SA HINAPOS nga bahin sa unang siglo, si Gayo ug ang ubang Kristohanon nag-atubag mga problema. Ang mga indibiduwal nga nagpakaylap ug bakak nga mga pagtulon-an misulay sa pagpaluya ug pagbahinbahin sa mga kongregasyon. (1 Juan 2:18, 19; 2 Juan 7) Ang usa ka tawong ginganlag Diotrefes nagpakaylap ug “daotang mga pulong” bahin kang apostol Juan ug sa uban, wala mag-abiabi sa nagapanawng mga Kristohanon, ug nagdani sa uban sa pagsundog kaniya. (3 Juan 9, 10) Kana ang situwasyon dihang gisulatan ni Juan si Gayo. Ang sulat sa apostol, nga gisulat niadtong 98 C.E., makita sa Kristohanon Gregong Kasulatan ingong “Ang Ikatulong Sulat ni Juan.”

Bisan pa sa iyang mga problema, si Gayo nagpadayon sa pag-alagad kang Jehova nga matinumanon. Giunsa niya pagpakita ang iyang pagkamatinumanon? Nganong gusto natong sundogon si Gayo? Sa unsang paagi ang sulat ni Juan makatabang nato sa pagbuhat niana?

Ang magsusulat sa Ikatulong Juan nagtawag sa iyang kaugalingon nga “ansiyano [o, tigulang].” Igo na kana nga mailhan si apostol Juan sa iyang minahal nga espirituwal nga anak, si Gayo. Si Juan mabinationg nagtawag kang Gayo nga “hinigugma, kinsa sa pagkatinuod akong gihigugma.” Dayon, nanghinaot si Juan nga si Gayo himsog sa pisikal sama sa kahimsog niini sa espirituwal. Pagkamabination ni Juan ug pagkanindot sa iyang komendasyon!—3 Juan 1, 2, 4.

Lagmit tigdumala sa kongregasyon si Gayo, pero walay giingon ang sulat bahin niana. Gidayeg ni Juan si Gayo kay gipaestar niini sa iyang balay ang mga igsoon bisag wala siya makaila kanila. Para kang Juan, pamatuod kini sa pagkamatinumanon ni Gayo, kay ang pag-abiabi usa gayod ka ilhanan sa mga alagad sa Diyos.—Gen. 18:1-8; 1 Tim. 3:2; 3 Juan 5.

Ang apresasyon ni Juan sa pagkamaabiabihon ni Gayo nagpakita nga may mga Kristohanong tigbiyahean tali sa nahimutangan ni apostol Juan ug sa mga kongregasyon, ug dayag nga gibalitaan si Juan niining mga igsoona sa ilang mga naeksperyensiyahan. Tingali niining paagiha nga nakabalita si Juan bahin nianang mga kongregasyona.

Ang nagapanawng mga Kristohanon gusto gyong moestar sa balay sa ilang mga igsoon sa pagtuo. Ang mga paabangan dili maayog dungog, dili maayog serbisyo, ug dapit sa imoral nga mga buhat. Busa kon posible, ang maalamong mga tigbiyahean moestar sa balay sa  ilang mga higala; ang tigbiyahean nga mga Kristohanon sa balay sa mga igsoon.

Si Juan nagdasig na pod kang Gayo sa pagpakitag pagkamaabiabihon kay ang apostol nag-awhag kaniya, “pagikana [ang mga mensahero] nga may kahimuot sa paagi nga takos sa Diyos.” Niini nga situwasyon, ang pagpagikan sa mga bisita nagpasabot nga pabalonan sila sa tanan nilang gikinahanglan hangtod makaabot sila sa ilang destinasyon. Klaro nga ginahimo na kini ni Gayo sa miaging mga bisita, kay gibalitaan nila si Juan sa gugma ug pagtuo ni Gayo.—3 Juan 3, 6.

Ang mga bisita tingali mga misyonaryo, mensahero ni Juan, o nagapanawng mga tigdumala. Bisan unsa pa man, sila mibiyahe tungod sa maayong balita. Si Juan miingon: “Tungod sa iyang ngalan nga sila nanglakaw.” (3 Juan 7) Bag-o lang gihisgotan ni Juan ang Diyos (tan-awa ang bersikulo 6), busa ang ekspresyong “sa iyang ngalan” nagtumong sa ngalan ni Jehova. Busa, ang mga igsoon maoy bahin sa Kristohanong kongregasyon ug angayng abiabihon sa mahigugmaong paagi. Sama kini sa gisulat ni Juan: “Atong obligasyon nga abiabihon ang maong mga tawo, aron kita mahimong mga isigkamagbubuhat diha sa kamatuoran.”—3 Juan 8.

Gisulatan ni Juan si Gayo dili lang aron pasalamatan siya. Gusto sab ni Juan nga tabangan siya sa pag-atubang sa usa ka seryosong problema. Tungod sa usa ka rason, may membro sa Kristohanong kongregasyon nga ginganlag Diotrefes ang dili gustong moabiabi sa nagabiyaheng mga Kristohanon. Babagan pa gani niya ang uban sa pag-abiabi sa mga igsoon.—3 Juan 9, 10.

Seguradong dili gustong moestar ang matinumanong mga Kristohanon sa balay ni Diotrefes bisan pag posible kini. Gusto niya ang unang dapit sa kongregasyon, wala niya tahora ang mga mensahero ni Juan, ug nagpakaylap siyag daotang mga pulong bahin sa apostol ug sa uban. Bisag wala siya tawga ni Juan nga bakakong magtutudlo, gisupak ni Diotrefes ang awtoridad sa apostol. Tungod sa tinguha ni Diotrefes nga mahimong prominente ug tungod sa iyang dili Kristohanong mga hiyas, nahimong kuwestiyonable ang iyang pagkamaunongon. Ang kahimtang ni Diotrefes nagpakita nga posibleng makapabahinbahin sa kongregasyon ang ambisyoso ug aroganteng mga indibiduwal. Busa, giingnan ni Juan si Gayo, ug kitang tanan usab: “Mahimong tigsundog, dili sa daotan.”—3 Juan 11.

Dili sama kang Diotrefes, ang usa ka Kristohanon nga si Demetrio gihisgotan ni Juan ingong maayong ehemplo. “Si Demetrio gipamatud-an nilang tanan . . . Ngani, kami, usab, nagpamatuod,” si Juan misulat, “ug ikaw nahibalo nga ang among pagpamatuod maoy tinuod.” (3 Juan 12) Lagmit gikinahanglan ni Demetrio ang tabang ni Gayo, ug ang Ikatulong Juan puwedeng magsilbing sulat sa pagpailaila ug rekomendasyon. Basig si Demetrio mismo ang nagdala sa sulat ngadto kang Gayo. Ingong usa sa mga mensahero ni Juan, o tingali nagapanawng tigdumala, lagmit gipamatud-an ni Demetrio ang gisulat ni Juan.

Nganong gidasig ni Juan si Gayo sa pagpadayon sa pag-abiabi kon ginahimo na niya kini? Nakita ba ni Juan nga kinahanglang palig-onon pa si Gayo? Nabalaka ba si Juan nga basig magpanuko si Gayo sa pag-abiabi kay gisulayan ni Diotrefes pagpapahawa sa kongregasyon ang maabiabihong mga Kristohanon? Bisan unsa pa man, gipasaligan ni Juan si Gayo: “Siya nga nagabuhat sa maayo nagagikan sa Diyos.” (3 Juan 11) Kana ang kinamaayohang rason sa pagbuhat ug maayo ug sa padayong pagbuhat niana.

Ang sulat ba ni Juan nakapalihok kang Gayo sa pagpadayon sa pag-abiabi? Posible gayod kay ang Ikatulong Juan gipreserbar diha sa  Bibliya ug gipasa sa ubang kongregasyon aron dasigon ang uban nga “mahimong tigsundog . . . sa maayo.”

Wala nay laing impormasyon bahin sa atong minahal nga igsoon sa kakaraanan, si Gayo. Bisan pa niana, kining daklit nga paghisgot sa iyang kinabuhi magtudlo natog daghang leksiyon.

Una, sa usa ka sukod, kadaghanan kanato nahibalo sa kamatuoran gikan sa matinumanong mga igsoon nga andam mobiyaheg layo aron ipaabot kana kanato. Siyempre, dili tanang membro sa Kristohanong kongregasyon karon ang nagabiyaheg layo tungod sa maayong balita. Bisan pa niana, sama kang Gayo, kita makasuportar ug makadasig niadtong nagabiyahe, sama sa tigdumala sa sirkito ug sa iyang asawa. O makahatag tingali tag praktikal nga tabang sa mga igsoon nga namalhin sa ubang lugar sa atong nasod, o sa laing nasod pa gani, aron moalagad diin mas dakog panginahanglan sa magmamantala sa Gingharian. Busa ‘sundon [nato] ang dalan sa pagkamaabiabihon.’—Roma 12:13; 1 Tim. 5:9, 10.

Ikaduha, dili ta angayng matingala kon usahay dunay mokuwestiyon sa awtoridad diha sa kongregasyon. Gikuwestiyon ang awtoridad ni Juan; ingon man ang kang apostol Pablo. (2 Cor. 10:7-12; 12:11-13) Busa, unsa may angay natong reaksiyon kon mahitabo kanato ang susamang problema? Si Pablo nagtambag kang Timoteo: “Ang ulipon sa Ginoo dili kinahanglang makig-away, kondili kinahanglang magmalumo sa tanan, may katakos sa pagpanudlo, nagapadayon sa pagpugong sa kaugalingon bisan ilalom sa daotan, malumong nagatudlo niadtong nagasupak.” Kon magpabilin tang lumo bisan pag gihagit, ang pipila ka hinawayon lagmit anam-anam nga magbag-o. Sa baylo, “basin ug itugot [ni Jehova] nga sila maghinulsol nga motultol ngadto sa tukmang kahibalo sa kamatuoran.”—2 Tim. 2:24, 25.

Ikatulo, ang mga isigka-Kristohanon nga maunongong nag-alagad kang Jehova bisan pa sa mga pagsupak kinahanglang komendahan tungod sa ilang pagkamatinumanon. Seguradong nadasig ni apostol Juan si Gayo ug gipasaligan siya nga maayo ang iyang ginabuhat. Sa susama, kinahanglang sundogon sa mga ansiyano karon si Juan pinaagi sa pagdasig sa mga igsoon aron sila “dili maluya.”—Isa. 40:31; 1 Tes. 5:11.

Gamit ang 219 lang ka pulong diha sa Gregong sinulat, ang sulat ni apostol Juan kang Gayo mao ang kinamub-ang basahon sa Bibliya. Pero mapuslanon kaayo ni sa mga Kristohanon karon.