SI Don, usa ka Saksi ni Jehova sa Canada, mihimog linaing paningkamot sa pagpakig-estorya sa mga tawo nga nagpuyo sa kalsada. Bahin sa usa nianang maong mga tawo, miingon si Don: “Usa sa kinahugawang tawo nga nagpuyo sa kalsada nga akong nakaila mao si Peter. Ngil-ad siyag batasan ug mangita gyod siyag paagi nga malikayan siya. Pirme niyang balibaran ang mga tabang nga ihatag kaniya.” Pero, matag karon ug unya sulod sa kapig 14 ka tuig, si Don mapailobong nagpakitag kaayo kang Peter.

Usa ka adlaw niana, gipangutana ni Peter si Don: “Nganong sige pa man kag duol nako? Gipasagdan ra ko sa uban. Nganong wala man ka mosurender?” Maampingong gigamit ni Don ang tulo ka teksto aron matandog ang kasingkasing ni Peter. Una, iyang gipangutana si Peter kon nahibalo ba kini nga may ngalan ang Diyos ug gihangyo kini sa pagbasa sa Salmo 83:18. Sunod, aron ipakita kon nganong wala siya mosurender, gihangyo ni Don si Peter sa pagbasa sa Roma 10:13, 14, nga nag-ingong “ang matag usa nga magatawag sa ngalan ni Jehova maluwas.” Sa ulahi, gibasa ni Don ang Mateo 9:36 ug dayon gihangyo niya si Peter nga basahon sab kini. Ang teksto nag-ingon: “Sa pagkakita sa mga panon sa katawhan [si Jesus] naluoy kanila, tungod kay sila pinanitan ug nagkatibuagsa sama sa mga karnero nga walay magbalantay.” Human niana, si Peter naghilak nga nangutana: “Usa ba ko aning mga karneroha?”

Si Peter anam-anam nga nausab. Siya naligo, namalbas, ug nagsul-ob na sa mas maayong mga sinina nga hinatag ni Don. Gipadayon ni Peter ang hinlong pamostura.

Si Peter may talaadlawan (diary). Ang nag-unang mga panid nagpakita sa iyang kaguol, pero lahi ang gipakita sa ulahing mga panid niini. Usa sa gisulat ni Peter nag-ingon: “Nahibaloan nako ang ngalan sa Diyos karong adlawa. Karon, makaampo na ko kang Jehova. Lipay kaayo kong mahibaloan ang iyang ngalan. Miingon si Don nga puwede kong mahimong suod nga  Higala ni Jehova, kinsa pirmeng mamati nako, bisag kanus-a o bisag unsay akong isulti.”

Ang kataposang gisulat ni Peter maoy para sa iyang mga igsoon. Siya misulat:

“Lain ang akong pamati karon. Dala na tingali ni sa akong katigulangon. Pero bisag mamatay ko ron, nahibalo kong magkita mi pag-usab sa akong amigo [si Don] sa Paraiso. Kon nagbasa mo ani, buot pasabot patay na ko. Pero kon makakita mog tawo sa akong haya nga wala ninyo mailhi, estoryaha siya, ug palihog basaha ning gamayng asul nga libro [nagtumong sa librong gigamit sa pagtuon sa Bibliya nga “Ang Kamatuoran nga Motultol sa Kinabuhing Dayon” nga iyang nadawat pipila ka tuig kanhi]. * Kana nag-ingon nga magkita mi pag-usab sa akong amigo sa Paraiso. Kombinsido gyod ko ani. Inyong igsoon, Peter.”

Human sa lubong, si Ummi nga igsoong babaye ni Peter miingon: “Mga duha ka tuig kanhi, gikontak ko ni Peter. Sa daghang katuigan, kadto pa nako siya nakita nga malipayon. Mipahiyom pa gani siya.” Giingnan ni Ummi si Don: “Basahon nako ang libro kay espesyal gyod seguro ni, kay nabag-o god ani ang akong igsoon.” Miuyon sab si Ummi nga hisgotan ang mas bag-ong libro nga Unsay Tinuod nga Gitudlo sa Bibliya? uban sa usa ka Saksi ni Jehova.

Dili sab ta angayng motan-aw sa panggawas lang nga panagway. Angay tang mopakitag sinserong gugma ug mopailob sa tanang matang sa tawo. (1 Tim. 2:3, 4) Kon buhaton nato kana, lagmit matabangan nato ang mga tawo nga sama ni Peter, kinsa dili tingali maayog pamostura pero may madinawatong kasingkasing. Makaseguro ta nga ang Diyos, kinsa “nagatan-aw sa kasingkasing,” magpatubo sa kamatuoran diha sa kasingkasing sa sinserong mga tawo.​—1 Sam. 16:7; Juan 6:44.