1, 2. (a) Unsay reaksiyon sa pipila ka ginikanan dihang gusto nang magpabawtismo ang ilang anak? (b) Nganong pangutan-on ang mga kandidato sa bawtismo kon nakapahinungod na ba sila kang Jehova? (Tan-awa ang hulagway sa sinugdan sa artikulo.)

ANG batang tawgon natog Maria nagtindog kauban sa ubang kandidato sa bawtismo, ug nagtan-aw niya ang iyang ginikanan. Sa kusog ug klaro nga tingog, iyang gitubag ang duha ka pangutana sa mamumulong. Wala madugay human niana, siya nabawtismohan.

² Lipay kaayo ang ginikanan ni Maria sa desisyon niini sa paghimog kinasingkasing nga dedikasyon kang Jehova ug sa pagpabawtismo. Pero, unâ pa niini, ang iyang mama nakapangutana sa kaugalingon: ‘Bata ra ba kaayo si Maria para magpabawtismo? Nasabtan ba gyod niya ang kaseryoso niana? Mas maayo kahang palabyon usâ ang panahon ayha siya magpabawtismo?’ Kini ang mga pangutana sa daghang mahigugmaong ginikanan dihang gusto nang magpabawtismo ang ilang gagmayng anak. (Eccl. 5:5) Tungod nâ kay ang dedikasyon ug bawtismo mao ang  labing importanteng desisyon nga himoon sa usa ka Kristohanon.​—Tan-awa ang kahong “ Nagpahinungod Ka na ba Kang Jehova?”

3, 4. (a) Giunsa pagpakita ni Pedro ang kaimportante sa bawtismo? (b) Nganong ikakomparar ang bawtismo sa pagtukod ug arka sa adlaw ni Noe?

³ Gikomparar ni apostol Pedro ang bawtismo sa pagtukod ni Noe sa arka: “Kana nga motumbas niini karon nagaluwas usab kaninyo, nga mao, ang bawtismo.” (Basaha ang 1 Pedro 3:20, 21.) Ang arka mao ang makitang pamatuod nga debotado si Noe sa pagbuhat sa kabubut-on sa Diyos. Matinumanong gituman ni Noe ang gipahimo ni Jehova kaniya. Oo, ang makita nga mga buhat sa pagtuo miresulta sa kaluwasan ni Noe ug sa iyang pamilya panahon sa Lunop. Unsay gipasabot sa giingon ni Pedro?

⁴ Ang arka maoy pamatuod sa pagtuo ni Noe. Sa susama, ang bawtismo atubangan sa publiko maoy makitang pamatuod. Sa unsa? Gipakita niana nga gipahinungod sa usa ka Kristohanong tinun-an ang iyang kaugalingon kang Jehova base sa pagtuo sa nabanhawng si Kristo. Sama kang Noe, ang dedikadong mga tinun-an motuman sa gipahimo sa Diyos kanila. Ingon nga si Noe naluwas sa Lunop, ang maunongong mga bawtismado maluwas dihang laglagon na kining daotang kalibotan. (Mar. 13:10; Pin. 7:9, 10) Tungod niini, importante kaayo ang dedikasyon ug bawtismo. Ang tawong maglangaylangay sa pagpabawtismo mameligrong mawad-an sa kahigayonan nga mabuhi sa walay kataposan.

5. Unsay atong konsiderahon niining artikuloha?

⁵ Kay seryoso ang pagpabawtismo, kinahanglan natong konsiderahon kining tulo ka pangutana. Unsay giingon sa Bibliya bahin sa bawtismo? Unsay buhaton sa usa  unâ magpabawtismo? Nganong angayng hinumdoman sa usa ang kaimportante sa bawtismo dihang tudloan niya ang iyang anak o Bible study?

6, 7. (a) Unsay kahulogan sa pagbawtismo ni Juan? (b) Unsang talagsaong pagbawtismo ang gihimo ni Juan?

⁶ Sa Bibliya, ang unang tawo nga nagbawtismo sa uban mao si Juan Bawtista. (Mat. 3:1-6) Gipakita niadtong nagpabawtismo kang Juan nga sila naghinulsol sa ilang pagsupak sa Moisesnong Balaod. Pero, walay kalabotan sa paghinulsol ang labing importanteng bawtismo nga gihimo ni Juan. Siya may talagsaong pribilehiyo sa pagbawtismo kang Jesus, ang hingpit nga Anak sa Diyos. (Mat. 3:13-17) Si Jesus walay sala, busa dili siya kinahanglang maghinulsol. (1 Ped. 2:22) Ang iyang bawtismo nagsimbolo sa pagpresentar sa iyang kaugalingon aron buhaton ang kabubut-on sa Diyos.​—Heb. 10:7.

⁷ Sa ministeryo ni Jesus sa yuta, ang iyang mga tinun-an nagbawtismo usab sa uban. (Juan 3:22; 4:1, 2) Sama niadtong gihimo ni Juan, ang ilang bawtismo nagsimbolo sa paghinulsol sa ilang pagsupak sa Moisesnong Balaod. Pero, human sa kamatayon ug pagkabanhaw ni Jesus, ang bawtismo bag-o nag kahulogan para sa iyang mga tinun-an.

8. (a) Human mabanhaw si Jesus, unsay gisugo niya sa iyang mga sumusunod? (b) Unsa ka importante ang bawtismo para sa mga Kristohanon?

⁸ Pagka-33 C.E., ang nabanhawng si Jesus nagpakita sa kapig 500 ka tawo​—lalaki, babaye, ug lagmit may mga bata. Tingali nianang panahona nga siya miingon: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” (Mat. 28:19, 20; 1 Cor. 15:6) Oo, lagmit gatosan sa iyang sumusunod ang nakadungog sa sugo ni Jesus sa paghimog mga tinun-an. Busa, gipadayag ni Jesus nga ang bawtismo maoy kinahanglanon niadtong modawat sa yugo sa pagka-Kristohanon. (Mat. 11:29, 30) Aron ang usa makaalagad sa Diyos sa dalawatong paagi, kinahanglan niyang ilhon ug dawaton nga gigamit ni Jehova si Jesus sa pagpalampos sa Iyang katuyoan. Human niana, puwede nang bawtismohan ang maong tawo. Mao ra ni ang bawtismo sa tubig nga giuyonan sa Diyos. Sa Bibliya, daghag pamatuod nga sa unang siglo, nasabtan sa bag-ong mga tinun-an ni Kristo ang kaimportante sa bawtismo. Ug wala sila maglangan sa pagpabawtismo.​—Buh. 2:41; 9:18; 16:14, 15, 32, 33.

9, 10. Kon bahin sa pagpabawtismo, unsay atong makat-onan sa Etiopianhong kinabig ug kang Pablo?

⁹ Basaha ang Buhat 8:35, 36. Konsideraha ang ehemplo sa Etiopianhong kinabig nga mouliay na human mosimba sa Jerusalem. Sa giya sa anghel ni Jehova, giduol siya ni Felipe ug “gipahayag kaniya ang maayong balita bahin kang Jesus.” Unsay gibuhat sa Etiopianhon? Ang iyang gibuhat nagpamatuod sa iyang kinasingkasing nga apresasyon sa kamatuoran nga iyang nadungog. Gusto niyang sundon ang kahikayan ni Jehova, maong nagpabawtismo dayon siya.

¹⁰ Ang ikaduhang ehemplo mao kanang sa Hudiyong naglutos sa mga Kristohanon. Gipanganak siya diha sa nasod nga napahinungod sa Diyos. Pero, ang mga Hudiyo wala nay espesyal nga relasyon kang  Jehova. Ang maong tawo dasig kaayo sa tradisyon sa Judaismo, pero nakat-onan niya ang mas maayong paagi. Personal nga nakig-estorya niya ang nabanhaw ug hinimayang si Jesu-Kristo. Unsay gibuhat sa maong tawo? Gidawat niya ang tabang sa Kristohanong tinun-an nga si Ananias. Bahin sa maong tawo, ang Bibliya nag-ingon: “Siya mitindog ug gibawtismohan.” (Buh. 9:17, 18; Gal. 1:14) Nahibalo na tingali ka nga ang maong Hudiyo nailhan sa ulahi ingong si apostol Pablo. Pero hinumdomi nga human niya masabti ang kamatuoran​—nga gigamit si Jesus sa pagpalampos sa katuyoan sa Diyos—​si Pablo nagpabawtismo dayon.​—Basaha ang Buhat 22:12-16.

11. (a) Unsay magpalihok sa mga Bible study karon sa pagpabawtismo? (b) Unsay atong bation kon dunay magpabawtismo?

¹¹ Ingon sab niana ang mga Bible study karon​—bata man o tigulang. Kadtong may pagtuo ug nagpabili sa kamatuoran sa Bibliya gustong magpahinungod ug magpabawtismo. Ug importanteng bahin sa mga asembliya ug kombensiyon ang pakigpulong sa bawtismo. Malipay ang mga Saksi ni Jehova dihang dawaton sa mga Bible study ang kamatuoran ug magpabawtismo. Malipay pod ang mga ginikanan nga makitang apil ang ilang anak sa bag-ong mga tinun-an nga magpabawtismo. Sa 2017 nga tuig sa pag-alagad, kapig 284,000 ang nagsimbolo sa ilang dedikasyon kang Jehova pinaagig pagpabawtismo. (Buh. 13:48) Klarong nasabtan nila nga kinahanglanon para sa mga Kristohanon ang bawtismo. Unsay ilang gihimo aron mabawtismohan?

12. Unsay angayng buhaton sa Bible study unâ mabawtismohan?

¹² Unâ mabawtismohan ang usa ka Bible study, kinahanglang duna siyay pagtuo base sa tukmang kahibalo sa Diyos, Iyang katuyoan, ug Iyang kahikayan sa kaluwasan. (1 Tim. 2:3-6) Tungod niana nga pagtuo, iyang likayan ang mga buhat nga dili makapalipay sa Diyos, ug magkinabuhi siya subay sa matarong nga mga sukdanan ni Jehova. (Buh. 3:19) Kana nagpasabot nga dili siya makahimog balidong dedikasyon sa Diyos kon padayon siyang mobuhat sa mga butang nga gidumtan sa Diyos. (1 Cor. 6:9, 10) Pero dili igo ang pagsunod sa taas nga moral nga sukdanan ni Jehova. Ang tawong naningkamot sa pagbuhat ug matarong kanunayng motambong sa tigom, mosangyaw, ug manudlo. Si Jesus nag-ingon nga kinahanglan kanang buhaton sa iyang tinuod nga mga tinun-an. (Buh. 1:8) Kon mahimo na kana sa bag-ong tinun-an, makahimo na siyag balidong dedikasyon kang Jehova pinaagig pribadong pag-ampo ug dayon simbolohan kana pinaagi sa pagpabawtismo atubangan sa publiko.

13. Nganong angayng hinumdoman sa mga nagtudlo sa Bibliya nga ang bawtismo maoy kinahanglanon sa Kristohanon?

¹³ Samtang tabangan nato ang atong mga anak ug mga Bible study sa paghimo niining mga kinahanglanona, atong hinumdoman nga kinahanglanon ang bawtismo aron mahimong tinuod nga tinun-an. Pinaagi niana, dili ta magduhaduha sa paghisgot sa kaimportante sa dedikasyon ug bawtismo sa haom nga panahon. Oo, gusto gyod nato nga ang atong mga anak ug Bible study mouswag ug magpabawtismo!

14. Nganong dili nato pugson si bisan kinsa nga magpabawtismo?

¹⁴ Siyempre, dili angayng pugson sa ginikanan, sa nagtudlo sa Bibliya, o ni bisan kinsa sa kongregasyon ang mga Bible study nga magpabawtismo. Dili nâ gusto ni Jehova. (1 Juan 4:8) Hinunoa, samtang tudloan  nato sila, kinahanglan natong ipasiugda ang kaimportante sa pag-ugmad ug personal nga relasyon sa Diyos. Kon ilang gipabilhan ang kamatuoran ug gusto nilang isangon ang yugo sa pagka-Kristohanon, makadesisyon silang magpabawtismo.​—2 Cor. 5:14, 15.

15, 16. (a) Duna bay gitakdang edad nga angayng magpabawtismo ang usa? Isaysay. (b) Nganong ang Bible study kinahanglang magpabawtismo ingong Saksi ni Jehova bisag nabawtismohan na sa laing relihiyon?

¹⁵ Walay gitakdang edad nga angayng magpabawtismo ang usa. Lainlain ang gikusgon sa pag-uswag ug paghamtong sa matag Bible study. Daghan ang nagpabawtismo sa bata pa, ug sila nagmatinumanon kang Jehova. Ang uban nakasabot sa kaimportante sa bawtismo dihang nakat-onan nila ang kamatuoran sa tigulang na sila​—ang pipila kapig 100 anyos na!

¹⁶ Usa ka tigulang nga Bible study ang nangutana sa nagtudlo niya kon kinahanglan pa ba siyang magpabawtismo pag-usab nga nabawtismohan na man siya sa lainlaing relihiyon. Gihisgotan nilang duha ang makatabang nga mga teksto. Nasabtan sa Bible study ang giingon sa Bibliya ug wala madugay nagpabawtismo siya. Bisag mag-80 anyos na, gibati niyang importante gihapon nga mabawtismohan siya. Oo, ang balidong bawtismo gibase sa tukmang kahibalo sa kabubut-on ni Jehova. Busa, ang bag-ong mga tinun-an kinahanglang magpabawtismo bisan pag nabawtismohan na sila sa laing relihiyon.​—Basaha ang Buhat 19:3-5.

17. Unsay angayng pamalandongon sa adlaw sa bawtismo?

¹⁷ Malipayon kaayo ang adlaw sa bawtismo. Panahon sab kana sa seryosong pagpamalandong. Ang pagtuman sa pahinungod nagkinahanglag paningkamot. Kanay rason nga gikomparar ni Jesus ang pagka-Kristohanon sa usa ka yugo. Ang mga tinun-an ni Jesus kinahanglang “magkinabuhi dili na alang sa ilang kaugalingon, kondili alang kaniya nga namatay alang kanila ug gibangon.”​—2 Cor. 5:15; Mat. 16:24.

18. Unsang mga pangutana ang atong konsiderahon sa sunod nga artikulo?

¹⁸ Kanay gipamalandong sa mama ni Maria dihang iyang gihunahuna ang mga pangutana nga gihisgotan sa introduksiyon. Kon ginikanan ka, nakapangutana tingali ka: ‘Andam na ba gyong magpabawtismo ang akong anak? Igo na ba ang iyang kahibalo aron mohimog balidong dedikasyon? Komosta ang bahin sa sekular nga edukasyon ug karera? Unsa na lang kon ang akong anak mabawtismohan ug unya makasala?’ Sa sunod nga artikulo, ato kanang konsiderahon ug hisgotan kon sa unsang paagi magpabiling balanse ang panglantaw sa mga ginikanan bahin sa bawtismo.