“KOMOSTA!”

Seguradong pirme kang mogamit niana nga timbaya. Tingali, apilan pa gani nimo nig lamano o gakos. Ang paagi ug pulong nga gamiton sa pagtimbaya o pagpangomosta nagdepende sa matag lugar, pero ang prinsipyo niini pareho lang. Gani, isipon nga dili mahigugmaon o walay batasan ang dili pagtimbaya o pagbalos ug timbaya.

Pero dili tanang tawo ang ganahang motimbaya. Ang pipila nagduhaduha kay sila maulawon o mibating dili sila importante. Nalisdan ang uban sa pagtimbaya niadtong lahig rasa, kultura, o kahimtang sa kinabuhi. Pero, bisan ang simpleng pagtimbaya dunay positibo kaayong mga epekto.

Pangutan-a ang kaugalingon: ‘Unsay epekto sa pagtimbaya? Ug unsay akong makat-onan sa Pulong sa Diyos maylabot sa pagtimbaya o pagpangomosta?’

Dihang giabiabi ni apostol Pedro sa Kristohanong kongregasyon ang unang Hentil nga si Cornelio, si Pedro miingon: “Ang Diyos dili mapihigon.” (Buh. 10:34) Sa ulahi, si Pedro misulat nga ang Diyos “nagtinguha nga ang tanan makakab-ot sa paghinulsol.” (2 Ped. 3:9) Makahunahuna tingali ta nga kining tekstoha naghisgot bahin niadtong nagtuon sa kamatuoran. Pero si Pedro nag-awhag sa mga Kristohanon: “Pasidunggi ang tanang matang sa mga tawo, pagbaton ug gugma alang sa tibuok kapunongan sa mga igsoon.” (1 Ped. 2:17) Busa, maayo gyod nga komostahon nato ang uban bisag unsa pay ilang rasa, kultura, o kagikan. Pagpakita kanag pasidungog ug gugma kanila.

Si apostol Pablo nagdasig sa kongregasyon: “Dawata ang usag usa, ingon nga si Kristo usab midawat kanato.” (Roma 15:7) Gani, gihisgotan ni Pablo ang mga igsoon nga ‘nakapalig-on’ pag-ayo niya. Karon, ilabinang kinahanglan natong palig-onon ang atong mga igsoon kay giatake pag-ayo ni Satanas ang katawhan sa Diyos.​—Col. 4:11; Pin. 12:12, 17.

Gipakita sa Bibliya nga ang pagpangomosta mas dakog epekto kay sa pagpabati lang sa uban nga giabiabi sila.

Dihang gibalhin ang kinabuhi sa Anak sa Diyos ngadto sa tagoangkan ni Maria, si Jehova nagpadalag anghel aron estoryahon siya. “Maayong adlaw, usa nga pinaboran kaayo,” ang anghel miingon, “si Jehova nagauban kanimo.” Si Maria “nalibog pag-ayo” kon nganong may anghel nga nakig-estorya niya. Kay namatikdan ni sa anghel, siya miingon: “Ayaw kahadlok, Maria, kay ikaw nakakaplag ug pabor sa Diyos.” Iyang gipasabot kang Maria nga katuyoan sa Diyos nga ipanganak niini ang Mesiyas. Imbes padayong maglibog, si Maria miingon: “Tan-awa! Ang ulipong babaye ni Jehova! Matuman unta kana kanako sumala sa imong gipahayag.”​—Luc. 1:26-38.

Pribilehiyo sa anghel nga mahimong mensahero ni Jehova, pero wala niya hunahunaa nga ang pagpakig-estorya sa dili hingpit nga tawo ubos nga buluhaton. Iyang gitimbaya si Maria. Unsay atong makat-onan niana? Kinahanglang andam tang motimbaya ug modasig sa uban. Bisag pipila lang ka pulong, makatabang ta sa uban ug makakombinsir nila nga bahin gyod sila sa katawhan ni Jehova.

Daghag nailhan si Pablo sa mga kongregasyon sa Asia Minor ug Europe. Ang iyang mga sulat may espesipikong mga pangomosta. Makita ni sa Roma kapitulo 16. Daghan ang gipangomosta ni Pablo. Iyang  gihisgotan si Febe ingong “atong igsoong babaye,” ug giawhag ang mga igsoon nga “dawaton siya diha sa Ginoo sa paaging takos sa mga balaan, ug . . . abagan siya sa bisan unsang butang nga siya manginahanglan.” Si Pablo nangomosta kang Prisca ug Aquila, ug midugang: “Kang kinsa dili lamang ako kondili usab ang tanang kongregasyon sa mga nasod nagpasalamat.” Gipangomosta niya ang pipila nga wala kaayo nato mailhi karon​—“akong hinigugmang si Epeneto” maingon man si “Trifena ug si Trifosa, mga babaye nga nagahago diha sa Ginoo.” Oo, si Pablo pirmeng mangomosta sa mga igsoon.​—Roma 16:1-16.

Hunahunaa lang ang kalipay nga ilang gibati sa pagkahibalo nga may naghandom nila. Seguradong midako ang ilang gugma kang Pablo ug sa usag usa! Ug ang pagkadungog nianang mahigugmaong mga pangomosta seguradong nakadasig sa ubang Kristohanon, nga nakatabang nila nga magmalig-on sa pagtuo. Oo, ang pangomosta nga nagpakitag sinserong personal nga interes ug komendasyon makapalig-on sa panaghigalaay ug makapahiusa sa maunongong mga alagad sa Diyos.

Dihang miabot si Pablo sa dunggoanan sa Puteoli ug mipaingon sa Roma, ang mga Kristohanon didto mibiyaheg layo aron sugaton siya. Dihang nalantawan sila ni Pablo, siya “nagpasalamat sa Diyos ug nakabatog kaisog.” (Buh. 28:13-15) Usahay, ang ato lang mahimo mao ang pagpahiyom o pagkaway. Pero, makadasig na kana sa usa nga na-depress o naguol.

Ang tinun-ang si Santiago kinahanglang mohatag ug bug-at nga tambag. Ang pipila ka Kristohanon nahimong espirituwal nga mga mananapaw kay nakighigala sila sa kalibotan. (Sant. 4:4) Pero matikdi ang introduksiyon sa iyang sulat:

“Si Santiago, ulipon sa Diyos ug sa Ginoong Jesu-Kristo, nganha sa napulog-duha ka tribo nga nagkatibulaag: Mga pangomosta!” (Sant. 1:1) Seguradong dili sila malisdan sa pagdawat sa iyang tambag kay ilang nakita sa iyang pangomosta nga ang tanan patas atubangan sa Diyos. Oo, pinaagi sa simpleng pangomosta, posibleng mahisgotan bisan ang seryosong mga butang.

Ang epektibo kaayong pangomosta, bisag mubo, kinahanglang sinsero ug magpakitag tinuod nga gugma. Buhaton nato kana bisag dili tingali ta balosag timbaya. (Mat. 22:39) Usa ka sister sa Ireland ang miabot sa Kingdom Hall dihang hapit nang magsugod ang tigom. Samtang nagdalidali siyag sulod, usa ka brader ang milingi, mipahiyom, ug miingon: “Komosta. Lipay kong nakita ka.” Ang sister basta milingkod na lang.

Pipila ka semana sa ulahi, ang sister miduol sa brader ug miingon nga taudtaod na siyang nag-atubag lisod nga situwasyon sa ilang balay. “Guol kaayo ko adtong gabhiona,” siya miingon, “nga dili na unta ko makatambong. Wala kaayo koy mahinumdoman sa tigom, gawas sa imong pangomosta. Gibati nakong importante gyod ko. Salamat kaayo.”

Wala mahunahunai sa brader ang epekto sa iyang mubong pagtimbaya. Ang brader miingon: “Dihang giingnan ko sa sister sa epekto kaniya niadtong pipila ka pulong, nalipay kong gibuhat nako to. Nindot pod ang akong gibati.”

Si Solomon misulat: “Ilabay ang imong tinapay ibabaw sa katubigan, kay sa paglabay sa daghang adlaw kini imong makaplagan pag-usab.” (Eccl. 11:1) Pinaagi sa paghunahuna kanunay sa kaimportante sa pagpangomosta, ilabina sa atong mga igsoon, atong madasig ang uban ug madasig pod ta. Busa, dili nato pakamenoson ang epekto sa pagpangomosta.