1. Nganong angay tang mamati sa pasidaan ni Jesus?

SA TAGNA ni Jesus bahin sa kataposang mga adlaw, siya miingon: “Pagbantay nga ang inyong kasingkasing dili mabug-atan . . . sa mga kabalaka sa kinabuhi [o “kabalaka sa panginabuhi; kabalaka sa adlaw-adlawng kinabuhi,” footnote sa nwtsty-E].” (Luc. 21:34) Angay tang mamati sa maong pasidaan. Ngano? Tungod kay kitang tanan dunay makapa-stress nga mga problema.

2. Unsang makapa-stress nga mga problema ang giatubang sa atong mga igsoon?

² Usahay, magdungan pagtungha ang makapa-stress nga mga problema. Tagda ni nga mga pananglitan. Ang brader nga si John, * kinsa nag-antos sa multiple sclerosis, naguol pag-ayo dihang gibiyaan siya sa iyang asawa human sa 19 ka tuig nga kaminyoon. Dayon, ang iyang duha ka anak nga babaye mihunong sa pag-alagad kang Jehova. Ang magtiayong Bob ug Linda lahig mga problema. Nawad-an silag trabaho, ug mihawa sila sa ilang balay kay dili na sila makabayad. Gawas pa ana, si Linda nadayagnos nga may sakit sa kasingkasing nga posibleng makapatay niya, ug may lain pa siyang sakit nga misugod nag daot sa iyang immune system.

3. Sumala sa Filipos 4:6, 7, sa unsa ta makaseguro?

³ Makaseguro ta nga ang atong Maglalalang ug mahigugmaong Amahan, si Jehova, nakasabot kon unsay atong bation dihang ma-stress ta. Ug gusto ta niyang tabangan sa atong mga problema. (Basaha ang Filipos 4:6, 7.) Ang Pulong sa Diyos  dunay daghang pananglitan nga naghisgot bahin sa mga problema nga giatubang sa iyang mga alagad. Naghisgot pod ni kon giunsa sila pagtabang ni Jehova sa maong makapa-stress nga mga kahimtang. Hisgotan nato ang pipila ka pananglitan.

4. Unsang mga problema ang giatubang ni Elias, ug unsay iyang pagbati bahin kang Jehova?

⁴ Si Elias nag-alagad kang Jehova sa lisod nga mga panahon ug nakaatubang ug grabeng mga problema. Si Haring Ahab, nga usa sa dili matinumanong mga hari sa Israel, nangasawa kang Jezebel, nga usa ka daotang magsisimba ni Baal. Gipakaylap nila sa nasod ang pagsimba kang Baal ug daghan sa mga propeta ni Jehova ang ilang gipapatay. Si Elias nakaikyas. Nakalahutay pod siya sa grabeng kagutom pinaagi sa pagsalig kang Jehova. (1 Hari 17:2-4, 14-16) Dugang pa, si Elias misalig kang Jehova dihang gihagit niya ang mga propeta ug magsisimba ni Baal. Iyang giawhag ang mga Israelinhon nga alagaron si Jehova. (1 Hari 18:21-24, 36-38) Sa daghang higayon, nakita ni Elias kon sa unsang paagi gitabangan ug gipanalipdan siya ni Jehova nianang lisod nga mga panahon.

5-6. Sumala sa 1 Hari 19:1-4, unsay gibati ni Elias, ug giunsa pagpakita ni Jehova nga gimahal niya si Elias?

⁵ Basaha ang 1 Hari 19:1-4. Bisan pa niana, nahadlok si Elias dihang gihulga siya ni Rayna Jezebel nga patyon. Busa miikyas siya ngadto sa Beer-seba. Tungod sa grabeng kaguol, ‘mihangyo siya nga mamatay na unta.’ Nganong mibati siya niana? Tungod kay si Elias  dili hingpit, usa ka “tawong may pagbati nga sama kanato.” (Sant. 5:17) Basin wala na niya makaya ang stress ug grabeng kakapoy. Tingali naghunahuna si Elias nga way pulos ang iyang paningkamot sa pagtabang sa mga tawo sa pagsimba kang Jehova, wala moarang-arang ang kahimtang sa Israel, ug siya na lay nag-alagad kang Jehova. (1 Hari 18:3, 4, 13; 19:10, 14) Basin matingala ta sa reaksiyon niining matinumanong propeta. Pero nasabtan ni Jehova ang gibati ni Elias.

⁶ Wala kasab-i ni Jehova si Elias sa pagpahungaw sa iyang gibati. Iya hinuong gitabangan si Elias nga maulian sa kusog niini. (1 Hari 19:5-7) Dayon, sa mahigugmaong paagi, gitul-id ni Jehova ang panghunahuna ni Elias pinaagi sa pagpakita sa Iyang katingalahang gahom. Unya si Jehova miingon nga duna pay 7,000 sa Israel nga wala magsimba kang Baal. (1 Hari 19:11-18) Niining mga paagiha, gipakita ni Jehova nga gimahal niya si Elias.

7. Nganong madasig ta sa paagi ni Jehova sa pagtabang kang Elias?

⁷ Naa ba kay problema nga nakapa-stress nimo? Makapahupay gyong mahibalo nga si Jehova nakasabot sa gibati ni Elias! Nagpasalig ni nato nga masabtan pod niya ang atong giatubang nga mga problema. Nahibalo siya sa atong mga limitasyon, bisan gani sa atong gihunahuna ug gibati. (Sal. 103:14; 139:3, 4) Kon mosalig ta kang Jehova sama kang Elias, tabangan ta niya sa pag-atubang sa mga problema nga nakapa-stress nato.​—Sal. 55:22.

8. Sa unsang paagi tabangan ka ni Jehova nga masagubang ang stress?

⁸ Ang stress makapanegatibo sa imong hunahuna ug makapaluya nimo. Kon mahitabo nâ, hinumdomi nga tabangan ka ni Jehova sa pagsagubang sa stress. Unsaon ka niya pagtabang? Siya nag-awhag nga imong isulti kaniya ang imong mga kabalaka, ug iyang tubagon ang imong pagpangayog tabang. (Sal. 5:3; 1 Ped. 5:7) Busa iampo pirme kang Jehova ang imong mga problema. Dili siya direktang makig-estorya nimo sama sa iyang gibuhat kang Elias, pero siya makig-estorya nimo pinaagi sa iyang Pulong, ang Bibliya, ug pinaagi sa iyang organisasyon. Ang mga asoy nga imong mabasa sa Bibliya makapahupay nimo ug makahatag nimog paglaom. Ang mga igsoon makadasig sab nimo.​—Roma 15:4; Heb. 10:24, 25.

9. Sa unsang paagi makatabang ang usa ka kasaligang higala?

⁹ Giingnan ni Jehova si Elias nga idelegar ang ubang trabaho kang Eliseo. Niining paagiha, si Jehova naghatag kang Elias ug maayong higala nga makatabang niya sa pagsagubang sa iyang mga problema. Kon makig-estorya pod ta sa usa ka kasaligang higala, matabangan ta niya sa pagsagubang sa atong mga problema. (2 Hari 2:2; Prov. 17:17) Kon gibati nimo nga wala kay kasultihan sa imong mga problema, hangyoa si Jehova nga tabangan kang makakitag hamtong nga igsoon nga makadasig nimo.

10. Sa unsang paagi ang eksperyensiya ni Elias naghatag natog paglaom, ug sa unsang paagi makatabang nato ang saad sa Isaias 40:28, 29?

¹⁰ Sa daghang katuigan, gitabangan ni Jehova si Elias nga makasagubang sa stress ug makapabiling matinumanon. Ang eksperyensiya ni Elias naghatag natog paglaom. Tingali may mga panahon nga grabe tang ma-stress ug maluya sa pisikal ug emosyonal. Pero kon mosalig ta kang Jehova, hatagan ta niya sa kusog nga atong gikinahanglan aron padayon tang makaalagad kaniya.​—Basaha ang Isaias 40:28, 29.

11-13. Sa unsang paagi ang stress nakaapektar sa tulo ka alagad ni Jehova sa karaang panahon?

¹¹ Ang ubang karakter sa Bibliya na-stress pod pag-ayo. Pananglitan, si Ana nag-antos sa kaulaw kay wala siyay anak ug gibiaybiay sa iyang karibal nga asawa. (1 Sam. 1:2, 6) Tungod sa grabeng stress, naguol kaayo si Ana nga siya mihilak ug walay ganang mokaon.​—1 Sam. 1:7, 10.

¹² May mga panahon nga si Haring David grabe pong na-stress. Hunahunaa ang iyang giatubang nga kalisdanan. Nakonsensiya kaayo siya sa daghan niyang kasaypanan. (Sal. 40:12) Mirebelde niya ang iyang pinalanggang anak nga si Absalom, ug sa ulahi kini namatay. (2 Sam. 15:13, 14; 18:33) Gitraydor sab siya sa usa sa iyang kinasuorang mga higala. (2 Sam. 16:23–17:2; Sal. 55:12-14) Daghan sa mga salmo ni David ang nagpakita sa iyang gibating kaluya ug sa iyang lig-ong pagsalig kang Jehova.​—Sal. 38:5-10; 94:17-19.

¹³ Sa ulahi, dihay salmistang nasina sa pagkinabuhi sa mga daotan. Lagmit siya kaliwat sa Levihanong si Asap ug nag-alagad sa “dakong sangtuwaryo sa Diyos.” Kini nga salmista na-stress, mao nga siya dili malipayon ug dili kontento. Naghunahuna na gani siya nga dili igo ang mga panalangin sa pag-alagad sa Diyos.​—Sal. 73:2-5, 7, 12-14, 16, 17, 21.

14-15. Unsay atong makat-onan gikan sa tulo ka pananglitan sa Bibliya bahin sa pagpangayog tabang kang Jehova?

¹⁴ Ang tulo ka alagad ni Jehova nga atong nahisgotan misalig kang Jehova alang sa tabang. Ilang giampo kang Jehova ang ilang mga kabalaka. Way pagduhaduha nilang gisulti kaniya ang mga rason kon nganong na-stress kaayo sila. Ug padayon silang miadto sa dapit  sa pagsimba kang Jehova.​—1 Sam. 1:9, 10; Sal. 55:22; 73:17; 122:1.

¹⁵ Mabinationg gitubag ni Jehova ang matag usa kanila. Si Ana nakabatog kalinaw sa hunahuna. (1 Sam. 1:18) Si David misulat: “Daghan ang kalisdanan sa matarong, apan luwason siya ni Jehova gikan nianang tanan.” (Sal. 34:19) Ug ang salmista nga lagmit kaliwat ni Asap mibati sa ulahi nga si Jehova ‘nagkupot sa iyang tuong kamot,’ nga naggiya kaniya pinaagig mahigugmaong tambag. Siya miawit: “Bahin kanako, maayo alang kanako ang pagduol sa Diyos. Gihimo nakong dangpanan ang Soberanong Ginoong Jehova.” (Sal. 73:23, 24, 28) Unsay atong makat-onan sa maong mga pananglitan? Usahay, mabug-atan ta sa mga problema nga makapa-stress nato. Pero masagubang nato ni kon mamalandong ta kon giunsa pagtabang ni Jehova ang uban, kon mosalig ta niya pinaagig pag-ampo, ug kon motuman ta sa tanan niyang isulti kanato.​—Sal. 143:1, 4-8.

16-17. (a) Nganong dili nato angayng ilain ang kaugalingon? (b) Sa unsang paagi mahibalik ang atong kadasig?

¹⁶ Kanang tulo ka pananglitan nagtudlo nato ug lain pang importanteng leksiyon​—dili gyod nato ilain ang atong kaugalingon gikan kang Jehova ug sa iyang katawhan. (Prov. 18:1) Si  Nancy, kinsa grabeng na-stress dihang gibiyaan sa iyang bana, miingon: “Daghang higayon nga di gyod ko gustong makakita o makig-estorya kang bisan kinsa. Pero misamot kog ka guol dihang gilain nako ang akong kaugalingon.” Nausab ang kahimtang dihang si Nancy naningkamot sa pagtabang niadtong may mga problema. Siya miingon: “Maminaw ko dihang mosulti ang uban sa ilang mga problema. Namatikdan nako nga dihang nagpakita kog empatiya sa uban, wala na kaayo ko maghunahuna sa akong kaugalingon ug sa akong mga problema.”

¹⁷ Mahibalik ang atong kadasig pinaagi sa pagtambong sa mga tigom. Dihang motambong ta, mahatagan nato si Jehova ug dugang kahigayonan nga mahimong atong “magtatabang ug maghuhupay.” (Sal. 86:17) Didto, iya tang palig-onon pinaagi sa iyang balaang espiritu, iyang Pulong, ug iyang katawhan. Sa mga tigom, duna tay kahigayonan nga “magdinasigay.” (Roma 1:11, 12) Usa ka sister nga ginganlag Sophia miingon: “Gitabangan ko ni Jehova ug sa mga igsoon nga makalahutay. Pinakaimportante nako ang mga tigom. Nakita nako nga kon mas magkugi ko sa ministeryo ug sa kongregasyon, mas masagubang nako ang stress ug kabalaka.”

18. Dihang maluya ta, unsay mahatag ni Jehova?

¹⁸ Dihang maluya ta, atong hinumdoman nga si Jehova wala lang magsaad nga bug-os niyang wad-on ang stress sa umaabot, kondili naghatag pod siyag tabang aron atong masagubang ang stress karon. Iyang ihatag kanato ang tinguha ug kusog sa pagsagubang sa kaluya ug kawalay-paglaom.​—Filip. 2:13.

19. Unsay gipasalig kanato sa Roma 8:37-39?

¹⁹ Basaha ang Roma 8:37-39. Gipasaligan ta ni apostol Pablo nga walay makabulag nato sa gugma sa Diyos. Unsaon nato pagtabang ang mga igsoon nga nakigbisog sa stress? Hisgotan sa sunod nga artikulo kon unsaon nato pagsundog si Jehova sa pagpakitag kaluoy ug sa pagtabang sa mga igsoon nga na-stress.