1-2. (a) Unsay makita ni Jehova dihang minilyon ang manambong sa Panihapon sa Ginoo? (Tan-awa ang hulagway sa atubangan sa magasin.) (b) Unsay atong hisgotan niining artikuloha?

HUNAHUNAA kon unsay makita ni Jehova dihang minilyon ang magtigom sa tibuok kalibotan para sa Panihapon sa Ginoo. Dili lang ang ka daghan sa manambong ang iyang makita; iyang makita ang matag indibiduwal nga motambong. Pananglitan, makita niya kadtong matinumanong nagatambong kada tuig. Apil niana kadtong naningkamot sa pagtambong bisan pa sa grabeng paglutos. Ang uban dili regular nga makatambong sa ubang tigom pero giisip nilang obligasyon ang pagtambong sa Memoryal. Makita pod ni Jehova kadtong motambong sa Memoryal sa unang higayon, tingali nainteres sila kon unsay ginahimo nianang okasyona.

² Seguradong malipay si Jehova nga daghan kaayo ang motambong sa Memoryal. (Luc. 22:19) Pero dili ang gidaghanon ang unang gihunahuna ni Jehova. Mas interesado siya sa rason sa ilang pagtambong; mas importante kaniya ang motibo. Niining artikuloha, atong hisgotan ang importanteng pangutana: Nganong motambong ta, dili lang sa tinuig nga Memoryal, kondili sa senemanang mga tigom nga gihikay ni Jehova para niadtong nahigugma niya?

3-4. (a) Nganong motambong man tag tigom? (b) Unsang hiyas ang magpalihok nato sa pagtambong sa tigom? (c) Sumala sa 1 Corinto 11:23-26, nganong angay tang motambong sa Memoryal?

³ Motambong ta sa tigom kay bahin ni sa atong pagsimba​—kana ang pangunang rason. Motambong sab ta kay ginatudloan  ta ni Jehova diha sa tigom. Ang mga hambogiro naghunahuna nga dili na sila kinahanglang tudloan. (3 Juan 9) Pero lahi ta kay ganahan kaayo tang matudloan ni Jehova ug sa organisasyon nga iyang gigamit.​—Isa. 30:20; Juan 6:45.

⁴ Pinaagi sa pagtambong sa tigom, atong gipakita nga mapainubsanon ta ug andam magpatudlo. Sa Memoryal sa kamatayon ni Jesus, motambong ta dili lang kay gibati natong obligasyon ni kondili mapainubsanon pod natong gisunod ang sugo ni Jesus: “Ipadayon ninyo ang pagbuhat niini sa paghandom kanako.” (Basaha ang 1 Corinto 11:23-26.) Kana nga tigom magpalig-on sa atong paglaom sa umaabot ug magpahinumdom nato nga gihigugma ta pag-ayo ni Jehova. Pero kahibalo si Jehova nga dili lang kas-a sa usa ka tuig nga nagkinahanglan tag pagdasig ug pasalig. Maong naghikay siyag senemanang tigom ug nagdasig nato sa pagtambong niana. Ang pagkamapainubsanon magpalihok nato sa pagsunod. Mogahin tag daghang oras kada semana sa pagpangandam ug pagtambong sa tigom.

5. Nganong ang mapainubsanong mga tawo modawat sa imbitasyon ni Jehova?

⁵ Kada tuig, daghang mapainubsanong tawo ang modawat sa imbitasyon ni Jehova nga magpatudlo niya. (Isa. 50:4) Giganahan sila sa pagtambong sa Memoryal ug misugod pagtambong sa ubang tigom. (Zac. 8:20-23) Kauban ang mga bag-ohan, malipay tang matudloan ug magiyahan ni Jehova, ang atong ‘magtatabang ug magtatagana ug kaikyasan.’ (Sal. 40:17) Sa tinuod lang, unsa pa may mas makapalipay​—o mas importante—​kay sa pagdawat sa imbitasyon nga matudloan ni Jehova ug Jesus, ang Anak nga gimahal niya pag-ayo?​—Mat. 17:5; 18:20; 28:20.

6. Sa unsang paagi ang pagkamapainubsanon nakatabang sa usa ka tawo sa pagtambong sa Memoryal?

⁶ Kada tuig, maningkamot ta nga daghan ang maimbitar sa Memoryal. Daghang mapainubsanong tawo ang nakabenepisyo kay ilang gidawat ang atong imbitasyon. Niay pananglitan. Pipila ka tuig kanhi, usa ka tawo ang nakadawat ug imbitasyon sa Memoryal, pero giingnan niya ang brader nga nag-imbitar niya nga dili siya katambong. Pero sa gabii sa Memoryal, nasorpresa ang brader dihang mitambong ang maong tawo. Nakadayeg pag-ayo ang tawo sa pag-abiabi kaniya maong mitambong siya sa senemanang mga tigom. Gani, pagkasunod tuig, tulo ka beses lang siyang wala katambong. Unsay nagpalihok niya sa pagtambong sa tigom? Kay mapainubsanon, giusab niya ang iyang hunahuna. Sa ulahi, ang brader nga nag-imbitar niya miingon, “Mapainubsanon kaayo siya.” Seguradong gikabig ni Jehova ang maong tawo aron simbahon Siya, ug karon bawtismado na siya.​—2 Sam. 22:28; Juan 6:44.

7. Sa unsang paagi ang atong makat-onan sa tigom ug mabasa sa Bibliya makatabang nato sa pagpaubos?

⁷ Ang atong makat-onan sa tigom ug mabasa sa Bibliya makatabang nato sa pagpaubos. Sa mga semana una sa Memoryal, ang atong mga tigom sagad magpokus sa ehemplo ni Jesus ug sa pagpaubos nga iyang gipakita pinaagi sa paghatag sa iyang kinabuhi ingong lukat. Ug sa mga adlaw una sa Memoryal, gidasig ta sa pagbasa sa mga estorya sa Bibliya bahin sa mga panghitabo panahon sa kamatayon ug pagkabanhaw ni Jesus. Ang atong makat-onan sa tigom ug mabasahan sa Bibliya makapalalom sa atong apresasyon sa gisakripisyo ni Jesus para nato. Mapalihok ta sa pagsundog sa iyang pagkamapainubsanon ug sa pagbuhat  sa kabubut-on ni Jehova, bisan pag lisod ang paghimo niana.​—Luc. 22:41, 42.

8. Giunsa pagpakita ni Jesus ang kaisog?

⁸ Maningkamot pod ta sa pagsundog sa kaisog ni Jesus. Hunahunaa ang iyang gipakitang kaisog sa mga adlaw una ang iyang kamatayon. Nahibalo siya pag-ayo nga hapit na siyang pakaulawan, dagmalan, ug patyon sa iyang mga kaaway. (Mat. 20:17-19) Bisan pa niana, andam siyang mamatay. Dihang miabot ang maong panahon, giingnan niya ang iyang matinumanong mga apostoles nga kauban niya sa Getsemane: “Bangon kamo, manglakaw na kita. Tan-awa! Ang akong magbubudhi nagsingabot na.” (Mat. 26:36, 46) Ug dihang miabot ang armadong mga tawo aron dakpon siya, nagpakita ug nagpaila dayon siya nila, unya giingnan niya ang mga sundalo nga palakwon ang iyang mga apostoles. (Juan 18:3-8) Maisogon gyod si Jesus! Karon, ang mga dinihogan ug ubang mga karnero naningkamot sa pagsundog sa kaisog ni Jesus. Sa unsang paagi?

9. (a) Ngano tingaling nagkinahanglan tag kaisog aron regular nga makatambong? (b) Unsay epekto sa atong ehemplo ngadto sa atong mga igsoon nga napriso?

⁹ Aron regular nga makatambong, basin kinahanglan tang magmaisogon sa pag-atubang sa mga kalisdanan. Ang pipila ka igsoon nanambong gihapon sa tigom bisag nagbangotan, nadismayar, o nasakit. Ang uban mitambong gihapon bisan sa grabeng paglutos sa mga membro sa pamilya o gobyerno. Hunahunaa ang epekto sa atong ehemplo ngadto sa mga igsoon nga napriso tungod sa pagtuo. (Heb. 13:3) Dihang mahibaloan nila nga nagpadayon ta sa pag-alagad bisan pa sa mga kalisdanan, mas molig-on ang ilang pagtuo, ug sila magmaisogon ug magmatinumanon. Naeksperyensiyahan sab nâ ni apostol Pablo. Dihang napriso siya sa Roma, malipay siya kon makabalita siya nga nagmatinumanon ang iyang mga igsoon. (Filip. 1:3-5, 12-14) Wala madugay o kaha human siya pagawsa, gisulatan ni Pablo ang mga Hebreohanon. Niana nga sulat, gidasig niya sila nga ‘ipadayon ang ilang inigsoong gugma’ ug dili pasagdan ang panagkatigom.​—Heb. 10:24, 25; 13:1.

10-11. (a) Kinsay atong imbitahon sa Memoryal? (b) Sumala sa Efeso 1:7, nganong imbitahon nato sila?

¹⁰ Nagmaisogon ta dihang atong imbitahon sa Memoryal ang atong mga paryente, katrabaho, ug silingan. Nganong imbitahon nato sila? Mapasalamaton kaayo ta sa nahimo ni Jehova ug Jesus para nato maong gusto gyod natong imbitahon ang uban sa Memoryal. Gusto natong mahibalo sila kon unsaon nga makabenepisyo pod sila sa dili hitupngang pagkamaayo ni Jehova pinaagi sa lukat.​—Basaha ang Efeso 1:7; Pin. 22:17.

¹¹ Dihang magmaisogon ta pinaagi sa  pagtambong sa tigom, gipakita pod nato ang laing hiyas​—nga gipakita pod sa Diyos ug sa iyang Anak sa talagsaong paagi.

12. (a) Nganong mas modako ang atong gugma kang Jehova ug Jesus kon motambong ta sa tigom? (b) Unsay gidasig sa 2 Corinto 5:14, 15 nga atong buhaton ingong pagsundog kang Jesus?

¹² Ang atong gugma kang Jehova ug Jesus magpalihok nato sa pagtambong sa tigom. Unya dihang motambong ta, mas higugmaon nato si Jehova ug ang iyang Anak kay sa tigom kanunay tang gipahinumdoman sa ilang nahimo para nato. (Roma 5:8) Ang Memoryal ilabinang magpahinumdom nato sa kadako sa ilang gugma kanato, bisan niadtong wala pa makaapresyar sa lukat. Kay mapasalamaton, naningkamot ta sa pagsundog kang Jesus diha sa atong adlaw-adlawng pagkinabuhi. (Basaha ang 2 Corinto 5:14, 15.) Dugang pa, ang atong gugma magpalihok nato sa pagdayeg kang Jehova tungod sa pagtagana sa lukat. Ang usa ka paagi sa pagdayeg niya mao ang paghatag ug kinasingkasing nga komento diha sa tigom.

13. Unsaon nato pagpakita ang ka dako sa atong gugma kang Jehova ug sa iyang Anak? Ipatin-aw.

¹³ Atong mapakita ang ka dako sa atong gugma kang Jehova ug sa iyang Anak pinaagi sa pagkaandam mosakripisyo para nila. Sagad, kinahanglan tang mohimog lainlaing sakripisyo para makatambong sa tigom. Daghang kongregasyon ang magtigom sa gabii, diin sagad gikapoy na ta. Ang laing tigom himoon sa Sabado o Dominggo, nga tingpahulay sa daghan. Nakita ba ni Jehova nga mitambong gihapon ta bisag gikapoy? Oo! Gani, kon mas dako ang atong paningkamot, mas apresyahon ni Jehova ang atong gipakitang gugma kaniya.​—Mar. 12:41-44.

14. Sa unsang paagi si Jesus nagpakitag ehemplo sa nagsakripisyong gugma?

¹⁴ Si Jesus nagpakitag ehemplo sa nagsakripisyong gugma. Gihimo niya ni pinaagi sa iyang pagkaandam mamatay para sa iyang mga tinun-an ug sa pag-una sa ilang kaayohan. Pananglitan, nakig-uban siya sa iyang mga sumusunod bisag gikapoy o naguol. (Luc. 22:39-46) Ug nagpokus siya sa iyang ikatabang sa uban, dili sa kon unsay ilang mahimo para niya. (Mat. 20:28) Kon  ingon ana ka dako ang atong gugma kang Jehova ug sa mga igsoon, maningkamot ta sa pagtambong sa Panihapon sa Ginoo ug sa ubang tigom sa kongregasyon.

15. Kinsa ang ilabinang tabangan nato?

¹⁵ Bahin ta sa tinuod nga Kristohanong panag-igsoonay, ug malipay ta sa pag-imbitar sa uban nga mahimong kauban nato. Pero ilabinang naghunahuna ta sa pagtabang sa “atong kabanay sa pagtuo” nga nahimong dili aktibo. (Gal. 6:10) Atong mapamatud-an ang atong gugma nila pinaagi sa pagdasig nila sa pagtambong sa mga tigom, ilabina sa Memoryal. Parehas ni Jehova ug Jesus, malipay kaayo ta dihang mobalik sila kang Jehova, ang atong mahigugmaong Amahan ug Magbalantay.​—Mat. 18:14.

16. (a) Unsaon nato pagdinasigay, ug unsay epekto kanato sa atong mga tigom? (b) Nganong maayo kini nga panahon sa paghinumdom sa giingon ni Jesus sa Juan 3:16?

¹⁶ Sa umaabot nga mga semana, paningkamoti nga daghan kag maimbitar para sa Memoryal sa Biyernes sa gabii, Abril 19, 2019. (Tan-awa ang kahong “ Imbitahon ba Nimo Sila?”) Sa tibuok tuig, hinaot magdinasigay ta pinaagi sa regular nga pagtambong sa tanang tigom nga gihikay ni Jehova para nato. Samtang nagkaduol ang kataposan niining sistemaha, gikinahanglan nato ang atong mga tigom aron magpabilin tang mapainubsanon, maisogon, ug mahigugmaon. (1 Tes. 5:8-11) Kinasingkasing natong ipakita ang atong pagmahal kang Jehova ug sa iyang Anak tungod sa ilang dakong gugma kanato!​—Basaha ang Juan 3:16.