Sa 2 Corinto 12:2, 3, si Pablo naghisgot bahin sa usa ka tawo nga “gisakgaw . . . ngadto sa ikatulong langit.” Kinsa siya? Dihang gisulatan ni Pablo ang kongregasyon sa Corinto, iyang gipasiugda nga gigamit siya sa Diyos ingong apostol. (2 Cor. 11:5, 23) Dayon, naghisgot siyag “mga panan-awon ug mga pinadayag sa Ginoo.” Niana nga konteksto, si Pablo wala maghisgot ug laing mga igsoon. Busa, makataronganon nga kaugalingon niya ang iyang gitumong ingong ang tawo nga nakadawat ug mga panan-awon ug pinadayag.​—2 Cor. 12:1, 5.

Busa, si Pablo mao ang tawo nga “gisakgaw . . . ngadto sa ikatulong langit” ug “sa paraiso.” (2 Cor. 12:2-4) Iyang gigamit ang terminong “mga pinadayag,” nga nagpasabot nga dunay gisulti kaniya bahin sa mahitabo sa umaabot.

Unsay nakita ni Pablo “sa ikatulong langit”?

Sa Bibliya, ang “langit” mahimong magtumong sa pisikal nga mga langit. (Gen. 11:4; 27:28; Mat. 6:26) Pero ang “langit” duna poy laing kahulogan. Usahay, magtumong ni sa pagmando sa tawo. (Dan. 4:20-22) O kaha sa pagmando sa Diyos, sama nianang pinaagi sa Gingharian sa Diyos.​—Pin. 21:1.

Nakita ni Pablo ang “ikatulong langit.” Unsay iyang gipasabot? May mga higayon nga katulo balikbalikon paghisgot sa Bibliya ang usa ka butang aron sa pagpasiugda. (Isa. 6:3; Ezeq. 21:27; Pin. 4:8) Sa paghisgot sa “ikatulong langit,” lagmit gipasiugda ni Pablo ang labaw ug binayaw nga klase sa pagmando​—ang Mesiyanikong Gingharian pinaagi ni Jesu-Kristo ug sa iyang 144,000 nga kaubang magmamando. (Tan-awa ang Pagtugkad sa Kasulatan, Tomo 2, p. 145, 152.) Sama sa gisulat ni Pedro, nagpaabot ta sa “bag-ong mga langit” nga gisaad sa Diyos.​—2 Ped. 3:13.

Unsa poy gipasabot ni Pablo sa paghisgot sa “paraiso”?

Ang pulong sab nga “paraiso” mahimong lainlain ug kahulogan: (1) Maylabot sa orihinal nga puy-anan sa tawo, ang “paraiso” mahimong magtumong sa literal nga Paraiso sa yuta sa umaabot. (2) Mahimong magtumong ni sa espirituwal nga kahimtang nga matagamtam sa katawhan sa Diyos sa bag-ong kalibotan. (3) Dugang pa, mahimong magtumong ni sa talagsaong kahimtang sa langit, ang “paraiso sa Diyos” nga gihisgotan sa Pinadayag 2:7.​—Tan-awa ang Hulyo 15, 2015 nga Bantayanang Torre, p. 8. par. 8.

Posible nga kanang tulo ang gitumong ni Pablo dihang gihisgotan niya ang iyang eksperyensiya nga narekord sa 2 Corinto 12:4.

Sa pagsumaryo:

Ang “ikatulong langit” nga gihisgotan sa 2 Corinto 12:2 lagmit mao ang Mesiyanikong Gingharian ubos sa pagmando ni Jesu-Kristo ug sa 144,000, ang “bag-ong mga langit.”​—2 Ped. 3:13.

Kini ang “ikatulong langit” kay ang Gingharian maoy kinalabwan ug binayaw kaayong klase sa pagmando.

Ang “paraiso” diin si Pablo “gisakgaw” diha sa panan-awon lagmit nagtumong sa (1) pisikal nga Paraiso sa yuta sa umaabot, (2) espirituwal nga paraiso nga matagamtam sa umaabot, nga mas dako kay sa espirituwal nga paraiso nga natagamtam karon, ug (3) “paraiso sa Diyos” sa langit panahon sa bag-ong kalibotan.

Busa, ang bag-ong kalibotan maoy kombinasyon sa bag-ong mga langit ug bag-ong yuta. Bag-o ni nga kahikayan, nga mag-apil sa langitnong Gingharian ug sa katawhan nga mag-alagad kang Jehova sa paraisong yuta.