1. Unsay epekto kanato sa pag-awit?

USA ka iladong tigkomposog awit ang miingon: “Ang mga pulong makapalihok sa hunahuna. Ang musika makapukaw sa pagbati. Pero pinaagi sa awit, bation nimo ang naa sa imong hunahuna.” Ang kinamaayohang hunahuna nga atong “bation” mao kanang nagpahayag sa atong pagdayeg ug gugma sa atong langitnong Amahan, si Jehova. Maong dili ikatingala nga importanteng bahin sa putling pagsimba ang pag-awit, himoon man nato kini nga nag-inusara o uban sa kongregasyon.

2, 3. (a) Unsa tingaliy hunahuna sa uban bahin sa pag-awit ug kusog diha sa kongregasyon? (b) Unsang mga pangutana ang atong konsiderahon?

² Apan unsay imong hunahuna sa pag-awit ug kusog diha sa kongregasyon? Maulaw ba ka? Sa ubang kultura, ang mga lalaki dili tingali komportableng mokanta sa publiko. Kini nga panghunahuna makaapektar sa tibuok kongregasyon, ilabina kon ang mga nagapanguna magpanuko sa pag-awit o mohimog ubang buluhaton samtang nagkanta ang kongregasyon.​—Sal. 30:12.

³ Kon gihunahuna gyod nato nga bahin sa atong pagsimba ang pag-awit, dili nato gustong mogawas panahon sa kanta o sayloan kanang bahina sa programa. Busa, ang matag usa angayng mangutana sa kaugalingon: ‘Unsay akong panglantaw sa pag-awit panahon sa tigom? Unsay akong buhaton aron dili ko magpanuko sa  pag-awit nga malipayon? Ug unsay akong mahimo aron kinasingkasing kong makaawit?’

4, 5. Sa karaang Israel, unsay mga kahikayan sa pag-awit panahon sa pagsimba?

⁴ Dugay nang gigamit sa matinumanong mga alagad ni Jehova ang musika ingong paagi sa pagdayeg kaniya. Makapainteres nga dihang nagmatinumanon kang Jehova ang mga Israelinhon, ang pag-awit maoy importanteng bahin sa ilang pagsimba. Pananglitan, dihang giandam ni Haring David ang pag-alagad sa templo, iyang giorganisar ang 4,000 ka Levihanon sa pagdayeg kang Jehova pinaagig musika. Ang 288 niini mga “binansay sa awit alang kang Jehova, tanan mga batid.”​—1 Cron. 23:5; 25:7.

⁵ Sa inagurasyon sa templo, may importanteng papel ang musika ug pag-awit. Ang asoy nag-ingon: “Sa dihang ang mga tigtrompeta ug ang mga mag-aawit nagkahiusa sa pagpalanog ug usa ka tingog sa pagdayeg ug pagpasalamat kang Jehova, ug sa dihang ilang gipatugbaw ang tingog uban sa mga trompeta ug sa mga piyangpiyang ug sa mga tulonggon sa awit ug sa pagdayeg kang Jehova, . . . ang balay sa matuod nga Diyos napuno sa himaya ni Jehova.” Makapalig-on gyod sa pagtuo ang maong okasyon!​—2 Cron. 5:13, 14; 7:6.

6. Isaysay ang espesyal nga presentasyon sa pagkanta dihang si Nehemias ang gobernador sa Jerusalem.

⁶ Dihang gipangunahan ni Nehemias ang matinumanong mga Israelinhon sa pagtukod pag-usab sa paril sa Jerusalem, giorganisar sab niya ang mga mag-aawit nga Levihanon nga bug-os giduyogan sa mga tulonggon. Ang espesyal nga presentasyon sa pagkanta nakadugang gayod sa kasadya sa okasyon dihang gidedikar ang nahuman nga paril. Nianang panahona, dihay “duha ka dagkong koro sa pagpasalamat.” Ang duha ka grupo sa mag-aawit naggikan sa magkaatbang nga direksiyon. Dayon, nagtagbo sila sa paril duol sa templo aron mokusog ang ilang pag-awit ug madunggan kini bisan sa layo. (Neh. 12:27, 28, 31, 38, 40, 43) Seguradong nalipay si Jehova nga madunggan ang iyang mga magsisimba nga madasigong nagdayeg kaniya pinaagig awit.

7. Giunsa pagpasiugda ni Jesus ang kaimportante sa pag-awit diha sa Kristohanong pagsimba?

⁷ Dihang natukod ang Kristohanong kongregasyon, ang musika maoy importante gihapong bahin sa tinuod nga pagsimba. Sa labing importanteng gabii sa kasaysayan sa tawo, giapil ni Jesus ang pagkantag mga awit human sugdi ang Panihapon sa Ginoo.​—Basaha ang Mateo 26:30.

8. Sa unsang paagi ang unang siglong mga Kristohanon naghatag ug sumbanan sa pag-awit diha sa pagsimba?

⁸ Ang unang siglong mga Kristohanon naghatag ug sumbanan sa duyog nga pag-awit sa pagdayeg sa Diyos. Bisag sa simpleng mga balay ra sila sagad magtigom, wala kana makapugong nila sa pag-awit nga madasigon kang Jehova. Ubos sa paggiya sa Diyos, si apostol Pablo nag-awhag sa mga igsoon: “Magpadayon sa pagtudlo ug sa pagpahimangno sa usag usa uban ang mga salmo, mga pagdayeg sa Diyos, espirituwal nga mga awit uban ang pagkamadanihon, nga magaawit diha sa inyong mga kasingkasing kang Jehova.” (Col. 3:16) Ang mga kanta sa atong songbook maoy “espirituwal nga mga awit [nga angayng kantahon] uban ang pagkamadanihon.” Bahin kana sa espirituwal nga pagkaon nga gitagana sa “matinumanon ug maalamong ulipon.”​—Mat. 24:45.

9. (a) Unsa tingaliy makapugong sa pipila sa pag-awit nga malipayon diha sa mga tigom ug asembliya? (b) Unsaon nato pag-awit ug mga pagdayeg kang Jehova, ug kinsay angayng manguna niini? (Tan-awa ang hulagway sa sinugdan sa artikulo.)

⁹ Komosta kon dili komon ang pag-awit  diha sa inyong pamilya, kultura, o palibot? Tungod sa modernong teknolohiya, malingaw ka tingaling maminaw sa propesyonal nga mga mag-aawit. Pero basig maulaw o madismayar na hinuon ka kon ikomparar nimo ang imong tingog sa mga mag-aawit diha sa industriya sa musika. Bisan pa niana, dili kana angayng mobabag sa imong responsibilidad sa pag-awit ug mga pagdayeg kang Jehova. Hinuon, ipataas ang imong songbook, ayawg iduko ang ulo, ug kanta nga kinasingkasing! (Esd. 3:11; basaha ang Salmo 147:1.) Sa daghang Kingdom Hall karon, ang liriko sa awit makita diha sa eskrin. Makatabang kini aron makakanta tag kusog. Makapainteres sab nga ang pagkanta sa mga awit sa Gingharian giapil sa leksiyon sa Kingdom Ministry School para sa mga ansiyano. Gipasiugda niini nga angayng manguna ang mga ansiyano sa pag-awit diha sa kongregasyon.

10. Unsay atong hinumdoman kon magpanuko ta sa pag-awit tungod sa kahadlok?

¹⁰ Daghan ang mahadlok moawit ug kusog kay basig molabaw o yabag ang ilang tingog. Pero, angay natong hinumdoman nga dihang mosulti ta, “kitang tanan mangapandol sa makadaghan.” (Sant. 3:2) Bisan pa niana, wala kini magpasabot nga dili na ta makig-estorya. Busa dili nato tugotan nga pugngan ta sa atong dili hingpit nga tingog sa pagdayeg kang Jehova pinaagig awit.

11, 12. Unsay pipila ka sugyot sa pagpauswag sa atong pag-awit?

¹¹ Lagmit magpanuko ta sa pag-awit kay dili ta segurado kon unsaon pagkanta. Pero, puwede natong pauswagon ang atong pag-awit pinaagi sa pagpadapat sa pipila ka simpleng sugyot. *

¹² Mapauswag nimo ang kakusog sa pag-awit pinaagi sa hustong pagginhawa. Sama sa koryente nga mohatag ug enerhiya aron mosiga ang bombilya, ang pagginhawa mohatag  ug puwersa sa tingog dihang ikaw mosulti o moawit. Ang gikusgon sa imong pagkanta kinahanglang parehas o mas kusog pa kay sa imong normal nga pag-estorya. (Tan-awa ang mga sugyot sa Pahimusli ang Edukasyon sa Teokratikanhong Tunghaan sa Ministeryo, panid 181-184, sa sub-ulohang “Ginhawa sa Hustong Paagi.”) Gani, kon bahin sa pag-awit ug mga pagdayeg, ang Kasulatan usahay nag-awhag sa mga magsisimba ni Jehova sa ‘paghugyaw nga malipayon.’​—Sal. 33:1-3.

13. Ipatin-aw kon unsaon pagpauswag ang atong kompiyansa sa pag-awit.

¹³ Sa inyong pamilyahanong pagsimba o bisag ikaw ra, sulayi kini: Pagpilig usa sa imong paboritong mga awit sa atong songbook. Basahag kusog ug may kompiyansa ang liriko. Dayon, gamit ang maong gikusgon sa tingog, litoka ang tanang pulong sa usa ka prase sa usa lang ka pagginhawa. Unya kantaha kana nga prase sa parehong gikusgon. (Isa. 24:14) Ang imong tingog mahimong mas tibuok, ug nindot nâ. Ayawg kahadlok o kaulaw!

14. (a) Nganong ang mas dako nga pagbuka sa baba makatabang sa atong pag-awit? (Tan-awa ang kahong “ Pagpauswag sa Imong Pag-awit.”) (b) Unsang mga sugyot ang nakita nimong makasulbad sa mga problema sa tingog?

¹⁴ Dili ka makaawit ug kusog kon dili nimo bukhon ug tarong ang imong baba. Busa ang laing sugyot mao ang pagbuka sa imong baba nga mas dako kay sa dihang mag-estorya. Unsay imong buhaton kon paminaw nimo hinay o kaha tagning kaayo ang imong tingog? Makakita kag praktikal nga mga sugyot bahin niini sa Pahimusli ang Edukasyon sa Teokratikanhong Tunghaan sa Ministeryo, panid 184, sa kahong “Pagbuntog sa Espesipikong mga Problema.”

15. (a) Unsay gipahibalo niadtong 2016 nga tinuig nga miting? (b) Unsa ang pipila ka rason nga gihimo ang bag-ong songbook?

¹⁵ Niadtong 2016 nga tinuig nga miting sa Watch Tower Bible and Tract Society of Pennsylvania, nalipay ang nanambong dihang gipahibalo ni Brader Stephen Lett, membro sa Nagamandong Lawas, nga hapit  nang gamiton ang bag-ong songbook nga nag-ulohang “Sing Out Joyfully” to Jehovah. Sumala ni Brader Lett, ang usa ka rason nga girebisar ang songbook maoy aron moharmonya kini sa rebisadong New World Translation of the Holy Scriptures. Tungod niini, kinahanglang tangtangon o rebisahon ang mga liriko nga naggamit ug mga ekspresyong dili na makita sa 2013 nga rebisyon sa New World Translation. Dugang pa, giapil sab ang bag-ong mga awit bahin sa atong pagsangyaw ug apresasyon sa lukat. Ug, kay importante mang bahin sa atong pagsimba ang pag-awit, gusto sa Nagamandong Lawas nga maghimog dekalidad nga libro nga parehog hapin sa rebisadong New World Translation.

16, 17. Unsang mga kausaban ang gihimo diha sa bag-ong songbook?

¹⁶ Aron sayon gamiton ang bag-ong songbook nga Malipayong Mag-awit Kang Jehova, ang mga awit gihan-ay sumala sa topiko. Pananglitan, ang unang 12 ka awit naghisgot kang Jehova, ang sunod nga 8 naghisgot kang Jesus ug sa lukat, ug padayon. Kini may listahan sa mga topiko nga mapuslanon kaayo, pananglitan, dihang mopilig awit para sa pakigpulong publiko.

¹⁷ Aron tabangan ang tanan sa pag-awit nga kinasingkasing, ang pipila ka liriko giusab aron mas klaro ang ideya niini ug gitangtang ang mga pulong nga dili na komon karon. Pananglitan, sa Iningles, ang pulong “shall” wala na kaayo gamita karon, busa gipulihan kini. Sa susama, ang ulohang “Hataas-nga-Pailob” giilisan nag “Magpailob,” ug giusab pod ang pipila ka liriko niini. Ug haom lang gyod nga ang ulohang “Bantayi ang Imong Kasingkasing” gipulihag “Bantayan Nato ang Atong Kasingkasing.” Ngano? Daghan sa manambong sa atong mga tigom, asembliya, ug kombensiyon maoy mga bag-ohan, interesado, batan-on, ug mga sister. Mahimong bakikawan sila sa pag-awit niana kay bation nila nga mora silag nanugo. Busa ang ulohan ug liriko giusab.

18. Nganong angay tang mapamilyar sa mga awit sa bag-ong songbook? (Tan-awa ang footnote.)

¹⁸ Daghan sa mga kanta diha sa Malipayong Mag-awit Kang Jehova anaa sa pormang pag-ampo. Pinaagi niining mga awita, mapahayag nimo kang Jehova ang imong pagbati. Ang ubang awit motabang sa “pagdasig [kanato] sa paghigugma ug sa maayong mga buhat.” (Heb. 10:24) Siyempre gusto natong mapamilyar sa musika, tono, ug liriko sa atong mga awit. Mahimo nimo kana pinaagi sa pagpaminaw sa gikanta nga mga bersiyon niini diha sa jw.org. Kon imong praktison kining mga kantaha sa balay, makakat-on ka sa pag-awit niini nga kinasingkasing ug may kompiyansa. *

19. Unsay buhaton sa tanan diha sa kongregasyon aron direktang makaapil sa pagsimba kang Jehova?

¹⁹ Hinumdomi nga importanteng bahin sa atong pagsimba ang pag-awit. Usa kini ka puwersadong paagi sa pagpahayag sa atong gugma ug apresasyon kang Jehova. (Basaha ang Isaias 12:5.) Kon malipayon kang moawit, madasig pod nimo ang uban sa pagkanta nga may kompiyansa. Oo, ang tanan sa kongregasyon​—batan-on, tigulang, ug mga interesado—​makaapil niining direktang pagsimba kang Jehova. Busa ayaw pagpanuko sa pag-awit nga kinasingkasing. Hinunoa, sunda ang klarong instruksiyon sa salmista: “Pag-awit kang Jehova”! Oo, mag-awit nga malipayon!​—Sal. 96:1.