1-3. Unsa tingaliy hinungdan sa panaglalis ni Euodia ug Sintique, ug sa unsang paagi malikayan kana? (Tan-awa ang hulagway sa sinugdan sa artikulo.)

ANG mga alagad ni Jehova nagpabili pag-ayo sa balaang basahon sa Diyos, ang Bibliya. Kay dili man hingpit, usahay makadawat tag tambag gikan sa Kasulatan. Unsay atong reaksiyon niini? Konsideraha ang unang siglong mga Kristohanon nga si Euodia ug Sintique. Nagkalalis ning duha ka dinihogang sister. Unsay hinungdan? Wala kana hisgoti sa Bibliya. Apan ingong ilustrasyon, ibutang ta nga kini ang nahitabo.

² Hunahunaa nga si Euodia nangimbitar sa pipila ka igsoon sa iyang balay para sa pagpangaon ug pagtapoktapok. Wala maimbitar si Sintique, unya nadunggan niya nga puwerteng lingawa sa mga nangadto. Si Sintique lagmit nakaingon: ‘Di ko katuo nga wala ko imbitaha ni Euodia! Suod man tâ mi.’ Kay nalain, si Sintique naghunahuna nga wala ganahi si Euodia niya ug gilikaylikayan siya niini. Busa si Sintique naghimog iyang tapoktapok ug nangimbitar sa mao rang mga igsoon, gawas kang Euodia! Ang  panaglalis ni Euodia ug Sintique lagmit nakatugaw sa kalinaw sa kongregasyon. Wala maghisgot ang Bibliya kon unsay nahitabo sa ulahi, pero lagmit gipadapat niining mga igsoona ang mahigugmaong tambag ni apostol Pablo.—Filip. 4:2, 3.

³ Ang susamang situwasyon mahitabo usahay sa mga kongregasyon sa katawhan ni Jehova karon. Pero, ang maong mga problema masulbad o malikayan pa gani kon ipadapat nato ang tambag sa Pulong sa Diyos, ang Bibliya. Ug kon gipabilhan nato pag-ayo ang Basahon ni Jehova, magkinabuhi ta uyon sa mga instruksiyon niini.—Sal. 27:11.

4, 5. Unsay tambag sa Pulong sa Diyos bahin sa pagkontrolar sa atong emosyon?

⁴ Lisod kontrolahon ang atong emosyon dihang kita giinsulto o gitratar nga dili patas. Makapaguol kaayo kon kita wala tratarag tarong tungod sa atong rasa, kolor sa panit, o hitsura. Labaw na gyod kon isigkamagtutuo ang mibuhat niana! Makatabang kaha ang Pulong sa Diyos dihang maapektohan ta sa pagkadili-hingpit sa uban?

⁵ Sukad sa sinugdan, nakita na ni Jehova ang pagpakiglabot sa mga tawo sa usag usa. Siya nahibalo sa atong mga emosyon ug binuhatan. Kon anaa ta sa kasuko, tingali may masulti o mabuhat ta nga basolan nato sa ulahi. Maalamon gyod ang pagpadapat sa tambag sa Bibliya nga kontrolahon ang atong pagbati ug likayan nga masuko dayon! (Basaha ang Proverbio 16:32; Ecclesiastes 7:9.) Klaro, kitang tanan kinahanglang maningkamot nga mahimong mas mapinasayloon ug dili sobra ka sensitibo. Importante kaayo kang Jehova ug Jesus ang atong pagkamapinasayloon. (Mat. 6:14, 15) Kinahanglan ba nimong pauswagon ang imong pagkamapinasayloon o pagkontrolar sa emosyon?

6. Nganong angay natong likayan ang pagkamasuk-anon?

⁶ Ang mga tawong dili makakontrolar sa ilang emosyon sagad mahimong masuk-anon. Tungod niana, ang uban dili gustong makig-uban nila. Ang tawong masuk-anon mahimong makaimpluwensiya sa kongregasyon. Sulayan tingali niyang itago ang iyang kasuko o bisan ang iyang pagdumot, pero sa ulahi ang iyang negatibong pagbati “mahikyad diha sa kongregasyon.” (Prov. 26:24-26) Ang mga ansiyano makatabang sa maong indibiduwal aron iyang masabtan nga ang pagkamasuk-anon, pagdumot, ug paghambin ug kayugot maoy mga kinaiya nga dili angay diha sa organisasyon sa Diyos. Klaro kaayo ang giingon sa bililhong Basahon ni Jehova bahin niana. (Lev. 19:17, 18; Roma 3:11-18) Uyon ka ba sa giingon niana?

7, 8. (a) Giunsa paggiya ni Jehova ang yutan-ong bahin sa iyang organisasyon? (b) Unsa ang pipila ka instruksiyon sa Pulong sa Diyos, ug nganong angay natong sundon kana?

⁷ Si Jehova naggiya ug nagpakaon sa yutan-ong bahin sa iyang organisasyon pinaagi sa “matinumanon ug maalamong ulipon” ubos sa pagpanguna ni Kristo, ang “ulo sa kongregasyon.” (Mat. 24:45-47; Efe. 5:23) Sama sa unang siglong nagamandong lawas, kini nga ulipon nagsunod ug nagpabili pag-ayo sa pulong, o mensahe sa Diyos. (Basaha ang 1 Tesalonica 2:13.) Unsa ang pipila ka mapuslanong instruksiyon sa Bibliya?

⁸ Ang Bibliya nagsugo kanato sa pagtambong nga regular sa mga tigom. (Heb. 10:24, 25) Kini nag-awhag nato nga magkahiusa sa pagtulon-an. (1 Cor. 1:10) Giingnan ta sa Pulong sa Diyos nga unahon sa atong kinabuhi ang Gingharian. (Mat. 6:33) Ang Kasulatan nagpasiugda usab sa atong obligasyon ug pribilehiyo sa pagsangyaw sa balay ug  balay, sa publiko, ug sa impormal. (Mat. 28:19, 20; Buh. 5:42; 17:17; 20:20) Ang Basahon sa Diyos nagsugo sa mga ansiyano nga huptang hinlo ang iyang organisasyon. (1 Cor. 5:1-5, 13; 1 Tim. 5:19-21) Ug si Jehova nagsugo nga ang tanan diha sa iyang organisasyon kinahanglang hinlo sa pisikal ug espirituwal.—2 Cor. 7:1.

9. Unsa ang bugtong galamiton nga gigamit sa pagtabang nato nga masabtan ang Pulong sa Diyos?

⁹ Ang pipila naghunahuna nga makasabot sila sa Bibliya nga silasila ra. Pero, si Jesus nagtudlo sa ‘matinumanong ulipon’ aron mahimong bugtong galamiton sa pagtaganag espirituwal nga pagkaon. Sukad sa 1919, ang hinimayang si Jesu-Kristo naggamit sa maong ulipon sa pagtabang sa iyang mga sumusunod nga masabtan ang Basahon sa Diyos ug tumanon ang mga instruksiyon niana. Pinaagi sa pagsunod sa mga instruksiyon sa Bibliya, atong gipalambo ang kahinlo, kalinaw, ug panaghiusa sa kongregasyon. Maayong pangutan-on nato ang kaugalingon, ‘Maunongon ba ko sa galamiton nga gigamit ni Jesus karon?’

10. Giunsa paghubit sa basahon sa Ezequiel ang langitnong bahin sa organisasyon ni Jehova?

¹⁰ Ang sinulat nga Pulong ni Jehova nagtudlo kanato mahitungod sa langitnong bahin sa iyang organisasyon. Pananglitan, si propetang Ezequiel nakadawat ug panan-awon diin ang langitnong bahin sa organisasyon sa Diyos girepresentahan sa langitnong karo. (Ezeq. 1:4-28) Si Jehova nagsakay niini nga karo, ug mopaingon kini bisan asa nga gusto sa iyang espiritu nga moadto. Sa baylo, ang langitnong bahin sa iyang organisasyon makaapektar sa yutan-ong bahin. Nagdagan gayod ang karo! Hunahunaa ang daghang kausaban sa organisasyon sa milabayng dekada—ug hinumdomi nga si Jehova ang nagpaluyo sa maong mga kausaban. Ingon nga si Kristo ug ang balaang mga manulonda hapit nang maglaglag sa daotang kalibotan, ang karo ni Jehova paspas nga nagdagan aron sa pagbindikar sa iyang pagkasoberano ug pagbalaan sa iyang balaang ngalan!

11, 12. Unsa ang pipila ka kalamposan sa organisasyon ni Jehova?

¹¹ Hunahunaa ang nalampos sa yutan-ong bahin sa organisasyon sa Diyos niining kataposang mga adlaw. Konstruksiyon. Gatosan ka boluntaryo ang puliki sa pagtukod sa bag-ong hedkuwarter sa mga Saksi ni Jehova sa Warwick, New York, U.S.A. Ubos sa pagpanguna sa Worldwide Design/Construction Department, libolibong boluntaryo sa tibuok kalibotan ang nagkugi sa pagtukod ug bag-ong mga Kingdom Hall ug dugang mga pasilidad sa sangang buhatan. Mapasalamaton gyod ta sa daghang boluntaryo nga nagkugi pag-ayo niana nga mga proyekto! Hinumdomi nga gipanalanginan ni Jehova ang mga magmamantala sa Gingharian sa tibuok kalibotan kinsa mapaubsanon ug maunongong mihatag ug pinansiyal nga amot kutob sa ilang maarangan aron suportahan ang maong mga proyekto.—Luc. 21:1-4.

 ¹² Edukasyon. Tagda ang lainlaing tunghaan nga nagpasiugda sa edukasyon gikan sa Diyos. (Isa. 2:2, 3) Naa tay Pioneer Service School, School for Kingdom Evangelizers, Gilead School, Bethel Entrants’ School, School for Circuit Overseers and Their Wives, School for Congregation Elders, Kingdom Ministry School, ug School for Branch Committee Members and Their Wives. Gusto gyod ni Jehova nga maedukar ang iyang katawhan! Gipasiugda sab ang edukasyon sa Bibliya diha sa atong website nga jw.org, diin kita dunay mga publikasyon nga nahubad sa gatosan ka pinulongan. Kini dunay seksiyon para sa mga bata, pamilya, ug mga balita. Gigamit ba nimo ang jw.org sa imong ministeryo ug sa pamilyahanong pagsimba?

13. Ingong maunongong mga magsisimba ni Jehova, unsay atong responsabilidad?

¹³ Pribilehiyo gayod nga mahimong bahin sa organisasyon ni Jehova! Kay nahibalo na ta sa mga kinahanglanon ug sukdanan sa Diyos, responsabilidad nato ang pagbuhat sa matarong ug pagdapig sa iyang pagmando. Samtang nagkagrabe ang pagkadaotan niining kalibotana, angay natong ‘dumtan ang daotan,’ sama sa panglantaw ni Jehova. (Sal. 97:10) Dili ta mosundog sa mga dili diyosnon ug moingon: “Ang maayo maoy daotan ug ang daotan maoy maayo.” (Isa. 5:20) Kay gusto natong pahimut-an ang Diyos, naningkamot tang magpabiling hinlo sa pisikal, moral, ug espirituwal. (1 Cor. 6:9-11) Kita nahigugma ug nagsalig kang Jehova, ug kita nagmaunongon kaniya pinaagi sa pagkinabuhi uyon sa iyang mga sukdanan nga nahisulat sa iyang bililhong Basahon. Ug atong gisunod ang maong mga sukdanan diha sa balay, kongregasyon, trabahoan, eskuylahan, ug bisag asa. (Prov. 15:3) Atong konsiderahon ang laing mga paagi sa pagpamatuod sa atong pagkamaunongon sa Diyos.

14. Sa unsang paagi ikapakita sa Kristohanong ginikanan ang pagkamaunongon sa Diyos?

¹⁴ Pagpadakog anak. Mapakita sa Kristohanong mga ginikanan ang ilang pagkamaunongon kang Jehova pinaagi sa pagbansay sa ilang mga anak sumala sa iyang Pulong. Dili sila magpaimpluwensiya sa lokal nga mga kultura bahin sa pagpadakog anak. Dili dalawaton ang espiritu sa kalibotan diha sa Kristohanong panimalay. (Efe. 2:2) Ang Saksi nga amahan dili angayng maghunahuna, ‘Aw, sa among nasod ang mga babaye ang magtudlo sa mga anak.’ Klaro ang giingon sa Bibliya bahin niini: “Mga amahan, . . . magpadayon sa pagmatuto [sa inyong mga anak] sa disiplina ug sa pagdumala-sa-kaisipan [instruksiyon; giya] ni Jehova.” (Efe. 6:4) Gusto sa diyosnong mga amahan ug inahan nga ang ilang anak mahisama kang Samuel, kay si Jehova nag-uban kaniya samtang siya nagdako.—1 Sam. 3:19.

15. Dihang mohimog dagkong desisyon, unsaon nato pagpakita ang atong pagkamaunongon kang Jehova?

¹⁵ Paghimog mga desisyon. Dihang kita mohimog dagkong desisyon sa kinabuhi, ang usa ka paagi nga mapakita nato ang pagkamaunongon sa Diyos mao ang pagpagiya sa iyang sinulat nga Pulong ug organisasyon. Sa pagpakita sa kaimportante sa pagbuhat niana, tagda ang usa ka sensitibong topiko nga nakaapektar sa daghang ginikanan. Naandan sa pipila nga nanarbaho sa abroad ang pagpadala sa ilang bag-ong natawong anak ngadto sa ilang mga paryente sa kaugalingong nasod aron sila makapadayog trabaho ug makatigom. Oo, personal kini nga desisyon, pero angay natong hinumdoman nga manubag kita sa Diyos sa atong mga desisyon. (Basaha ang Roma 14:12.) Maalamon bang mohimog dagkong desisyon bahin sa pamilya ug trabaho nga dili una konsultahon  ang Bibliya? Siyempre dili! Gikinahanglan nato ang tabang sa atong langitnong Amahan kay dili ta makagiya sa atong kaugalingong mga lakang.—Jer. 10:23.

16. Unsang desisyon ang kinahanglang himoon sa usa ka inahan human siya manganak, ug unsay nakatabang niya sa paghimog hustong desisyon?

¹⁶ Usa ka babaye nga nanarbaho sa abroad ang nanganak ug batang lalaki. Ipadala na unta niya kini ngadto sa iyang kaugalingong nasod aron atimanon sa apohan sa bata. Nianang panahona, nasugdan na siyag tuon sa usa ka Saksi ni Jehova. Maayo ang iyang pag-uswag ug iyang nakat-onan ang sugo sa Diyos nga matutuon ang anak sa pagsimba kang Jehova. (Sal. 127:3; Prov. 22:6) Iya kining giampo kang Jehova, ingon sa gitambag sa Bibliya. (Sal. 62:7, 8) Gisulti sab niya kini sa nag-Bible study niya ug ngadto sa uban pa diha sa kongregasyon. Bisan pag gipresyur siya sa iyang mga paryente ug higala nga ipadala ang bata sa apohan niini, nakahukom siyang dili kana husto. Tungod sa pagtabang sa kongregasyon kaniya ug sa iyang anak, nakadayeg pag-ayo ang iyang bana ug midawat kinig pagtuon sa Bibliya ug misugod pagtambong uban niya ug sa ilang anak. Para nimo, gibati kaha niining inahana nga gitubag ni Jehova ang iyang kinasingkasing nga pag-ampo? Seguradong gibati niya kana.

17. Unsang mga instruksiyon ang nadawat nato maylabot sa atong mga Bible study?

¹⁷ Pagsunod sa instruksiyon. Ang usa ka importanteng paagi sa pagpakitag pagkamaunongon sa Diyos mao ang pagsunod sa instruksiyon gikan sa iyang organisasyon. Pananglitan, tagda ang mga sugyot bahin sa atong mga Bible study. Girekomendar nga human maestablisar ang pagtuon gamit ang librong Unsay Tinuod nga Gitudlo sa Bibliya? mogahin tag pipila ka minuto human sa matag pagtuon aron masinati sa Bible study ang atong organisasyon. Mahimo nato ni pinaagi sa pagpatan-aw sa video nga Unsay Ginahimo Diha sa Kingdom Hall? ug sa brosyur nga Kinsay Nagabuhat sa Kabubut-on ni Jehova Karon? Dihang mahumag tuon ang librong Gitudlo sa Bibliya, gisugyot nga ipadayon nato ang pagtuon sa usa ka mauswagong Bible study gamit ang librong Magpabilin Kamo sa Gugma sa Diyos, bisan ganig bawtismado na kini. Ang organisasyon naghatag niini nga mga instruksiyon aron ang bag-ong mga tinun-an mahimong ‘lig-on diha sa pagtuo.’ (Col. 2:7) Gisunod ba nimo ang maong mga sugyot gikan sa organisasyon ni Jehova?

18, 19. Unsa ang pipila ka rason kon nganong angay natong pasalamatan si Jehova?

¹⁸ Daghan kitag rason nga pasalamatan si Jehova! Utang nato niya ang atong kinabuhi—kay kon wala siya, wala tay mahimo o dili ta maglungtad. (Buh. 17:27, 28) Gihatagan ta niyag bililhon kaayong regalo—ang iyang basahon, ang Bibliya. Malipayon nato ning giila ingong mensahe sa Diyos, sama sa pag-ila ug pagdawat sa mga Kristohanon sa Tesalonica niini, ingong pulong sa Diyos.—1 Tes. 2:13.

¹⁹ Kay nabatonan nato ang Pulong sa Diyos, nasuod ta kang Jehova ug nasuod sab siya kanato. (Sant. 4:8) Ang atong langitnong Amahan naghatag natog talagsaong pribilehiyo nga mahimong bahin sa iyang organisasyon. Gipabilhan gyod nato kana nga mga panalangin! Nindot kaayo ang pagpahayag sa salmista niana dihang siya miawit: “Pasalamati ninyo si Jehova, kay siya maayo: Kay ang iyang mahigugmaong-kalulot maoy hangtod sa panahong walay tino.” (Sal. 136:1) Sa Salmo 136, makitag 26 ka beses ang mga pulong “ang iyang mahigugmaong-kalulot maoy hangtod sa panahong walay tino.” Pinaagi sa pagkamaunongon kang Jehova ug sa iyang organisasyon, maeksperyensiyahan nato ang pagkatinuod nianang makapadasig nga mga pulong kay mabuhi ta sa walay kataposan!