1, 2. Dihang mohimog tumong sa kinabuhi, nganong maalamon nga maminaw sa atong Maglalalang? (Tan-awa ang mga hulagway sa sinugdan sa artikulo.)

KON batan-on ka, nakadawat na tingali kag daghang tambag bahin sa imong kaugmaon. Ang mga maestro, guidance counselor, o ang uban lagmit magdasig nimo sa pagkuhag taas nga edukasyon ug maayong trabaho. Pero lahi ang gitambag ni Jehova. Siyempre, gusto niyang magkugi ka sa imong pag-eskuyla aron duna kay ikasuportar sa kaugalingon iniggraduwar. (Col. 3:23) Pero dihang modesisyon bahin sa imong prayoridad, gidasig ka niya nga magpagiya sa iyang mga prinsipyo, nga nag-apil sa iyang katuyoan ug kabubut-on para nato niining panahon sa kataposan.​—Mat. 24:14.

² Hinumdomi pod nga nahibalo si Jehova sa tanan. Nahibalo siya kon unsay mahitabo niining kalibotana ug kon unsa ka duol na ning taposon. (Isa. 46:10; Mat. 24:3, 36) Nakaila sab siya nato​—kon unsay tinuod nga makapatagbaw ug makapalipay nato, ingon man sa mga hinungdan sa kapakyasan ug kagul-anan. Busa, bisan unsa ka rasonable ang tambag, kon wala ni ibase sa Pulong  sa Diyos, dili gyod ni tinuod nga kaalam.​—Prov. 19:21.

3, 4. Sa unsang paagi ang pagsunod sa sayop nga tambag nakaapektar kang Adan ug Eva ug sa ilang kaliwat?

³ Ang sayop nga tambag nagsugod sa sayong bahin sa kasaysayan sa tawo dihang misulod si Satanas sa esena. Ingong mapangahason ug mabuotbuotong magtatambag, giingnan niya si Eva nga mahimong mas malipayon siya ug ang iyang bana kon silay magbuot sa ilang kinabuhi. (Gen. 3:1-6) Pero ang tinuod, kaugalingon ray gihunahuna ni Satanas. Gusto niya nga si Adan ug Eva​—ug ang ilang umaabot nga kaliwat—​magpasakop ug mosimba niya imbes kang Jehova. Pero unsa may nahatag ni Satanas nila? Si Jehova ang naghatag sa tanan nilang nabatonan​—ang usag usa, ang nindot nga tanaman nga ilang gipuy-an, ug ang ilang hingpit nga lawas nga mabuhi unta sa walay kataposan.

⁴ Makapaguol, si Adan ug Eva misupak sa Diyos. Sa paghimo niana, ilang giputol ang ilang relasyon sa Diyos. Aw, nahibalo na ta nga dili gyod maayo ang resulta. Sama sa bulak nga giputol gikan sa tanom, sila anam-anam nga nalaya ug namatay. Ang ilang mga anak nag-antos pod sa tunglo sa sala. (Roma 5:12) Bisan pa niana, kadaghanan karon mipili gihapon nga dili magpasakop sa Diyos. Gusto nilang silay magbuot sa ilang kinabuhi. (Efe. 2:1-3) Klarong gipakita sa mga resulta nga “walay kaalam . . . nga makabarog batok kang Jehova.”​—Prov. 21:30.

5. Sa unsa masaligon ang Diyos, ug husto ba ang iyang pagsalig?

⁵ Bisan pa niana, masaligon si Jehova nga ang pipila, apil ang daghang buotang batan-on, mangita ug moalagad niya. (Sal. 103:17, 18; 110:3) Gipabilhan gyod niya sila! Usa ka ba nila? Kon mao, seguradong natagamtam nimo ang daghang “maayong butang” gikan sa Diyos nga nakapalipay kaayo nimo. (Basaha ang Salmo 103:5; Prov. 10:22) Sama sa ato unyang hisgotan, apil nianang “maayong butang” ang abundang espirituwal nga pagkaon, kinamaayohang mga higala, mapuslanong mga tumong, ug tinuod nga kagawasan.

6. Nganong angay mong maghunahuna sa inyong espirituwal nga panginahanglan, ug giunsa nâ pagtagana ni Jehova?

⁶ Dili sama sa mga hayop, duna moy espirituwal nga panginahanglan​—nga ang Maglalalang ray makatagana. (Mat. 4:4) Kon maminaw mo niya, mahimo mong masinabtanon, maalamon, ug malipayon. Si Jesus miingon: “Malipayon kadtong mahunahunaon sa ilang espirituwal nga panginahanglan.” (Mat. 5:3) Ang Diyos nagtagana sa inyong espirituwal nga panginahanglan pinaagi sa iyang Pulong ug sa “matinumanon ug maalamong ulipon,” nga nag-andam ug abundang espirituwal nga pagkaon. (Mat. 24:45) Ug nagkadaiya gyod ang maong pagkaon!​—Isa. 65:13, 14.

7. Unsa ang pipila ka kaayohan sa espirituwal nga pagkaon nga gitagana sa Diyos?

⁷ Ang espirituwal nga pagkaon nga gitagana sa Diyos maghatag ninyog kaalam ug katakos sa panghunahuna, nga manalipod ninyo sa daghang paagi. (Basaha ang Proverbio 2:10-14.) Pananglitan, kini nga mga hiyas makatabang ninyo nga mailhan ang bakak nga mga pagtulon-an, sama sa panghunahuna nga walay Maglalalang ug sekreto kuno sa kalipay ang kuwarta ug kabtangan. Tabangan sab mo niana nga mailhan ug malikayan ang sayop nga mga tinguha ug ang mga panggawi nga makadaot sa kaugalingon. Busa, padayon sa pagpangita sa kaalam ug sa katakos sa panghunahuna, nga isipon kining bahandi! Dihang inyong mabatonan ang maong bililhong  mga hiyas, kamo mismo ang makaingon nga gimahal mo ni Jehova ug gusto niya ang pinakamaayo para ninyo.​—Sal. 34:8; Isa. 48:17, 18.

8. Nganong kinahanglan mong makigsuod sa Diyos karon, ug sa unsang paagi makabenepisyo mo niana sa umaabot?

⁸ Sa dili madugay, malaglag ang matag bahin sa kalibotan ni Satanas, ug si Jehova lang ang atong kadangpan. Gani, basin moabot ang panahon nga magdepende ta niya bisan sa atong sunod nga kaonon! (Hab. 3:2, 12-19) Oo, karon na ang panahon sa pagpakigsuod sa atong langitnong Amahan ug sa pagpalig-on sa atong pagsalig niya. (2 Ped. 2:9) Kon buhaton nâ ninyo, bisan unsay mahitabo, bation ninyo ang giingon sa salmistang si David: “Si Jehova gibutang ko sa kanunay sa akong atubangan. Tungod kay ania siya sa akong tuong kamot, ako dili matarog.”​—Sal. 16:8.

9. (a) Sumala sa Juan 6:44, unsay himoon ni Jehova? (b) Unsay talagsaon kon makailaila kag Saksi?

⁹ Si Jehova ang nagkabig niadtong gusto niyang mahimong bahin sa iyang espirituwal nga pamilya, nga nagdani sa sinserong mga tawo sa tinuod nga pagsimba. (Basaha ang Juan 6:44.) Dihang makailaila kag dili Saksi, unsay imong nahibaloan bahin niya? Gawas sa iyang ngalan ug hitsura, wala na kay nahibal-an pa. Pero lahi kon mailaila nimo ang usa nga nakaila ug nahigugma kang Jehova. Bisag lahi siyag kagikan, nasod, tribo, o kultura, daghan na kag nahibaloan bahin niya, ug daghan pod siyag nahibaloan bahin nimo!

10, 11. Unsay parehong nabatonan sa mga alagad ni Jehova, ug sa unsang paagi nakabenepisyo ta niana?

¹⁰ Pananglitan, mailhan dayon ninyo ang inyong “pinulongan”​—ang “putli nga pinulongan” sa kamatuoran. (Sof. 3:9) Ingong resulta, nahibalo mo kon unsay inyong gituohan bahin sa Diyos, moralidad, paglaom sa umaabot, ug uban pa. Dugang pa, kana ang importante kaayong mahibal-an bahin sa usa ka tawo​—mga butang nga makatabang ninyo nga mosalig sa usag usa. Mahimo pod nang pundasyon sa maayo ug dumalayong panaghigalaay.

 ¹¹ Dili sa paghinobra, pero ingong magsisimba ni Jehova, nabatonan ninyo ang kinamaayohang mga higala, ug naa sila sa tibuok kalibotan. Wala pa lang ninyo makita ang kadaghanan nila! Gawas sa katawhan ni Jehova, may lain pa bang nagtagamtam nianang bililhong regalo?

12. Unsang maayong espirituwal nga mga tumong ang puwede ninyong kab-oton?

¹² Basaha ang Ecclesiastes 11:9–12:1. Naa ba moy mga tumong nga gipangab-ot? Basin naningkamot mong mabasa ang Bibliya kada adlaw. O kaha naningkamot mong mouswag sa paghatag ug bahin, pagkomento, ug pagpanudlo. Bisan unsa pa man, dihang makita ninyo ang positibong mga resulta​—o makita nâ sa uban ug komendahan mo—​unsay inyong bation? Seguradong malipay kaayo mo. Ug kana gyoy angay ninyong bation kay giuna ninyo ang kabubut-on sa Diyos, ingong pagsundog kang Jesus.​—Sal. 40:8; Prov. 27:11.

13. Kon ikomparar sa pagpangab-ot ug mga tumong sa kalibotan, nganong mas maayo ang pag-alagad sa Diyos?

¹³ Pinaagi sa pagpangab-ot ug espirituwal nga mga tumong, nagahimo pod mog makapatagbawng buluhaton kay dili ni masayang. Si apostol Pablo misulat: “Magmalig-on, dili matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.” (1 Cor. 15:58) Ingong pagkomparar, ang kinabuhi nga nagpokus sa mga ambisyon ug tumong niining kalibotana​—bisag mora pa nig malamposon—​walay kapuslanan. (Luc. 9:25) Napamatud-an na kana ni Haring Solomon.​—Roma 15:4.

14. Unsay inyong makat-onan kang Solomon bahin sa paglipaylipay?

¹⁴ Si Solomon, kinsa dato ug gamhanan kaayo, ‘misulay sa pagmaya ug sa pagpahimulos sa maayo.’ (Eccl. 2:1-10) Nagtukod siyag mga balay, naghimog mga hardin ug parke, ug gihimo niya kon unsay iyang gusto. Unsay iyang gibati pagkahuman? Nakontento ba siya, o kaha nalipay? Dili na ta angayng managna pa. Siya mismo ang miingon: “Ako mismo mitan-aw sa tanan ko nga mga buhat . . . ang tanan kakawangan . . . ug walay bisan unsang mapuslanon.” (Eccl. 2:11) Puwersado kaayo nâ nga leksiyon! Inyo ba nang pamalandongon?

15. Sumala sa Salmo 32:8, nganong importante ang pagtuo, ug unsay kaayohan niana?

¹⁵ Dili gusto ni Jehova nga unya ra mo makakat-on kon mag-antos na mo sa resulta sa inyong mga sayop. Tinuod, nagkinahanglag pagtuo ang pagtuman sa Diyos ug pag-una sa iyang kabubut-on. Importante kaayo ang pagtuo, ug dili gyod mo pakyason niini. Oo, dili gyod kalimtan ni Jehova “ang gugma nga inyong gipakita alang sa iyang ngalan.” (Heb. 6:10) Busa, paningkamot pag-ayo nga molig-on ang inyong pagtuo, ug personal ninyong maeksperyensiyahan nga gusto gyod sa inyong langitnong Amahan kon unsay makaayo ninyo.​—Basaha ang Salmo 32:8.

16. Nganong angayng pabilhan ang kagawasan ug gamiton ni sa maalamong paagi?

¹⁶ Si Pablo misulat: “Kon asa gani ang espiritu ni Jehova, adunay kagawasan.” (2 Cor. 3:17) Oo, gimahal ni Jehova ang kagawasan, ug gibutang niya ang maong pagmahal sa inyong kasingkasing. Pero sa samang panahon, gusto niyang gamiton ninyo ang inyong kagawasan sa maalamong paagi, nga makapanalipod ninyo. Tingali may nailhan mong mga batan-on nga nagtan-awg pornograpiya o naghimog seksuwal nga imoralidad, nag-apil-apil sa peligrosong mga sport, o nagdroga ug naghuboghubog. Siyempre, nakatagamtam  silag temporaryong kalipay. Pero sagad dili maayo ang resulta niana, sama sa sakit, pagkaadik, o kamatayon pa gani. (Gal. 6:7, 8) Klaro nga dili tinuod ang ilang “kagawasan.”​—Tito 3:3.

17, 18. (a) Nganong makahatag ug kagawasan ang pagsunod sa Diyos? (b) Sa unsang paagi labaw ang kagawasan nga natagamtam ni Adan ug Eva sa sinugdan kon ikomparar nianang sa mga tawo karon?

¹⁷ Sa pagkomparar, pila may nahibal-an ninyo nga nasakit tungod sa pagsunod sa Bibliya? Klaro, ang pagsunod kang Jehova makaayo ug makahatag ug kagawasan. (Sal. 19:7-11) Dugang pa, kon gamiton ninyo ang inyong kagawasan sa maalamong paagi​—nga dili molapas sa hingpit nga balaod ug prinsipyo sa Diyos—​inyong gipakita sa Diyos ug sa inyong ginikanan nga puwede mong hatagag dugang kagawasan. Gani, katuyoan gyod sa Diyos nga hatagag bug-os nga kagawasan ang iyang matinumanong mga alagad, nga gihisgotan sa Bibliya ingong “mahimayaong kagawasan sa mga anak sa Diyos.”​—Roma 8:21.

¹⁸ Natilawan ni Adan ug Eva ang maong kagawasan. Sa tanaman sa Eden, unsa ka daghan ang gidili sa Diyos? Usa lang. Dili nila puwedeng kaonon ang bunga sa usa ka kahoy. (Gen. 2:9, 17) Estrikto ra ba kaayo nang usa ka sugo? Siyempre dili! Ikomparar nâ sa daghan kaayong balaod sa tawo nga gipamugos nilang tun-an ug sundon.

19. Sa unsang mga paagi gitudloan ta nga mahimong katawhan nga may kagawasan?

¹⁹ Maalamon kaayo ang paagi sa pagtratar ni Jehova sa iyang mga alagad. Imbes hatagan tag daghang balaod, mapailobon siyang nagtudlo nato sa pagsunod sa balaod sa gugma. Gusto niyang magkinabuhi ta uyon sa iyang mga prinsipyo ug dumtan kon unsay daotan. (Roma 12:9) Ang Wali sa Bukid maoy maayo kaayong pananglitan niana, kay kini naghisgot kon unsa gyoy hinungdan sa kasaypanan. (Mat. 5:27, 28) Sa bag-ong kalibotan, ingong Hari sa Gingharian sa Diyos, ang Kristo padayong magtudlo nato aron masundog ang iyang panghunahuna bahin sa pagkamatarong ug pagkadaotan. (Heb. 1:9) Himoon niyang hingpit ang atong lawas ug hunahuna. Hunahunaa lang, wala nay motental ninyo sa pagpakasala ug dili na pod mo mag-antos sa makapaguol nga epekto sa sala. Dayon sa kataposan, matagamtam ninyo ang “mahimayaong kagawasan” nga gisaad ni Jehova.

20. (a) Giunsa paggamit ni Jehova ang iyang kagawasan? (b) Sa unsang paagi makabenepisyo mo sa ehemplo sa Diyos?

²⁰ Siyempre, dili gyod puwedeng mahimong bug-os ang atong kagawasan. Kinahanglan ning palihokon sa atong gugma sa Diyos ug isigkatawo. Ang tinuod, gisugo ra ta ni Jehova nga sundogon siya. Ang iyang kagawasan walay limitasyon, pero gipili niyang magpagiya sa gugma diha sa pagtratar niya sa iyang intelihenteng mga linalang. (1 Juan 4:7, 8) Busa, makataronganon lang ang pag-ingon nga matagamtam nato ang tinuod nga kagawasan dihang sundogon nato ang gugma sa Diyos.

21. (a) Unsay pagbati ni David kang Jehova? (b) Unsay atong hisgotan sa sunod nga artikulo?

²¹ Inyo bang giapresyar ang daghang “maayong butang” nga gihatag ni Jehova kaninyo, sama sa abundang espirituwal nga pagkaon, maayong mga higala, mapuslanong mga tumong, ug paglaom sa hingpit nga kagawasan? (Sal. 103:5) Kon mao, hinaot bation pod ninyo ang giingon sa Salmo 16:11: “Ipahibalo mo kanako ang dalan sa kinabuhi. Anaa sa imong atubangan ang pagmaya hangtod sa pagkatagbaw; adunay kahimuot diha sa imong tuong kamot hangtod sa kahangtoran.” Hisgotan sa sunod nga artikulo ang ubang espirituwal nga bahandi diha sa Salmo 16. Makatabang ni nato nga mas masabtan ang sekreto sa tinuod nga malipayong kinabuhi.