ANG unang siglong mga Kristohanon naningkamot pag-ayo aron mas daghan ang masangyawan sa “maayong balita sa gingharian.” (Mat. 24:14) Ang uban miadto pa gani sa laing nasod. Pananglitan, si apostol Pablo miadto sa dapit nga nahimutangan karon sa Turkey ug gilukop kana pagsangyaw panahon sa iyang mga panaw ingong misyonaryo. * Mga 2,000 ka tuig sa ulahi, niadtong 2014, gihimo na usab sa Turkey ang espesyal nga kampanya sa pagsangyaw. Nganong giorganisar ang maong kampanya? Kinsay miapil niana?

Dunay kapig 2,800 ka magmamantala sa Turkey, apan 79 ka milyon ang populasyon. Nagpasabot kana nga ang kada magmamantala mosangyaw sa 28,000 ka tawo. Siyempre, diyutay ra ang ilang masangyawan. Busa, tumong sa maong espesyal nga kampanya nga mas daghan ang masangyawan sulod sa mubo nga panahon. Mga 550 ka igsoon gikan sa laing mga nasod nga nagsultig Turkish ang miadto sa Turkey ug misangyaw uban sa lokal nga mga magmamantala panahon sa kampanya. Unsay ilang nalampos?

Daghan ang nasangyawan. Usa ka kongregasyon sa Istanbul ang misulat: “Dihang nakita mi sa mga tawo, nangutana sila: ‘May espesyal kombensiyon ba? Makakita mig mga Saksi ni Jehova bisan asa!’” May kongregasyon sa siyudad sa Izmir nga misulat: “Usa ka tawo nga nagtrabaho diha sa parkinganag taksi ang nangutana sa usa ka ansiyano, ‘Unsay nagakahitabo? Gipaspasan ba ninyo ang inyong buluhaton?’” Oo, namatikdan gayod ang kampanya.

Ang langyawng mga igsoon nalipay gayod sa pagsangyaw. Si Steffen, nga taga-Denmark, miingon: “Kada adlaw may mga masangyawan ko nga wala pa gyod makadungog bahin kang Jehova. Gibati nako nga napaila gyod nako ang ngalan ni Jehova.” Si Jean-David nga taga-France misulat: “Usa ra ka karsada ang among nasangyawan sulod sa pipila ka oras. Nindot kaayo! Kadaghanan sa mga tawo wala makaila sa mga Saksi ni Jehova. Halos sa matag pultahan, duna mi maestorya, mapakitaan sa atong mga video, ug mabinlag basahon.”

Ang 550 nga miapil sa kampanya nakapahimutag 60,000 ka literatura sulod lang sa duha ka semana!  Daghan gyod ang nasangyawan tungod sa maong kampanya.

Mas madasigon sa ministeryo. Ang espesyal nga buluhaton nakadasig sa lokal nga mga igsoon. Daghan ang naghunahunang magpayunir. Gani, ang gidaghanon sa regular payunir sa Turkey miuswag ug 24 porsiyento sulod sa 12 ka bulan human sa kampanya.

Ang langyawng mga igsoon mipahayag usab sa epekto sa kampanya diha sa ilang ministeryo bisag nakabalik na sila sa ilang nasod. Si Şirin, usa ka sister nga taga-Germany, misulat: “Dali ra alang sa mga igsoon sa Turkey ang pagsangyaw sa impormal nga paagi. Maulaw kaayo ko nianang paagiha sa pagsangyaw. Apan tungod sa espesyal nga kampanya, sa ehemplo sa lokal nga mga igsoon, ug sa daghang pag-ampo, nahimo nako ang dili nako mahimo kaniadto. Gani, misangyaw ko sa subwey ug nakapahimutag mga tract! Karon dili na kaayo ko maulawon.”

“May nakat-onan sab ko nga magamit sa akong ministeryo,” miingon si Johannes nga taga-Germany. “Gusto gyod sa mga igsoon sa Turkey nga daghan ang masangyawan. Mosangyaw sila sa matag kahigayonan. Gihimo sab nako nâ pagbalik nako sa Germany. Karon, mas daghan na kog nasangyawan kay kaniadto.”

“Ang maong kampanya dako kaayog epekto sa akong ministeryo. Nakatabang ni nako nga mahimong mas maisogon ug mas masaligon kang Jehova,” miingon si Zeynep nga taga-France.

Mas nagkasuod ang mga igsoon. Wala gayod malimti sa langyawng mga igsoon ang gugma ug panaghiusa. “Among ‘natilawan’ ang pagkamaabiabihon sa mga igsoon,” matod ni Jean-David, nga gihisgotan ganina. Siya midugang: “Gidawat mi nila ingong ilang mga higala ug bahin sa ilang pamilya. Gipaestar mi sa ilang mga balay. Nahibalo ko nga duna tay tibuok kalibotang panag-igsoonay; kadaghan nako nâ mabasa sa atong mga publikasyon. Apan niadtong higayona, ako gyod nang naeksperyensiyahan. Mas mapasigarbohon ko nga nahimong usa sa mga alagad ni Jehova, ug gipasalamatan nako siya niining nindot nga pribilehiyo.”

 “Taga-Denmark man, France, Germany, o Turkey, usa ra mi ka pamilya. Sama rag giwagtang sa Diyos ang tanang utlanan sa mga nasod,” matod ni Claire nga taga-France.

Si Stéphanie nga taga-France midugang: “Nakat-onan namo sa espesyal nga kampanya nga ang nakapahiusa nato dili ang kultura o pinulongan kondili ang atong gugma kang Jehova.”

Daghan sa langyawng mga igsoon ang naghunahuna nga mobalhin sa Turkey aron motabang sa dako pang buluhaton didto. Daghan na ang namalhin. Giapresyar pag-ayo ang maong mga need-greater.

Tagda pananglitan ang usa ka gamayng grupo sa 25 ka magmamantala. Sulod sa daghang katuigan, usa ray ilang ansiyano. Hunahunaa kon unsa ka dako ang kalipay sa mga igsoon dihang pagka-2015, unom ka need-greater gikan sa Germany ug Netherlands ang namalhin aron sa pagtabang nila!

Unsay giingon sa mga need-greater nga taudtaod nang nag-alagad sa Turkey? Tinuod, lisod usahay ang ilang kinabuhi pero daghan kinig panalangin. Tagda kon unsay giingon sa pipila:

“Kay diyutay ra ang among mga butang, dili kaayo mi puliki, ug makapokus mi sa labing importanteng mga butang,” miingon si Federico, mga 40 anyos nga minyong brader gikan sa Spain. Irekomendar ba niya kining matanga sa pag-alagad? “Siyempre!” matod niya. “Dihang mobalhin ka sa laing nasod aron motabang sa mga tawo nga makaila kang Jehova, gisalig nimo ang imong kaugalingon kaniya. Mas bation nimo ang pag-atiman ni Jehova.”

“Nalipay kaayo mi sa pag-alagad diha sa panggubatan, ingnon ta, ug sa pagpaambit sa kamatuoran ngadto sa daghan kaayong tawo nga wala pa gayod makadungog niana sukad,” matod ni Rudy, hapit nang mo-60 anyos nga minyong brader gikan sa Netherlands. “Makapatagbaw gayong makita ang  kalipay sa mga tawo dihang dawaton nila ang kamatuoran.”

Si Sascha, kapin sa 40 anyos nga minyong brader kinsa mibalhin gikan sa Germany, miingon: “Matag higayon nga mosangyaw ko, makaestorya kog mga tawo nga mao pay pagkadungog sa kamatuoran. Makapalipay kaayo ang paghatag nilag kahigayonan nga makaila kang Jehova.”

Si Atsuko, mga 35 anyos nga minyong sister nga taga-Japan, nag-ingon: “Sa una, gusto gyod nakong mag-Armagedon na. Pero pagbalhin nako sa Turkey, nagpasalamat ko kang Jehova sa iyang pailob. Dihang kanunay nakong makita ang paggiya ni Jehova, mas midako ang akong tinguha nga makigsuod niya.”

Si Alisa, kapig 30 anyos nga sister nga gikan sa Russia, miingon: “Tungod sa pag-alagad nako kang Jehova niining matanga sa ministeryo, akong natilawan ang tanan niyang kaayo.” (Sal. 34:8) Siya midugang: “Si Jehova dili lang nako Amahan kondili suod sab nga Higala, nga mas nailhan nako ubos sa lainlaing kahimtang. Daghan kaayo kog malipayon, kulbahinam nga mga eksperyensiya, ug mga panalangin!”

Pinaagi sa espesyal nga kampanya sa Turkey, mas daghang tawo ang nasangyawan sa maayong balita. Bisan pa niana, daghan pang teritoryo ang wala masangyawi. Kada adlaw, ang mga need-greater nga mibalhin sa Turkey makaestorya ug mga tawo nga wala pa gyod makadungog bahin kang Jehova. Gusto ka bang moalagad sa ingon ana nga teritoryo? Kon mao, gidasig ka namo: “Iyahat ang [imong] mga mata ug lantawa ang kaumahan, nga kini puti na aron anihon.” (Juan 4:35) Makaalagad ka ba sa dapit diin ang umahan “puti na aron anihon”? Kon mao, paghimo nag mga lakang aron makab-ot ang maong tumong. Usa ka butang ang segurado: Kon pauswagon nimo ang imong pagpakigbahin sa pagpakaylap sa maayong balita “hangtod sa kinalay-ang dapit sa yuta,” madawat nimo ang dagayang panalangin!—Buh. 1:8.