Nahinumdom Ka Ba?
Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:
Nganong giuyonan ni Jehova ang mga gubat sa karaang Israel?
Si Jehova mahigugmaon. Pero may mga higayon nga iyang giuyonan ang pagpakiggubat dihang nameligro ang iyang katawhan tungod sa pagkadaotan ug pagpanglupig. Diyos lamang ang nagbuot kon kinsay makiggubat ug kon kanus-a.—w15 11/1, p. 4-5.
Unsay angayng buhaton sa mga ginikanan aron mabansay ang ilang tin-edyer sa pag-alagad kang Jehova?
Kinahanglang higugmaon sa mga ginikanan ang ilang tin-edyer ug ipakita ang pagkamapainubsanon pinaagig ehemplo. Importante usab nga ilang ipakita ang pagsabot ug sabton ang ilang tin-edyer.—w15 11/15, p. 9-11.
Nganong dili angayng isipon ang papa ingong manununod ni Pedro?
Ang Mateo 16:17, 18 wala mag-ingon nga si apostol Pedro mahimong ulo sa Kristohanong kongregasyon. Wala gani hisgoti sa Bibliya nga gihatagan si Pedro ug kinatas-ang posisyon. Si Jesus mao ang batong pamag-ang sa kongregasyon. (1 Ped. 2:4-8)—w15 12/1, p. 12-14.
Unsay angay natong hinumdoman sa dili pa mosulti?
Aron dili makapasakit sa uban, angay natong hinumdoman (1) kon kanus-a mosulti (Eccl. 3:7), (2) kon unsay isulti (Prov. 12:18), ug (3) kon unsaon pagsulti (Prov. 25:15).—w15 12/15, p. 19-22.
Unsa ang pipila ka buhat sa pagkadili-matinud-anon nga angayng likayan sa mga Kristohanon?
Ang matuod nga mga Kristohanon maglikay sa pagpamakak ug pagbutangbutang. Dili sila magsabwag ug bakak nga mga estorya nga makadaot sa reputasyon sa uban, ug dili sila manikas ni mangawat.—wp16.1, p. 5.
Kinsa man ang “pangulong mga saserdote” nga gihisgotan sa Bibliya?
Ang ekspresyong “pangulong mga saserdote” nagtumong sa pangunang mga membro sa pagkasaserdote, lakip na ang kanhing hataas nga mga saserdote nga natangtangan sa katungdanan.— wp16.1, p. 10.
Unsay angay natong pagtratar sa usa nga nakig-ambit sa mga emblema sa Memoryal?
Ang mga Kristohanon dili magbayaw niadtong nakig-ambit. Ang tinuod nga dinihogan dili gusto nga bayawon siya sa uban ug dili sab niya gustong ipahibalo sa publiko ang iyang baroganan atubangan sa Diyos. (Mat. 23:8-12)—w16.01, p. 23-24.
Unsay atong makat-onan bahin sa pagkahimo ni Abraham nga higala sa Diyos?
Si Abraham nakakat-on bahin sa Diyos, tingali gikan kang Sem. Ug siya nakabatog kasinatian sa paagi nga nakiglabot ang Diyos kaniya ug sa iyang pamilya. Masundog nato siya.—w16.02, p. 9-10.
Kinsay nagbutang ug kapitulo ug bersikulo diha sa Bibliya?
Usa ka lider sa simbahan niadtong ika-13ng siglo nga si Stephen Langton ang nagbutang ug kapitulo sa Bibliya. Ang Hudiyong mga magkokopya ang unang nagbutang ug mga bersikulo sa Hebreohanong Kasulatan, ug niadtong ika-16 nga siglo, gihimo sab kana sa eskolar nga si Robert Estienne sa Kristohanon Gregong Kasulatan.—wp16.2, p. 14-15.
Literal bang gidala ni Satanas si Jesus sa templo aron tentalon?
Dili ta segurado. Ang Mateo 4:5 ug Lucas 4:9 mahimong nagpasabot nga gidala si Jesus sa templo pinaagig panan-awon o kaha siya aktuwal nga mibarog sa usa ka habog nga bahin sa templo.—w16.03, p. 31-32.
Sa unsang mga paagi nga ang atong ministeryo samag yamog?
Ang yamog inanayng maporma, makapahupay, ug makapatunhay sa kinabuhi. Ang literal nga yamog maoy panalangin gikan sa Diyos. (Deut. 33:13) Susama niana ang hiniusang paningkamot sa katawhan sa Diyos diha sa ministeryo.—w16.04, p. 4.