Ang amahan ni Rehoboam mao si Solomon, nga naghari sa Israel sa 40 ka tuig. (1 Hari 11:42) Si Solomon namatay niadtong 997 B.C.E. Dayon, miadto si Rehoboam sa norte​—gikan sa Jerusalem ngadto sa Sekem—​aron dihogan ingong hari. (2 Cron. 10:1) Nagduhaduha kaha si Rehoboam sa pagpuli kang Solomon, kinsa nailhan sa iyang talagsaong kaalam? Mapamatud-an kaha ni Rehoboam nga may igo siyang kaalam sa pagsulbad sa lisod kaayong mga problema?

Nakita tingali ni Rehoboam nga tensiyonado kaayo ang nasod sa Israel. Wala madugay, ang mga representante sa katawhan nangadto niya ug direktang gisulti ang ilang hangyo: “Ang imong amahan . . . nagpabug-at sa among yugo; ug karon pagaana ang malisod nga pag-alagad sa imong amahan ug ang mabug-at nga yugo nga iyang gisangon kanamo, ug kami moalagad kanimo.”​—2 Cron. 10:3, 4.

Tingali gibati ni Rehoboam nga nakorner siya! Kon iyang sundon ang katawhan, mamenosan ang luho niya, sa iyang pamilya, ug niadtong naa sa iyang palasyo, hasta ang ilang ipabuhat sa katawhan. Sa laing bahin, kon dili niya sundon ang mga tawo, posibleng morebelde sila. Unsay iyang buhaton? Una, ang bag-ong hari mikonsulta sa tigulang nga mga lalaki nga magtatambag ni Solomon. Pero, si Rehoboam nangayog tambag sa batan-ong mga lalaki nga kaedad niya. Sa pagsunod sa tambag sa mga batan-on, siya midesisyon nga lisodlisoron pa ang katawhan. Siya miingon: “Akong pabug-aton pa ang inyong yugo, ug . . . magdugang niini. Ang akong amahan . . . nagkastigo kaninyo pinaagig mga latigo, apan ako . . . pinaagig mga tunokong panglapdos.”​—2 Cron. 10:6-14.

Unsay atong makat-onan niini? Klaro, maalamong maminaw sa edaran, hamtong sa espirituwal nga mga igsoon. Kay daghag eksperyensiya, lagmit makita nila ang resulta sa mga desisyon ug makahatag natog maayong tambag.​—Job 12:12.

Aron masumpo ang pagrebelde, gitigom ni Rehoboam ang iyang mga sundalo. Pero nangilabot si Jehova pinaagi ni propetang Semaias, nga miingon: “Dili gayod kamo motungas ug makig-away batok sa inyong mga igsoon nga mga anak sa Israel. Bumalik kamo ang matag usa ngadto sa iyang balay, kay tungod sa akong sugo nga kining butanga nahitabo.”​—1 Hari 12:21-24. *

Dili makig-away? Maimadyin tingali nimo ang kabalaka ni Rehoboam! Unsa na lay hunahunaon sa katawhan sa ilang hari kinsa nanghadlok nga silotan ang iyang mga sakop “pinaagig mga tunokong panglapdos,” pero wala ra diay gihimo nianang grabeng rebelyon? (Itandi ang 2 Cronicas 13:7.) Bisan pa niana, ang hari ug ang iyang kasundalohan misunod sa “pulong ni Jehova, ug namauli sumala sa pulong ni Jehova.”

Unsay atong makat-onan niini? Maalamon nga sundon ang Diyos bisag bugalbugalan ta. Panalanginan ug paboran ta sa Diyos kon ato siyang sundon.​—Deut. 28:2.

Unsay epekto niini kang Rehoboam? Kay wala man niya idayon ang plano nga makig-away sa bag-ong nasod, nagpokus siya sa pagtukod ug mga siyudad sa tribo sa Juda ug Benjamin, nga iya gihapong gimandoan. “Iya pa gayod nga gipalig-on” ang ubang siyudad. (2 Cron. 11:5-12) Labaw sa tanan, may panahong gisunod niya ang mga balaod ni Jehova. Dihang misimbag mga diyosdiyos ang 10 ka tribo nga gingharian sa Israel nga gimandoan ni Jeroboam, daghan kanila ang misuportar kang Rehoboam pinaagig pagbiyahe sa Jerusalem aron modapig sa tinuod nga pagsimba. (2 Cron. 11:16, 17) Busa, ang pagkamasinugtanon ni Rehoboam nakapalig-on sa iyang pagmando.

Pero dihang ang pagmando ni Rehoboam nalig-on na, may gibuhat siyang wala damha. Iyang gisalikway ang balaod ni Jehova ug midapig sa paganong pagsimba! Ngano? Naimpluwensiyahan ba siya sa iyang Ammonhanong inahan? (1 Hari 14:21) Bisag unsa pay iyang rason, ang tibuok nasod misunod niya. Tungod niini, gitugotan ni Jehova si Haring Sisak sa Ehipto sa pag-ilog sa daghang siyudad sa Juda, bisan pag gipalig-on na kini ni Rehoboam!​—1 Hari 14:22-24; 2 Cron. 12:1-4.

Migrabe ang situwasyon dihang giatake ni Sisak ang Jerusalem nga gimandoan ni Rehoboam. Niadtong tungora, gisulti ni Semaias ang mensahe sa Diyos ngadto kang Rehoboam ug sa iyang mga prinsipe: “Kamo . . . nagbiya kanako, ug ako, usab . . . nagbiya kaninyo ngadto sa kamot ni Sisak.” Unsay reaksiyon ni Rehoboam sa maong disiplina? Dalayegon ang iyang gibuhat! Ang Bibliya miingon: “Ang mga prinsipe sa Israel ug ang hari nagpaubos sa ilang kaugalingon ug miingon: ‘Si Jehova matarong.’” Tungod niana, giluwas ni Jehova si Rehoboam ug ang Jerusalem gikan sa pagkalaglag.​—2 Cron. 12:5-7, 12.

Human niadto, padayong nagmando si Rehoboam sa habagatang gingharian. Sa wala pa mamatay, gihatagan niyag daghang regalo ang iyang mga anak nga lalaki aron dili sila morebelde sa ilang igsoong si Abias, ang mosunod nga hari. (2 Cron. 11:21-23) Pinaagi niini, gipakita ni Rehoboam ang kaalam nga wala niya ipakita kaniadto.

Bisag nakabuhat siyag maayo, wala maangkon ni Rehoboam ang pabor sa Diyos. Ang Bibliya nag-ingon bahin sa iyang pagmando: “Iyang gibuhat ang daotan.” Ngano? Tungod “kay ang iyang kasingkasing wala niya ibutang nga lig-on sa pagpangita kang Jehova.”​—2 Cron. 12:14.

Hunahunaa ang atong makat-onan: Si Rehoboam mosunod usahay sa Diyos. Nagbuhat sab siyag pipila ka maayong butang para sa nasod ni Jehova. Pero, wala siya makigsuod kang Jehova o maningkamot sa paglipay Niya. Busa, nagbuhat siyag dili maayo ug nagsimbag bakak nga mga diyos. Makahunahuna tingali ka: ‘Dihang gidawat ni Rehoboam ang pagbadlong sa Diyos, gihimo ba niya kini kay naghinulsol siya ug gusto niyang malipay ang Diyos o naimpluwensiyahan lang siya sa  uban?’ (2 Cron. 11:3, 4; 12:6) Sa ulahing bahin sa iyang kinabuhi, mibalik siya sa pagbuhat ug daotan. Lahi ra gyod siya sa iyang lolo nga si Haring David! Oo, nakahimog mga sala si David, pero gipakita sa iyang pagkinabuhi nga siya nahigugma kang Jehova, debotado sa tinuod nga pagsimba, ug tinuod nga naghinulsol sa iyang mga sala.​—1 Hari 14:8; Sal. 51:1, 17; 63:1.

May makat-onan gyod ta kang Rehoboam. Makadayeg ta sa mga tawong nagtagana sa panginahanglan sa pamilya ug naningkamot sa pagbuhat ug maayo. Pero aron maangkon ang pabor sa Diyos, kinahanglang prayoridad nato ang pagsuportar sa tinuod nga pagsimba ug ang pag-unong niini.

Mahimo nato ni kon maningkamot tang magpabilin ang atong dakong gugma kang Jehova. Samag pagsugnod sa kalayo aron dili ni mapalong, maningkamot tang magpabilin ang atong gugma sa Diyos pinaagi sa pagtuon sa iyang Pulong, pagpamalandong sa atong gibasa, ug padayong pag-ampo. (Sal. 1:2; Roma 12:12) Sa ingon, ang atong gugma kang Jehova magpalihok nato nga mapalipay siya sa tanan natong buhaton. Magpalihok pod ni nato sa pagpakitag tinuod nga paghinulsol kon makasala. Dili sama ni Rehoboam, magmatinumanon ta sa tinuod nga pagsimba.​—Jud. 20, 21.