1-3. (a) Sumala sa Salmo 5:4-6, unsay pagbati ni Jehova sa pagkadaotan? (b) Nganong makaingon ta nga ang pag-abuso ug bata supak sa “balaod sa Kristo”?

SI Jehova nga Diyos nagdumot sa tanang klase sa pagkadaotan. (Basaha ang Salmo 5:4-6.) Gidumtan gyod niya ang seksuwal nga pag-abuso ug bata, nga daotan kaayong buhat! Ingong pagsundog kang Jehova, kita nga iyang mga Saksi nagdumot sa pag-abuso ug bata ug wala magtugot niana sulod sa kongregasyon.​—Roma 12:9; Heb. 12:15, 16.

² Ang bisan unsang klase sa pag-abuso ug bata supak gayod sa “balaod sa Kristo”! (Gal. 6:2) Nganong makaingon ta niana? Sa ato nang nakat-onan sa miaging artikulo, ang balaod sa Kristo​—nga mao ang tanang gitudlo ni Jesus sa pulong ug buhat—​gibase sa gugma ug nagpasiugda sa hustisya. Kay gigiyahan niana nga balaod, ang tinuod nga mga Kristohanon nagtratar sa mga bata sa paagi nga mobati silang luwas ug gimahal pag-ayo. Pero ang pag-abuso ug bata sayop ug dili mahigugmaon nga buhat nga mopabati sa bata nga dili luwas ug wala mahala.

³ Makapaguol, ang seksuwal nga pag-abuso ug bata komon sa kalibotan karon, ug naapektohan niana ang tinuod nga mga Kristohanon. Ngano? Kay daghan “ang mga tawong daotan ug mga impostor,” ug ang pipila kanila mosulay sa pagpakig-uban sa mga igsoon. (2 Tim. 3:13) Dugang pa, ang pipila nga nag-angkong membro sa kongregasyon nagpadala sa dili natural nga unodnong tinguha ug nag-abuso ug mga bata. Atong hisgotan kon nganong grabeng sala ang pag-abuso ug bata. Dayon  atong konsiderahon kon unsay buhaton sa mga ansiyano dihang dunay makahimog seryosong sala, apil na ang pag-abuso ug bata, ug kon sa unsang paagi mapanalipdan sa mga ginikanan ang ilang mga anak. *

4-5. Nganong ang pag-abuso ug bata sala batok sa biktima?

⁴ Dugay mawala ang epekto sa pag-abuso ug bata. Maapektohan niini ang biktima ug ang mga nagmahal sa biktima​—iyang pamilya ug mga igsoon sa pagtuo. Grabeng sala ang pag-abuso ug bata.

⁵ Sala kini batok sa biktima. * Usa ka sala kon pasakitan ug paantoson ang uban. Sa ato unyang hisgotan sa sunod nga artikulo, kanay gihimo sa tig-abuso​—iyang gipasakitan pag-ayo ang bata. Iyang gitraydor ang bata ug gipabati kining dili luwas. Ang mga bata kinahanglang protektahan batok nianang daotan kaayong buhat, ug ang mga biktima kinahanglang hupayon ug tabangan.​—1 Tes. 5:14.

6-7. Nganong ang pag-abuso ug bata sala batok sa kongregasyon ug sa sekular nga awtoridad?

⁶ Sala kini batok sa kongregasyon. Ang membro sa kongregasyon nga nag-abuso ug bata nagpakaulaw sa kongregasyon. (Mat. 5:16; 1 Ped. 2:12) Makadaot nâ sa reputasyon sa minilyong matinumanong Kristohanon nga ‘nakigbugno pag-ayo alang sa pagtuo.’ (Jud. 3) Dili nato tugotan nga magpabilin sa kongregasyon kadtong dili mahinulsolong naghimog daotang mga butang ug nagdaot sa reputasyon sa kongregasyon.

⁷ Sala kini batok sa sekular nga awtoridad. Ang mga Kristohanon kinahanglang “magpasakop sa labaw nga mga awtoridad.” (Roma 13:1) Ato nang gipakita pinaagi sa pagsunod sa balaod sa gobyerno. Kon dunay membro sa kongregasyon nga nakahimog krimen, sama sa pag-abuso ug bata, nakasala siya sa sekular nga awtoridad. (Itandi ang Buhat 25:8.) Ang mga ansiyano wala awtorisahi sa pagpatuman sa balaod sa gobyerno, pero dili nila protektahan ang nag-abuso ug bata batok sa silot nga ipahamtang sa balaod. (Roma 13:4) Antoson sa nakasala ang resulta sa iyang binuhatan.​—Gal. 6:7.

8. Unsay panglantaw ni Jehova sa sala nga gihimo batok sa laing tawo?

⁸ Labaw sa tanan, sala kini batok sa Diyos. (Sal. 51:4) Dihang ang usa ka tawo makasala batok sa laing tawo, makasala sab siya kang Jehova. Konsideraha ang usa ka pananglitan diha sa Balaod nga gihatag sa Diyos sa Israel. Sumala sa Balaod, ang tawong nangawat o nanglimbong sa uban “wala magmatinumanon kang Jehova.” (Lev. 6:2-4) Busa, klaro nga ang membro sa kongregasyon nga nag-abuso ug bata​—nga nagkawat, o nagkuha, sa kasegurohan niini—​wala magmatinumanon sa Diyos. Ang tig-abuso nagpasipala sa ngalan ni Jehova. Busa, kinahanglan natong isipon ang pag-abuso ug bata ingong dakong sala batok sa Diyos ug angay natong dumtan kini.

9. Sa daghang katuigan, unsang Kasulatanhong impormasyon ang gitagana sa organisasyon, ug ngano?

⁹ Sa daghang katuigan, ang organisasyon ni Jehova nagtagana ug daghang Kasulatanhong impormasyon bahin sa pag-abuso ug bata.  Pananglitan, ang mga artikulo sa Bantayanang Torre ug Pagmata! naghisgot kon sa unsang paagi ang mga giabuso mahupayan sa dugay na nilang gidaladala nga kasakit, kon sa unsang paagi ang uban makatabang ug makadasig nila, ug kon sa unsang paagi ang mga ginikanan makapanalipod sa ilang mga anak. Ang mga ansiyano gihatagan ug detalyadong instruksiyon nga binase sa Bibliya kon unsay buhaton dihang dunay mag-abuso ug bata. Ang organisasyon padayong nagsusi kon giunsa pag-atiman sa mga ansiyano ang kaso sa pag-abuso ug bata. Ngano? Aron maseguro nga nahiuyon kana sa balaod sa Kristo.

10-12. (a) Dihang dunay makahimog seryosong sala, unsay hinumdoman sa mga ansiyano, ug unsay ilang pangunang tumong? (b) Sumala sa Santiago 5:14, 15, unsay paningkamotan sa mga ansiyano?

¹⁰ Dihang dunay makahimog seryosong sala, hinumdoman sa mga ansiyano nga ang balaod sa Kristo nagsugo nila nga trataron ang panon sa mahigugmaong paagi ug buhaton kon unsay husto ug matarong atubangan sa Diyos. Busa, daghan silag angayng konsiderahon kon mahibaloan nila nga dunay nakahimog seryosong sala. Pangunang tumong sa mga ansiyano nga magpabiling balaan ang ngalan sa Diyos. (Lev. 22:31, 32; Mat. 6:9) Importante pod kaayo nila ang espirituwal nga kaayohan sa mga igsoon ug ang pagtabang sa mga biktima sa seryosong sala.

¹¹ Dugang pa, kon ang nakasala membro sa kongregasyon, gusto sa mga ansiyano nga tabangan siya nga mapasig-uli kon posible. (Basaha ang Santiago 5:14, 15.) Masakiton sa espirituwal ang usa ka Kristohanon nga magpadala sa sayop nga tinguha ug makahimog seryosong sala. Nagpasabot ni nga wala na siyay maayong relasyon kang Jehova. * Ang mga ansiyano samag espirituwal nga doktor. Maningkamot sila nga ‘ayohon ang masakiton,’ niining bahina, ang nakasala. Ang ilang binase sa Bibliya nga tambag makatabang niya nga mapasig-uli ang maayong relasyon sa Diyos, pero posible lang ni kon tinuod siyang maghinulsol.​—Buh. 3:19; 2 Cor. 2:5-10.

¹² Klaro, ang mga ansiyano dunay bug-at nga responsibilidad. Gimahal nila pag-ayo ang panon nga gipiyal sa Diyos kanila. (1 Ped. 5:1-3) Gusto nila nga ang mga igsoon mobating luwas diha sa kongregasyon. Tungod niana, molihok dayon sila dihang mahibaloan nila nga dunay nakahimog seryosong sala, apil na ang pag-abuso ug bata. Tagda ang mga pangutana sa sinugdan sa  parapo 13,  15, ug  17.

13-14. Mosunod ba ang mga ansiyano sa mga balaod bahin sa pagsumbong ngadto sa awtoridad kon dunay giakusahan nga nag-abuso ug bata? Ipatin-aw.

 ¹³ Mosunod ba ang mga ansiyano sa mga balaod bahin sa pagsumbong ngadto sa awtoridad kon dunay giakusahan nga nag-abuso ug bata? Oo. Sa mga dapit diin anaa kana nga mga balaod, ang mga ansiyano maningkamot sa pagsunod niana. (Roma 13:1) Ang maong mga balaod dili supak sa balaod sa Diyos. (Buh. 5:28, 29) Busa kon mahibaloan sa mga ansiyano nga dunay giakusahan, mangayo dayon silag direksiyon sa sangang buhatan kon unsay buhaton aron matuman nila ang mga balaod bahin sa pagsumbong niana.

¹⁴ Pasaligan sa mga ansiyano ang mga biktima ug ang mga ginikanan niini ug ang uban nga nahibalo sa maong hitabo nga puwede silang mosumbong sa sekular nga awtoridad.  Pero komosta kon ang giakusahan membro sa kongregasyon ug mahibaloan sa komunidad ang nahitabo? Angay bang bation sa Kristohanong nagsumbong niana nga nakapasipala siya sa ngalan sa Diyos? Dili. Ang tig-abuso maoy nagpasipala sa ngalan sa Diyos.

15-16. (a) Sumala sa 1 Timoteo 5:19, nganong labing menos duha ka testigos ang gikinahanglan una magpormag hudisyal nga komite? (b) Unsay buhaton sa mga ansiyano dihang mahibaloan nila nga may membro sa kongregasyon nga giakusahan ug pag-abuso ug bata?

 ¹⁵ Sa dili pa magporma ang mga ansiyano ug hudisyal nga komite, nganong gikinahanglan ang labing menos duha ka testigos? Tungod kay apil ni sa taas nga sukdanan sa Bibliya sa hustisya. Kon dili moangkon ang giakusahan, gikinahanglan ang duha ka testigos nga mopamatuod sa akusasyon una magporma ang mga ansiyano ug hudisyal nga komite. (Deut. 19:15; Mat. 18:16; basaha ang 1 Timoteo 5:19.) Nagpasabot ba ni nga sa dili pa isumbong ngadto sa awtoridad ang nahitabo, gikinahanglan ang duha ka testigos? Wala. Kini nga kinahanglanon dili mapadapat kon ang mga ansiyano ug ang uban mosumbong ngadto sa awtoridad maylabot sa akusasyon sa usa ka krimen.

¹⁶ Dihang mahibaloan sa mga ansiyano nga may membro sa kongregasyon nga giakusahan ug pag-abuso ug bata, maningkamot sila sa pagtuman sa balaod bahin sa pagsumbong niana ug dayon susihon nila kon unsa gyoy nahitabo. Human niana, base sa giingon sa Bibliya, ilang timbangtimbangon kon kinahanglan ba silang magpormag hudisyal nga komite. Kon moingon ang akusado nga dili tinuod ang akusasyon, paminawon sa mga ansiyano ang mga testigos. Kon labing menos duha ka tawo​—ang nag-akusar ug ang lain pa nga makapamatuod nga ang akusado nag-abuso niining bataa o sa laing bata​—ang makapamatuod sa akusasyon, pormahon ang hudisyal nga komite. * Wala magpasabot nga kon usa ray testigos, dili tinuod ang akusasyon. Bisag walay ikaduhang testigos, ang mga ansiyano nahibalo nga ang akusado lagmit nakahimog seryosong sala nga nakapasakit pag-ayo sa uban. Ang mga ansiyano padayong maghupay ug magpaluyo niadtong nasakitan sa maong hitabo. Dugang pa, ang mga ansiyano magmabinantayon aron mapanalipdan ang kongregasyon sa posibleng kadaot nga ipahinabo sa maong akusado.​—Buh. 20:28.

17-18. Ipatin-aw ang papel sa hudisyal nga komite.

 ¹⁷ Unsay papel sa hudisyal nga komite? Ang terminong “hudisyal” wala magpasabot nga ang mga ansiyano mohukom, o modesisyon, kon ang tig-abuso kinahanglan bang silotan sa mga awtoridad tungod sa paglapas sa balaod. Ang mga ansiyano dili mag-apil-apil sa pagpatuman sa balaod; itugyan nila kana sa mga awtoridad. (Roma 13:2-4; Tito 3:1) Hinunoa, ang mga ansiyano mohukom, o modesisyon, kon ang maong tawo makapabilin pa ba sa kongregasyon.

¹⁸ Ang mga ansiyano nga apil sa hudisyal nga komite mohukom lang maylabot sa espirituwal nga mga butang. Gamiton nila ang Bibliya sa pagdesisyon kon ang tig-abuso mahinulsolon ba o dili. Kon dili siya mahinulsolon, siya ma-disfellowship, ug ipahibalo kini sa kongregasyon. (1 Cor. 5:11-13) Kon mahinulsolon siya, puwede siyang magpabilin sa kongregasyon. Pero, pahibaloon siya sa mga ansiyano nga posibleng dili na gyod siya hatagag pribilehiyo o responsibilidad sa kongregasyon. Aron mapanalipdan ang mga bata,  mahimong pasidan-an sa mga ansiyano sa pribado ang mga ginikanan nga bantayan nila ang ilang menor de edad nga mga anak kon naa ang maong indibiduwal. Dihang himoon kini, mag-amping ang mga ansiyano nga dili ipahibalo kon kinsay iyang giabuso.

19-22. Unsay mahimo sa mga ginikanan aron mapanalipdan ang ilang mga anak? (Tan-awa ang hulagway sa atubangan sa magasin.)

¹⁹ Kang kinsang responsibilidad ang pagpanalipod sa mga bata? Sa mga ginikanan. * Ang inyong mga anak regalo sa Diyos, “panulondon gikan ni Jehova.” (Sal. 127:3) Inyong responsibilidad nga panalipdan ang maong regalo. Sa unsang paagi ninyo mapanalipdan ang inyong mga anak batok sa pag-abuso?

²⁰ Una, edukaha ang kaugalingon bahin sa pag-abuso. Sayra kon unsang klaseha sa mga tawo ang nag-abuso ug mga bata ug ang mga taktika nga ilang gamiton sa pagpamiktima. Magmaalerto sa posibleng kapeligrohan. (Prov. 22:3; 24:3) Hinumdomi nga sagad suod sa bata ang tawo nga nag-abuso niya.

²¹ Ikaduha, importante nga duna moy maayong komunikasyon sa inyong mga anak. (Deut. 6:6, 7) Apil ana ang pagpaminaw pag-ayo kanila. (Sant. 1:19) Hinumdomi nga sagad ang mga bata mahadlok mosumbong bahin sa pag-abuso. Basin mahadlok sila nga dili sila tuohan, o tingali gihulga sila sa tig-abuso nga dunay dili maayong mahitabo kon mosumbong sila. Kon mamatikdan nimo nga dunay problema, pangutan-a sila sa mabinationg paagi ug mapailobong maminaw kanila.

²² Ikatulo, tudloi ang inyong mga anak. Estoryahi sila bahin sa sekso, pero kanang haom lang sa ilang edad. Tudloi sila kon unsay isulti ug buhaton kon dunay magbinastos nila. Gamita ang impormasyon nga gitagana sa organisasyon kon unsaon pagpanalipod ang inyong mga anak.​—Tan-awa ang kahong “ Tudloi ang Imong Kaugalingon ug ang Imong mga Anak.”

23. Unsay atong panglantaw sa seksuwal nga pag-abuso ug bata, ug unsang pangutana ang tubagon sa sunod nga artikulo?

²³ Ingong mga Saksi ni Jehova, giisip nato ang seksuwal nga pag-abuso ug bata ingong grabeng sala ug daotan kaayo nga buhat. Kay gigiyahan sa balaod sa Kristo, dili panalipdan sa kongregasyon ang mga tig-abuso batok sa resulta sa ilang sala. Sa kasamtangan, unsay atong mahimo sa pagtabang sa mga biktima sa pag-abuso? Tubagon kana sa sunod nga artikulo.