1. Unsay gustong segurohon sa mga ginikanan ayha mabawtismohan ang ilang mga anak?

“PIPILA ka bulan na nakong giingnan sila Papa ug Mama nga gusto na kong magpabawtismo, ug pirme ko nilang estoryahon bahin ini. Gusto nilang makaseguro nga nahibalo ko sa kaseryoso sa maong desisyon. Niadtong Disyembre 31, 1934, miabot ang importante kaayong adlaw sa akong kinabuhi.” Kanay giingon ni Blossom Brandt dihang midesisyon siyang magpabawtismo. Karon, gusto pong tabangan sa mga ginikanan ang ilang mga anak sa paghimog maalamong desisyon. Ang tinuyong paglangaylangay sa pagpabawtismo may espirituwal nga kapeligrohan. (Sant. 4:17) Pero, gusto pong segurohon sa maalamong mga ginikanan nga ayha mabawtismohan ang ilang mga anak, andam na sila sa mga responsibilidad sa pagka-Kristohanon.

2. (a) Nganong nabalaka ang pipila ka tigdumala sa sirkito? (b) Unsay atong hisgotan niining artikuloha?

² Nabalaka ang pipila ka tigdumala sa sirkito kay may mga anak ug Saksi nga mag-20 anyos na o kapin pa, pero dili pa bawtismado.  Sagad, motambong silag tigom ug mosangyaw. Para nila, mga Saksi ni Jehova sila. Pero, nagduhaduha sila sa pagdedikar sa ilang kinabuhi kang Jehova ug pagpabawtismo. Ngano? Sa pipila ka kahimtang, ingnan sila sa ilang ginikanan nga dili usâ magpabawtismo. Niining artikuloha, atong hisgotan ang upat ka rason kon nganong wala unâ dasiga sa pipila ka ginikanan ang ilang mga anak sa pagpabawtismo.

3. Unsay gikabalak-an sa ginikanan ni Blossom?

³ Ang ginikanan ni Blossom, nga gihisgotan sa unang parapo, nabalaka kon naa na ba sa hustong edad ang ilang anak aron masabtan ang kaimportante ug kaseryoso sa bawtismo. Unsaon pagkahibalo sa mga ginikanan kon naa na ba sa hustong edad ang ilang anak sa paghimog balidong dedikasyon?

4. Sa unsang paagi ang sugo ni Jesus sa Mateo 28:19, 20 makatabang sa mga ginikanan sa pagtudlo sa ilang anak?

⁴ Basaha ang Mateo 28:19, 20. Sama sa gihisgotan sa nag-unang artikulo, ang Bibliya wala maghatag ug espesipikong edad nga angay nang magpabawtismo ang usa. Pero makatabang sa ginikanan ang pagpamalandong sa kahulogan sa pagkahimong tinun-an. Ang Gregong pulong nga gihubad ug “paghimog mga tinun-an” sa Mateo 28:19 nagpasabot ug pagtudlo uban ang intensiyon nga ang usa mahimong estudyante, o tinun-an. Ang usa ka tinun-an nakahibalo ug nakasabot sa gitudlo ni Jesus ug determinadong sundon kini. Busa, ang tumong sa tanang Saksing ginikanan mao ang pagtudlo sa ilang mga anak sukad sa pagkamasuso (baby) uban ang intensiyong mahimo silang bawtismadong tinun-an ni Kristo. Siyempre, ang masuso dili pa mokuwalipikar sa bawtismo. Pero ang Bibliya nagpakita nga bisan ang mga bata makasabot ug modawat na sa kamatuoran sa Bibliya.

5, 6. (a) Unsay atong ikaingon sa bawtismo ni Timoteo sumala sa giingon sa Bibliya bahin kaniya? (b) Sa unsang paagi ang maalamong mga ginikanan epektibong makatabang sa ilang anak?

⁵ Si Timoteo nahimong tinun-an ug midawat sa kamatuoran sa bata pa. Si apostol Pablo miingon nga nakakat-on si Timoteo sa kamatuoran sukad sa pagkamasuso. Bisag nagdako si Timoteo sa pamilyang managlahi ug relihiyon, gitabangan siya sa iyang Hudiyang mama ug lola nga makat-onan ang Kasulatan, sumala sa pagsabot sa mga Hudiyo. Tungod niana, lig-on kaayo ang iyang pagtuo. (2 Tim. 1:5; 3:14, 15) Dihang mga 20 anyos na si Timoteo, kuwalipikado na siyang hatagan ug espesyal nga mga pribilehiyo sa kongregasyon.​—Buh. 16:1-3.

⁶ Siyempre, managlahi ang matag bata; dili tanan mohamtong sa samang gipaspason o sa samang edad. Ang pipila hamtong nag hunahuna ug pagbati bisag bata pa ug gusto nang magpabawtismo. Ang uban dili pa andam magpabawtismo hangtod nga dakodako na silag edad. Busa, dili presyuron sa maalamong mga ginikanan ang ilang mga anak sa pagpabawtismo. Hinuon, tabangan nila ang ilang anak nga mohamtong sa espirituwal depende sa pag-uswag niini. Malipay ang mga ginikanan dihang ipadapat sa anak ang giingon sa Proverbio 27:11. (Basaha.) Pero, kinahanglang dili nila kalimtan ang ilang tumong​—ang pagtabang sa ilang anak nga mahimong tinun-an. Samtang hinumdoman kana, ang mga ginikanan mahimong mangutana, ‘Naa na bay igong kahibalo ang akong anak aron magpahinungod sa Diyos ug magpabawtismo?’

7. Gikinahanglan ba ang daghan kaayong kahibalo sa Bibliya aron mabawtismohan? Isaysay.

⁷ Kay ang mga ginikanan maoy nagtudlo diha sa pamilya, gusto nila nga ang mga anak may lig-ong pundasyon sa kahibalo nga maoy basehanan sa dedikasyon. Pero, dili kinahanglang daghan kaayog nahibaloan ang usa aron makapahinungod sa Diyos ug magpabawtismo. Human sa bawtismo, ang tanang tinun-an kinahanglang padayon nga mouswag sa tukmang kahibalo. (Basaha ang Colosas 1:9, 10.) Busa, unsa ka daghang kahibalo ang gikinahanglan aron mabawtismohan?

8, 9. Unsay atong makat-onan sa asoy bahin kang Pablo ug sa magbalantay sa prisohan?

⁸ Ang mga ginikanan makakuhag ideya gikan sa eksperyensiya sa usa ka pamilya sa unang siglo. (Buh. 16:25-33) Sa ikaduhang misyonaryong panaw ni Pablo, siya mibisita sa Filipos niadtong mga 50 C.E. Didto, siya ug ang iyang kaubang si Silas sayop nga giakusahan, gidakop, ug gipriso. Pagkagabii, milinog ug natay-og ang pundasyon sa prisohan ug naabli ang tanang pultahan. Ang magbalantay sa prisohan maghikog na unta kay abi niyag nakaikyas ang mga piniriso, pero gitawag siya ni Pablo. Si Pablo ug Silas nakasangyaw sa magbalantay sa prisohan ug sa iyang pamilya. Unsay ilang gihimo dihang nakakat-on sila bahin kang Jesus? Nagpabawtismo dayon sila. Unsay atong makat-onan niini?

⁹ Sumala sa kostumbre, ang magbalantay sa prisohan lagmit usa ka retiradong sundalo. Dili siya pamilyar sa Kasulatan. Busa, aron makabaton ug lig-ong pundasyon sa Kasulatan, kinahanglang mahibalo siya sa simpleng kamatuoran sa Bibliya, masabtan ang kahulogan sa pagkahimong alagad sa Diyos, ug maningkamot sa pagsunod sa gitudlo ni Jesus. Sa mubo lang nga panahon, ang iyang kahibalo sa simpleng kamatuoran sa Kasulatan ug ang iyang apresasyon niini nagpalihok niya sa pagpabawtismo. Seguradong padayon siyang nagkat-on human sa iyang bawtismo. Base sa maong asoy, unsay imong himoon kon ang imong anak kinasingkasing nang nakaapresyar sa simpleng kamatuoran sa Bibliya, apil ang kahulogan ug kaimportante sa dedikasyon ug bawtismo? Puwede nimong ingnon ang imong anak nga makig-estorya sa mga ansiyano kon kuwalipikado na ba siyang magpabawtismo. * Sama sa ubang bawtismadong tinun-an, padayong mouswag ang iyang kahibalo sa katuyoan ni Jehova sa tibuok niyang kinabuhi, bisan hangtod sa kahangtoran.​—Roma 11:33, 34.

10, 11. (a) Unsay gihunahuna sa pipila ka ginikanan? (b) Unsay angayng unahon sa ginikanan?

¹⁰ Ang pipila ka ginikanan naghunahuna nga mas maayong dili usâ magpabawtismo ang ilang anak aron makakuha unag taas nga edukasyon ug maayong trabaho. Maayo tingali ang ilang intensiyon, pero makatabang ba nâ aron tinuod nga magmalamposon ang ilang anak? Labaw sa tanan, uyon ba nâ sa Kasulatan? Unsay gidasig sa Pulong ni Jehova?​—Basaha ang Ecclesiastes 12:1.

¹¹ Angayng hinumdoman nga kining kalibotana ug ang tanang bahin niini lahi sa gusto ug panghunahuna ni Jehova. (Sant. 4:7, 8; 1 Juan 2:15-17; 5:19) Ang suod nga  relasyon sa bata kang Jehova mao ang kinamaayohang depensa niya batok kang Satanas, sa iyang kalibotan, ug sa dili diyosnong panghunahuna niini. Kon unahon sa ginikanan ang mga tinguha sa kalibotan, posibleng maglibog ang bata ug dili nâ makaayo niya. Gusto ba sa mahigugmaong ginikanan nga maimpluwensiyahan sa kalibotan ang panglantaw sa iyang anak bahin sa kalamposan? Ang tinuod, magmalipayon ug magmalamposon lang ta kon atong unahon si Jehova.​—Basaha ang Salmo 1:2, 3.

12. Nganong wala usâ dasiga sa pipila ka ginikanan ang ilang anak nga magpabawtismo?

¹² Usa ka inahan ang misaysay kon nganong wala niya dasiga ang iyang anak nga magpabawtismo: “Ulaw man isulti, pero ang pangunang rason mao ang kahikayan sa pag-disfellow.” Sama niya, ang pipila ka ginikanan miingon nga mas maayong unya na magpabawtismo ang ilang anak kon mohamtong na ni ug dili na makahimog binuang. (Gen. 8:21; Prov. 22:15) Moingon tingali sila, ‘Kon dili bawtismado akong anak, dili siya ma-disfellow.’ Nganong sayop nâ nga pangatarongan?​—Sant. 1:22.

13. Wala bay tulubagon ang usa nga dili bawtismado? Ipatin-aw.

¹³ Siyempre, dili gusto sa mga ginikanan nga mabawtismohan ang ilang anak kon dili pa ni hamtong sa paghimog balidong dedikasyon. Pero, sayop ang paghunahuna nga ang dili bawtismadong anak dili manubag kang Jehova. Ngano? Kay may tulubagon ta kang Jehova bawtismado man o dili. Ang bata may tulubagon sa Diyos dihang mahibaloan niya kon unsay husto ug sayop sa panan-aw ni Jehova. (Basaha ang Santiago 4:17.) Busa, imbes ingnon ang anak nga dili usâ magpabawtismo, ang maalamong ginikanan maningkamot sa pagpakitag maayong panig-ingnan. Gusto nilang tudloan ang ilang anak sukad sa pagkamasuso nga apresyahon ang taas nga sukdanan ni Jehova sa moralidad. (Luc. 6:40) Ang maong apresasyon mao ang kinamaayohang proteksiyon, kay ang imong anak mapalihok sa pagsubay sa matarong nga dalan ni Jehova.​—Isa. 35:8.

14. Unsaon pagsuportar sa mga ansiyano ang ginikanan nga nagtabang sa ilang anak nga mabawtismohan?

¹⁴ Ingong espirituwal nga magbalantay, ang mga ansiyano makasuportar sa ginikanan pinaagi sa pagsultig positibo bahin sa espirituwal nga mga tumong. Usa ka sister nga nagpayunir sa kapig 70 ka tuig nahinumdom sa epekto sa iyang pagpakig-estorya kang Brader Charles T. Russell niadtong sayis anyos pa siya. Siya miingon, “Migahin siyag 15 minutos sa pagpakig-estorya nako bahin sa akong espirituwal nga mga tumong.” Oo, ang positibong mga pulong ug pagdasig may dumalayong epekto. (Prov. 25:11) Puwede pong iapil sa mga ansiyano ang mga ginikanan ug anak sa mga proyekto sa Kingdom Hall, ug hatagan ang mga bata ug buluhaton nga haom sa ilang edad ug abilidad.

15. Unsa ang pipila ka paagi nga madasig sa ubang membro sa kongregasyon ang mga bata?

¹⁵ Ang mga membro sa kongregasyon makatabang sab pinaagi sa pagpakitag haom nga personal nga interes sa mga bata. Apil niana ang pagkaalerto dihang makita ang ilang espirituwal nga pag-uswag. Mihatag ba ang bata ug kinasingkasing, giandam nga komento o may bahin ba siya sa midweek? Nakasukol ba ang bata sa usa ka tentasyon o naningkamot nga makasangyaw sa eskuylahan? Dayega dayon ang bata! Pangitag kahigayonan​—unâ ug  human sa tigom—​sa pagpakig-estorya ug pagpakitag tinuod nga interes sa mga bata. Kon buhaton nato kana, bation nila nga apil sila sa “dako nga kongregasyon.”​—Sal. 35:18.

16, 17. (a) Sa unsang paagi ang bawtismo makaapektar sa kaugmaon sa usa? (b) Unsang kalipay ang gipaningkamotang masinati sa tanang Saksi nga ginikanan? (Tan-awa ang hulagway sa sinugdan sa artikulo.)

¹⁶ Ang pagpadako sa anak diha sa “disiplina ug sa pagdumala-sa-kaisipan [o, giya] ni Jehova” mao ang usa sa kinadak-ang pribilehiyo sa ginikanan. (Efe. 6:4; Sal. 127:3) Lahi sa mga anak sa karaang nasod sa Israel, ang mga anak sa Saksi karon dili awtomatikong bahin sa katawhan nga napahinungod kang Jehova. Dugang pa, dili mapanunod ang gugma sa Diyos ug sa kamatuoran. Sukad sa pagkatawo sa ilang anak, kinahanglang may intensiyon ang mga ginikanan nga himoong tinun-an ang ilang anak, nga tabangan kining mahimong dedikado, bawtismadong alagad ni Jehova. May mas importante pa ba niana? Ang dedikasyon, bawtismo, ug matinumanong pag-alagad sa Diyos mao ang makatabang sa usa nga mamarkahan sa kaluwasan panahon sa dakong kasakitan.​—Mat. 24:13.

¹⁷ Dihang si Blossom Brandt nakadesisyon nga magpabawtismo, gustong segurohon sa iyang mahinadlokon sa Diyos nga ginikanan nga andam na siyang mohimo sa labing importanteng desisyon sa iyang kinabuhi. Dihang segurado silang andam na siya, gisuportahan nila ang iyang desisyon. Sa gabii unâ ang iyang bawtismo, may nindot nga gihimo ang iyang papa. Si Blossom miingon: “Gipaluhod mi ni Papa, ug dayon nag-ampo siya. Giingnan niya si Jehova nga lipay kaayo siya sa desisyon sa iyang gamayng bata nga magpahinungod Kaniya.” Kapig 60 ka tuig sa ulahi, si Blossom miingon: “Segurado ko nga bisag pila pa ka tuig ang molabay, dili gyod nako malimtan tong gabhiona!” Mga ginikanan, hinaot masinati ninyo ang kalipay ug katagbawan dihang makita ninyo ang inyong mga anak nga mahimong dedikado, bawtismadong alagad ni Jehova.