NAGDAKO ko sa Graz, Austria. Sa nag-edad kog siyete, gipaenrol ko sa eskuylahan nga nagtudlo bahin sa relihiyon. Pero nakita nako ang makapakurat nga imoral nga mga buhat sa mga pari ug madre. Busa, wala ray tuig, gipapauli ko ni Mama.

Sa ulahi, nagpaenrol ko sa eskuylahan nga may dormitoryo. Usa ka gabii niana, miadto si Papa aron kuhaon ko kay grabeng gibombahan ang Graz. Midangop mi sa lungsod sa Schladming. Igo lang ming nakatabok sa usa ka tulay, kini gibombahan. Sa laing higayon, samtang diha mi ni Lola sa nataran, girakrakan mi sa mga eroplanong ubos ang lupad. Human sa gubat, gibati namong gipakyas mi sa simbahan ug sa gobyerno.

Niadtong 1950, nasangyawan si Mama sa usa ka Saksi ni Jehova. Maminaw ko sa ilang estoryahanay ug mouban pa gani ko kang Mama sa mga tigom. Kay nakombinsir nga naa sa mga Saksi ni Jehova ang kamatuoran, nagpabawtismo siya niadtong 1952.

Niadtong panahona, gibati nako nga ang lokal nga kongregasyon samag asosasyon sa tigulang nga mga babaye. Pero sa ulahi, mibisita mig kongregasyon nga daghag batan-on​—dili diay asosasyon sa tigulang nga mga babaye! Pagbalik sa Graz, tigtambongan na ko sa tanang tigom, ug wala madugay nakombinsir pod ko nga ang akong nakat-onan mao ang kamatuoran. Nailhan sab nako si Jehova ingong Diyos nga dili mopakyas sa iyang mga alagad. Buhaton niya kana bisag gibati natong nag-inusara ta sa pag-atubang sa lisod nga mga kahimtang.​—Sal. 3:5, 6.

Gusto nakong isulti ang kamatuoran sa uban. Ug ang akong mga igsoon ang una nakong gisangyawan. Ang upat nako ka magulang nga babaye nga mga maestra wala na magpuyo sa balay. Pero ako silang gibisita sa  lainlaing baryo ug gidasig nga magtuon ug Bibliya. Sa ulahi, midawat sila ug nahimong mga Saksi ni Jehova.

Sa ikaduha nakong semana sa pagpamalaybalay, nakaila nako ang kapig 30 anyos nga babaye nga akong nasugdan ug pagtuon sa Bibliya. Siya miuswag ug nagpabawtismo, ug sa ulahi, mao pod ang iyang bana ug duha ka anak nga lalaki. Ang maong Bible study dakog epekto sa akong espirituwalidad. Ngano? Aw, wala man goy nagdumala nakog pormal nga pagtuon sa Bibliya. Kinahanglan kong mangandam pag-ayo kada pagtuon. Sa laing pagkasulti, gitudloan unâ nako ang kaugalingon aron makatudlo ko sa akong study. Nakapalalom ni sa akong apresasyon sa kamatuoran. Niadtong Abril 1954, gisimbolohan nako ang akong pagpahinungod kang Jehova pinaagi sa pagpabawtismo.

Niadtong 1955, mitambong kog internasyonal nga mga kombensiyon sa Germany, France, ug England. Samtang didto sa London, nakaila nako si Albert Schroeder. Instruktor siya sa Bible School of Gilead, ug sa ulahi nahimong membro sa Nagamandong Lawas. Dihang nag-tour mi sa British Museum, gitudlo ni Brader Schroeder ang pipila ka manuskrito sa Bibliya. Makita niini ang ngalan sa Diyos sa Hebreohanong mga letra, ug iyang gisaysay ang kaimportante niana. Natandog ko niini sa emosyonal ug espirituwal nga paagi, ug tungod niini mas determinado kong isangyaw ang kamatuoran sa Pulong sa Diyos.

Nagsugod ko pagregular payunir niadtong Enero 1, 1956. Upat ka bulan sa ulahi, giimbitar ko nga moalagad ingong espesyal payunir sa Austria. Niadtong panahona, wala pay Saksi sa Mistelbach, ang lungsod diin ko giasayn. Pero nakaatubang kog usa ka hagit. Magkalahi mi sa akong partner. Ako mag-19 anyos ug taga-siyudad; siya 25 anyos ug taga-baryo. Gusto nakong dugay momata kada buntag; gusto niyang momatag sayo. Pagkagabii, dugay kong matulog; gusto niyang sayo matulog. Bisan pa niana, pinaagi sa pagpadapat sa tambag sa Bibliya, nagkasinabot ra mi ug nagmalipayon sa among pagpayunir.

Sa pagkatinuod, nakasinati mig ubang lisod nga mga problema. Gilutos pa gani mi, pero “wala [mi] biyai.” (2 Cor. 4:7-9) Kas-a, samtang nagsangyaw mi sa usa ka baryo, gibuhian sa mga tawo ang ilang mga iro. Wala madugay, kami sa akong partner gilibotag dagkong iro nga nagsigeg paghot ug morag kapaakon na. Nagkuptanay mi, ug gani miampo ko, “Jehova, palihog, kon paakon mi nila, unta mamatay dayon mi!” Dihang duol na kaayo ang mga iro, sila mihunong, nagpakitiwkitiw sa ikog, ug dayon nanglakaw. Gibati namong giprotektahan mi ni Jehova. Human niana, nagsangyaw mi sa tibuok baryo, ug lipay kaayo mi kay ang mga tawo madinawaton na kaayo. Tingali, natingala sila nga wala mi paaka sa mga iro o kon nganong nakalahutay mi bisan pa nianang makahahadlok nga eksperyensiya. Ang pipila nila nahimong Saksi.

Naa na pod mi laing hadlok nga eksperyensiya. Usa ka adlaw niana, nahubog ang  tag-iya sa among gipuy-an. Gihulga mi niyang patyon ug miingon nga nagsamoksamok kuno mi sa silingan. Misulay ang iyang asawa sa pagpakalma niya pero wala siya maminaw. Nadunggan namo tong tanan gikan sa among kuwarto sa taas. Amo dayong gitrangkahan ang pultahan ug gialihag mga lingkoranan, dayon nagsugod mig empake. Pag-abli namo sa pultahan, ang tag-iya sa balay nakasaka na sa hagdan ug naggunit ug dakong kutsilyo. Busa, miagi mi sa likod nga pultahan ug mikanaog paingon sa garden​—nga taas ang agianan. Dala namo ang tanan namong gamit, nga dili na gyod mamalik.

Mi-check in mi sa usa ka hotel. Nakapuyo mi didtog usa ka tuig, nga nakatabang pag-ayo sa among ministeryo. Sa unsang paagi? Ang hotel diha sa sentro sa lungsod, ug kadaghanan sa among Bible study gustong adto magtuon. Wala madugay, nagpahigayon mig pagtuon sa libro ug senemanang Pagtuon sa Bantayanang Torre sulod sa among kuwarto, nga mga 15 ang manambong.

Mipuyo mi sa Mistelbach kapig usa ka tuig. Dayon giasayn ko sa Feldbach, nga habagatan sidlakan sa Graz. May bag-o kong partner, pero wala gihapon mi kongregasyon. Nagpuyo mi sa gamayng kuwarto sa ikaduhang andana sa usa ka balay nga gama sa troso. Maglusotlusot ang hangin sa mga gawang, maong amo ning gitabonag papel. Magkabô pod mig tubig sa atabay. Pero wala to makawang. Sulod sa pipila lang ka bulan, naporma ang usa ka grupo. Ngadtongadto, mga 30 ka membro sa usa ka pamilya nga among giestadihan ang na-Saksi!

Tungod sa maong mga eksperyensiya, mas napamatud-an nako nga dili gyod pakyason ni Jehova ang nag-una sa Gingharian. Bisag walay tawong makatabang nato, dili ta pasagdan ni Jehova.​—Sal. 121:1-3.

Niadtong 1958, may ipahigayong internasyonal nga kombensiyon sa New York City, sa Yankee Stadium ug Polo Grounds. Miaplay ko nga motambong, ug nangutana ang sangang buhatan sa Austria kon interesado ba kong moeskuyla sa ika-32 nga klase sa Gilead. Kinsa goy makabalibad ana nga pribilehiyo? Maong misugot dayon ko!

Sa klase sa Gilead, tapad mig lingkoranan ni Martin Poetzinger. Lisod kaayo ang iyang  naagian sa mga kampo konsentrasyon sa Nazi. Sa ulahi, nahimo pod siyang membro sa Nagamandong Lawas. Panahon sa klase, si Martin usahay mohunghong, “Erika, unsay ipasabot ana sa German?”

Dihang tungatunga na mi sa among pag-eskuyla, gipahibalo ni Nathan Knorr ang among asaynment. Giasayn ko sa Paraguay. Kay bata pa, gikinahanglan nako ang permiso ni Papa aron makasulod nianang nasora. Dihang nakuha na nako kini, miabot ko sa Paraguay niadtong Marso 1959. Naasayn ko ingong misyonaryo sa Asunción, uban ang bag-ong partner.

Wala madugay, nakaila nako si Walter Bright, misyonaryo nga migraduwar sa ika-30 nga klase. Paglabay sa panahon, nagminyo mi ug nagkauban na sa pag-atubag mga problema. Kon makaatubang mig problema, among basahon ang saad ni Jehova sa Isaias 41:10: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo.” Kini nagpasalig namo nga basta magmatinumanon lang mi sa Diyos ug unahon ang iyang Gingharian, dili gyod mi niya pakyason.

Sa ulahi, naasayn mi sa lugar nga duol sa utlanan sa Brazil. Didto, gisugo sa mga lider sa relihiyon ang mga batan-on nga batoon ang among gubaon na nga puy-anan. Dayon, nasugdag study ni Walter ang hepe sa kapolisan. Giseguro niya nga naay magbantay nga mga polis duol sa among balay sulod sa usa ka semana, ug wala na mi samoksamoka sa mga magsusupak. Wala madugay human niana, gipabalhin mi sa mas komportableng puy-anan tabok sa utlanan sa Brazil. Nakatabang ni kay makadumala mig tigom sa Paraguay ug sa Brazil. Sa wala pa mi mobiya sa maong asaynment, diha nay duha ka gagmayng kongregasyon.

Gisultian ko sa akong mga doktor nga dili ko makaanak, pero niadtong 1962 nasorpresa mi sa pagkahibalo nga mabdos ko! Sa ulahi, mipuyo mi sa Hollywood, Florida, duol sa pamilya ni Walter. Daghang katuigan nga dili mi makapayunir ni Walter. Kinahanglan namong atimanon ang among pamilya. Bisan pa niana, padayon namong giuna ang buluhaton sa Gingharian.​—Mat. 6:33.

Pag-abot namo sa Florida niadtong Nobyembre 1962, natingala mi kay lahig tigomanan ang itom nga mga igsoon sa mga puti, ug lahi pod silag teritoryo. Pero, si Jehova walay gidapigang rasa, ug wala madugay, lainlain nag rasa ang mga membro sa kongregasyon. Klaro nga gipaluyohan kini ni Jehova kay karon daghan nag kongregasyon didto.

Makapaguol nga si Walter namatay niadtong 2015 tungod sa kanser sa utok. Usa siya ka maayong bana sulod sa 55 ka tuig, nga nahigugma kang Jehova ug nakatabag daghang igsoon. Naghinamhinam ko nga makita siya pag-usab nga himsog na dihang banhawon siya.​—Buh. 24:15.

Mapasalamaton gyod ko sa akong kapig 40 ka tuig nga bug-os panahong pag-alagad, nga nakaeksperyensiyag mga kalipay ug panalangin. Pananglitan, nakita namo ni Walter nga gibawtismohan ang 136 sa among mga Bible study. Siyempre, may mga kalisdanan gihapon. Pero wala gyod namo ni tugoti nga makapugong namo sa pag-alagad sa among maunongong Diyos. Hinuon, mas nasuod mi niya, nga masaligong sulbaron niya ang mga problema sa iyang panahon ug sa iyang paagi. Ug gibuhat gyod niya kana!​—2 Tim. 4:16, 17.

Gimingaw kaayo ko ni Walter, pero ang pagpayunir nakatabang nako. Nakita nako nga nakabenepisyo ko sa pagtudlo sa uban, ilabina ang bahin sa pagkabanhaw. Oo, daghan kaayong higayon nga wala gyod ko pakyasa ni Jehova. Sumala sa iyang saad, siya nagtabang, nagpalig-on, ug naghawid kanako uban ang iyang “tuong kamot sa pagkamatarong.”​—Isa. 41:10.