natilawan sa tanang Kristohanon ang kaayo ni Jehova. Kana mao ang pag-imbitar kanato sa pagpakigsuod kaniya ug sa iyang Anak. Si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Gibati ba nimo nga gikabig ka ni Jehova? Morason tingali ang usa ka batan-on, ‘Gikabig ni Jehova ang akong ginikanan, misunod lang ko.’ Pero dihang nagpahinungod ka kang Jehova ug nagpabawtismo, imong gipakita nga duna ka nay espesyal nga relasyon kaniya. Karon, nakaila na gyod siya nimo. Ang Bibliya nagpasalig: “Kon ang usa ka tawo nahigugma sa Diyos, kini siya nailhan niya.” (1 Cor. 8:3) Paningkamoti kanunay nga apresyahon ang imong dapit diha sa organisasyon ni Jehova.

14, 15. Sa unsang paagi makatabang ang ministeryo sa pagpalig-on sa imong pagtuo?

¹⁴ Matilawan sab nimo ang kaayo ni Jehova dihang masinati nimo ang iyang tabang samtang imong isulti ang imong pagtuo sa uban. Mahimo nimo nâ diha sa ministeryo ug sa eskuylahan. Ang pipila malisdan sa pagsangyaw sa ilang mga eskolmet. Lagmit makasabot ka kon ngano. Wala kay ideya kon unsay ilang reaksiyon. Mas lisod tingali kon makig-estorya ka sa usa ka grupo kay sa usa lang ka klasmet. Unsay makatabang nimo?

¹⁵ Una, hunahunaa kon nganong kombinsido ka sa imong gituohan. Gihubad ba sa inyong pinulongan ang mga giya sa pagtuon diha sa jw.org? Kon dili ka segurado, gahinig panahon ang pagpangita niini. Gidisenyo kini aron makapamalandong ka sa imong gituohan,  nganong gituohan nimo kana, ug kon unsaon kana pagpatin-aw ngadto sa uban. Kon ikaw kombinsido ug andam, mapalihok ka sa pagsangyaw bahin kang Jehova.​—Jer. 20:8, 9.

16. Unsay makatabang nimo aron dili ka magduhaduha sa pagsulti bahin sa imong gituohan?

¹⁶ Apan, bisag nakapangandam ka, magduhaduha tingali gihapon ka sa pagsulti sa imong gituohan. Usa ka 18 anyos nga sister, kinsa nabawtismohan sa edad nga 13, miangkon, “Kabalo ko kon unsay akong gituohan, pero usahay malisdan ko sa pagsulti kon unsay naa sa akong hunahuna.” Busa maningkamot siyang mosulti bahin sa kamatuoran diha sa natural ug relaks nga paagi. Siya miingon: “Ang akong mga klasmet pirmeng mag-estorya kon unsay ilang ginabuhat. Angay nga mao sab nay akong buhaton. Busa molakbit kog estorya sa akong ginabuhat. Pananglitan moingon ko, ‘Duna koy gitudloag Bibliya niadtong miaging adlaw ug . . . ’ Dayon akong hisgotan ang punto nga gusto nakong isulti. Bisag dili Bibliya ang direktang gihisgotan, sagad gustong masayod ang uban kon unsay akong buhaton dihang magtudlog Bibliya. Usahay, mangutana sila bahin ana. Sa sige nakong gamit niining paagiha, mas sayon na ang pagpakig-estorya nila. Ug lipay kaayo ko inigkahuman!”

17. Sa unsang paagi ang imong panglantaw sa imong gituohan makatabang nimo sa pagpakigsulti sa uban?

¹⁷ Kon ikaw motahod ug magpakitag personal nga interes sa uban, mas dakog purohan nga buhaton pod nâ nila nimo. “Mahadlok kong iapil ang Bibliya sa akong pagpakig-estorya kay basig maghunahuna ang mga tawo nga panatiko kaayo ko.” Mao ni ang giingon ni Olivia, nga 17 anyos ug nabawtismohan sa wala pa matin-edyer. Dayon giusab niya ang iyang panglantaw. Imbes maghunahuna pag-ayo sa iyang kahadlok, si Olivia miingon: “Daghang batan-on ang walay kalibotan bahin sa mga Saksi ni Jehova. Kami lang ang mga Saksi nga ilang nakaila. Busa, magdepende sa among paggawi ang ilang reaksiyon. Komosta kon maulaw mi o maglisod sa pag-estorya bahin sa among pagtuo, o kaha mahadlok dihang makig-estorya na? Aw, lagmit maghunahuna sila nga gikaulaw namo ang among relihiyon. Basin ganig dili sila mamati kay kulang mig kompiyansa. Pero, kon natural lang ang atong pagpakig-estorya ug kombinsido ta sa atong gituohan, ug pirme nang iapil sa atong pagpakigsulti, lagmit motahod sila nato.”

18. Unsay kinahanglan nimong buhaton aron makapanlimbasog ka sa imong kaluwasan?

¹⁸ Sama sa atong nahisgotan, seryosong responsabilidad ang pagpanlimbasog sa imong kaluwasan. Aron mahimo kana, gikinahanglan ang pagbasa ug pagpamalandong sa Pulong sa Diyos, pag-ampo kang Jehova, ug paghunahuna kon sa unsang paagi gipanalanginan ka ni Jehova ingong indibiduwal. Kon buhaton nâ nimo, mas mapabilhan nimo ang imong pribilehiyo sa pagpakighigala kang Jehova. Kana magpalihok nimo sa pagsulti bahin sa imong gituohan.​—Basaha ang Salmo 73:28.

19. Nganong dili makawang ang imong paningkamot sa pagpanlimbasog sa imong kaluwasan?

¹⁹ Si Jesus miingon: “Kon adunay buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit ug magpadayon sa pagsunod kanako.” (Mateo 16:24) Klaro nga ang pagkahimong sumusunod ni Jesus​—apil ang pagpahinungod ug pagpabawtismo—​maoy imong obligasyon ingong Kristohanon. Bisan pa niana, moresulta kinig daghang panalangin karon ug kinabuhing walay kataposan sa bag-ong kalibotan sa Diyos. Busa, padayong panlimbasogi ang imong kaluwasan!