1. Ngano tingaling ang pipila dili ganahang magtuon?

KARON, gikinahanglan ang dakong paningkamot sa pagpanginabuhi. Daghan sa atong mga igsoon ang motrabahog daghang oras aron matagan-an ang panginahanglan sa ilang pamilya. Ang uban mogahin ug ubay-ubayng oras kada adlaw sa pagbiyahe paingon sa trabahoan ug pagpauli. Daghan ang mohimog hago nga trabaho aron masuportahan ang kaugalingon. Human sa tibuok adlawng pagtrabaho, kining kugihan nga mga igsoon kapoy na kaayo nga dili na sila makatuon.

2. Unsay imong eskedyul sa pagtuon?

² Pero ang tinuod, kinahanglan tang mangitag panahon sa seryosong pagtuon sa Pulong sa Diyos ug sa atong mga publikasyon. Nagdepende niana ang atong relasyon kang Jehova ug ang atong paglaom nga mabuhi sa walay kataposan! (1 Tim. 4:15) Ang pipila momatag sayo kada adlaw ug magtuon dihang hilom pa ang palibot ug relaks ang hunahuna. Ang uban mogahin ug pipila ka minuto inigkahapon aron sa pagtuon ug pagpamalandong, sa panahon nga walay makadisturbo nila.

3-4. Unsang mga kausaban ang gihimo maylabot sa gidaghanon sa gitaganang impormasyon, ug ngano?

³ Seguro mouyon ka nga importanteng mangitag panahon sa pagtuon. Pero unsay angay natong tun-an? ‘Daghan kaayog basahonon,’ moingon tingali ka. ‘Dili na nako maato.’ Ang pipila makahigayon sa pagbasa sa tanang publikasyon ug pagtan-aw sa tanang video nga gitagana kanato, pero daghan ang malisdan sa paghimo niini. Nahibalo niana ang Nagamandong  Lawas. Busa di pa dugay, midesisyon sila nga menosan ang gidaghanon sa impormasyon nga atong madawat, inimprenta man o sa internet.

⁴ Pananglitan, wala na ta mag-imprentag Tinuig nga Basahon sa mga Saksi ni Jehova, kay duna nay daghang makapadasig nga mga eksperyensiya diha sa jw.org^® ug sa binulang programa sa JW Broadcasting^®. Ang publikong edisyon sa Bantayanang Torre ug Pagmata! tagtulo na lang ka isyu kada tuig. Kini nga mga kausaban wala himoa aron duna tay dugang panahon sa ubang kalihokan. Gihimo ni aron makapokus ta sa “mas importanteng mga butang.” (Filip. 1:10) Hisgotan nato kon unsaon nimo pagtakdag mga prayoridad ug kon sa unsang paagi makabenepisyo ka pag-ayo sa pagtuon sa Bibliya.

5-6. Unsang mga publikasyon ang paneguroon nato nga matun-an pag-ayo?

⁵ Unsay atong unahog tuon? Kinahanglang mogahin tag panahon kada adlaw sa pagtuon sa Pulong sa Diyos. Gimenosan karon ang gidaghanon sa bersikulo nga gieskedyul para sa senemanang pagbasa sa Bibliya aron duna tay dugang panahon sa pagpamalandong sa atong gibasa ug sa pag-research. Angay nga ang atong tumong, dili lang ang pagbasa sa gieskedyul para nianang semanaha, kondili nga matandog ang atong kasingkasing sa mensahe sa Bibliya ug mas masuod kang Jehova.​—Sal. 19:14.

⁶ Unsa pay angay natong tun-an pag-ayo? Siyempre, mangandam ta para sa Pagtuon sa Bantayanang Torre, Pagtuon sa Kongregasyon sa Bibliya, ug sa ubang bahin sa midweek nga tigom. Angay sab natong basahon ang matag isyu sa Bantayanang Torre ug Pagmata!

7. Angay ba tang mabalaka kon dili nato maato ang tanang materyal diha sa atong website ug sa JW Broadcasting?

⁷ ‘Okey,’ moingon tingali ka, ‘pero komosta ang mga artikulo ug video sa atong website nga jw.org ug ang programa diha sa JW Broadcasting? Daghan kaayo nâ!’ Konsideraha ni nga ilustrasyon: Diha sa restawran nga “eat all you can,” dunay daghang lamian nga pagkaon. Dili gyod matilawan sa mga kustomer ang tanang potahe. Busa mopili lang silag pipila niana. Sa susama, kon dili nimo maato ang tanang materyal diha sa atong website, ayawg kabalaka. Basaha o tan-awa kon unsay imong makaya. Karon, hisgotan nato kon unsay kahulogan sa pagtuon ug kon sa unsang paagi makabenepisyo ta pag-ayo sa atong pagtuon.

8. Unsang mga lakang ang atong himoon dihang magtuon sa Bantayanang Torre? Sa unsang paagi makabenepisyo ka sa pagbuhat niana?

⁸ Ang pagtuon nagpasabot ug pagpokus sa imong gibasa aron duna kay makat-onan. Dili ni dinalidali nga pagbasa sa materyal ug pagbadlis sa mga tubag. Pananglitan, dihang mangandam para sa Pagtuon sa Bantayanang Torre, basaha una ang sumaryo sa sinugdan sa artikulo. Sunod, basaha ug palandonga ang ulohan sa artikulo, apil ang mga sub-ulohan ug repasong mga pangutana. Dayon, basaha pag-ayo ang artikulo. Matikdi ang sentence, o tudling pulong, nga maghatag ug ideya kon unsay gihisgotan sa parapo. Sagad naa ni sa sinugdanan sa matag parapo. Pinaagi niini mahibaloan nimo kon unsang puntoha ang gipatin-aw sa parapo. Samtang basahon nimo ang artikulo, hunahunaa kon unsay koneksiyon sa matag parapo ngadto sa sub-ulohan ug sa katibuk-ang tema sa artikulo. Isulat ang mga pulong  nga wala kaayo nimo masabti ug ang mga punto nga gusto nimong i-research.

9. (a) Nganong angay natong hatagag dakong pagtagad ang mga teksto dihang magtuon ta sa Bantayanang Torre, ug unsaon nato nâ paghimo? (b) Sumala sa Josue 1:8, unsay angay natong buhaton gawas sa pagbasa sa mga teksto?

⁹ Ang Pagtuon sa Bantayanang Torre maoy pagtuon sa Bibliya. Busa, hatagig pagtagad ang mga teksto, ilabina kadtong basahon dihang tun-an sa kongregasyon ang artikulo. Matikdi pag-ayo kon sa unsang paagi ang importanteng mga pulong diha sa teksto mosuportar sa pangunang punto diha sa parapo. Dugang pa, paggahin ug panahon sa pagpamalandong sa mga teksto nga imong gibasa ug kon unsaon nimo ni pagpadapat.​—Basaha ang Josue 1:8.

10. Base sa Hebreohanon 5:14, nganong ang mga ginikanan angayng mogahin ug panahon diha sa ilang pamilyahanong pagsimba sa pagtudlo sa ilang mga anak kon unsaon pagtuon ug pag-research?

¹⁰ Siyempre, gusto sa mga ginikanan nga malingaw ang ilang mga anak sa senemana nga Pamilyahanong Pagsimba. Ang mga ginikanan angayng magplano kon unsay ilang hisgotan sa pamilyahanong pagsimba. Pero, dili kinahanglang mag-organisar sila ug espesyal nga mga kalihokan o makalingawng proyekto kada semana. Tinuod, panahon sa pamilyahanong pagsimba puwedeng motan-awg binulang programa sa JW Broadcasting o usahay maghimog proyekto, sama sa pag-asembol ug model sa arka ni Noe, pero importante sab nga tudloan ang mga anak kon unsaon pagtuon. Pananglitan, kinahanglang makakat-on sila kon unsaon pagpangandam para sa mga tigom o kon unsaon pag-research bahin sa problema nga mitungha sa eskuylahan. (Basaha ang Hebreohanon 5:14.) Kon mogahin silag panahon sa pagtuon diha sa balay, mas sayon nila ang pagpaminaw ug pagsabot sa materyal nga hisgotan diha sa mga tigom, asembliya, ug kombensiyon, nga tingali walay apil nga video. Siyempre, ang gitas-on sa matag pagtuon magdepende sa edad ug personalidad sa mga bata.

11. Nganong importante nga tudloan nato ang atong mga Bible study kon unsaon pagtuon pag-ayo nga silasila ra?

¹¹ Ang atong mga Bible study kinahanglan pong makakat-on kon unsaon pagtuon. Kon bag-o pa silang nagtuon, malipay ta kon badlisan nila ang tubag agig pagpangandam sa ilang pagtuon sa Bibliya o sa mga tigom. Pero, kinahanglan nato silang tudloan kon unsaon pag-research ug pagtuon pag-ayo nga silasila ra. Busa kon motungha ang mga problema, imbes mangutana dayon sila sa mga igsoon kon unsay buhaton, mahibalo na sila kon unsaon pagpangitag impormasyon nga makatabang  nila pinaagi sa pag-research diha sa atong mga publikasyon.

12. Unsay posible natong mga tumong sa pagtuon?

¹² Kon dili ka ganahang magtuon, maghunahuna tingali ka nga dili gyod ka malingaw sa pagtuon. Pero malingaw ka. Sa sinugdan, mubong panahon lang una ang igahin. Dayon, anam-anamig dugang ang panahon nga imong igahin. Paghunahuna ug tumong. Siyempre, panguna natong tumong nga mas masuod kang Jehova. Ang mas dali natong makab-ot nga tumong mao ang pagtubag sa usa ka pangutana bahin sa Bibliya o pag-research bahin sa problema nga atong giatubang.

13. (a) Ipatin-aw ang mga lakang nga puwedeng himoon sa usa ka estudyante sa pagdepensa sa iyang pagtuo. (b) Unsaon nimo pagpadapat ang tambag sa Colosas 4:6?

¹³ Pananglitan, estudyante ka ba? Tingali ang tanan nimong klasmet nagtuo ug ebolusyon. Gusto nimong depensahan ang pagtulon-an sa Bibliya, pero gibati tingali nimo nga dili ka makahimo niana. Busa, kinahanglan kang magtuon! Duha ang imong tumong: (1) aron molig-on ang imong pagtuo nga gilalang sa Diyos ang tanang butang ug (2) aron mouswag ang imong katakos sa pagdepensa sa kamatuoran. (Roma 1:20; 1 Ped. 3:15) Tingali pangutan-on una nimo ang kaugalingon, ‘Nganong nagtuo ug ebolusyon ang akong mga klasmet?’ Dayon pag-research bahin ana diha sa atong mga publikasyon. Maamgohan nimo nga dili ingon ana ka lisod ang pagdepensa sa imong pagtuo. Kadaghanan nagtuo ug ebolusyon tungod lang kay dunay tawo nga gitahod nila nga nag-ingong tinuod nâ. Kon duna kay ikasulti nga usa o duha ka punto, mahimong matubag nimo ang pangutana niadtong sinserong nangita sa kamatuoran.​—Basaha ang Colosas 4:6.

14-16. (a) Kon dili kaayo ka pamilyar sa usa ka basahon sa Bibliya, unsay imong buhaton aron mas masinati niana? (b) Gamit ang gisitar nga mga teksto, ipatin-aw kon sa unsang paagi mas masabtan nimo ang basahon sa Amos. (Tan-awa sab ang kahon nga “ Himoang Buhi ang mga Asoy sa Bibliya.”)

¹⁴ Ibutang ta nga sa sunod nga tigom hisgotan ang basahon nga gisulat sa usa sa gitawag ug mga minor prophet, nga tingali wala kaayo nimo mailhi. Ang unang tikang mao ang pagpauswag sa imong interes bahin sa gisulat sa maong propeta. Unsaon nâ nimo paghimo?

¹⁵ Una, pangutan-a ang imong kaugalingon: ‘Unsay akong nahibaloan bahin sa magsusulat niining basahona? Kinsa siya, tagaasa siya, unsay iyang trabaho?’ Kon mas mailhan nato ang magsusulat, mas masabtan nato kon nganong gigamit niya ang mga pulong o ilustrasyon nga iyang gigamit. Sa imong pagbasa sa Bibliya, pangitag mga pulong nga nagpaila sa personalidad sa magsusulat.

¹⁶ Dayon, makatabang nimo kon imong mahibaloan kon kanus-a gisulat ang maong basahon. Tan-awa lang ang “Listahan sa mga Basahon sa Bibliya” sa likod sa Bag-ong Kalibotang Hubad sa Balaang Kasulatan. Dugang pa, puwede nimong tan-awon ang tsart bahin sa mga propeta ug hari diha sa Apendise A6. Kon bahin sa tagna ang imong gitun-an nga basahon sa Bibliya, mas maayong mahibaloan nimo ang kahimtang sa panahon nga gisulat kana. Unsang daotang mga panghunahuna o buhat ang gustong tul-iron sa maong propeta? Kinsa ang ubang karakter nga buhi niadtong panahona? Aron mas masabtan ang kahimtang, basin kinahanglang basahon nimo ang ubang basahon sa Bibliya. Pananglitan, aron mas masabtan kon unsay nahitabo sa panahon ni propetang Amos, makabenepisyo ka kon imong basahon ang  mga teksto sa 2 Hari ug 2 Cronicas, nga naa sa marginal reference sa Amos 1:1. Puwede sab nimong basahon ang sinulat ni Oseas, nga posibleng buhi sa panahon ni Amos. Kon basahon nimo kining ubang teksto, mas masabtan nimo kon unsay kahimtang sa panahon ni Amos.​—2 Hari 14:25-28; 2 Cron. 26:1-15; Os. 1:1-11; Amos 1:1.

17-18. Gamit ang mga pananglitan sa parapo o ang imong kaugalingong pananglitan, ipakita kon nganong ang paghatag ug pagtagad sa daw gagmayng detalye makahimo sa pagtuon sa Bibliya nga makalingaw.

¹⁷ Kon magbasa tag Bibliya, mas maayo kon duna tay tinguha nga mokat-on ug dugang pa. Ibutang ta nga nagbasa ka sa kapitulo 12 sa Zacarias, nga nagtagna bahin sa kamatayon sa Mesiyas. (Zac. 12:10) Pag-abot sa bersikulo 12, imong nabasa nga “ang banay sa panimalay ni Natan” motiyabaw tungod sa kamatayon sa Mesiyas. Imbes palabyon lang ang maong detalye, pangutan-a una ang kaugalingon: ‘Unsay koneksiyon sa panimalay ni Natan ug sa Mesiyas? Duna bay laing paagi nga mahibalog dugang pa?’ Aw, pag-research. Makita nimo sa marginal reference ang 2 Samuel 5:13, 14, diin imong masayran nga si Natan usa sa mga anak ni Haring David. Gipakita sa laing marginal reference, ang Lucas 3:23, 31, nga si Jesus kaliwat ni Natan pinaagi kang Maria. (Tan-awa ang “Heli,” it-1 p. 1040.) Mainteres dayon ka! Nahibalo ka nga si Jesus gitagna nga maggikan sa panimalay ni David. (Mat. 22:42) Pero kapin sa 20 ang anak nga lalaki ni David. Busa makapahingangha gyod nga partikular nga gihisgotan ni Zacarias ang panimalay ni Natan ingong dunay rason nga motiyabaw tungod sa kamatayon ni Jesus.

¹⁸ Tagda ang laing pananglitan. Sa unang kapitulo sa Lucas, atong mabasa nga ang anghel nga si Gabriel mibisita kang Maria ug nagpahibalo  bahin sa iyang ipanganak: “Siya mahimong bantogan ug tawgong Anak sa Labing Hataas, ug ihatag ni Jehova nga Diyos kaniya ang trono ni David nga iyang amahan. Siya magahari sa panimalay ni Jacob hangtod sa hangtod.” (Luc. 1:32, 33) Tingali mas magpokus ta sa unang bahin sa mensahe ni Gabriel, nga si Jesus tawgong “Anak sa Labing Hataas.” Pero nagtagna sab si Gabriel nga si Jesus “magahari.” Busa pangutan-on nato ang kaugalingon kon unsay posibleng gihunahuna ni Maria dihang gisulti kana ni Gabriel. Naghunahuna kaha siya nga ang gisulti ni Gabriel nagpasabot nga pulihan ni Jesus si Haring Herodes​—o ang usa sa iyang mga manununod—​ingong hari sa Israel? Kon mahimong hari si Jesus, nan, si Maria nga iyang inahan mahimo pong rayna, ug ang ilang pamilya magpuyo sa palasyo. Pero, walay rekord nga nagpakitang misulti si Maria kang Gabriel ug ingon niana; wala pod tay mabasa nga nangayo si Maria ug pinaborang posisyon sa Gingharian, sama sa gibuhat sa duha ka tinun-an ni Jesus. (Mat. 20:20-23) Pinaagi niini nga detalye mas makombinsir ta nga si Maria mapainubsanon gayod!

19-20. Sumala sa Santiago 1:22-25 ug 4:8, unsay atong mga tumong dihang magtuon?

¹⁹ Hinumdoman nato ang atong pangunang tumong sa pagtuon sa Bibliya ug sa atong mga publikasyon​—mahimong mas masuod kang Jehova. Gusto sab natong mas mailhan ang kaugalingon, ‘kon unsa tang matanga sa tawo,’ ug kon unsang mga kausaban ang kinahanglan natong himoon aron malipay ang Diyos. (Basaha ang Santiago 1:22-25; 4:8.) Busa sa matag higayon nga magtuon ta, kinahanglang sugdan nato ni sa pag-ampo, nga mangayo sa balaang espiritu ni Jehova. Hangyoon nato siya nga tabangan ta nga makabenepisyo pag-ayo sa atong gitun-an ug makahimo sa gikinahanglang kausaban.

²⁰ Hinaot kitang tanan mahisama sa matinumanong alagad sa Diyos nga gihisgotan sa salmista: “Ang iyang kalipay anaa sa balaod ni Jehova, ug ginabasa niya ang Iyang balaod sa hinayng tingog adlaw ug gabii. . . . Ang tanan niyang ginahimo magmalamposon.”​—Sal. 1:2, 3.