1. Unsay gitudlo kanato sa Pulong sa Diyos?

MALAMPOSON natong maatubang ang bisan unsang kalisdanan kay si Jehova ang atong Dakong Instruktor. (Isa. 30:20, 21) Ang iyang Pulong nagtudlo kanato sa tanan natong gikinahanglan aron kita makabaton ug “igong katakos” ug mahimong “andam gayod sa matag maayong buhat.” (2 Tim. 3:17) Kon magkinabuhi ta sumala sa mga pagtulon-an sa Bibliya, mahimo tang mas maalamon kay sa mga tawo nga nagpasiugda sa “kaalam niining kalibotana.”​—1 Cor. 3:19; Sal. 119:97-100.

2. Unsay atong susihon niining artikuloha?

² Sa ato unyang makat-onan, ang kaalam sa kalibotan sagad makadani sa atong hakog nga mga tinguha. Busa malisdan tingali ta sa pagsukol sa tendensiya nga maghunahuna ug molihok sama niadtong naa sa kalibotan. Tungod niana, ang Bibliya nag-ingon: “Pagbantay nga dili mo malit-agan sa uban pinaagi sa pilosopiya ug sayop nga mga pangatarongan nga gibase sa tradisyon sa mga tawo.” (Col. 2:8) Niining artikuloha, susihon nato kon sa unsang paagi nagsugod ang mga tawo sa pagdawat sa duha ka bakak nga gitudlo ni Satanas. Sa matag bakak, atong makita kon nganong kabuangan ang kaalam sa kalibotan ug kon sa unsang paagi ang kaalam sa Pulong sa Diyos labaw kaayo kay sa bisan unsa nga gitanyag sa kalibotan.

3-4. Sa United States, unsang kausaban sa panglantaw bahin sa moralidad ang nahitabo sa katuigan tali sa 1900 ug 1930?

³ Sa United States, dako kaayo ang kausaban sa panglantaw sa mga tawo bahin sa moralidad sa katuigan tali sa 1900 ug 1930. Una pa niana, daghan ang nagtuo nga ang pagpakigsekso para lang sa mga minyo ug dili angayng hisgotan sa publiko. Pero ang  maong mga sukdanan nahugno, ug luag nag moralidad ang kadaghanan.

⁴ Ang katuigan tali sa 1920 ug 1929 nailhan nga mga tuig sa dakong kalipay ug kauswagan, ug ang binuhatan sa mga tawo ug panglantaw bahin sa sekso nausab pag-ayo. “Ang mga pelikula, pasundayag sa teatro, awit, nobela, ug advertisement nagsugod pagpasiugda ug daghang topiko bahin sa sekso,” miingon ang usa ka researcher. Niana nga dekada, ang sinayawan makapahunahuna sa mga tawo bahin sa sekso ug ang mga sinina nag-anam ka seksi. Sumala sa gitagna sa Bibliya, ang mga tawo sa kataposang mga adlaw mahimong “mahigugmaon sa kalipayan.”​—2 Tim. 3:4.

5. Unsay nahitabo sa panglantaw sa kalibotan bahin sa moralidad sukad sa katuigan sa 1960?

⁵ Sa katuigan sa 1960, nagkadaghan ang mga tawo nga nag-ipon nga walay kasal ug nahimong mas komon ang homoseksuwalidad ug diborsiyo. Ang pagpasiugda sa sekso diha sa daghang klase sa kalingawan mas migrabe. Unsay resulta niining tanan? Usa ka magsusulat nag-ingon nga ang hinungdan sa pagkabungkag sa pamilya, usa ray ginikanan nga pamilya, problema sa emosyon, pagkaadik sa pornograpiya, ug susamang mga problema konektado sa “luag nga moral nga sukdanan sa mga tawo karon.” Ang pagdaghan sa sakit nga mapasa pinaagig pakigsekso, sama sa AIDS, maoy usa lang sa mga pamatuod nga kabuangan ang kaalam sa kalibotan.​—2 Ped. 2:19.

6. Sa unsang paagi ang panglantaw sa kalibotan bahin sa sekso nagsuportar sa katuyoan ni Satanas?

⁶ Ang panglantaw sa kalibotan bahin sa sekso nagsuportar sa katuyoan ni Satanas. Seguradong malipay siyang magtan-aw nga gamiton sa mga tawo ang seksuwal nga relasyon sa paagi nga supak sa katuyoan sa Diyos ug sa ingon, wala nila tahora ang regalo sa Diyos nga kaminyoon. (Efe. 2:2) Gawas nga ang seksuwal nga imoralidad magdaot sa nindot nga regalo ni Jehova sa pagpatunghag mga anak, makapugong sab ni niadtong naghimo niini sa pagbaton ug kinabuhing walay kataposan.​—1 Cor. 6:9, 10.

7-8. Unsang dungganon ug husto nga panglantaw bahin sa sekso ang gipasiugda sa Bibliya?

⁷ Ang mga tawong nagsunod sa kaalam niining kalibotana nagtamay sa moral nga mga sukdanan sa Bibliya, nga nag-ingong kini dili realistiko. Sila tingali mangutana, ‘Nganong hatagan man ta sa Diyos ug seksuwal nga mga tinguha ug unya ingnon ta nga pugngan kini?’ Kining pangutanaha gibase sa sayop nga panghunahuna nga kinahanglang buhaton sa mga tawo bisag unsay ilang gusto. Pero lahi ang giingon sa  Bibliya. Kini nagtudlo nga makahimo ta sa pagkontrolar sa dili maayong mga tinguha. (Col. 3:5) Dugang pa, gitagana ni Jehova ang regalo nga kaminyoon, usa ka kahikayan diin matagbaw ang atong dili sayop nga seksuwal nga mga tinguha sa dungganong paagi. (1 Cor. 7:8, 9) Niini nga kahikayan, ang bana ug asawa makapahimulos sa seksuwal nga relasyon nga walay pagmahay ug kabalaka nga sagad maoy resulta sa imoralidad.

⁸ Lahi sa kaalam niining kalibotana, ang Bibliya nagpasiugda ug hustong panglantaw bahin sa sekso. Gipakita niini nga ang sekso mahimong makapalipay. (Prov. 5:18, 19) Pero ang Bibliya nag-ingon: “Ang matag usa ninyo kinahanglang mahibalo kon unsaon pagkontrolar sa iyang lawas aron magpabilin kining balaan ug dungganon. Ayawg sundoga ang mga tawo sa kanasoran nga wala makaila sa Diyos, kay sila hakog ug walay pagpugong sa ilang gana sa sekso.”​—1 Tes. 4:4, 5.

9. (a) Sa katuigan tali sa 1900 ug 1930, sa unsang paagi gitabangan ang katawhan ni Jehova sa pagsunod sa labaw kaayong kaalam sa Pulong sa Diyos? (b) Unsa ang maalamong tambag sa 1 Juan 2:15, 16? (c) Sumala sa Roma 1:24-27, unsang imoral nga mga buhat ang angay natong likayan?

⁹ Sa katuigan tali sa 1900 ug 1930, ang katawhan ni Jehova wala malimbongi sa panglantaw niadtong “dili na makaila kon unsay maayo ug daotan.” (Efe. 4:19) Naningkamot gyod sila sa pagsunod sa mga sukdanan ni Jehova. Ang Mayo 15, 1926 nga Watch Tower nag-ingon nga “ang lalaki o babaye kinahanglang hinlo sa hunahuna ug buhat, ilabina sa iyang pagpakiglabot sa kaatbang nga sekso.” Bisag unsa pay nagakahitabo sa kalibotan, ang katawhan ni Jehova nagsunod sa labaw kaayo nga kaalam sa Pulong sa Diyos. (Basaha ang 1 Juan 2:15, 16.) Mapasalamaton gyod ta sa Pulong sa Diyos! Mapasalamaton sab ta nga si Jehova nagtaganag espirituwal nga pagkaon sa hustong panahon aron tabangan ta nga dili malimbongan sa kaalam niining kalibotana maylabot sa moralidad. *​—Basaha ang Roma 1:24-27.

10-11. Unsay gipasidaan sa Bibliya nga mahitabo sa kataposang mga adlaw?

¹⁰ Ang Bibliya nagpasidaan nga sa kataposang mga adlaw, ang mga tawo mahimong “mahigugmaon sa kaugalingon.” (2 Tim. 3:1, 2) Dili ikatingala nga ang kalibotan nagpasiugda niining hakog nga panghunahuna. Ang usa ka reperensiya nag-ingon nga sa katuigan sa 1970 midaghan ang basahon nga naghatag ug tambag kon sa unsang paagi magmalamposon. Ang pipila niana “nag-awhag sa mga magbabasa sa pag-ila ug pagdawat sa ilang kaugalingon ug sa pagpasigarbo kon kinsa sila.” Pananglitan, matikdi ang giingon sa usa nianang mga basahona: “Mahala ang labing hitsuraan, makalingaw, dalayegon nga tawo nga nabuhi sukad​—ikaw.” Ang maong basahon nag-ingon nga ang usa maoy modesisyon kon sa unsang paagi siya mogawi, ug buhaton niya kon unsay iyang gihunahuna nga husto ug kombenyente.

¹¹ Nakadungog na ba ka niini nga ideya? Giawhag ni Satanas si Eva sa paghimog susama niana. Siya miingon nga si Eva puwedeng ‘maparehas sa Diyos, nga mahibalo sa maayo ug daotan.’ (Gen. 3:5) Karon, daghan ang taas kaayog panglantaw sa ilang kaugalingon nga para nila walay makasulti nila kon unsay husto ug sayop, bisan ang Diyos. Pananglitan, kana nga panghunahuna ilabinang makita sa panglantaw sa mga tawo bahin sa kaminyoon.

12. Unsang panglantaw bahin sa kaminyoon ang gipasiugda sa kalibotan?

¹² Ang Bibliya nagsugo sa bana ug asawa sa pagpasidungog sa usag usa ug sa pagtuman sa  ilang panumpa sa kaminyoon. Kini nagdasig sa magtiayon nga magmadeterminado nga mounong sa usag usa, nga nag-ingon: “Ang lalaki mobiya sa iyang amahan ug inahan ug siya moipon sa iyang asawa, ug sila mahimong usa ka unod.” (Gen. 2:24) Pero kadtong naimpluwensiyahan sa kaalam sa kalibotan nagpasiugdag lahi nga panglantaw, nga nag-ingon nga ang bana o asawa angayng magpokus sa iyang kaugalingong mga panginahanglan. Ang usa ka basahon bahin sa diborsiyo nag-ingon: “Sa pipila ka seremonyas sa kasal, ang naandang panumpa nga magpabiling minyo ‘samtang kita buhi pa’ gipulihan ug mas limitadong saad nga magpabiling minyo ‘samtang kita nagkahigugmaay pa.’” Kay giisip sa mga tawo nga ang kaminyoon dili permanente, daghang pamilya ang nabungkag ug nasakitan pag-ayo. Klaro gyod nga kabuangan ang panglantaw sa kalibotan bahin sa kaminyoon.

13. Unsa ang usa ka rason nga gidumtan ni Jehova ang mga garboso?

¹³ Ang Bibliya nag-ingon: “Gidumtan ni Jehova ang garbosog kasingkasing.” (Prov. 16:5) Nganong gidumtan ni Jehova ang mga garboso? Ang usa ka rason mao nga kadtong nag-ugmad ug nagpasiugdag sobrang paghigugma sa kaugalingon mahimong mapahitas-on, sama kang Satanas. Hunahunaa lang, si Satanas nagtuo nga si Jesus​—ang usa nga gigamit sa Diyos sa paglalang sa tanang butang—​angayng mohapa ug mosimba niya! (Mat. 4:8, 9; Col. 1:15, 16) Kadtong ingon nianag panglantaw sa kaugalingon nagpamatuod nga ang kaalam sa kalibotan kabuangan para sa Diyos.

14. Sa unsang paagi ang Roma 12:3 motabang nato sa pagbaton ug balanseng panglantaw sa kaugalingon?

¹⁴ Ang Bibliya nagtabang nato sa pagbaton ug balanseng panglantaw sa kaugalingon. Kini nag-ingon nga dili sayop ang pagbaton ug igong gugma sa kaugalingon. Si Jesus miingon: “Higugmaa ang imong isigkatawo sama sa imong kaugalingon,” nga nagpakitang angay tang mohatag ug rasonableng pagtagad sa atong mga panginahanglan. (Mat. 19:19) Pero ang Bibliya nagtudlo nga dili gyod ta angayng maghunahuna  nga mas labaw ta sa uban. Hinuon, kini nag-ingon: “Likayi ang hilig nga makig-away o ang pagpakaimportante sa kaugalingon, apan magpaubos mo ug isipa ang uban nga labaw kay kaninyo.”​—Filip. 2:3; basaha ang Roma 12:3.

15. Nganong makaingon ka nga praktikal ang tambag sa Bibliya bahin sa pagpakaimportante sa kaugalingon?

¹⁵ Karon, daghang tawo nga giisip nga maalamon ang motamay sa tambag sa Bibliya bahin sa pagpakaimportante sa kaugalingon. Sila moingon nga kon isipon nimo ang uban nga mas labaw nimo, dali ra kang mabentahaan. Pero sa pagkatinuod, unsay mga resulta sa hakog nga panghunahuna nga gipasiugda sa kalibotan ni Satanas? Unsay imong namatikdan? Malipayon ba ang hakog nga mga tawo? Malipayon ba ang ilang pamilya? Duna ba silay tinuod nga mga higala? Suod ba sila sa Diyos? Sa imong nakita, hain niini ang kinamaayohag resulta​—ang pagsunod sa kaalam sa kalibotan o sa kaalam sa Pulong sa Diyos?

16-17. Sa unsa kita mapasalamaton, ug ngano?

¹⁶ Ang mga tawo nga nagsunod sa tambag niadtong giisip sa kalibotan nga maalamon nahisamag turista nga nangutanag direksiyon sa laing turista nga nasaag pod. Si Jesus miingon bahin sa mga “maalamon” sa iyang panahon: “Mga buta sila nga tiggiya. Kon ang buta giyahan ug buta, silang duha mangahulog sa gahong.” (Mat. 15:14) Tinuod gyod nga ang kaalam niining kalibotana kabuangan para sa Diyos.

¹⁷ Nakita nato nga ang maalamong tambag sa Bibliya kanunayng “mapuslanon sa pagtudlo, sa pagbadlong, sa pagtul-id, sa pagdisiplina diha sa pagkamatarong.” (2 Tim. 3:16) Mapasalamaton kaayo ta nga si Jehova, pinaagi sa iyang organisasyon, nanalipod kanato batok sa kaalam niining kalibotana! (Efe. 4:14) Ang espirituwal nga pagkaon nga iyang gitagana naghatag natog kusog nga atong gikinahanglan sa pagsunod sa mga sukdanan sa iyang Pulong. Pribilehiyo gyod nato nga magiyahan sa labing kasaligang kaalam nga naa sa Bibliya!