1. Nganong makaingon ta nga si Jehova ang tag-iya sa tanan? (Tan-awa ang hulagway sa sinugdan sa artikulo.)

SI Jehova ang tag-iya sa tanan! Iya “ang mga langit, bisan ang mga langit sa mga langit, ang yuta ug ang tanan nga anaa niana.” (Deut. 10:14; Pin. 4:11) Busa, kay si Jehova man ang naghimo sa mga tawo, iya ta ni Jehova. (Sal. 100:3) Pero, sa tibuok kasaysayan, ang Diyos nagpilig espesipikong mga grupo sa katawhan nga nahimong iya sa espesyal nga paagi.

2. Kinsa ang gitawag sa Bibliya nga gipanag-iya ni Jehova sa espesyal nga paagi?

² Pananglitan, ang Salmo 135 nagtawag sa matinumanong mga magsisimba ni Jehova sa karaang Israel ingong “iyang linaing katigayonan.” (Sal. 135:4) Dugang pa, ang basahon sa Oseas nagtagna nga dunay dili mga Israelinhon nga mahimong katawhan ni Jehova. (Os. 2:23) Ang tagna ni Oseas natuman dihang giapil ni Jehova ang mga dili Hudiyo nga mahimong kaubang magmamando sa Kristo. (Buh. 10:45; Roma 9:23-26) Kanang “balaang nasod” maoy “linaing pagpanag-iya” ni Jehova sa talagsaong paagi, kay ang mga membro niini gidihogan sa balaang espiritu ug gipili nga mabuhi sa langit. (1 Ped. 2:9, 10) Komosta ang kadaghanang Kristohanon karon nga may paglaom nga mabuhi sa yuta? Gitawag pod sila ni Jehova nga iyang “katawhan” ug iyang “pinili.”​—Isa. 65:22.

3. (a) Kinsay nakatagamtam ug espesyal nga relasyon kang Jehova karon? (b) Unsay hisgotan niining artikuloha?

 ³ Karon, ang “gamayng panon,” nga may langitnong paglaom, ug ang “ubang mga karnero,” nga may yutan-ong paglaom, maoy sakop sa “usa ka panon” nga giisip ni Jehova ingong iyang katawhan. (Luc. 12:32; Juan 10:16) Seguradong gusto natong ipakita ang atong pagkamapasalamaton kang Jehova sa atong espesyal nga relasyon kaniya. Hisgotan niining artikuloha ang lainlaing paagi nga mapakita nato ang atong pagkamapasalamaton kang Jehova nianang espesyal nga pribilehiyo.

4. Unsa ang usa ka paagi nga makapasalamat ta kang Jehova sa atong relasyon kaniya, ug giunsa pod nâ paghimo ni Jesus?

⁴ Mapakita nato ang atong pagkamapasalamaton kang Jehova pinaagi sa kinasingkasing nga pagpahinungod sa atong kinabuhi kaniya. Pinaagi sa pagpabawtismo sa tubig, pormal natong gipakita sa publiko nga si Jehova ang tag-iya nato ug kinabubut-on tang nagpasakop niya. (Heb. 12:9) Kana say gihimo ni Jesus panahon sa iyang bawtismo, nga samag miingon siya kang Jehova: “Sa pagbuhat sa imong kabubut-on, Oh Diyos ko, ako nagakalipay.” (Sal. 40:7, 8) Gipahinungod ni Jesus ang iyang kinabuhi kang Jehova, bisag gipanganak siya sa nasod nga dedikado kang Jehova.

5, 6. (a) Unsay gibati ni Jehova sa pagpabawtismo ni Jesus? (b) Iilustrar kon nganong apresyahon ni Jehova ang atong pagpahinungod bisag siyay tag-iya sa tanan.

⁵ Unsay gibati ni Jehova sa pagpabawtismo ni Jesus? Ang Bibliya nag-ingon: “Human mabawtismohi, si Jesus mihaw-as gilayon sa tubig; ug, tan-awa! ang mga langit nabuksan, ug iyang nakita nga mikunsad diha kaniya ang espiritu sa Diyos ingon sa usa ka salampati. Tan-awa! Dihay tingog usab gikan sa mga langit nga nag-ingon: ‘Kini mao ang akong Anak, ang hinigugma, nga akong giuyonan.’” (Mat. 3:16, 17) Bisag si Jesus gipanag-iya na sa iyang langitnong Amahan, nalipay si Jehova nga makitang andam ang iyang Anak sa pagbuhat sa Iyang kabubut-on. Sa susama, malipay si Jehova nga dawaton ang atong pagpahinungod, ug iya tang panalanginan.​—Sal. 149:4.

⁶ Sa pag-ilustrar, hunahunaa ang usa ka tawong nagtanom ug nindot nga mga bulak sa iyang garden. Usa ka adlaw niana, ang iyang batang babaye mikuhag bulak sa garden ug giregalo kaniya. Di ba ang amahan may tag-iya sa bulak? Makahatag ba diay ang anak ug usa ka butang nga gipanag-iya na sa amahan? Ang usa ka mahigugmaong amahan dili gyod mangutana niana. Iya hinuong dawaton ang maong regalo kay gipakita niana nga gimahal siya sa iyang anak. Seguradong mas maapresyar niya ang maong bulak kay sa ubang bulak sa garden. Malipay pod si Jehova dihang kinabubut-on natong ihatag ang atong eksklusibong debosyon kaniya.​—Ex. 34:14.

7. Giunsa pagpakita ni Malaquias ang pagbati ni Jehova niadtong kinabubut-ong nag-alagad niya?

⁷ Basaha ang Malaquias 3:16. Kon dili ka pa dedikado ug bawtismado, hunahunaa ang kaimportante niana. Tinuod, sukad nga gimabdos ka, si Jehova na ang tag-iya nimo, parehas sa tanang tawo. Pero, hunahunaa ang kadako sa kalipay ni Jehova kon ipahinungod nimo ang imong kinabuhi kaniya ug buhaton ang iyang kabubut-on ingong pag-ila sa iyang pagkamagmamando. (Prov. 23:15) Sa baylo, ilhon ni Jehova kadtong kinabubut-ong nag-alagad niya, ug isulat ang ilang ngalan diha sa iyang “basahon sa handomanan.”

8, 9. Unsay gikinahanglan ni Jehova para niadtong nasulat sa iyang “basahon sa handomanan”?

 ⁸ Dihang masulat ang atong ngalan sa “basahon sa handomanan” ni Jehova ingong Iyang katawhan, may obligasyon pod ta. Sumala ni Malaquias, kinahanglan tang ‘mahadlok kang Jehova ug mamalandong sa iyang ngalan.’ Kon mosimba ta sa lain, tangtangon ang atong ngalan sa simbolikong basahon sa kinabuhi ni Jehova.​—Ex. 32:33; Sal. 69:28.

⁹ Busa, ang atong pagpahinungod kang Jehova dili lang kutob sa seryosong panaad nga buhaton ang iyang kabubut-on ug sa pagpabawtismo. Kadiyot ra ning mahitabo, ug mahimo nang bahin sa kagahapon. Ang atong pagdapig kang Jehova ingong iyang katawhan nagkinahanglag padayong pagpakita nga maunongon ta niya​—karon, sa umaabot, ug samtang buhi ta.​—1 Ped. 4:1, 2.

10. Unsay klarong kalainan niadtong nag-alagad kang Jehova ug niadtong wala?

¹⁰ Sa miaging artikulo, gihisgotan ang estorya ni Cain, Solomon, ug sa mga Israelinhon. Silang tanan nangangkong nagsimba kang Jehova, pero ang ilang debosyon dili eksklusibo. Klarong gipakita sa maong mga pananglitan nga kadtong tinuod nga iya ni Jehova kinahanglan gyong modapig sa pagkamatarong ug suklan ang pagkadaotan. (Roma 12:9) Haom lang nga human hisgoti ni Malaquias ang “basahon sa handomanan,” si Jehova misulti bahin sa “kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.”​—Mal. 3:18.

11. Nganong kinahanglang makita sa uban nga eksklusibo ang atong debosyon kang Jehova?

¹¹ Busa, kini ang laing paagi nga makapasalamat ta kang Jehova sa pagpili niya nato ingong iyang katawhan. Ang atong espirituwal nga pag-uswag kinahanglang “madayag sa tanan.” (1 Tim. 4:15; Mat. 5:16) Pangutan-a ang kaugalingon: ‘Makita ba sa uban nga maunongon ko kang Jehova? Nangita ba kog mga kahigayonan sa pagpaila nga Saksi ni Jehova ko?’ Maguol gyod si Jehova kon human nga mapili ta niya ingong iyang katawhan, magduhaduha ta sa pagpaila nga siyay tag-iya nato.​—Sal. 119:46; basaha ang Marcos 8:38.

12, 13. Sa unsang paagi dili kaayo makita diha sa pipila ang ilhanan ingong Saksi ni Jehova?

 ¹² Makapaguol, dili kaayo makita diha sa pipila ang “kalainan tali . . . sa usa nga nagaalagad sa Diyos ug sa usa nga wala” kay ilang gisundog ang “espiritu sa kalibotan.” (1 Cor. 2:12) Tungod niini nga espiritu, magpokus ang mga tawo sa “tinguha sa . . . unod.” (Efe. 2:3) Pananglitan, bisan pa sa daghang tambag, gipili gihapon sa pipila ang sininaan ug pamostura nga dili desente. Magsul-ob silag sinina nga fitting kaayo ug halos makita ang pribadong parte sa lawas, bisan panahon sa mga tigom. O kaha gisundog nila ang kalibotanon kaayong mga estilo sa buhok. (1 Tim. 2:9, 10) Ingong resulta, kon naa sila diha sa daghang tawo, lisod mailhan ang iya ni Jehova ug ang ‘higala sa kalibotan.’​—Sant. 4:4.

¹³ Dugang pa, may pipila ka Saksi nga wala kaayo magsalikway sa kalibotanong panggawi. Panahon sa party, ang ilang sinayawan ug linihokan dili dalawaton para sa mga Kristohanon. Diha sa social media, mag-post silag mga letrato ug comment nga nagpakitang dili sila hamtong sa espirituwal. Wala tingali sila makahimog seryosong sala ug madisiplina sa kongregasyon, pero posibleng mahimo silang negatibong impluwensiya sa mga igsoon nga naningkamot nga mamentinar ang maayong panggawi ingong bahin sa katawhan ni Jehova.​—Basaha ang 1 Pedro 2:11, 12.

14. Unsay kinahanglan natong buhaton aron maproteksiyonan ang atong espesyal nga relasyon kang Jehova?

¹⁴ Gipasiugda pag-ayo sa kalibotan “ang tinguha sa unod ug ang tinguha sa mga mata ug ang mapagawalong pagpasundayag sa mga kahinguhaan sa kinabuhi.” (1 Juan 2:16) Pero kay iya man ta ni Jehova, gitambagan ta “sa pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.” (Tito 2:12) Ang atong sinultihan, batasan sa pagkaon ug pag-inom, sininaan ug pamostura, ug batasan sa trabaho​—ang tanan natong himoon—​kinahanglang magpakita sa uban nga eksklusibo ang atong debosyon kang Jehova.​—Basaha ang 1 Corinto 10:31, 32.

15. Nganong kinahanglan natong pakitaag kaayo ug gugma ang atong mga igsoon?

¹⁵ Mapakita nato ang pagkamapasalamaton kang Jehova sa espesyal nga pagpakighigala niya pinaagi sa pagtratar nato sa atong mga igsoon sa pagtuo. Si Jehova poy tag-iya nila. Kon hinumdoman nato ni nga kamatuoran, kanunay natong pakitaag kaayo ug gugma ang atong mga igsoon. (1 Tes. 5:15) Si Jesus miingon sa iyang mga sumusunod: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”​—Juan 13:35.

16. Unsang pananglitan sa Moisesnong Balaod ang nag-ilustrar sa pagbati ni Jehova sa iyang katawhan?

¹⁶ Sa pag-ilustrar kon unsaon nato pagtratar ang usag usa diha sa kongregasyon, konsideraha kini: Ang mga gamit sa templo ni Jehova gipahinungod, o gilain, para lang sa hinlong pagsimba. Gihisgotan sa Moisesnong Balaod kon unsaon pag-atiman ang maong mga gamit, ug patyon ang mosupak. (Num. 1:50, 51) Kon mainampingong giprotektahan ni Jehova ang walay kinabuhing mga butang nga gigamit sa pagsimba, mas protektahan niya ang iyang dedikado, maunongong mga magsisimba nga iyang gipili ingong iyang katawhan! Kon bahin sa iyang katawhan, si Jehova miingon: “Siya nga nagahilabot kaninyo nagahilabot sa kalimutaw sa akong mata.”​—Zac. 2:8.

17. Unsay gitan-aw ug gipaminaw ni Jehova?

¹⁷ Makapainteres nga gihisgotan ni Malaquias si Jehova ingong ‘nagtagad ug namati’ samtang ang Iyang katawhan nag-estoryahanay. (Mal. 3:16) “Si Jehova nakaila sa mga iyaha.” (2 Tim. 2:19) Kabalo gyod siya sa tanan natong buhaton ug isulti. (Heb. 4:13) Kon dili kaayo ta mahunahunaon sa atong mga igsoon, si Jehova nagtan-aw ug naminaw. Dihang maabiabihon, mahinatagon, mapinasayloon, ug mahunahunaon ta sa usag usa, makaseguro ta nga nakita pod nâ ni Jehova.​—Heb. 13:16; 1 Ped. 4:8, 9.

18. Unsaon nato pagpakita ang atong pagkamapasalamaton sa pribilehiyo nga mahimong katawhan ni Jehova?

¹⁸ Gusto gyod natong ipakita ang atong pagkamapasalamaton kang Jehova sa pribilehiyo nga mahimong iyang katawhan. Atong nakita nga maalamon gyong ilhon nga siyay tag-iya nato pinaagi sa kinabubut-ong pagpahinungod sa atong kinabuhi kaniya. Bisag nagkinabuhi ta “taliwala sa baliko ug hiwi nga kaliwatan,” gusto natong makita sa mga tawo nga kita “walay-ikasaway ug inosente, . . . nagasidlak ingong mga magbabanwag sa kalibotan.” (Filip. 2:15) Atong gisuklan ang pagkadaotan. (Sant. 4:7) Ug atong gihigugma ug gitahod ang atong mga igsoon kay gipanag-iya pod sila ni Jehova.​—Roma 12:10.

19. Unsay panalangin ni Jehova para niadtong iya?

¹⁹ Ang Bibliya nagsaad: “Si Jehova dili motalikod sa iyang katawhan.” (Sal. 94:14) Lig-on ni nga garantiya bisag mag-antos pa tag katalagman. Bisan ang kamatayon dili makapugong sa gugma ni Jehova kanato. (Roma 8:38, 39) “Kon kita mabuhi, kita mabuhi alang kang Jehova, ug kon kita mamatay, kita mamatay alang kang Jehova. Busa kon kita mabuhi ug kon kita mamatay, kita iya ni Jehova.” (Roma 14:8) Naghinamhinam ta sa panahon nga banhawon ni Jehova ang tanan niyang maunongong higala nga namatay. (Mat. 22:32) Bisan karon, atong gitagamtam ang daghang panalangin. Sama sa giingon sa Bibliya, “malipayon ang nasod kansang Diyos mao si Jehova, ang katawhan nga gipili niya ingon nga iyang panulondon.”​—Sal. 33:12.